مهمة حب ( الجزء الثاني من رحم للإيجار) للكاتبه ريحانه الجنه

١٢

اسفة ليكم بس حقيقي تعبانة وكمان جزء من الحلقة اتمسح وللاسف لضيق الوقت كتبت جزء منه . تتعوض الحلقة اللي جاية

(((سلسلة عشق الرجال الجزء الثاني من رحم للإيجار)))

((مهمة حب))
((الحلقة الثانية عشر))
🌹بقلم ريحانة الجنه🌹

في قرية الجونة فادي وصل وسأل علي حلا موجودة ولا لا وعرف انها وصلت وهي والولاد موجودين في   الشاليهات الخاصة بعائلة رعد الحديدي . فادي راح بسرعة ماالقهاش.  راح علي البحر  ولما قرب وشافها هي والولاد قلبه هدي من القلق عليها كان طول الطريق خايف ماتكونش هناك. كانت فكرة انها تكون في مكان بعيد عنه هو مايعرفهوش كانت بتجننه. اتنهد براحة وابتسم هي كانت نايمة علي الشيزلونج. ومغمضة   عنيها وبتسمع اغنية خالته يبتسم اكتر ويتأكد انه عايش جوه قلبها وعقلها . والولاد شافوه بس هو شاورلهم مايتكلموش . قربوا منه براحة وحضنوه وهو قالهم يروحوا يكملوا لعب. وقرب منها وقعد علي الشيزلونج اللي جنبها وهو بيسمع الاغنية ويبتسم.

اغلي الحابيب اللي عن حياتي غايب. لو عدي عمري كله مش هنساه .
  وحياة غالوته قلبي من فراقه دايب. وحشاني دنيا عشت فيها معاه.
مهما في حياتي العمر فات فاكراله اجمل ذكريات جوايا هتعيش بالسنين.

لسة الحنين في القلب ليه ده اللي احنا عشنا ليالي فيه في العمر مايجيش مرتين.

فادي قرب منها وقعد جنبها وباسها من خدها بهدوء وشوق.
فادي : وحششتيني .
حلا فتحت عنيها وبصتله بشوق مش عارفة هي مصدومة من وجوده ولا كانت مشتاقة للمسته. بس كانت زي الغرقان اللي فجأة لقي طوق نجاه.

مهما هقابل بعد منه نااااس كتيرة لسة اللي بينا في قلبي زي زمان. والله  ماليا في الدنيا دي غيره سيرة عمري ماعز عنه روحي كمااااان .
مهما في حياتي العمر فات فاكراله اجمل ذكريات جوايا هتعيش بالسنيييين.

فادي بصلها بحنية : انتي اللي اغلي الحبايب واللي مهما بعدت ساكنة في قلبي هنت عليكي يا حلا خلاص فادي بقي بيهون كدة تبعدي وتسافري خلاص مابقتش الراجل اللي يملي عنيكي يا حلا.

حلا بدموع حطت ايديها علي شفايفه: اياك تقول كدة تاني هو انا عمري شوفت ولا اتمنيت راجل غيرك . انا جنس الرجال ده بالنسبة ليا هو انت . انت وبس يا فادي . بس انا اللي هنت عليك انا اللي طلقتني ورمتني برا حياتك .

فادي باس ايدها : عموك ما هنتي وعمري ما اقدر اخرجك من حياتي . حلا انتي حياتي نفسها مش مجرد زوجة في حياتي . حلا انا بحبك بحبك اوي.

حلا حضنته بقوة وهي بتبكي: وانا بحبك . بحبك اوي يا فادي اوي. وحشني حضنك اوي.

فادي ضمها لحضنه بقوة لدرجة انها حاست انه ممكن يكسر ضلوعها من شدة ضمته.
فادي: اااااااه يا حلا انا كنت زي المجنون من غيرك مش شايف حاجة ولا عارف اعيش. كل ليلة ابص لاوضتنا اللي شافت اجمل ايامنا وللسرير اللي ياما غمضتي فيه في حضني واتوجع علي بعدك . وحشتيني اوي.