حين يستبد أدم

لقاء

يسعد مساؤكم...صح ماجاوب على تعليقاتكم لان مالحك...بس كلها اقراها...هذا بارت اعتبروه هدية لان مالحكت اليوم...ومن باجر انزل بالليل بارت طويل
...تحياتي
#حين يستبد أدم
همس ليل
البارت العشرين
مر سنة ونص على طلاكي...اخر مرة شفت كرم
جان يوم اجاني للكلية...
بعدها ماشفته...ولا نطرح اسمه بالبيت...
سعاد خابرتني فد يوم...جانت تريد تجي تشوفني
اني اعتذرت منها...كتلها مشغولة
يجوز البعض يشوفهة انانية....
ورب العالمين يسامح....
بس اني حيل أذوني....رغم وكفت وياهم...
ومن شافت اختها ممكن تتاذى...فضلت تظلمني
ولا تأذيها....
هيج شخص مااكدر أمن له بعد....
واكو سبب ثاني...ماردت اي صلة بكرم...
ردت انسى وامحي الصار...
بس اضحك على نفسي...والصار محفور بداخلي
السنة اني رابع...واستاذ حسام دائما يجي علية ويتفكد احوالي شكد كتله ما محتاجة بس اصر بين فترة وفترة يجي يسألني...
ريم اختي ...طلعت وية زوجها للخارج يكملون دراسة...
بقينا اني وسما...سما صارت ثاني قانون...
بس احسها مو ذيج الطفلة الخجولة...
والي ابد ماضم شي علية...
كبرت وصارت ما تلجأ لي بكلشي مثل قبل...
بس احس اكو شي...
لان دائما تنغلق على نفسه...
ومرات اشوفها حزينة...
بيوم وبعد نص السنة...شفت شخص من بعيد
يشبه ايهاب...
بس ما اهتميت...كلت يجوز مجرد شبه...
لحد ما وصل يمي...
ايهاب...السلام عليكم...شلونج ذرى
تفاجأت بيه...وبنفس الوقت خفت لو صاير شي
ذرى...ايهاب...صاير شي
ايهاب...يعني مايصير اجي اتفكد بنت عمي
ذرى...من شوكت هالشي
ايهاب...من زمان...بس خفت لا ترديني
ذرى...لا صدك ايهاب شكو
ايهاب...اعزميني على الاقل على كلاص جاي
ذرى...عندي محاظرات ...و
ايهاب...ذرى...لاتصعبين الموضوع علية اريد منج ربع ساعة مو اكثر
باوعت حولي واني قلقة من جيته ....
ذرى....تعال خلي نكعد بالكافتيريا
رحنا وكعد مقابيلي بعد ماجاب جاي لنا
ذرى...كول ايهاب
شفته ظل ساكت ويباوع على كلاص الجاي
ذرى...عادي احجي صدك مااضربك بالكلاص
ضحك وباوع علية
ايهاب...والله افتقدنا لحجاياتج...تعرفين ذرى ...بيتنا ميت من يوم الصار ...مابي اي ضحكة...
نادرا ما نتلاكنة...ماكو ذيج اللمة على الاكل...
صرنا مثل الغربة...
التفت اباوع من الشباك...
ايهاب....اعرف انتي تأذيتي يمنا ونظلمتي...
بس احنة هم نكلبت حياتنا
ذرى...شلون عمي وعمتي
ايهاب...تعبانين...وابوية صحته حيل تعبت...دائما يصعد سكره
ذرى...ليش
ايهاب....الصار مو شوية...وكرم نادرا مايتواجد بالبيت
واذا موجود ساكت اغلب الوكت...
وابوية يشوفه هالشكل ينقهر حيل...
قاطعته...ايهاب اذا ناوي تحجي عن اخوك...لا تكمل رجاء
ايهاب...لا الموضوع ما يخصه...يخصني
ورجع سكت...
ذرى...يعني شلون راح ابقى اجر الحجي منك جر
تبسم....لا بس مداعرف شلون ابدي
ذرى...بدون مقدمات كول اريد كذا
ايهاب...بدون مقدمات...اريد ازوج سما
التفت عليه بصدمة...وفتحت عيني
ذرى...شنو...شتحجي انتة
ايهاب...صوتج ذرى...قبل ماتكولين اي شي...اني صار ٣ سنوات احبها....
