#نـصـيـبـي_فـيـك
الـحـلـقـة الـثـامـنـة
نبيل هو واصحابه عند محمود يلعبو في كارطة نبيل يلعب ورن فونه شاف الرقم ماعرفش
نبيل رد:ايوا
سالمة ساكته
نبيل:الو من امعاي
سالمة:ايوا نبيل
نبيل عرف الصوت صبى وبيطلع من جنب اصحابه
محمود:وين ماشي كمل الطرح
نبيل:اشوي جاني اتصال مهم وطلع
نبيل ركب في سيارته:ايوا سالمة شن اخبارك
سالمة وباين علي صوتها انها كانت تبكي:اكويسه
نبيل:شن فيه سالمة كنه صوتك
سالمة قعدت تبكي
نبيل:سكري خليني انعاودلك ونفهم شن صاير امعاك
سكر امعاها وعاودلها سالمة ردت عليه
نبيل:ها هيا قوليلي شن صاير امعاك
سالمة تبكي:ايخون فيا يانبيل
نبيل:اس بشوية وفهميني شن صار
سالمة:وحكتله اللي صار والكلام اللي حكاه الها وليد
نبيل مصدوم:هذا من جده يحكي
سالمة:اها حتى ان مااحترم مشاعري
نبيل:هدا واحد غبي معقولة ايدير هكي فيك انتي
سالمة قعدت تبكي
نبيل:خلاص اسكتي والله مايستاهل حتى دمعه وحدة من عيونك دموعك اغلى منه وريه انك احسن منه وفوتيه بكل وفيه غيره ايقدرك ويعرف قيمتك اكثر منه
سالمة:نقدرش انسيبه نقدرش انحبه حاسه بنار في قلبي مابتش تطفى بكل
نبيل:للدرجة هذي اتحبيه يعني حتى بعد اللي داره مش قادرة تاخدي قرار انك اتسيبيه
سالمة تبكي:مرات دار هكي لان زاعل مني يعني مرات عشان قصة الشاب وهكي
نبيل:راضية بخيانته لكي
سالمة:قلبي مجروح منه ونار فيه بس مش قادرة نكره ياريته لو حتى قال يحكي مع صاحبه راه صدقته ومادرتش شي او قالي انها بنت ونادم وتأسف كنت سامحته عادي بس هو قهرني بكل
نبيل:يعني لو ايرن ايتأسفلك اتسامحيه عادي
سالمة:مش بيدي انحبه مانقدرش انعيش من دونه
نبيل وقلبه مكسور وكأن سالمه تقتل فيه بكلامها: عمري ماحسدت راجل لكن والله نحسده لانك اتحبيه للدرجة هدي
سالمة:ياريت مقدر الشي هذا
نبيل: نحكيلك كلام وماتزعلي مني
سالمة:احكي
نبيل:انتي االي رخصتي روحك له وحسستيه انك مش قادرة اتعيشي من غيره والشاب فينا لما يلقى بنت هكي معش تفرق امعاه لان عارف لو مهما ايدير اتسامحه
سالمة:وشن بندير معناها
نبيل:بما انك ماتقدري اتسيبه وهالشي صعب عليك مع ان المفروض ان هذا اللي ايسير واتسيبيه بس مانقدر نفرض عليك اديري هكي لكن في شي ثاني وهو انك اتفوتيه واتشعفيه عليها واقفلي فونك وتعالي علي قلبك لان الشباب ايحبو البنت اللي اتحسسهم ان هو مش فارق امعاها ويقعد خايف لان عارف اي غلط منه حتسيب كل شي وراها واتفوته لذلك لازم اتحسسيه ان خسرك ومعش ادوريه الهي روحك بأي شي ومهما طولت المدة حتشوفيه جايك بروحه ويعتذر
سالمة:خايفة ينساني ومعش ايرن عليا
نبيل:لو دار هكي معناها عمره ماحبك وانك تنسيه افضلك
سالمة:خلاص انا تعبت من التفكير وتعبت من الحب
