حين يستبد أدم

افكار مشوشة

#حين يستبد أدم
همس ليل
البارت الحادي عشر
اعصابي جانت تفور ...وايدي كامت ترجف من نزلت من السيارة ...
حاولت اسيطر على نفسي...
دخلت للبيت واهلي جانوا منجمعين بالحديقة ...
لان صار وكت العصر...
رحت مباشرة للغرفة...لكيت ذرى نايمة
كعدت على الجرباية واني اباوع عليا.....واحجي وية نفسي...
معقولة يطلع هيج منج...ليش...
جنت اتمنى من كلبي مو هية.....
_ذرى ..اكعدي....ذرى
فتحت عينها تباوع علية
_كعدي اريد احجي وياج
كعدت لحيلها...نعم شصاير....
جانت عيون كرم تنكط عصبية...ماعرف ليش خفت منه اول مرة
خله كدامي جيس ادوية ...هاي الادوية الي كتبتها الدكتورة بوقتها ...كلها جنتي تاخذيها
_اي مو انتة بنفسك جبتها من الصيدلية
_افتحيها وكلبيها....
فتحتها وكامت تكلب بيها ...ماعرف هواي بالادوية ...بس هية
_يعني شلون ماتعرفين بادوية صار ٣ اسابيع تاخذيها
_اقصد مامركزة بيها...هسة شنو الموضوع
_وهذا شريط الحب
اخذتها كلبت بيه...ماعرف اصور مو ضمن العلاج
فارت اعصابي...جواباتها متضاربة
_يعني شلون ماتعرفين بأدويتج وشلون عرفتي هالدوة
_كرم لوين تريد توصل
_اريد اعرف هذا الدوة مين جبتي...وليش مخليته على صفحة
وكف كرم اثناء ماديحجي...حسيته متوتر...وبدت عصبيته تظهر..
_هو شنو هذا الدوة
_قبل ما اجاوبج...بعد مارحنا للدكتورة مو كالت الطفل كل زين...سويتي شي...شلتي ثكل
_لا اصلا ام خضير اغلب الشغل تسوي...هسة فهمني
شمر الحب على الجرباية كدامي...
_هذا الدوة خانم...مال اسقاط
شهكت ....وباوعت على الحب...
_انتة شدحجي...شلون تنطيني الدكتورة هيج حب
_ما منطيتج هية
_لعد مين اجة
_اني داسالج
صفنت بوجهه من وكف مقابيلي واني كاعدة على الجرباية...
وهسة يلا طخت عندي...راسا وكفت
_شنو قصدك...لا يكون ابالك اني اخذته حتة اسقط نفسي
_هسة كوللي شلون اجة بالمجر مالتج...ومأخوذو منه ٣ حبايات ...
قابل احد شربج بدون ماتدرين
ظليت اباوع عليه...واني ماداصدك الي يكوله
لساني عجز...ماكو كلمات تقبل تطلع ...
صح مامسويتها...بس ماعرف شلون اجة بمجري
_جاوبيني...صاح بية ...
_شجاوبك...انتة مصدك نفسك ممكن اطرح ابني
_اقنعيني...منو ينظف الغرفة غيرج
_بس اني
_عندج عداوة وية احد من الي حواليج
_هو اني طابة طالعة...حتة تصير عندي عداوة
ضرب الكنتور بيده بوكسي...شلون لعد ...فهميني
جانت واكفة صافنة بوجهي...مانطتني عذر واحد
وبكل دقيقة اعصابي تفور اكثر
_ذرى ...احجي فهميني
رفع صوته....واني ماعندي جواب له...لا اعرف الحب مين...ولا منو ممكن يخليه لي...لان فعلا بس اني اصعد للغرفة
_يعني شفهمك...اذا اني ما فاهمة
_انطيني سبب يقنعني مو انتي سقطي نفسج
هنا ثارت اعصابي ونرفع صوتي...
_شنو...انتة اكيد تخبلت...
بعدني مامكملة جملتي...طفر يمي..وجرني من ايدي
_لسانج الزمي ولا تجاوزين...داحاول اسيطر على اعصابي...واقنع نفسي مو انتي مسويته
عيونه حمر من العصبية ...وجان يكز على سنونه من يحجي...حسيته كوة لازم نفسه
_شسوي ...ليش شنو شايفيني كدامك...حتة الحيوان مايسويها...
_انتي نفسج كلتي ما اريد هذا الطفل...شنو ردتي تحركين كلبي بسوايتج هاي
_كلتها بلحظة عصبية...
