حين يستبد أدم

كشف الاسرار

#حين يستبد أدم
همس ليل
البارت الثامن عشر
سعاد...شلون....منو كالك هالحجي
حامد...كرم كال...ولا تسألين على التفاصيل...
لان ما اعرف...بس حاولت اقنعه من راد يروح يطلك
وعرفت واحد دازله مقطع مصور ....
ذرى تنطي فلوس حتة يسكت ومايوصل هالحجي
لكرم....
وهو هم سامعها من تحجي وياه بالتلفون ....
ومن مطلع فلوسه لاكي نقص ...نفس المبلغ الي طالبه الشخص الي دازله التصوير
سعاد...اكو شي غلط بالموضوع...هو نفس حجي ذرى...بس ضدها مو بصالحها
حامد....سدي الموضوع...وبعد مالج شغل
ظليت افكر...اسد الموضوع وخلي ينتهي على كد هيج....
لان اول وتالي موج تروح بيها...صح هية مامقصرة
بس مهما يكون اختي...
زين وكرم...وذرى...شنو ذنبهم...
وحتة لو لهم ذنب...اذا تمادت موج وسوت الاكبر من هيج شلون
ظليت دايخة....بس اكو شي لازم اعرفه...
منو الي جذب بيهم....وبعدين اشوف شسوي
بس المشكلة...ذرى كامت ماترفع علية خط...
ومرة وحدة رفعتها...وكالت مشغولة...
يعني معقولة عرفت اني دريت وتتهرب
مر اسبوعين وهية ماتقبل اشوفها...كل مرة بحجة..
ومرات اصلا ماترفع التلفون...
يوم كاعدة وية حامد بعد ماتعشينة...
ديسولف على شغله...
سعاد...حامد اريدك توديني لذرى
حامد...هم رجعنا لنفس الموال...هسة احنة ماصدكنا شوية استقرت حالتج
سعاد...هية مو بعيدة....واني مابية شي
حامد...ادري غير توكفين وية اخوج...لو وية مرته سابقا هم
سعاد..حامد الله عليك...من زوجنا لسة ما طلبت منك شي...
بس هالمرة وبعد ما اكولك والله
حامد...هاي اخر مرة
رحت بدون ما اخابرها...لان ادري راح تكول عندي شغل
من وصلت خليت حامد ينتظر اشوف موجودة لو لا
طلعلي عمي كال موجودة...حامد سلم عليه وراح
دخلت جوة يمهم...من شافتني تفاجأت
سعاد...شلونج خيتي....لو صرنا غربة هسة
ذرى....هو يكولون يجمعنا الدم...بس محد صان هالشي
سعاد...صوني انتي...خليج احسن منهم
ذرى...تعاي خلي نكعد بالصالة....
دخلتني للصالة...كعدنة...واني انتظر تحجي
سعاد...ليش كطعتي بية
ذرى...اخوج يريدني بعيدة...واني هم تعبت...
سعاد...ما اكدر اكول حقج لحد ما اسمع منج الصار
ذرى...ما فهمت قصدج
سعاد....ذرى....شنو جان بالرام
ذرى...خلي يولي هالموضوع...اريد ابدي حياتي بعيد عنه
سعاد...حليه الموضوع وابدي حياتج...محد يلومج ساعتها
سكتت وظلت صافنة
سعاد...ذرى لازم تحجين...ترة الموضوع اطور...وانقلب ضدج
ذرى...شلون يعني
سعاد..احجيلي شنو جان بالرام ...واني اكولج شلون
ذرى....جان بيه تسجيل صوت لسامر وموج...وهو يسلمها حب الاسقاط ويعلمها شلون تخليه لي
سعاد...صخام ...بس هية حلفت ماسوتها
ذرى...شنو قصدج سعاد...داكذب عليج
سعاد....مو هيج...بس
ذرى...بس شنو
سعاد..وين الرام ...شوفينياه
ذرى...انباك...هذا قبل يوم من جيت كرم...