نبيل تنهد:الحب ايتعب وايذل وايخليك ايدير حاجات عمرك ماتخيلت روحك اديرهن لحدت مااتحس انك شخص ثاني
سالمة:صح كلامك جيت عالجرح فعلا الحب ايذل
نبيل:لو نحكيلك كلام عادي تسمعيني
سالمة:اها احكي
نبيل:قبل 3اسنين ماكنتش معترف ان فيه شي اسمه حب خاطي حب هلك كل ماانشوف حد ايحب وايقول امكبد نضحك عليه انقول مش راجل نكذب لو انقولك ماعرفت ولا بنت عرفت بنات يمكن اكثر من شعر راسي فيه اللي دامت علاقتي بيها يوم واحد وفيه اللي دامت اشهور بس كله كلام مافيش وحدة لمست قلبي وكل وحدة نهيت امعاها علاقة كانت بجوي انا فيه اللي لما سيبتها بكت من كل قلبها وهيا تحكيلي ومااثرتش فيا ابدا كنت نضحك عليها انقول تكذب معقوله فيه حد ايتعلق بحد الدرجة يبكي هه لحدت ماجربت الاحساس هذا بروحي حسيت بالنار اللي حسن بيها للدرجة اني انقول مرات اللي صاير امعايا عشمهن فيا توا عرفت الحب وجربت ناره وعذابه والاصعب من الحب بروحه حبك الشخص مش حاس بيك
سالمة حست باالالم اللي في قلب نبيل:مش عارفه شن انقولك بس قلبنا ومشاعرنا هذا شي عمره ماكان بيدنا مش نحنا نقدرو انوجهوهن المكان معين نبيل انا حاسة بيك يمكن فيك شبه من حالتي توا بس انا ماعمري قصدت نجرحك بالعكس انا عارفه اكويس انك شاب محترم وطيب وخلوق وان كل بنت تتمناك وفوق من هذا عارفه انك اتحبني من كل قلبك بس مش بيدي ان عمري مابادلتك نفس الشعور انا اول ماعرفت شي اسمه حب عرفته هو يمكن لو عرفتك قبله ماكنش هكي الوضع بس كلمة وحدة بنقولها لكي انت الشخص الصح في الوقت الغلط
نبيل متكي براسه علي كرسي السيارة ومغمض عيونه:ياريت جيت في الوقت الصح
قعدو سالمة ونبيل ايهدرزو وكل واحد يحكي عالجرح اللي فيه بسبب الحب لين طاب خاطرهم
سالمة:نبيل انا نعست بكل
نبيل:تصبحي علي خير
سالمة:وانت بخير شكرا لانك سمعتني بجد تريحت واجد لما حكيت امعاك
نبيل:العفو وفي اي وقت احتجتي شي او حسيتي روحك بتحكي رني عليا
سالمة:اكيدة وسكرت
نبيل سكر منها وتنهد من وسط قلبه:وياريت انتي تعرفي كيف عذبتيني بكلامك عليه 😔
وولع سيارته وروح للفيلا
"""
في الفيلا وتحديدا في دار نرمين نرمين كانت راقدة وايمان مقمعزة عالكنبة وفاتحة فيس وخاشة علي صفحة نبيل واتشوف في مناشيره اللي كانن كلهن في المعنى يحكن علي سالمة
سمعت صوت سيارة نبيل صبت وشافت من عند الروشن شفاته خش للجنان وقمعز عالكرسي وحط راسه بين ايديه ترددت اشوي وبعدين نزلت
ايمان صبت قدامه;كنك نبيل
نبيل رفع راسه;انتي اللي شن جابك في الوقت هذا ايمان:سمعت صوت سيارتك ولما شفت من الروشن القيتك في الوضع هذا خفت قلت ممكن مريض او شي
نبيل:لا اكويس مافيا شي بس مش جايني نوم قلت نقعد هنا اشوي انتي شن مسهرك لعند توا
ايمان قمعزت عالكرسي:ولا شي ماجاني نوم وكنت فاتحة نت وخاشة علي صفحتك
