MR.FASTERTHANABULLET (published under PHR5511-book content only chap 1 to 9 )

CHAPTER ONE

RED WINE

MAY isang oras nang nakaalis ang mga bagong kasal na sina Miguel at Ciarra patungo sa Baguio para sa isang linggong honeymoon.Ngunit  nag-e-enjoy pa rin si Geneva na makipaghuntahan habang sumisimsim ng red wine sa isa pa nilang kaibigan na si Marcia, na kagaya niya ay single pa rin.

Ah, hindi na pala masasabing single si Marcia. Kumbaga sa status sa Facebook, nakalagay roon na "engaged or "in a relationship with.... " na kaibigan. Iilan na lang silang naiwang mga bisita sa reception na ginanap sa mountain resort na pag-aari ng magkaibigang Miguel at Robin.

Si Robin na kahit may kaumpok din na mga barkada  ay maya-maya naman ang sulyap sa gawi ni Geneva sabay kikindat  sa kanya, flashing his killer smile. Killer smile na nagpakilig at nagpataas sa palda ng mga babae noong  high school pa sila.

Umasim ang mukha ni Geneva nang maalala ang hindi kaaya-ayang sernaryo. Subalit kung makatitig si Robin na may kasamang ibang klaseng ngiti, sino ba ang hindi tatablan? Marahil, may epekto na yata sa kanya ang red wine.  Paano ay kinikilig siya sa tuwing magtatama ang mga mata nila ni Robin. Gusto tuloy niyang batukan ang sarili kung bakit  nakakaramdam ng ganoon.

"Hay naku, malapit na tayong lusubin ng bata-batalyong langgam... ang cheesy naman talaga," nakairap ngunit nambubuskang bulalas ni Marcia.  "Mabuti pa kaya, bilisan na nating ubusin itong red wine at parating na ang sundo ko."

"Cheesy ka dyan," irap ni Geneva,  pilit na pinanormal ang ekspresyon. "Eh, bakit kasi nagpasundo ka sa boyfriend mo? Usapan nating overnight dito, ah, para namang makapag-catch-up tayo. Ang tagal nating hindi nagkita." Nurse si Marcia na nagtatrabaho sa isang hospital sa Dubai. Kasabay nitong nagbakasyon sa Pilipinas ang boyfriend na isang pharmacist sa naturang bansa.

"Hindi ko naman kasi akalain na hindi magtatagal ang lokong iyon sa parents niya sa Cainta. Ayun, sa simbahan pa lang tawag na nang tawag."

"Eh, kayo pala ang dapat ipalapa sa mga langgam ,"muling irap niya. "Hindi pa ba kayo nagkakasawaan, ha? At saka, kelan naman ang weddings bells sa inyo?"

Bumungisngis si Marcia. "E-enjoy-in na muna namin ang  ganitong set-up. Nag-iipon pa kaya wala pa sa plano ang kasal-kasal na 'yan."

"O siya, sasabay na ako sa inyo paluwas. Nagbago na isip ko. Akala ko naman kasi, kasama kitang mag-o-overnight dito kaya napapayag ko sina Mamang na mauna nang bumiyahe pauwi."

Naging apologetic naman ang mukha ni Marcia. "Pasensiya ka na, Bebang. Hindi ko naman kasi akalain na mangungulit na sumunod dito si Alex. Isa pa, bakit ka sasabay sa amin,eh, buti kung pumayag si Robin?"

'Bakit naman hindi papayag? Kaanu-ano ko ba 'yong mokong na iyon?"

Nanunudyo ang ngiti ni Marcia. "Hindi pa ba kayo? Ang cute n'yo ngang tingnan kanina sa wedding ceremony. Ang maid of honor at ang bestman... what a perfect pair!"

Inirapan niya ang kaibigan. "Huwag ka ngang ganyan."

"Sabi ni Ciarra, nanliligaw sa iyo."

"Wala akong balak na sagutin. "

"In your case, mukhang hindi na kailangan ng sagot, kasi tingin ko pa lang MU na kayo ni Robin. May mutual understanding...  Basta iyon na... wala nang pali-paliwanag, wala nang sagot-sagot. After all..." Ang kasunod nitong sinabi ay sa tonong malakas lang sa bulong. Si Robin ang matagal mo ng pantasya. Akala mo siguro nakakalimutan ko  'yong linya mo noong nasa high school pa lang tayo.  Na nirereserba mo ang sarili mo sa nag-iisang lalaki."

Pakiwari ni Geneva, namula ang buong mukha niya sa panunukso ni Marcia. "Ewan ko sa iyo, Marcing. Lasing ka na kung anu-ano na'ng pinagsasabi mo."