#نـصـيـبـي_فـيـك
الـحـلـقـة الـسـابـعـة
نبيل انحرج;اسف نحساب نهي بروحها هنا
سالمة وهيا تمسح في ادموعها وبصوت مخنوق من البكي :لا عادي
نبيل انتبه انها تبكي:شن فيك سالمة كنك
سالمة;لا مافيش شي
نبيل سكر الباب:حلفتك بالله اتقولي كنك
سالمة معش قدرت تمسك ادموعها وبدت تبكي
نبيل تلخبط ومعش عرف شن ايدير شاف كاسة مية عالطاوله جابها ومدها الها وقمعز جنبها
نبيل:اشربي مية واهدي وقوليلي كنك
سالمة تشرب في مية وخانقتها العبرة ومعش عرفت تحكي
نبيل:استهدي بالله وقوليلي كنك الشاب ضايقك بشي او اي حاجة صارت في الموضوع هذا
سالمة والعبرة اتشيل فيها واترد:لا😭
نبيل:امالا كنك فهميني
سالمة:من وليد وزادت تبكي
نبيل هنا غمض عيونه بكل حسرة والم ووجعه قلبه:كنه شن دارلك مرة اخرى
سالمة:مافيش اي خوف عليا ولا اهتمام
نبيل:عليش شن صار
سالمة:حكيتله عالقصة اللي صارت امعايا وماعبرش الموضوع بكل وفوق هذا كله طلعني غلطانة وقالي ان الشاب مادار شي غلط والمفروض ماادخلتش ومامسحت صور البنت
نبيل لان ماايحب ايشوف ادموعها ويبيها تسكت وخلاص:ممكن لان ايغير عليك ومايبيك اتعاملي مع الشباب بس
سالمة:لا مش غيرة حتى قتله خايفة الشاب ايرد ايتعرضلي مرة ثانية قالي عادي تحملي نتيجة غلطك وانا مادخلني بيك حتي لو ضربك عندك اهل
نبيل:عادي سالمة فيه شباب واجد ماايحبو المشاكل مش معنى هكي مش مهتم بيك(وطبعا الكلام كان ايقول فيه وهو يتالم ويجرح فيه بس كان يبي ايهديها)
سالمة:بس هو قال ان الشاب امعاه حق واللي داره مش غالط فيه ولو هو مكانه وانا خنته بيديرلي نفس الشي واكثر
نبيل بصدمة:شنو 😳
سالمة تبكي:قهرني كلامه
نبيل قعد يمسح في وجه بيديه وفي قلبه خوف علي سالمة من وليد لان حس بحقارته
نبيل;اهم شي انتي مااتزعلي روحك واكيدة ايقول هكي لان تعقد من الموضوع بس فيه ناس ماتعرف اتعبر اكويس واكيدة في قلبه خايف عليك
سالمة:قولك هكي نبيل
نبيل:اكيدة هكي مستحيل فيه حد في الدنيا ماايحبك وماايخاف عليك اهم شي انتي ديري بنصيحتي معش اترني عليه وخليك واخده موقف وحتشوفي ان حيرن بروحه ويعتذرلك
سالمة:صح درت اليوم بنصيحتك وابروحه رن وقالي ليش مارنيتي
نبيل:ها شفتي مش قتلك خلاص يبقي كملي بيها
سالمة:حاظر
نبيل:ايحظرلك الخير وتوا ترا وريني الابتسامه الحلوة
سالمة ابتسمت:شكرا نبيل
نبيل ابتسم:العفو😊
مع خشت نهى عليهم وانصدمت لما شافتهم
نهى;نبيل شن ادير هنا
نبيل:نحكي مع سالمة في موضوع
نهى:شن الموضوع اللي بينكم تخيل شافكم حد شن بيقول توا
نبيل;نهى مااتكبري الموضوع وانتي عارفه كل شي مافيش داعي اديري قصة
سالمة;نهى مافيش شي انا ونبيل اصدقاء بس وكنت نحكيله في موضوع مضايقني
نبيل:مش داعي اتبرري ياسالمة نهى عارفه كل شي نحنا اصدقاء توا ومافيش اكثر من هكي وطلع
نهى:شكلي زعلته بس انتو شنو الموضوع اللي بينكم