نبيل;صفحتي وشن تبي فيها
ايمان:كنت انشوف في مناشيرك
نبيل:وعجبوك
ايمان:عجبوني بس لاحظت ان مناشيرك كلهم تقصد بيهم سالمة وهذا ليش عحبوني لان نفس الشي اللي انا حاسه بيه حب من طرف واحد
نبيل:ايمان حكيتلك المرة اللي فاتت وقتلك شيلي الكلام هذا من بالك لان بجد مانبيك تتعبي
ايمان:وليش ماتحكي الشي هذا النفسك وتنسى سالمة واطلعها من راسك
نبيل;انا حاولت وماقدرت
ايمان:وانا زيك حاولت وماقدرت
نبيل معش عرف مايحكي وسكت
ايمان:انت اتحب وحدة قلبها مع غيرك ومش مفكره فيك وانا قاعدة كل يوم نتعذب بحبك ومش قادرة ننساك ليش ماتعطيني فرصة وحدة واتخليني انحبك وانا نوعدك خنخليك تنساها واتحبني بس انت وافق بعلاقة بينا
نبيل بعصبية:الف مرة حكينا في الموضوع هذا وقتلك لا وبعدين من قالك انا نبي ننساها انا نبي نقعد انحبها لعند لما انموت وصبى من جنبها وخش للفيلا
ايمان وادموعها ينزلو:صدقني يانبيل حتحبني حتحبني ومش حتكون الوحدة غيري لو مهما صار
"""
جا صباح ثاني يوم
سالمة اتهجز في روحها عندها محاضرة بتمشي للجامعه كملت وطلعت تفطر مع هلها وبعدين طلعت مع صهيب بيشيلها للجامعه وصلها للجامعه نزلت ولقت مرام حكتلها اللي صار امعاها امس في الليل وقهرتها من وليد
مرام:هاالواطي ماايتحشم علي وجه
سالمة بحزن:خلاص بنموت مش عارفه شن اندير
مرام;رد بالك عاد اترني عليه
سالمة;حتى انا مش رانه لين ايرن هو
مرام;خلاص سيبيه حتي بعد ايرن مااتردي عليه
سالمة:كيف انسيبه والله مش قادرة انحبه افهميني
مرام;شن نفهمك هذا خانك ومازال بتقعدي امعاه
سالمة;اكيد عنده عذر ان دار هكي هو ايحبني انا متاكدة
مرام:بلا كلام زايد مافيش عذر للخيانة ولو ايحبك مستحيل يرضى ايدير هكي
سالمة قعدت تبكي:
مرام:ماتبكيش عشان واحد خوان وبعدين كرامتك فوق منه وسامحيني ياصاحبتي لو رجعتيله بعد كلامه هذا يبقى ماعندك كرامة
سالمة;انتي عارفه ان كرامتي فوق كل شي
مرام:معناها خودي موقف ومعش تقعدي امعاه لو بكالك دم
سالمة:كلامك كله صح لكن
مرام;مافيش لكن كلامي وصلك وعقلك في راسك تعرفي خلاصك وتوا هيا نمشو للقاعة
اشوي وخشن المحاضرتهن قعدن ساعتين وكملت المحاضرة وطلعن
مرام:المحاضرة صعبة اليوم
سالمة:اها القيود واعرات اليوم
وهما قاعدين يحكو عالمحاضرة والشاب اللي تعارك مع سالمة جاهن
الشاب:السلام عليكم
سالمة بخوف;انت شن جاي تبي مني 😕
الشاب:انا ياانسه جاي نعتذر منك
سالمة ومرام بصوت واحد ومصدومات:تعتذر
الشاب:اها انا غلطت في حقك وانتي ماليك علاقة في الموضوع انا اسف وياريت تقبلي اعتذاري
سالمة:قبلت اعتذارك وحصل خير
الشاب جا بيمشي وبعدين رد
الشاب:معليش طلب لو سمحتي
سالمة:تفضل
الشاب:ياريت اتقولي للشاب اللي تعاركت امعاه ان معش يطلع في طريقي لان اللي طلبه مني درته