من اجى كرم...صعدت ردت اتاكد من الرام...لكيته ماكو...
وخابرني سامر يهدد بحيل صدر...عرفت موج باكت الرام
سعاد...والله يعني اذا صدك هالحجي...ذولة شياطين
ذرى...شنو اذا صدك...ليش اكذب عليج واتهم اختج
شعندي وياها...
سعاد ...موقصدي.....بس ...
سكتت ماعرف شكول لها
ذرى...احجي عادي ترة تعودت على مصايبكم
سعاد...ليش هيج ذرى...اشو اسلوبج هالمرة متغير
ذرى...يعني جاية تشككين بية...اكيد تريدين اختج تطلع برة السالفة
سعاد...ماجذب واكول لا...هاي اختي وانتي هم نفس الشي جان تسوين
ذرى...حتة لو...جان على الاقل اكول كلمة حق...حكموا ضميركم شوي
سعاد...وين الحق ضاع بينكم...انتي تحجين شكل...وماعندج دليل
وكرم شكل وعنده دليل
ذرى...دليل شنو صور ممكن واحد ياخذها باي مكان
سعاد...لا ...التصوير الي حجيتي عنه...
بس مو مثل ما كلتي...التصوير يبين انتي مشترية الحب...والشخص الي بايعج اياه مهددج بيه...
لذلك انتي اخذتي فلوس له...حتة اسكتيه
وكفت ذرى....كافي عاد...تصورتج احسن منهم...بس الظاهر كلكم صنف واحد...
سكتت ..وكلت استر على اختج...لان راح يمس الكل ...
بس اختج عكرب مو مال واحد يستر عليها
وانتو مو مال واحد يسويلكم زينة....
ظليت ساكتة ما اعرف شنو اجاوب...
دخت منو الصادك بيهم...
دخل عمي ومرته...شبيكم ليش صوتكم عالي
ذرى...تعال شوف اهلك الي ردتهم سند لنا
شوف شلون لعبوا طوبة بية....
ابو ريم...ذرى ...شنو هذا الاسلوب
ذرى...طكت روحي...مو تريد تعرف شصار هسة احجيلك...بس انطيني صبر
التفت علية....دافعي لاختج شكد ماتريدين...بس ربج ما يظلم احد...
واذا ماكدرت اخذ حقي..هو موجود ويطلعه بيكم
عافتني وطلعت...
خابرت حامد حتة يجيني...واني الوم بنفسي
شسويت...راح تعلك من وراي...
ليش ماحاولت احلها بهدوء
******
ذرى....
شكد جنت متماسكة....وكلت خلص مادام باع هو الخسران...
صح نار بكلبي...وصح يامة حنيت له...
بس ما توصل يقلبون الموضوع علية ...
ابد والله.....ما فوتها لهم...
من رجعت قبل ست اشهر...ابوية سألني  شصار
ماعرفت شكوله...
كتله تعاركنا...شكد امي حاولت وياي....
بس ماحجيت...وابوية جان مصور فترة وراح يجي كرم يرجعني....
بس من شاف عدت الاشهر...وماكو رجع يسال واسكت...
لحد يوم الطلاك...انصدم....
وكال انتي ماتحجين لان الظاهر الخلل منج
وسكت....حسيت حتة هو خذلني
دكيت على علي...
_شلونك ابو محمد
_هلا خوية...ادري مقصر وياج...وجنت ناوي اجيج
بس صار عندي ظرف
_لا خيي حشاك من القصور....بس اريدك تجيني ضروري
_على راسي...باجر الظهر يمج
بيومها كلشي ما اكلت ....
ظليت افكر شلون راح احلها....
تعبت ومالكيت حل...بقت حجايتي ضد حجايتهم .
كمت توضيت وصليت...
وظليت لحد صلاة الفجر اكول حسبي الله ونعم الوكيل...