سالمة حكت النهى كل شي ونهى حست بقهرت خوها وقلبه اللي انكسر وحبيبته تحكيله علي حبيبها حست بانها زودتها عليه حتى هيا بكلامها
"""
نبيل خش الداره وقلبه مكسور💔وقعد ايخبط بيده عالساس وايقول ليش اتحبيه الهدرجة ياسالمة ليش مااتحسي بيا انا اللي انحبك والله لو مكانه ماانزل منك ولا دمعة شن فيه بزيادة عني مستحيل يطلع ايحبك اكثر مني مستحيل وقمعز عالارض وحط راسه بين ايديه
"""
نهى معش قدرت اتريح وعرفت ان نبيل زعل مشتله في داره بتشوفه لو قاعد واول مافتحت الدار وخشت انصدمت من شكل نبيل اللي كاين مقمعز عالارض وحالته حاله وباين عليه كسرة قلبه
نهى بصدمة;نبيل ليش قاعد هكي
نبيل:نهى اطلعي وخليني بروحي
نهى خشت وسكرت الباب:شن انخليك ابروحك شوف حالتك ومدتله يدها هيا صبي وصبى امعاها وقمعزو عالسرير
نهى;خلاص نبيل ليش ادير في روحك هذا كله
نبيل:اتحبه اتحبه موت يانهى
نهى:عارفتها بس ليش تحكي امعاها في الموضوع هذا وهو ايضايق فيك
نبيل:لما شفتها تبكي مااقدرتش انتحمل ادموعها جيت علي روحي وسمعت منها
نهى:هكي ححتعب انت بالصداقة هذي
نبيل;انتحمل اهم شي انكون قريب منها
نهى:للدرجة هذي يانبيل اتحبها
نبيل:صعب نوصف حبي الها الحد انحبها انحبها ونبيها من كل قلبي
نهى:ماعنديش ماانقول الا اني ندعيلك ربي يجعلها من نصيبك او ايطلعها ربي من قلبك
نبيل:يارب اجعلها من نصيبي
نهي:خلاص نبيل خش دوش عشان تهدي اشوي وتنزل اتغدى امعانا
نبيل:تمام
نهى طلعت من دار نبيل وهي تدعي في قلبها ان ربي ايريح قلب نبيل من النار اللي فيه
""""
جا وقت الغدا ونزلو تغدو كلهم وبعدين طلعو بياخدو قيلوله
مع العصر سالمة وعت علي رنت فونها شفاته لقاته صهيب
سالمة:ايوا صهيب
صهيب:سومه هيا اطلعي عشان نمشو للحوش انا برا
سالمة:الضي كيف ايصير فيه
صهيب:انا من بدري امروح وجبتله حد صلحة
سالمة;تمام نلبس عبايتي وننزل
صهيب:تمام نرجى فيك
نهى وعت علي صوت سالمة
نهى:كنك شن فيه
سالمة:صهيب برا بنمشي الحوشنا
نهى:يااخسارة قبل غيرتيلنا جو
سالمة تلبس في عبايتها;حتي انا انسجمت امعاكن
نهى صبت سلمت عليها:عاوديها مرة ثانية
سالمة:انشاءلله حتى انتو تعالو زورني في حوشنا
نهى:حاظر
سالمة خلاص بنسلم علي باقي البنات ونطلع الصهيب برا
وطلعت سالمة والبنات كلهن قعدن ايسلمن عليها وطلعن امعاها في الممر وكلهن انسجمن مع سالمة وماكانن يبنها اتروح
نبيل سمع الهرجة وطلع ولقا سالمة لابسة عبايتها
نبيل:بتروحي
سالمة;اها
نبيل:من جاك
سالمة:صهيب
نبيل:تمام
نرمين تثقل علي نبيل:اه بتعدي ياسومة وننحرمو من الشكولاطات والحاجات الحلوة
سالمة تضحك علي كلام نرمين
نبيل:اللي يسمعك ايقول عمري ماجبتلك شي لكن احسابك بعدين ياام السان
وطلعت سالمة وطلعن البنات كلهن امعاها لعند الجنان وامعاهن نبيل
نبيل:هي خلاص خشن ولا بتوصلنها لعند الشارع
