اسر:.............
انتى الاحلى
نور:ايه؟
اسر:قصدى الفستان جميل اه حلو اووى
نور:طيب احنا هنعمل ايه انهارده؟
انهارده فى تدريب ولا اجازة؟
اسر:لا هنبدا من بكرة الدروس بعد ما اتعرفتى على علا
بكرة هتبدا معاكى الكورس
نور:طيب يعنى هعمل ايه انا بقى هفضل قاعده فى البيت كده؟
اسر:بقولك ايه؟
انا كنت رايح اتغدى ايه رايك تروحى تتغدى معايا؟
نور:اروح اتغدى معاك؟
مش عارفه؟ بس انا اتكسف اروح انا وانت بس
نور:هتتكسفى من ايه؟ع العموم لو مش عايزة نخرج انا وانتى لوحدنا خلاص اتصل بياسر يجى ويجيب علا معاه ونروح كلنا
نور:ماشى اوكيه
اسر:خلاص ثوانى هتصل اشوف ايه رايه
واتصل بياسر
الو ياسر
ياسر:ايوه يا اسر عامل ايه؟
اسر:الحمد لله
بقولك ؟
ايه رايك تيجى انت وعلا ونروح نتغدى ومعانا نور
ياسر:يا ريت بس مش عارف علا ايه ظروفها ع العموم هكلمها كده وهقولك
اسر:ماشى بس بسرعه يا يسو
وقفل وقال لنور
هيشوف علا وهيكلمنى يا رب تكون فاضيه
نور:عادى ولو مش فاضيه نروح انا وانت بس
فاستغرب اسر وبصلها وهو رافع حواجبه
نروح لوحدنا؟
نور:اه عادى يعنى مش فيها حاجه
ولا انت مش عايز حد يشوفك قاعد مع واحده لوحدكم
اسر:انا اللى مش عايز نخرج لوحدنا؟
نور:اه لو مش عايز خلاص ممكن ناجلها لو هى مش فاضيه
اسر:انا اللى مش عايز؟!!!!!!!!
معاكى حق انا اللى قلتلك هتكسف نخرج لوحدنا صح؟
نور: انا مش عارفه ليه يعنى مع ان الموضوع عادى
اسر:والله انتى بنت مجانين
نور:ايه؟
لا ولا حاجه يعنى عايزة نخرج لوحدنا ولا لازم حد معانا؟
نور:برحتك
اسر:يا اااا ربى لا مش براحتى براحت حضرتك
نور:عادى بالنسبه لى
اسر:طيب كنتى قلتى كده من الاول
واخد الموبايل واتصل بياسر وقاله لو مكنتش كلمت علا خلاص متكلمهاش هروح انا وهى
ياسر:انا كلمتها بس هى مش فاضيه
اسر:طيب خلاص تمام
سلامات انت بقى شوف اللى وراك
ولف لنور وقال
ها هتروحى ولا بعد ما كلمته هتقوليلى لا هتكسف
نور:وهتكسف من ايه؟
لا يلا
اسر:ماشى اتفضلى يا برينسيس
نور:شكرا
ونزلوا ففتح العربيه وقالها
اتفضلى
فركبت معاه قدام وهو لف وركب العربيه وساقها وقالها
تحبى اشغلك حاجه معينه
نور: مش قولت انك مش عندك اغانى
اسر:جبت الاسطوانات بتاعت فارس مخصوص عشانك
نور:طيب ياريت تشغلى اغنية
لوائل جسار
اسر:انتى بتحبى وائل جسار
نور:اه طبعاا بموت فيه
اسر:وانا كمان بحب اسمعه اووى
وكويس عندى اغانى كتير ليه هنا
فشغل اغنية
مهما يقولوا ويعيدوا ويزيدوا
حبنا اكبر من كده
اجمل حاجه فى الحب عذابه حتى ولو هو ابتدى