ومستعد لاي شي تريدونه....
هديت شوية بعد الصدمة...وظليت اباوع عليه وهو مرتبك...وهسة فهمت ليش متغيرة سما
ذرى...وهية تعرف
ايهاب...اي ..
ذرى...بس ايهاب...ترة سما فقيرة كلش..ماتكدر تتعايش وياكم....هو اني ماكدرت مو عاد هية
ايهاب...انتي وكرم ظروف زواجكم جانت من البداية غلط...وماحاول واحد بيكم يفهم الثاني...وانجمعت
فوكها هواي تأمرات...
بس اني وسما غير...واحد فاهم الثاني...
ومستعدين لكلشي
ذرى...وكليتها
ايهاب...راح أجر ابغداد لحد ماتخلص....
ذرى...وليش جاي علية ...اذا انتو متفقين على كلشي
ايهاب...هنا المشكلة...مامتفقين هاي قرارات اني ماخذها....
سما اصلا رافضة اتقدم...وتريد تعوفني
ذرى...ليش
ايهاب...علمودج
سكتت ودنكت اخوط بالجاي...ماعرف شنو اجاوبه
ما اكدر اقرر عنها...
وبنفس الوقت اخاف عليها من مجتمعهم ...
ايهاب...هية ماتدري اجيت احجي وياج...
اني جنت مقرر اخليها تخلص كلية...
وينسي الموضوع...بس اكو ولد يريد يجي يتقدم لها
واني اخاف عمي يوافق
ذرى...ابوية مايجبرها ترة
ايهاب...هي قطعت العلاقة بينا...واخاف تسويها شغلة عناد حتة اكطع الامل
ذرى...شوف ايهاب...اذا ترجع علية...اني مستحيل اقبل تروح يمكم....
بس مادام انتو واحد رايد الثاني فما اكدر اوكف بوجهكم....
ايهاب...فهميها هالشي...واني راح اخلي ابوية يجي لعمي....
وكف ...اني ممنون منج وعرفت انتي كلبج جبير
ومراح توكفين ضدنا
سلم وراح...واني بقيت دايخة....
شلون...اذا راحت هناك سما...خلص انساها لان مستحيل يوم اوصل هناك...
وعليش اوصل هية تجينا...
زين شلون تعيش بنصهم....هاي فقيرة مادبرها
اذا ايهاب يحبها راح يوكف وياها ...
جنت اسال نفسي واجاوب...
زين شلون راح اشوفه...هم يصير عندي اتصال وياهم
نقطعت سلسلة افكاري بصوت
حسام..شلونج ذرى
ذرى...اهلا استاذ
حسام...شو ماحظرتي اليوم المحاضرة
ذرى...جان عندي شغلة...هسة اخذها من البنات
حسام...ممكن اعرف منو جان كاعد وياج قبل شوي
تفاجأت من سؤاله ...وكفت واني الم اغراضي
ذرى..استاذ حسام...اصور هالشي ما يخصك
حسام...اسف بس ماجان قصدي ادخل بخصوصياتج
فقط من باب الاطمئنان عليج
ذرى...أطمئن اني جبيرة كفاية حتة اعرف مصلحتي
من رخصتك
عفته ومشيته...هذا شبيه ...شو كام يحشر نفسه
والله يالله...
بيومها من رجعت ...بقيت بحيرة....
اني وافقت من البداية على زواجي لاجل ابوية واخواتي...
يعني اصير هسة انانية وواكف بوجهم...
اعرف ايهاب خوش ولد....بس بداخلي خوفة
رحت لغرفة سما....لكيتها صافنة...من دخلت
مثل الي مسحت عيونها...نقهرت عليها
كعدت يمها على الجرباية...
ذرى...سما حبيبتي...شو ابد صايرة ما تحجيلي مثل قبل
سما...ماكو شي وانتي ملتهية بكليتج
_واذا هالشي مايمنع اسمعج
سكتت ودنكت راسها
ذرى...باعي حبي...اني ماعرف الف وادور...راح احجيلج مباشرة...