نرمين:انت كنك بنطلعو امعاها لعند الباب انوصلوها
نبيل:لا شكرا بارك الله فيك امغير خشي وتريحي انتي انا توا انوصلها
نهى فهمت علي نبيل شكله بيحكي مع سالمة:صح يابنات صدق هيا انخشو نحنا وخشن البنات كلهن الا ايمان طلعت امعاهن وبعدين نزلت بروحها وقعدت اتشوف فيهم من بعيد
نبيل:اتصدقي تعودت عليك هنا
سالمة تضحك:امس كيف جيتكم
نبيل;حسيتها فترة طويلة والله
سالمة سكتت
نبيل:اسمعي رقمي وعندك لو احتجتي اي شي او حد ضايقك واضايقتي وحسيتي روحك بتحكي وبتفضفضي الحد مااتردديش ولا مرة في انك اترني عليا وحتلقيني في اي وقت فاضي ونسمعك
سالمة:انشاءلله
نبيل;تمام وزي مااتفقنا اللي صار ماتحكيه الصهيب
سالمة:حاظر وشكرا علي كل شي درته عشاني
نبيل;شكلك بتزعليني لا شكر لا شي انا اندير في الشي هذا وانا فرحان عشان اندير فيه لكي
سالمة ابتسمت;خلاص نطلعو
نبيل يضحك:حي انسينا صهيب برا
ايمان شافتهم وسمعت كلامهم وحطت يدها علي قلبها ونزلو ادموعها بحسرة
وطلعو الصهيب وركبت سالمة مع صهيب
صهيب:امنور يالشايب علي كل شي درته
نبيل;تسلم نحنا خوت مش بينا
صهيب:اكيدة خوت واعز تبي حاجة توا ياباشا
نبيل:سلامتك
ومشي صهيب الحوشهم وقال السالمة اتغير دبشها وبيمشو للعزا لان بوه رن عليه وقاله اتجو اليوم اتعزو عشان حتى هله بيروحو اليوم
ومشو للعزا وفي الليل روحو كلهم الحوشهم وقعدت سالمة تحكيلهم في كل حاجة صارت امعاها وخوفها بروحها وصهيب حصل هزيبة من باته علي تسييبته السالمة بروحها
""""
مرام قاعدة في دارها وفاتحة نت واتفسفس 😂(يعني فاتحة فيس) اشوي وجتها رسالة عالخاص
مرام خشت شافتها وانصدمت باللي شفاته :حي هذا حسام دازلي السلام عليكم
وطارت من الفرحة وقعدت اتنطر عالسرير وعيونها قلوب وفرحانه 😍اشوي واذكرت هيثم وخافت يسمعها وايجيها قمعزت عالسرير وهيا زي البنية الشاطرة ومسكت فونها ودزت الحسام
مرام;وعليكم السلام
حسام:مرام صح
مرام وقلبها بيطلع من مكانه وايديها يرعشو ومش قادرة حتى تكتب:اها مرام
حسام:عرفت ايميلك من البنات
مرام:اها
حسام;كنك معلقة علي اها شكلك مازلتي منحرجة من اللي صار
مرام:اها
حسام يضحك;😂مرام انتي مستكه المهم اصلا انا جيتك عشان الموضوع هذا
مرام:اي موضوع
حسام:اللي صار يوم البيان بصراحة البنات كلهم كانو قاعدين معش عرفت كيف نتاسف منك بس انقولها لكي توا انا اسف عاللي صار ماكنت نحسابك في الدار
مرام:لا حصل خير عارفه مش قصدك
حسام:معش عرفت نرقد من اليوم هذكي وانا انفكر فيك
مرام:عليش
حسام:اهو هكي قلت ممكن لما نتاسفلك ونحكي امعاك اتخليني نرقد
مرام:دزتله ضحكة 😂
وقعدو ايهدرزو للصبح وحسام انسجم في الهدرزة مع مرام وحتي مرام انسجمت امعاه وانطلقو في الهدرزة وقعدو يتعرفو علي شخصية
مرام:دزتله ضحكة 😂
وقعدو ايهدرزو للصبح وحسام انسجم في الهدرزة مع مرام وحتي مرام انسجمت امعاه وانطلقو في الهدرزة وقعدو يتعرفو علي شخصية بعض