فقطعته نور وقالت
لا يا ريت تشغل اغنيه
غريبه الناس
اسر:يا ساتر يا رب بقى رايحين نتغدى وتقوليلى غريبة الناس
نور:ا هانا بقى بحب الاغنية دى
اسر:واجيبهالك منين الاغنيه دى بقى
مش معايا لو كنتى قولتى كنت جبتهالك من الشقه
نور:امال ايه عندى اغانى كتير ومش اغانى كتير
اسر:من غير لماضه
اه عندى وبقولك معايا فوق بس مش هنا فى العربيه
وبعدين هى الاغانى خلصت ومش باقى غير دى؟
نور:خلاص خلاص
مش تشغل حاجه احسن
اسر:احسن بردو
وطفى الكاسيت وفضلوا ساكتين طول الطريق ولما وصلوا المطعم نزل اسر وفتحلها الباب فنزلت وهى لسه بتنزل من العربيه شافت معتز ابن خالتها داخل المطعم مع خطيبته ندى فارتبكت جداا ومكنتش عارفه تعمل ايه فى الورطه دى
اسر:اتفضلى ادخلى
فقالت شذى لنفسها
وبعدين فى الورطه دى لو معتز شافنى اكيد هيسلم عليا وساعتها هتكشف وهتبقى مصيبه
طيب وبعدين اعمل ايه؟
انا مش هينفع خاالص ادخل
اسر:انتى واقفه ليه اتفضلى
نور:اتفضل فين؟
اسر:اتفضلى ادخلى المطعم الباب اهوه
نور:مطعم ايه؟ هو احنا هنقعد نتغدى هنا لوحدنا
اسر:................
اه امال احنا جاين ليه؟
نور:لا انا مش كنت اعرف اننا هنيجى نتغدى فى مكان زى ده ولوحدنا
لو كنت اعرف اكيد مش كنت وافقت
اسر:انتى مجنونه ولا عايزة تجننينى
مش احنا اتفقنا وانتى قلتى عادى
نور:اه بس انا مش عاجبنى المكان
اسر:ايه؟
مش عاجبك المكان اولا ده احسن مطعم فى مصر
ثانيا هو انتى دخلتيه عشان تحكمى عليه
نور:ثالثا انا مش مرتحاله وخلاص ع العموم لو عايز تدخله اووى خلاص ادخل انت اتغدى وانا هروح
اسر:والله انا مش عارف انتى عايزة ايه بالظبط
اتفضلى اركبى وقوليلى عايزة تروحى فين وانا اوديكى
نور:عادى اى مكان
اسر:تانى اى مكان
نور:لا المرة دى اى مكان انا موافقه بيه
اسر:وانا هوديكى حته مكان خرافى
ومشيوا بالعربيه ووقف اسر عند مكان رائع وقالها اتفضلى انزلى
المكان ده بقى اكتر مكان بحبه وبحب اكل فيه دايماا
نزلت نور وقالت
اها كده المكان ده حلو اوووى
اسر:طيب كويس انه عاجبك
نور:طيب يلا ندخل بقى عشان واقعه من الجوع
اسر:اتفضلى طيب
ودخلوا المكان وانبهرت جدااا بالمكان وشد لها الكرسى فقعدت وقعد هو كمان وقالها
ها تاخدى ايه ؟
فمسكت المنيو وبتقلب فيه وكانت لسه هتختار
***********
افتكرت انها المفروض بنت شارع مش عارفه حاجه فرمت المنيو وقالت
انا مش فاهمه حاجه خاالص
وبصتله بدلع وقالت
ممكن تطلبلى انت
اسر:................
خلاص
هطلبلك زييى
فندى الجارسون وطلب منه اتنين...............