موضوعج وية ايهاب مالي علاقة بيه
فتحت عينها علية...مين عرفتي
ذرى...ايهاب اجاني للكلية..وقبل ماتحجين...
الي صار وياي ماله علاقة بيكم
يجوز اتمنى مايصير عندي اتصال بيهم...
بس هذا شي يخصني...مايخصج
ايهاب خوش ولد....بس خلي ابالج...
ترة حياتهم يجوز ماتوالمج
كنت اريد اطلع ...وكمزت شبكتني
سما...ما اريد انتي ضحيتي علمودنا...واجي اني اكسرج
رفعت راسها لي
ذرى...باعي حبي الي سويته جان باختياري...انتو مامسؤولين عنه...
والي تسويه هسة انتي ماراح ينفعني ولا يضرني...
هاي حياتج لازم تبديها صح...لا تخلين الخواطر للاخرين بيها....
بعد كم يوم صاحني ابوية...وسألني
لان ايهاب جاي عليه...كتله الموضوع مايخصني
وهاي حياتهم...
امي اعترضت ...كتله ايهاب خوش ولد
وعدت نفسي من اجاوز المي اسالها...
ليش جانت رافضة كرم....
******
ايهاب....
من يوم شفت سما وتعلك كلبي بيها...
وجنت ناوي بس تخلص سادس اتقدم لها ....
بس الي صار بين كرم وذرى...
غير كل مخططاتي...
ردت انسحب من الموضوع...بس لكيت نفسي اترقب معدلها...
واتابع قبولها وكل مرة اكول هاي اخر مرة وبعد مالي شغلة...
لحد ماداومت بالكلية...لكيت نفسي رايح لها
جنت اكول وية نفسي...بنت عمي واشوف اخبارها
لكن من شفتها ضاعت قراراتي هباء
بقيت دائما اروحلها واتفقد احوالها...يوم عن يوم
اتعلق بيها اكثر...
لحد ما اجى يوم طكت روحي وصارحتها...
لكيت اجابة منها...
بس جانت مترددة علمود شغلة ذرى
فاتفقت وياها تخلص كلية يلا...
حتة الموضوع ينسي...بس قبل مدة عرفت اكو ولد
يريد يتقدم لها...
كتلها خلي اتقدملج ما نبقى هيج...
خاف مرة عمي يقبل...
رفضت...وبعد مالحيت عليها...
قطعت العلاقة...وكالت ماكدر اشوفها صعبة على ذرى
رحت لذرى فهمتها...
وبعدها رحت لعمي.....
بس من رجعتلي خبر سما...
اجيت ابلغ اهلي بقيت حاير شلون راح اكول لكرم
بوقتها عذرت سما...
اخر شي قررت احجي وياه قبل ما احجي وية ابوية
اكيد الكاه كاعد بمكانه المعتاد ...
وفعلا جان مخلي كرسي جوة نخلات...
هذا المكان جان مسوي لجدي...
ايهاب...السلام عليكم
اتنبه لي من صفنته..وعليكم السلام...
كعدت يمه....
كرم...كول خوية شعندك
ايهاب...جاي اكعد يمك
كرم...صار هواي مامسويها شعجب هسة
ايهاب...كرم خوية انتة عزلت نفسك...طول اليوم شغل بشغل...
ومن تجي تالي الليل...راسا تصعد تنام
كرم...وهالشغل والكيعان منو يراقبها...
ايهاب...وياك بس قبل عندك وكت تكعد ويانة...تسولف ...هسة نادر ماتسويها
سكت وعيونه جانت سارحة....
كرم...هسة ما كلت شنو محتاج
ايهاب...محتاج وكفتك وياي
كرم...سما
فاجأني...من كال هيج
ايهاب...شمدريك
كرم....روح بفالك خوية...والنعم من اختيارك
ايهاب...بس مايصير على خاطرك مني
كرم...خوية العشك لا بيدي ولا بيدك...