مرام شافت الساعة وكان غالبها النعاس لقتها الساعة4:30 استاذنت منه بترقد برغم ان كان خاطرها تحكي امعاه اكثر لكن النعاس غلب عليها ورقدت وقلبها فرحان واخير الشخص اللي اتحبه وصلت فيه وحست بإهتمام منه
"""
سالمة في دارها تتفرج عالتلفزيون وكل مرة تمسك فونها اتشوف لو فيه مكالمة او رسالة من وليد لكن ماتلقي في شي وتفتح في نت تلقى فيه فاتح ومش معبرها طفت التلفزيون وامتدت علي سريرها ومسكت فونها حطت علي رقم وليد وحاولت اترن وبعدين اذكرت كلام نبيل ونصيحته الها سكرت فونها حطاته جنبها ورقدت
"""
ثاني يوم من الصبح سالمة وعيت علي رنت فونها وكانت مرام وحكتلها اللي صار امعاها امس كله وسالمة فرحتلها من وسط قلبها واخيرا صاحبتها ورفيقت دربها بتفرح زي اي بنت بالحب وتمنتلها ان ايكون من نصيبها واتفقت امعاها سالمة انها بتجيها بعد العصر عشان يقرو الامتحان اللي عندهم بعد بكرا
"""
بعد العصر صهيب شال سالمة المرام عشان يقرن وصلها عند حوش مرام خشت وسلمت علي امها وخشن الدار مرام واول شي مرام ورتها المحادثة اللي بينها وبين حسام وبعدين سالمة حكتلها علي داره وليد وعلي كلامه وحكتلها علي كلام نبيل
مرام:عليك فرق كبير بينهم ياسومة شوفي وليد شن يحكي وشوفي نبيل شن قالك وشن دار عشانك
سالمة بحزن:صاح الفرق واضح بينهم
مرام:عاودي فكري نبيل احسنلك ياسومة
سالمة;ليش مش حاسة بيا يامرام مش بالساهل الكلام هذا انا قلبي مع وليد مش بيدي مش قادرة انتخيل غيره امعايا صح نبيل شاب اكويس وطيب وكل بنت تتمناه لكن والله مش بيدي مااقدرتش انحبه كل تفكري ومشاعري مع وليد صح طبعه صامط ومايهتمش بيا ودائما امهمشني بس الله غالب عليا انحبه ماقدرتش انفكر في غيره
مرام;بس هكي انتي حتتعذبي امعاه وعلي قولت المثل خوذ اللي ايحبك مش اللي انت اتحبه لان اللي ايحبك ايحاول ان ديما يسعدك
سالمة;عارفه الكلام هذا كله بس والله مش بيدي من هذا واتحط في يدها علي قلبها وقعدت تبكي
مرام;خلاص سومة ماتبكيش انا نصحتك بس وخلاص اللي اتريحك ديرها معش انضايقك مرة اخرى عشان خاطري معش تبكي وعطتها مية
سالمة;خلاص مرام قلبي وجعني خلينا نقرو خير
مرام تضحك واتغير في الجو😂:هيا مايلانا شي الا قرايتنا لا رجاله لا هم
سالمة تضحك😂والله صدقتي
وكملن قرايتهن وبعد المغرب سالمة رنت علي صهيب عشان ايجيها ياخدها بعد اشوي صهيب كان عندها سلمت علي مرام وامها وطلعت
سالمة سكنت الصهيب تبي محل مستلزمات تكى بيها خذت اللي تبيه وطلعو وهما في الطريق عجلت صهيب انفلقت نزل وشاف العجلة البديل اللي امعاه لقاها من عدم اهتمامه حتى هيا مفلوقة ومايندري عليها وهو مازال فاتح شنطت السيارة خطم عليه نبيل وشاف صهيب وشاف ان امعاه سالمة وقف سيارته بعيد اشوي لان كان امعاه صاحبه محمود وقاله ماتنزلش (لان كان ايغار علي سالمة)