فقالت نور لنفسها
كويس انا كنت عايزة كده
شكلك بتفهم ف الاكل
اسر:تحبى ايه تحلى؟
نور:اللى انته تطلبه انا هاخده
اسر:خلاص روح انت ولما نخلص اكل هنشوف نحلى بايه
فقعدوا شويه قبل ما يجى الاكل من غير ما يتكلموا ولا كلمه وفجاه طلعت نور بتقول
هو انت بقيت كده ازاى
فاستغرب اسر من السؤال وقال
يعنى ايه بقيت كده ازاى؟
نور:يعنى انت دلوقتى غنى جدااا ورجل اعمال فظيع وانت لسه صغير
مش انت لسه صغير؟
اسر:ههههههههههه
اه لسه صغير
نور:طيب ازاى بقى؟
اسر:بصى يا نور اللى بيحط حاجه ف دماغه ويقرر انه لازم يعمله مهما حصل يبقى هيعمله واهم حاجه الاراده وانك تثقى بقدراتك وساعتها هتحققى اللى يبهر الناس
نور:يعنى ايه مهما حصل؟
يعنى ممكن احقق اللى انا عايزاة حتى لو سلكت طريق غلط يوصلنى ليه؟
اسر:لا طبعااااا مين قال كده بالعكس
انتى لازم تحطى ف دماغك الحاجه وقبل ما تحطيها لازم تحطى ف دماغك انك هتحققيها من غير ما تخلفى ضميرك وتغضبى ربنا عشان ربنا يكرمك فيها
ومهما واجهك من صعاب اوعى تفكرى انك تعملى حاجه مخالفه
نور:................
يعنى كل اللى انت فيه ده بقدراتك بس
اسر:ايه دا ايه دا انتى بتحسدى بقى ولا ايه؟
فابتسمت نور وقالت
لا طبعاا بالعكس انا عايزاك تكون اكتر من كده مش هبقى السيكرتيرة بتاعتك
اسر:اه قولى كده
عشان مصلحطك يعنى
وجيه الاكل وهما بيتكلموا فقالها كلى بقى وقوليلى ايه رايك
فاكلت منه وقالت
اه حلو اووى الاكله دى
اسر:شفتى انا كنت متاكد انها هتعجبك
انا تقريبا كل ما اجى هنا اكلها
وكملوا اكل وخلصوا فقالها
نفكر بقى ناخد ايه تانى؟
نور:لا انا مش هقدر خلينا نمشى بقى
اسر:طيب خلينا قاعدين شويه
نور:لا انا عايزة اروح بقى عايزة ارتاح شويه
اسر:زى ما تحبى اتفضلى
فقاموا وركبوا العربيه وروحوا البيت ونزلوا طلعوا العمارة فقال اسر
اوصلك لحد شقتك فوق وانزل شقتى
نور:لا مش فى داعى انت اكيد تعبت انهارده
اسر:لا عادى وبعدين الشقه سلمتين يعنى اتفضلى
فطلعها شقتها وقالها ارتاحى بقى
ونزل شقته ودخل لملك وسالها عن فارس فقالت
هو قالى انه هيروح يقعد عند صاحبه كريم كذى يوم
اسر:ازاى يعنى هيقعد عنده ويسيبك هنا والله الواد ده
بيستهبل ومعندوش دم
ملك:...........
اسر:انا هتصل اقوله يجى فورااا
ملك:اصل احنا اتخنقنا فهو قال هيسيب البيت عشان ميضايقنيش
اسر:يااااااا على الخناق بتاعكم ده انا مش عارف انتوا كبار ولا لسه اطفال انا مش عارف هتتصرفوا بعقل امتى اما اتصل بالبيه
فاتصل بفارس
الو يا بيه
فارس:ايه الدخله القويه دى يا كبير
اسر:ولا كبير ولا زفت انت فين
فارس:اهدى بس يا برنس وبلاش تعصب نفسك
اسر:فارس بطل برود ورد على قد السؤال
فارس:ماشى يا عم انا عند كريم
اسر:بتعمل ايه عند كريم؟
فارس:هعمل ايه يعنى قاعدين وكمان انا هبات عنده كام يوم كده
اسر:فارس
فارس:نعم
اسر:اتفضل تعالى هنا حالا
فارس:لا انا قاعد هنا كام يوم بقولك
اسر:وانا قلتلك تعالى حالا
وقفل السكه
فارس:هو ايه اصله ده
كريم:ايه يابنى ف ايه
فارس:انا عارف يا عم اسر اتصل ومتنرفز وعايزنى اجى مش عارف انا ايه اللى حصل لكل ده؟
كريم:خلاص روح شوفه عايزك ليه؟
فارس:والله!