_اني هم جنت عصبي ...ليش ما حجيت مثلج
_انتة بس تريد حجة علية...ماتحتاج ...خلص الي يربطنا راح
فلتت من جوة ايده وفتحت الكنتور..واني كلبي ينزف من اتهامه
رجعني جرني بقوة...شنو ماصدكتي...هالشي مو يثبت انتي سويتها حتة تتخلصين
_وليش مايكون انتة انطتني الحب..حتة ترجع لحبيبتك
ماحسيت الا راشدي اجاني على وجهي يهف..
ورجع جرني من شعري...
_لج اني رجال...مو عار حتة اسقط مرتي...اذا اريد ازوج مااحتاج سبب
جان يجر بشعري حيل...وهو يحجي
_الرجال الصدك...مايستقوي على مرة
رجع ضربني راشدي بس هالمرة جان اقوى لان لازمني من شعري...
وحسيت شفتي انشكت...لان الضربة اجت على حلكي
_رجال غصب عليج...والنسوان مثلج ماينفع التعامل وياهة الا هيج...
دفعني على الجرباية...وطلع
جانت شفتي تجرني دم..بس ما طلعت دمعة لي...
جان جرح كرامتي اكبر...
بلحظتها حسيت بذلة...
جنت اتمنة اني رجال واتواجه وياه...
جريت كلينس اخليه على شفتي...
شوي واندك الباب.. وانفتح...
سعاد....ذرى...
سكتت...وهية تباوع علية...
ذرى....شنو احجي اكو اتهام ثاني
سعاد...ايهاب جوة ينتظرج حتة يوصلج لاهلج
عافتني ونزلت...
كعدت على الجرباية...شكد انسان مستبد...حتى بهاي منطاني مجال ابادر
هو طردني...حزت بنفسي...اني بكل الاحوال جنت ناوية ما ابقى...
بس ردت تطلع مني ...مو منه..
فتحت الكنتور...ولميت ملابس بجنطة...
لبست جبتي وكفت اريد البس شالي..
شفت شفتي شلون ورامة...هاي ثاني مرة
دارفع ضفيرتي ...واذكرت حجايته...
فتحت المجر وجريت المكص...
كصيتها من فوك...ردت احرك كلبه..
خليتها على الجرباية...
نزلت...تلكاني عمي...
_بوية شنو الصار
_عمي اسال ابنك
عفتهم وطلعت...ركبت وية ايهاب
بقى ساكت واني خالة راسي على الجامة...
بس حسيت بدوخة صار اربع ايام من طرحت
صحتي بعدها تعبانة...
ظليت ادعي اوصل لاهلي ماريد يوصله خبر اني تخربطت...
جان الوكت المغرب ودخلت بغداد صعبة سيطرات...وازدحامات...
لحد ماوصلت روحي لابت...
بالطريق...ايهاب حاجاني...ذرى شنو الي صار
_اسال اخوك
_كرم طلع وهو عصبي ماينجرع...
بس كال وصلها...ومحد كدر يحاجيه
_اخوك انسان مستبد وظالم...
عرف ما اريد احجي...سكت ...من وصلنا
ردت انزل ماكدرت ...روحي ماعت...ركض ايهاب دك باب اهلي...
طلعت سما .....من شافت وضعي اجت تركض وهية تصيح على امي...
ايهاب ما قبل انزل...كال ناخذها للمستشفى
ودوني للدكتورة قريبة...امي وايهاب..
_بنتي ضعطج هابط...وانتي تكولين طارحة وجان عندج نزف ...يعني اكيد فقر دم عندج...
غير هسة هم عندج نزف...شايلة شي
_لا دكتورة..
بس بداخلي عرفت من الهبطة ...
طلعت بعد ماكتبتلي على مغذي...رجعنا ايهاب للبيت
لكينة بابا هستوة جاي تلكانة...يسال شنو الموضوع
ايهاب ماجاوبه...واني جنت مابية حيل اشرح
خابروا ريم ترجع حتة تشكلي المغذي...
ابوية جلب بايهاب حتة يبقى مقبل
رجعت لغرفتي...بيها احس بالامان...
********
كرم...طلعت واني شايط ...جنت احاول اجذب كلشي واصدكها...بس مانطتني عذر واحد
وتجاوزت هواي...
فكري جان مشوش...بس حسيت ما اريد اشوفها بعد...
جنت مسوي غرفة مثل الاسطبل...ومخلي بيها حصان...