نبيل نزل الصهيب;كنك شن فيه
صهيب:العجلة انفلقت وحتي البديل القيتها مفلوقة
نبيل:هدا من عدم اهتمامك
صهيب ايحرك في يده علي شعره:سهيت عليها والله
نبيل;مش مشكله حصل خير هيا نزل اختك انوصلوها وبعدين انردو عالسيارة ننفخو العجلة
صهيب:انت امعاك اصحابك عدي وانا توا انكلم واحد من الشلة ايجيني
نبيل:من جدك بتركب اختك مع واحد غريب غير نزلها بس
صهيب:ياراجل والشاب اللي امعاك
نبيل;ماعليك فيه توا ينزل ايرن علي اول حد ايجيه
صهيب; تمام ومشي شور سالمة بينزلها
نبيل مشي شور محمود ;هيا حودة انزل
محمود:عليش ننزل
نبيل;بنوصل هل صهيب الحوشهم
محمود:وشن المشكلة نمشي امعاكم
نبيل:تي شن تمشي امعانا غير انزل بس
محمود:من جدك تحكي
نبيل;والله من جدي بنت تبي تركب امعانا
محمود:شكلها حبيبت القلب صح
نبيل:مش موضوعك هيا انزل ورن علي واحد من الشباب ايجيك
محمود :تم يانبيل اتفوتني في الطريق علي خاطر بنت ماكنش دا العشم
نبيل:ياراجل فكنا من الدراما الزايدة
محمود يضحك:تم ونزل انتلاقو ونتحاسبو يانبولي😂
نبيل:تم 😂
صهيب جاب سالمة وبتركب في السيارة ونبيل قاعد مع محمود قدام السيارة ومخلاش ايلف وجه بكل عشان مايبيش ايشوف سالمة لعند لما ركبت ركب حتى هو للسيارة ووصلو سالمة للحوش وردو شور السيارة
""""
الساعة 2في الليل سالمة اتفكر في وليد وماجاهش النوم فتحت نت مالقتش فاتح قلبها نغزها وحست بشيء غريب حطت علي رقمه بترن عليه ترددت اشوي وبعدين اتصلت وتفاجئت لما لقت رقمه #انتظار سالمة ولعت فيها النار وقعدت اترن وادز في رسائل ووليد مازال انتظار بعد حوالي ربع ساعة وليد رد عليها
سالمة تبكي:مع من تحكي الوقت هذا كله
وليد ببرود;نحكي مع وحدة
سالمة مصدومة:تحكي جد انت
وليد:اها جد
سالمة:وعادي اتقول فيها ليا ومش محترمني ولا محترم مشاعري
وليد:شن بنديرلك مش انتي سألتيني وانا جاوبتك
سالمة;يعني عادي قاعد تحكي مع غيري وانا من امس نرجى في اتصالك
وليد;اسمعي راه توا ماعنديش لكي جو اطلعي من راسي مليت منك راه وسكر وقفل فونه
سالمة قعدت اترن عليه تلقى في فونه مقفل تمت ادز في رسائل وفتحت نت لقاته مش فاتح والنار اللي في قلبها ماطفت وقهرتها كبيرة وتبكي
رنت علي مرام 5مرات مرام راقدة وماردت عليها
سالمة ضاقت بيها الدنيا ومعش عرفت شن ادير وماجاش في بالها الا شخص واحد وهو نبيل وخذت فونها واتصلت بيه
#يتبع
قولكم شن بيصير وهل نبيل حيرد عليها ولا لا وزعما فيه تطور حيصير بعد المكالمة هذي انتظروني في حلقة بكرا عشان نعرفو مع بعضنا 😊
اسفة لو فيه اخطاء في الاسماء 😉
وياريت لو فيه اي حد من الفانز من الغرب ومافهم حاجة يسالني في اي وقت وأكيد رأيكم ايهمني 😍
اسفة عالتأخير بس توا غير كملت كتابة الحلقة اليوم خذتني نومة وماوعيت بدري هذا ليش تأخرت 😊
گـتـابـتـي Koka Saleh😊
منقولة💖