سالمة;كيف يا خويا مافهمت
الشاب:انتي قوليله ان اللي طلبته درته وهو حيفهم
سالمة;حاظر حنقولها له
الشاب مشى وسالمة مازال مصدومة من كلام
سالمة;حاظر حنقولها له
الشاب مشى وسالمة مازال مصدومة من كلام الشاب وتصرفه
مرام:فهمتي حاجة
سالمة:لا
مرام;انا فهمت الباين ان نبيل مانسش الموضوع وماشي للشاب مرة ثانية واغصبه انه معش ايتعرضلك وان ايجي يعتذرلك
سالمة;معقوله
مرام:قاعدة واضحة بصراحة نبيل كل يوم يكبر في عيني اكثر واكثر
سالمة سكتت:وقعدت اتفكر في الفرق اللي بين نبيل ووليد
وبعد اشوي جاها صهيب وروح بيها ومرام نفس الشي جاها هيثم وروح بيها
""
نبيل في مكتبه في المعرض رن فونه وفرح لما شاف ان اللي رنت هي سالمة
نبيل:هلا وغلا
سالمة:اهلين نبيل شن اخبارك
نبيل;تمام شن اخبارك انتي اليوم
سالمة;اهو الحمدلله من ربي اكويسه
نبيل:اهم شي من ربي اكويسه العبد ماادوريه واجد سالمة:صدقت المهم بنحكلك الشاب جاني اليوم في الجامعة
نبيل بصوت عالي:تعرضلك قالك شي قوليلي توا نمشيله
سالمة;لا بشوية جا يعتذر
نبيل:اها اوكي تمام
سالمة:بس قالي انقولك ان اللي طلبته درته ومعش تطلع في طريقه والحق انا مافهمت شي
نبيل:اها لا ماادوريش موضوع بيني وبينه
سالمة;انت مشيتله اخرى بعد اللي صار في الجامعه
نبيل:فوتي الموضوع خلاص اهم شي ان معش ايتعرضلك توا
سالمة;ياريت تحكيلي يانبيل بجد خاطري نعرف
نبيل:اسمعي مافيش موضوع ان بس حذرته ان معش ايتعرضلك
سالمة;وطلبت منه يعتذر
نبيل:اها وخلاص عاد سكري عالموضوع وقوليلي انتي شن صار امعاك
سالمة:في شنو
نبيل;في موضوع امس
سالمة:اها والله شن انقولك اليوم حكيت مع مرام صاحبتي علي الموضوع وحكتلي كلام فطنتلي الروحي
نبيل:شن حكتلك
سالمة:قالتلي ان كرامتي فوق كل شي وان لو رديت عليه او حكيت امعاه معناها انا ماعندي كرامة ونستاهل اللي ايصير فيا وقالتلي كلمة هزتني من جوا ان الخيانة ماعندها مبرر
نبيل:كلامها صح بس انتي شن قررتي
سالمة:بصراحة اقتنعت بكلامها وقررت اني انسيب وليد ونعفس علي قلبي وانحاول ننساه
نبيل بفرحة:تحكي جد
سالمة بحزن: نحكي جد اصلا انا فكرت اكويس لو سامحته ورضيت بالشي اللي داره حيديرة مره واثنين وعشرة ومعش ايعدل عليا ولا يحترمني
نبيل:هذا هو القرار السليم لان بجد فيه غيره ايتمناك من كل قلبه ويقدر ايحافظ عليك وايقدرك
سالمة:اها المهم توا وقت الغدا وبنسكر رنيت بس عشان نحكيلك عالشاب
نبيل:تمام وصحة مقدما وفي اي وقت تبي حاجة او محتاجة تحكي تقدري اترني عليا
سالمة:سلمك انشاءلله لو احتجت شي انرن عليك سلام
نبيل:سلام