لان احب الخيل...وجان عندي صديق عدهم مزرعة جبيرة...من نروح بيها تعلمت على ركوب الخيل ...واشتريت منه حصان
وصلت يمه...بس ما جان الي واهس اركبه..
عفت ورحت امشي للبستان...
اريد افكر بس عبالك دماغي قفل...
كعدت بعد ما تعبت من التفكير...وحسيت راسي رح ينفجر...
جانت العصبية عاميتني ....ماوصلت لحل...
رجعت للبيت...وابوية تلكاني..
_بوية شنو الموضوع...غير تفهمنا...لو انتة مالك جبير صاير
_لا يابة...شلون تكول هيج...خلني ارتاح واكولك
صعدت لغرفتي....اول ما اطب تصير الجرباية بوجهي...
شفت شي غريب عليها..تقدمت وتفاجأت من شفت
ضفيرة ....عرفتها هاي ضفيرتهة
كعدت يمها بدون ما امد ايدي عليها..
فوك كل الي صار...عرفت شلون تجوي كلبي..
وتقهرني...
تمددت على الجرباية...وخليت ايدي على عيوني
اني شنو الي سويته....ليش هيج اتعاقب واتعذب
خلصت عمري من صغير لحد ماكبرت اشتغل وية ابوية وجدي بالكاع...
ما فديوم باوعت لبنية ولا فكرت بالحب...جان ابالي اكو بنية محجوزة لي ولازم ما اكسر بيها
فرح اصغر مني ب١٠ سنوات....
انتظرت تكبر حتة ازوجها....
بس ماجانت لي مشاعر خاصة تجاهه
وحتة اصدقائي ماعندي هواي مقربين بس حامد وخالد...وعلي ابن عمي
خالد يصير ابن خال علي...وبنفس الوقت اقاربنا من ناحية الخوال...
جان اقرب انسان لي....
يوم جنت راجع من البستان وهذا قبل سنتين..
وشفته.يمشي ورة فرح وهية راجعة من المدرسة...
وهية جانت تضحك من يحجي...
اول شي فرت واخذتني الغيرة...
ومن رحت اتعارك وياه...كال نسيت اني ابن خالها
_ ابن خالها تمشي وراهها من المدرسة للبيت
_كرم...انت صويحبي وصديقي...
ادري لا تحبها ولا تريدها...شكو رابطها بيك
_شتقصد...
_اقصد اني اريد اخطبها ....واخاف تنهة عليها
لزمته من زيجه...لك عينك على عرضنا...
_كرم هية هم عرضي...اني دكول اريدها بالحلال
ولان انتة صاحبي وخويي...كلت اكولك
دفعته بقوة بحيث وكع...من اليوم مابينا صحوبية
الصاحب الي مثلك مايلزمني...
مو حزام ظهر...واخاف ادخله بيتي بعد
مشيت ...لحكني وخله ايده على جتفي...
_لا كرم ما مرجية منك...صار سنين سوة..شفتني يوم تعديت وياك حدي...
خوية عرضك عرضي...بس مو بيدي ...
وهية بنت عمتي وادري انتة مو ابالك
رفعت ايده بغضب ونزلتها....روح خالد...اني هم بعد مالي شغل بيها...
بس انسى عندك صاحب اسمه كرم
من يومها شلت فرح من بالي...وادري خالد مايكدر يتقدم لحد ما ازوج ...لان يخاف من جدي وابوها مايقبلون...وهم هية داتكمل دراسة
من قررت ازوج ذرى...جدي وكف وياي
وعمي تخبل..وزعل مني...ولحد ماجدي حجى
وياه...وكاله
_بوية ...لازم واحد من الولد يزوج منهن
علمود الكاع ماتطلع للغربة
جاسم...اي عندي احمد وسامر وموجود ايهاب
الجد....اني اعرف منو مناسب...وبعدين لا تخاف على بنتك....
احسن لك ولد خالها الشيخ موجودين...
عمي بسرعة يقتنع خاصة من شاف نسابة الشوخ احسن له...
واصلا هو مو على صلح وياي وداىما نتصادم
كعدت على حيلي...واني احس نار جواي...
رجعت تلمست ضفيرتها...اوووف ياذرى
شكد ظليت اقنع وارضي بالحولي حتة تصيرين لي
وتالي ماكدرت اقنعج وترضين ...
ماكدرت اصبر بالغرفة ...نزلت جوة ...اريد اشوف ايهاب رجع...
لكيته بعده ...طلعت بالحديقة ...وكعدت سارح بافكاري...
وادور المشكلة براسي...شلون وصل الحب لمجرها...