ربي انتة تاخذ حقي....
ثاني يوم...الظهر اجة علي...
خليت ابوية يحظر...وحجيت كلشي
ابوية تعصب علية....
ابو ريم...الي سويتي غلط...مثل مارحتي اول مرة لابن عمج وحجيتيله وهو اصرف...جان المفروض ترحين هالمرة...
مو تصرفين من كيفج...هسة منو يصدكج
هاي عود انتي العاقلة...ظل يحجي علية
واني سكتت...حقه...اني غلطانة....
علي ..عمي حقك...بس ترة ذرى جان قصدها الستر....
ويمكن لو ماجاية لي بالمرة الاولى جان ماصدكتها هسة
ابو ريم ...شلون يعني
علي...جان صارت حجايتها ضد حجايتهم...
بس من اجت بالمرة الاولى...وكلبت الموبايل
وشفت ماكو صور مثل ما كالت موج...
عرفت اكو شي غلط....
بس صراحة ماتوقعت هيج لعبة
ابو ريم...والله عمي ...شكولك...ليش كرم مافكر مثلك
وانطاها عذر
علي...كرم مايعرف التفاصيل...وبعدين اجاه تصوير ..ومنة شغلة الاسقاط...
لازم راح يدوخ وتفكيره يتخربط...
والي خارج الموضوع...دائما يفكر بشكل اصفى
ذرى...ابو محمد.. اريدها منك بعد..
علي...مايكون خاطرج الا طيب...كافي ردي ماتخلينة علج بحلوك الناس....
كام سلم وطلع...
ابوية التفت علية...ماعرف الومج...الوم نفسي
عافني ودخل لغرفته...
*****
علي....
من يوم طلاك كرم...واني اريد اروح لذرى
ردت افهم السبب...
كرم رغم علاقتي بيه...ما حجى شي
شكد حاولت وياه...
من خابرت ذرى...ورحت وسمعت منهة...
صدكتها...
مو لان اعرفها زين....بس لخاطر موقفها...
ولان بوقتها من اخذت موبايل سامر...شفت بلاوي بيه...
غير الديانة الي كل يوم واحد طالعلي....
وشغلة الشقة هم عرفتها....
وادمانه على الشرب....فاكيد مستعد يسوي كلشي...
علمود يحصل فلوس...
بس ذيج الجلبة حشى السامع...ليش هيج تسوي
والله اعصابي احتركت حرك...
نقهرت...على اخوية الي ديضيع شبابه...
على كرم...الي اعز من اخوتي
على هاي المسكينة الي لابيها ولا عليها اجتهها
التهايم...فوك ما سوت زينة
بس وصلت ...لكيت سامر مستغل غيابي وطالع...
وياهو الي اساله مايعرف وين...
خابرته...كال عندي شغلة يم صديقي...
كتله تعوفها وتجيني هسة ....
تاخر...رجعت خابرته...
عرفت من صوته شارب...كتله هسة تكون يمي
*****
ذرى...
كعدت الصبح....على صوت جوة...بليلتها...نمت من التعب مال السهر...
نزلت اريد اشوف شكو...
شفت بابا مبدل ويريد يطلع...
ذرى...شكو بابا صار شي
ابو ريم...والله بوية شكولج...الظاهر حوبتج...
طلع وخلاني صافنة بوراه
ذرى....ماما شكو شصاير
ام ريم....سامر ابن عمج...البارحة بالليل من راجع مكلوبة بيه السيارة
جنت بعدني واكفة على الدرج...راسا كعدت على البايات
لا ياربي...بس لا يموت
ام ريم...يطبه مرض...يخلص الناس من شره
راحت لغرفتها...
واني اكول هو يخلص بس اني شلون...
اذا مات يروح كلشي وياه...
بس والله ما اسكت....
اروح اكلب الدنيا على موج...
للظهر...خابرت امي ابوية حتة تتطمن عليه تأخر...