انت عايز تخلص منى وخلاص
بس انا بردو مش هنولك اللى انت عايزة انا هنزل اشوفه عايز ايه ع طول وهاجى تانى
يلا اشوفك بالليل
ونزل فارس وراح لاسر واول ما دخل من الشقه لقى اسر مستنيه فى الهول
فراحله وقال
ايه ياعم مالك زهقان عليا كده ليه
ايه اللى حصل؟
اسر:وكمان مش عارف ايه اللى حصل ؟
فارس:صدقنى لو عارف مش هعزة عليك
اسر:تنزل وتروح لصاحبك وتسيب ملك هنا ومش بس كده لا انت كمان عايز تبات كام يوم وكل ده ليه
عشان خناقه عيال بينك وبينها
اطفال انا عايش مع اطفال مش ناس كبار
فارس:انا................
اسر:مش عايز اسمع منك حاجه
اتفضل ادخلها وتتصلحوا معرفش ازاى وتيجى انت وهى هنا عندى وانتوا متصالحين يلا
فارس:اسمع.............
اسر:مش هسمع حاجه قبل ما تتصلحوا اتفضل يلا
فخبط ع الباب ودخلها فكانت قاعده ع المكتب وبتذاكر فشد منها الكتاب وقال
يلا قومى قوليلى انا اسفه يا فارس وانا هسمحك على طول
فبصتله ملك باستغرب وجزء من الاستهزاء ومردتش
فارس:ع العموم انا عارف انك مش هتقدرى على زعلى وانا مقدر ده عشان كده انا قررت انى اسمحك
انتى عارفه قلبى الطيب
ملك:.................
فمسك ايدها وقاومها وقال
ومش بس كده انا عازمك ياستى كمان ع الغدى بره
فى دلع اكتر من كده
ملك:لو سمحت...............
فارس:لو سمحت يا فارس ابعد عنى
والله حفظتها
اصل بصى انا مش هسيبك غير لما نتصالح احنا مش هنفضل كده
وهقعد هنا ف الاوضه معاكى لو عايزة تخلصى منى بقى صالحينى
ملك:والله براحتك اقعد ف الحته اللى انت عايزها
فارس:انا الظاهر دلعتك كتير بس خلاص بقى انا لازم اشد عليكى شويه
ملك:...............