سمعت صوت سيارة..عرفته ايهاب اجة
صحته من اجة يتمشى يريد يدخل للبيت
_ها وصلتها
_اي خوية...
كعد يمي...كرم شصار ...شو محد بينا يعرف
سكتت...ماعرف شكوله
_ترة البنية من وصلت تخربطت...ووديتها للدكتورة
فز كلبي لحجايته...وعدلت كعدي ...ليش شصار
_شنو شصار ...هية صار اربع ايام من رجعناها من المستشفى....مالحكت تصير زينة
_هسة فهمني ...شبيها...
حجيت بعصبية..
_ماعرف وديتها ورجعتها...واذا هيج اتحبها...تنازل شوي وتفاهم وياها...ماكو مشكلة بدون حل
رجعت راسي ليورة وغمضت عيني
_روح ايهاب
**********
سعاد.....
من يوم مهري ومشكلة كرم وذرى على احمد
والوضع بالبيت متوتر....
كرم كام مايحجي وية ذرى حتة كدامنا...
مرات اكول اني السبب...ومرات اكول هية هم خطات من اخذت تلفونه....
بس البنية ماشفنا عليها شي بالعكس
حبابة وخدومة وية الكل...
بس مشكلتها وية كرم...اثنينهم انفة وكبرياء ومايكص خشمهم السيف
بس الي صار مؤخرا غريب...
اسقاط ذرى...وكرم يدزها لاهلهة..ومن صعدت عليها...جان مبين كرم ضاربها...
سؤال كرم لنا كلنا من يصعد لغرفته
لازم صاير شي جبيىر...لان عمرنا ماشفناه رفع ايده على وحدة بينا....
حاولت اخابرها بعد كم يوم خاصة من عرفت من ايهاب مريضة....
بس ماجاوبتني....
جان كلبي يحترك من اشوف اخوية...روحه لايبة
تحسيه طالعة الدنيا من عينه...
على طول عصبي...ومايبقى بالبيت...بس على كد النومة
شكد ما اخوتي حبابين وحنينين ..بس مامجربة اقترب منهم واحاجيهم...خاصة كرم...
شخصيته وهيبته تخلينا نتردد نحجي...
كلت خلي احجي وية حامد...هو صديقه المقرب...
خابرته...السلام عليكم
_هلة بهالصوت العذب ...شعجب مخابرة ..
مين طلعت الشمس اليوم
_عفية حامد شبيك...مو انتة دائما تخابر
_انتي كلتيها...اني اخابر...نفسي يوم انتي تخابريني وتفرحين كلبي الولهان
اني بقيت بس ابتسم...استحي احجي وياه ...
بس حامد من يوم نخطبنا...ماقصر بالكلام الحلو..
وصدك شغل بالي..
جانت ذرى تكول...الرجال بيده يخلي المرة تحبه
_هاحبي وين رحتي...
احمر وجهي...عزة شجاوبه
_يعني شلون مخابرة بس تسمعين صوتي...احجي
_ماعرف والله شكولك....استحي
_عمي عقدت شيخ ومحكمة...بعد شعقد...وكعبة انتي مرتي
_اهوووو...هسة اني خابرتك على شي...
_شنو كلي بالخدمة
_كرم...زعلان وية مرته...ومانعرف شن   السبب
_ليش ماتحجون وياه
_هو مايحجي لاحد اي شي...كتوم كلش...انتة صاحبه حاول وياه
_هسة اشوف
********
حامد....
تعرفت على كرم بالاول كلية...
جانت تعجبني شخصيته....دحسه اكبر من عمره...
بمرور الوقت قوت علاقتي بيه....
ولان ماعندي بس اخوات ...حسيته خويي
لحد يوم صارت عركة وية مجموعة ولد بالكلية.
وسبب العركة بنية احبها...وجنت ناوي بس اتخرج اخطبها...
ويوم ذولة ولد وهمة اصدقاء وطبة وطلعة وياهم...جابوا سيرتها...
عبالهم اني مصادقها ومو نيتي غير شي
وتلاغيت وياهم وتلازمنا...وصار ضرب بينا..
تهور شباب....كرم من شافني متلازم وياهم...
اجة وياي وعاوني...واذيناهم...
بس همة ضموها لي...ومرة من طلعت من الكلية...دزوا ناس علية...شبعوني ضرب...وكسروا ايدي...وراسي شكوه...
وعافوني مشمور بالشارع...
لحد ماشافوني ولد ويانة ونقلوني للمستشفى
بوقتها كرم...ماعافني...وحتة بات وياي...