كال لها ...مات
راجع شارب بالليل والظاهر يسوق سريع...
ومكلوبة بيه السيارة....
كعدت على حيلي....واني افكر ضاع حقي
خلص بعد ...
امي اصلا ماقبلت تروح للفاتحة...
بس ابوية بقى هناك يمهم تلث ايام....
من رجع...جان مقهور على عمي جاسم
يكول حيل مكسور على ابنه
ام ريم...وانتة مقهور عليه...انقهر على بنتك والي سوو بيها
ابو ريم...بنتي جزء من الي صار جان من تهورها...
وبعدين هية يمي...وهسة لو يوزنوها ذهب ماترجع
مر على طلاكي  تلث اشهر وشوية...وطلعت الاربعين مال سامر..
وبدت الكليات...
العدة وكملتها.....قررت خلص انسى الي صار...
وابدي دوامي واكمل كليتي....
صح مو سهل علية ...بس مالازم احبس نفسي بالماضي...
شراح احصل....علاقتي انكطعت باعمامي...
بس ابوية بقى يروح بين فترة واخرة
بلشت دوام....بس وجبتي كلهم صعدوا رابع...
سما نقبلت قانون.... وجانت تنتظر يبدون دوام
لان الاول دائما يتأخرون بالدوام...
جنت اكابر وابين مامهتمة ...واموري تمام...
بس من يجي الليل...تبدي عذاباتي...
وتبدي الافكار تزورني...وتشغل دماغي...
كرم عرف لو لا ....زين مافكر يوم بية
شيكول لابوية من يشوفه...
واشكال الافكار...بس اتعسها جانت من كلبي يبدي حرب وية عقلي...
كلبي ينطيه العذر...ويكول عنده تصوير....
الله يعلم شمفبركين بيه
وعقلي يكول...لا جان على الاقل يحاول يسمع مني
هاي الافكار صرت جزء مني
بالدوام...صار وضعي حساس...مطلقة بعد سنة من زواجي...
وبدت نوع من المضايقات...بس ما جان يهمني
استمريت محاضرات طول اليوم
ومن تخلص اطلع انتظر الخط....
بعد مافترقنا اني وصديقاتي من خلصنا اعدادية
ما كان عندي صديقة مقربة ...
بس وحدة اسمها سهى...تعرفت عليها بالاول
وكامت تحجيلي كلشي
وصارت من ضمن كروبي...الي جانوا ولد اثنين
واحنة ثلاث بنات
سهى كانت معجبة بولد ويانة....
وشكد نبهتها لان الولد من النوع الملعب...
بس ما سمعتني...وبعد نص السنة بالصف الثاني
اجة صارحني ...وطبعا صديته
مو بس لان صديقتي تحبه....
وهم هو مو من الشخصيات الي افضلها
شو بعدها سهى بدت تتجنبني...
بوقتها ماركزت بالموضوع...لان جان شغلة عمامي
والمشاكل الي اجت وياهم....
واني ملتهية بيهم....
هسة من رجعت..كروبي رابع...مرات يجون بدون سهى
يشوفوني...وعداهم ماسويت اي صداقة...
اكتفيت بالزمالة العادية.....
********
كرم....
الفترة السابقة ...التهيت وية بيت عمي...
لان وفاة سامر دمرت عمي...
وعلي جان ملتهي يحل الديون الي تركها سامر
بس رغم شكد مشغول من افتح عيني..
لحد ما انام...
ماراحت من بالي....مرات من اروح لبغداد
ياخذني الشوك...والكة نفسي متوجه لمنطقتهم
وارجع الوم بنفسي....
الي مارادك لا تشتري...
بس حجي ...من يجي تالي الليل...
واصعد لغرفتي...سلوتي ضفيرتها الي تركتها يوم
عرفت رجعت اداوم....
عندي اخو صديقي...استاذ بنفس قسمهة...
خابرته وصيته عليها....
كتله بنت عمي...دير بالك عليها