وسكرت سالمة ونبيل كان طاير من الفرحة عشان سالمة قررت اتسيب وليد وحس ان الطريق انفتحت قدامه وان واخيرا سالمة حتكون له ومن نصيبه ورن علي اصحابه كلهم وعزمهم عالغدا يحتفل بالمناسبة هذي لكن طبعا ماحكهش الحد منهم
"""
وليد في داره بيرقد:ياامي انتي ليش ساكنه عالموضوع ام وليد;اولاد عمك انت وهما جاينن في نفس الاسبوع واحد عنده اوليد والثاني بكرا فرحه وانت حتى خطبه ماتبي تخطب
وليد:الف مرة قتلك البنت اللي في راسي مازال ماالقيتها
ام وليد;معناها خليني اندورلك انا
وليد:شن ادوريلي انا اللي بنجوز مش انتو
ام وليد:انا مليت وانا نكذب علي باتك وانقوله البنت اللي يبيها مازال اتكمل في قرايتها لكن دبينه هذا كلامك انا حنقوله ان مافيش بنت ويكذب علينا وخليه ياخدلك بنت عمك
وليد:لا بنت عمي لا شي اطلعو من راسي قتلكم مازال ماالقيت البنت اللي نبيها
ام وليد:اسمع ليا سنتين انساير فيك انا مليت بنفرح بيك وانشوف اعيالك وتوا بنقولك كلمتين عمري ماقلتهم لكي قدامك يومين يا تختار وحدة واتخلينا نخطبوها لكي يا والله نحكي البوك ويخطب بنت عمك وطلعت
وليد بصوت عالي:عليك سكنه قلتلكم مانبيش نجوز وغطى وجه وقعد ايفكر في كلام امه وبعدين رقد
""""
مر اليوم عادي ومافي اي احداث سالمة حاطه فونها في الشحن وامسيبته في الدار وقاعدة برا تقرا في امتحان بكرا كملت اقرايتها وخشت عشان اتجهز لبستها بكرا وترقد جهزت لبستها ووتتها وجت تمددت عالسرير شافت الفونها لقت 10مكالمات ورسائل ولما فتحت عليهم انصدمت لما لقتهم من وليد
سالمة اتفكر اترن وبعدين اذكرت كلام مرام وغيرت رايها والفون مازال في يدها رن لما شافت لقاته وليد سالمة لانها اتحبه فما تحملت اتشوف رقمه ايرن ومااتردش فقررت اترد واتشوفه كنه
سالمة:ايوا شن فيه
وليد;عليش مااترديش
سالمة:وعليش انرد عليك بعد اللي درته
وليد;قصدك كنتي زاعله وماتبيش اتردي
سالمة:مش بس زاعله انا اصلا كنت مقررة معش نحكي امعاك بكل
وليد:شن قصدك بتسيبيني
سالمة:وشن رايك بعد اللي درته حظرتك تبيني نقعد امعاك
وليد:اها تقعدي امعايا انا عارف روحي غلطت في حقك ونادم وانا اسف
سالمة:هه وشن بينفعني ندمك بعد ماحرقت قلبي لو تأسفت من اليوم لعند بكرا مستحيل انسامحك
وليد:شن اندير عشان نرضيك
سالمة:سكر توا ومعش اترن
وليد:لا هدي لا بس عندي شي احسن وايخليك تقبلي اسفي لاني عارف انك اتحبيني
سالمة:مافيش شي ايخليني انسامحك
وليد:بلا طولت كلام بكرا احكي الهلك ان هلي جايين يخطبوكي
سالمة مصدومة😳شنو
#يتبع
الاحداث بدت اتخش في بعضها والجو تعقد اكثر ياترى سالمة حتوافق ولو وافقت شن حتكون ردت فعل نبيل كله حنعرفوه في الحلقة الجاية انتظروني 😍
اسفة لو فيه اخطاء في الأسماء واكيد رأيكم ايهمني 😊😍
اليوم طولت الحلقة زي ماطلبتو مني ونزلتها قبل الوقت المحدد #فانزاتي😍 😊
گـتـابـتـي Koka Saleh😊
منقولة💖