هذا ابتلاء من ربك...وكل واحد ونصيبه
بوقتها حسيت بجرحه عميق...بس عمره ماشكى
اتفقنا ورحنا دانخطب ...
والحمد لله قرينا الفاتحة....
*****
ذرى....
امي اشترطت يجي لبغداد...
وصار الاتفاق وياه على هالشي...
ومن رادوا يشترون النيشان...اجت سعاد
بس ماشفتها....
لان مانزلت...رغم ما سالت علية...
وخلصوا اجراءات بسرعة...وعقدوا محكمة
جان يريد على العطلة ياجرون ويزوجون
اليوم جانت كعدة المهر مالتهم....
لبست فستان اسود مضلع بماروني...
مصبوب على الجسم...وخليت مكياج قوي
وبقيت لابسة الحجاب ...
لان اكيد ايهاب يدخل...
قبل مايجون ردت ابينلها اني ماضايجة ركصت
وياها...
واشاقيت...بس من سمعت صوت الهورنات مال سيارتهم...
ماعرف شصار بية....
هية جلبت بيدي...فبقيت واكفة...لحد ماطبوا وهوسوا...ودخل ايهاب كعد يمها
شفت سعاد تباوع علية بس تجاهلتها
من صارت هوسة والصالة صغيرة...
طلعت للهول الداخلي....
جانوا الكل بالحفلة لان بدة يلبسها ذهب
سمعت صوت بالممر...
رحت داشوف منو ..تفاجأت بكرم كدامي
********
كرم....
رحنا لبيت عمي نخطب لايهاب...
واحنة كاعدين وية كل فتحت باب
عيني عليه تصير...ردت المحها بس
اخر مرة شفتها من رحت للكلية عليهة
بيومها عرفت اني خسرتها.....
وحسيت شكد صعب كسرت الخاطر...
من رجعت من يمها...
جان اكو وجع بداخلي ...
لو وجع مرض.. اروح دكتور واداويه...
بس وجع بكلبي...مايكدر اي دكتور يعالجه
بقيت بعدها اشغل نفسي بالشغل ....
ونهار يأخذني وليل يرجعني....
شكد حاول ابوية يقنعني ازوج...
لكن مالي نفس بأي مرة....
مرات من الذكريات تاخذني لايامنا
ومن يطك كلبي الشوك...
افتح المجر واطلع ظفيرتها...
وابقى اذكر شلون جانت تمشط شعرها....
خلصنا قراية الفاتحة وطلعنا وماشفت٩ها....
وبيوم المهر...لمحتها واكفة يم اختها من دخل ايهاب
رف كلبي عليها....
بقوا ولد عمنا برة...لان بيت عمي صغير...
واني دخلت للممر الي يربط الباب الخارجي بالمطبخ...
وية دخلتي صارت بوجهي...
بقت واكفة بمكانها...تقدمت وكفت مقابيلها
جانت طالعة تخبل...الفستان مصبوب عليها...
ضعفانة بس لايكللها....
جانت عيني بعينها...
كرم....شلونج ذرى
ذرى...الحمد لله بخير
كرم...دوم يارب....السنة تخرجج
هزت براسها....
جنت اتمنى اظل احجي وياها...وابقى اتأمل بملامحها....
اخزن ذكريات لسهر ليلي...
ذرى...من رخصتك...
بس ماحسيت من مشت مديت ايدي ولزمت ايدها
التفت متفاجأة...
جانت ايدي دافية...وايدها باردة....
ذرى...كرم...هد ايدي...مايصير هيج
كرم...هو شنو المايصير...
جانت تحاول تسحب ايدها...
واني مجلب بيها...مثل غركان مجلب بقشة تنقذه
ذرى....شتريد كرم
كرم...ما اريد بس كلبي الييمج
ذرى...كلبك عندك عمره ماجان يمي
سمعنا صوت امها هديت ايدها...
وبلحظة اختفت...عبالك حلم جنت عايشه
رجعت للبيت....
ماجنت محسب حساب من اشوفها تهيج
كل مواجعي....
طلعت للمكاني المعتاد واني اباوع للسما...
ربي لو تهديها علية...
لو تشيلها من كلبي ...
وللحكاية تكملة