ومن طلعت عرفت هو مادبهم للولد...
البنية تركتها...لان عرفت اكو هواي حجي عليهة
مو مثل ماجنت شايفها ملاك...
ومن تخرجنا اشتغلت وية كرم ...ومن يومها ...
مافترقنا...لان كرم اخو خيته
بعرسه جنت مسافر...بعدها من رجعت اخذت والدتي ورحت اباركلهم...
وبطلعتنا...طلعت امي من باب المطبخ..وام كرم شايفها وداىما اسلم عليها...
بس بفتح الباب...رفعت عيني داسلم على امه
شفت بنية جذبت نظري....
دنكت لان ما اريد اباوع على عرض صاحبي الي مامني ومدخلني بيته
رجعنا للبيت...وامي مابطلت تحمد بيهم...
وهية صار مدة تلح على زواجي...
فكالت على اخت كرم...
عجبتني الفكرة...خوش عائلة...والبنية شفتها وعجبتني...بعد شكو
حجيت وية كرم...بس فاجاني كال محجوزة...
عادي مالي بالطيب نصيب...
بعد فترة ...عزمني كرم على غدة...امي جلبت وياي
من رجعنا كالت حجيت وياهم...اني تعصبت عليها
كتلها هسة شيكول...
رحتله وحجيت وياه...
_كرم ترة والله ما ادري بالحجية حاجية وية الاهل...
_ليش بطلت ما تريد
_ابطل...كل عقلك وين انول اصير نسيبك واكوم اسب خال جهالي
ضحك كرم....شحدك تسبهم
_يعني شنو وافقت
_توكل على الله وجيب عمامك
بوكتها كمزت شبكت...
_لك اثكل شلون نسيب خفيف
والحمد لله...سعاد طلعت خوش بنية ...جمال واخلاق وادب...
دكيت على كرم...جاوبني
_تعزمني لو اعزمك
_تعذرني حامد مشغول
بالعادي جان اشاقيت وياه بس من جاوبه وصوته عرفت اكو شي
_والله كرم رايدك ...بشغلة العزومة اجبارية
اتفقنا يجي يتغدة يمي
جان مبين باله مشغول
كرم....حامد كول شنو شغلتك
حامد....انتة شغلتي
_ما فهمت
_كرم شنو موضوعك...صار اسبوع اشوفك دايخ ومهموم ...اني خويك احجيلي بلكت اكدر اساعدك
سكت وظل صافن...ياخوية شحجي...سالفة ما تنكال...
_اذ تخص الاهل...فاني ماصرت غريب منكم وبيكم...وان شاء الله هية اختي اعتبرها
شفته ظل ساكت  ويفكر
حامد...خوية واحد مايكدر وحده يفكر...يجوز اكدر اعينك
حجالي المشكلة...خلاني صافن
_والله شكولك بس صدك شغلة تحير...
بس اريد اسألك...انت خلال هالاشهر العاشرتها...تتوقع تسويها
_لا ماتسويها...بيها شبه مني هواي...بس مال تسوي هيج ما اتوقع...
_لعد ليش هيج سويت...ليش تعصبت ودزيتهة لاهلهة...
غير تتفاهم وياه
_حامد اني روحي لابت...وفكري ودة وجاب
وردت منها بس تساعدني تنطيني فكرة منو ممكن يسويها...
بس هية اخذتها شغلة عناد وكرامة ....
وزادت همي ...يجوز غلطت بس خليك بمكاني
الحب بمجرها...ومحد يصعد لغرفتها...
وتكول ماعدها اي شي ...
وهية لا طابة ولا طالعة...فهمني شتريد تفسرها
_بالبيت ما سألت...منو يصعد
_سألت....محد يصعد فوك بس سعاد...
وبوجود ذرى
_ادري قابل الي يصعد يكول اني....
بس صح حجيك....لازم هية هم تساعدك اذا عدها مشكلة وية احد
لا تزعل ...طول عمرك ماتستعجل...ليش هالمرة...هسة خربت وياها
راح كرم بعد ما ظلينا نتناقش بس ماوصلنا لشي
بقيت افكر...صدك شغلة تحير...
اني لو بمكانه يمكن بلحظتها جانت جلدتها لمرتي
بس الظاهر هو يعرفها ماتسويها...
اكو فكرة اجت ابالي بس ماكتله عليها
اذا صدك مو هية الي شربت بمزاجها....
فالشخص الي خله الحب لها من نفس البيت..
بس شنو مصلحته...
وللحكاية تكملة