فارس:انا داخل اغير هدومى عايز اخرج والقيكى انتى كمان لبسه عشان نتغدى مع بعض
وجاى يلف عشان يمشى فقال
اه والله يا ملك لو جيت ولقتك لسه ملبستيش
والله لهشيلك لغايه تحت وانتى عارفه انى مجنون واعملها
وخرج من الاوضه فقال اسر
ها ايه الاخبار؟
فارس:والله مش عارف ملك دماغها نشفه وانت عارف بس اعتقد اننا خلاص شبه اصطلحنا وانا هلبس وعازمها ع الغدى
اسر:ايوة كده طيب يلا روح البس
فارس:طيران
فدخل لبس قميس اسود وجرافت سودا وبنطلون اسود وخرج لاسر
ايه رايك ف البرنس اللى قدامك
اسر:اتنيل ولا برنس ولا حاجه
فارس:يا ساتر على الغيرة
اسر:غيرة ايه يابنى
انت ناسى اصحابك اللى بتسهر معاهم كل يوم قالولك ايه
ولا افكرك
فارس:يابنى دول كانو بيجاملوك عشانى بس
اسر:هههههههههههههه اه طبعااااا
فارس:يلا اما اروح اشوف البت دى لبست ولا لسه
اسر:بت؟
ياخى احترمها شويه دى مهما كان بنوته رقيقه وعايزة اللى يدلعها مش يقولها يابت
فارس:ههههههههههههه
خلاص اما اروح اشوف البنوته الرقيقه لبست ولا لا
وخبط عليها الباب فتحت وهى لبسه فستان اسود سواريه طويل وشعرها الطويل الناعم مفرود على ظهرها ومش حاطه مكياج ووشها الصافى الابيض الجميل زى البدر المنور
فانبهر فارس بجمالها ومكنش مصدق نفسه انه شايف ملك قدامه
فارس:انا شكلى هغير رائى فيكى
ملك:ايه؟
فارس:لا ولا حاجه اتفضلى يا اميرة
ملك:اتفضل فين؟
فارس:اتفضلى نخرج!!!!!!!!
ملك:نخرج؟!!!انا وانت؟!!
بس عامر اتصل بيا وعازمنى على العشا وانا مش هقدر ارفضله طلب
فاتغير فارس وبصلها بعصبيه وقال
عامر مين ده اللى هتخرجى معاه؟
ملك:عامر ابن عمى انت نسيت ولا ايه؟
فارس:لا مانسيتش بس احنا مش اتفقنا اننا هنخرج؟
ملك:انت اتفقت لكن انا ماتفقتش مع حد .....
غير عامر
فارس:بس انتى بقى هتتغدى معايا انا
ملك:سورى مش هقدر انا وعدته ولو مش رحت هيزعل
فارس:امممممممممممممم
ماشى يا ملك
اتفضلى انزلى روحيله وابقى سلميلى عليه ما تنسيش
ملك:اكيد هقوله انك بتسلم عليه
فخرجت ملك من الشقه بكل ثقه ونزلت ركبت تاكسى وراحت على المكان اللى كانوا اتفقوا عليه ولما نزلت ملك سمع فارس موبايلها بيرن ف الاوضه فمسكه ولقى عامر اللى بيتصل فرد
الو
عامر:الو
فارس:الو يا عامر ازيك انا فارس
عامر:ا ه ازيك يا فارس عامل ايه؟
فارس:تمام
عامر:هى فين ملك كنت بتصل بيها اشوفها خلصت ولا لا عشان اجى اخدها
فسكت ثانيه فارس وقال
لا معلش والله يا عامر ملك واحده صاحبتها تعبت اووى وراحتلها بسرعه ونسيت الموبايل هنا
واتصلت وقالت اعتزرلك
عامر:بجد طيب مفيش مشكله خليها تتصل بيا لما ترجع
هى مين صاحبتها دى؟
فارس:...........
مش عارف والله اصلها نزلت من غير ما تفهمنا حاجه كانت مخضوضه بقى
عامر:اه طيب سلام عايز حاجه؟
فارس:لا شكرااا
اه صح هو انتوا كنتوا هتتعشوا فين؟
عامر:فى مطعم(,....) ليه فى حاجه؟
فارس:لا ابداا يا ابو على كنت باخد فكرة بالمطاعم ما انت عارف بحتاجهم قد ايه؟
عامر:اه طيب يلا سلام عشان معطلكش
فارس:سلام يا حبيبى
وضحك فارس بصوت عالى
اسر:انت اتجننت يابنى ولا ايه؟
فارس:ههههههههههههه
ولا جنان ولا حاجه انا نازل يا كبير
اسر:رايح فين تانى ماهى فلسعتك
فارس:هههههههههه
ما عاش ولا كان
ونزل فارس بسرعه وركب عربيته
يتبع
