حين يستبد أدم

رغبةووعد

يسعد مساؤكم...حبايب...باجر ماكو بارت...الاحداث القادمة مهمة واريد اركز بيها..تحياتي
#حين يستبد أدم
همس ليل
البارت الرابع عشر
ذرى...
خابرت فرح من الصبح جان يوم خميس كتلها تعاي اصبغلج من ترجعين من الدوام لان ايهاب يبات يم صديقه...
وكرم...كال معزوم يم صديقي
وافقت...الظهر جابها احمد...وراح
من شافتها موج استغربت
ذرى_خوما اتغديتي
فرح...لا والله ...من المدرسة لهنا...بي كتلهم بالبيت
ذرى..زين...حتة نتغدى سوة...
وبعدين نبدي نصبغ..
كمت داصب غدة...
فرح...اساعدج
ذرى...لا ماعندي شي...اليوم بس احنة..حتة عمي راح يم عمي قاسم...
جمعنا على الغدة...عمتي رحبت بفرح واستغربت من جيتها
وموج ظلت تلصلص عيونها بينا...
خلصنا غدة...شلنا المواعين...عمتي راحت لغرفتها تنام لان تكعد من وكت...
وموج هم راحت لغرفتها...بس اعرف راح تتنصت علينا
ذرى...تعاي بالمطبخ اصبغلج...وبين ما يجف شعرج اغسل المواعين
كعدتها على الكرسي وحظرت المواد...
وبديت اصبغ بشعرها..
فرح...موج ليش بطلت من المدرسة
ذؤى...ماتحب الدراسة..
فرح...هو سبحان الله من دون عمامي بنات عمي قاسم مايحبن الدراسة...
ماعرف ولدهم مايشجعون...هاي كرم مو بطلج
ماعرف ليش غثتني حجايتها على كرم
ذرى...لا اني أجلت السنة...تعبت بعد الاسقاط
فرح...صدك شنو جان سبب الاسقاط
ذرى...خطأ بالدوة
فرح...يا ...خطية الله يعوضج
كملت صبغ شعرها...
ومن داخلي جيس عليه
ذرى...اسال سؤال بس ما تزعلين
فرح ...كولي
ذرى..اني اشوف كل الولد متشددين...شعجب يخلوج تصبغين شعرج قبل الزواج
سكتت...صراحة مايدرون...كتلهم راح اجي يمكم
ذرى...ما راح يشوفن شعرج
سكتت مرة ثانية...
واني بديت اغسل مواعين
فرح...ليش كله انتي تسوين...وين موج لعد
ذرى...مقسمين الشغل...وعمتي تطبخ
عموما الشغل مايموت احد....
خلصت مواعين ...شفت شعرها بعده
تخابريهم تكولين لهم تتأخرين
فرح ...اي هسة
اخذتها وصعدت لغرفتي بس بقيت الباب مفتوح جزئي...حتة اشوف موج من تتنصت
فرح...حلوة غرفتج ...اول مرة اشوفها
ذرى...كدامج
فرح...بالعافية عليج
طلعت لها صور مال الكلية وبديت اسولف وياه
شفتها بنية حبابة...ونوعا ما عدها نوع من الفطارة
يعني من الناس الي بكلبهم على لسانهم..
بسرعة اخذت علية من شافتني حجيتلها على ريم اختي وخطيبها
رغم عرفت من اسلوبها ماممكن هية تخلي الحب..
بس كلت كلشي يصير ...اتاكد يلا
ذرى...كومي خلي اغسلج شعرج
بلحظتها حسيت حركة سريعة يم الباب ..
رحنا للحمام غسلته...وجبتها كعدتها كدام المراية...وبديت اشسورلها
ذرى...خامة ماخذة موقف مني علمود كرم
سكتت...بس من خلصت شسوار
كعدت مقابيلها على الجرباية وهي مقابيلي تتفرج على شعرها
فرح...حلو عاشت ايدج
ذرى...بالعافية...اني تعلمت براس اختي ريم
فرح...الله يعافيج....
اندارت علية...وكعدت على الكرسي
فرح...ذرى انتي حبابة مو مثل ما جنت اصورج...
اريد اكولج...اني صبغت شعري...لان الخميس جاين بيت خالي يخطبوني لابنهم...
وشعري شفتي تعبان...وراح يجن بنات عمه ...واريد اطلع حلوة كدامهم...
ذرى...شكو بيها...الله يهنيج
فرح...بالنسبة لكرم ...اكيد وصلج خبر عن موضوعنا...
بس اريد تعرفين ...اني احب ابن خالي...وعمري مافكرت بكرم...
بالعكس جنت اخاف منه...اشوفه فد شي جبير
واخاف اتقربله...يمكن طول حياتي ماحاجية وياه كلمتين...
ذرى...وليش ما خطبج ابن خالج
فرح...جان ينتظر كرم يزوج...خوفا لا ينهي علية
واني العام اجلت دراستي..لذلك اخر الخطوبة للسنة هاي حتة الحك اكمل السادس..
ذرى...بس شفتج ضايجة بالعرس وبالسبعة
فرح...صراحة...ضجت من ورة حجي اخواني وخاصة علي...
علي وكرم كلش مقربين...وظل يكولي حرامات عافج ...انتي خسرتيه..
ومرات غرور بنية...شخص جان ينتظرها تكبر
وفجاة يعوفها ويزوج
ذرى...بمعنى جنتي تريدين تزوجين قبله...حتة الناس ما دكول عافها
سكتت...وعرفت صدك هيج نيتها...
ذرى...لو هسة رادج كرم...وعفته اني ماتقبلين
فرح...لا طبعا مو كتلج اريد ابن خالي
...بس عفية...ما اريد احد يعرف بهاي الشغلة
ذرى...اطمني....
نزلنا...وصار كرم بوجهنا...
شفته ظل يباوع على فرح...
ماعرف ضجت واني اشوف نظراته...
معقولة عرف بشغلة ابن خالها لذلك عافها
بس هو يحبها...
كرم...شلونج فرح
فرح...الحمد لله انتة شلونك
كرم..بخير...منورتنا اليوم
الحجاية دقتني حيل
فرح...اشكرك...بس رايحة هسة
كرم....ليش بعد وكت
فرح..لا من زمان هنا...انتظر احمد يجيني
كرم...اني اوصلج ...امشي
فارت اعصابي...بس ماكدرت احجي
اخذها بالسيارة ...
واني اباوع عليهم...
موج....ها حنلها
التفت عليها....ردت اجاوب..بس بعدين بطلت
صعدت لغرفتي..وبدي يكون هسة يمي
حتة اتعارك وياه..
ذرى شبيج...خلي يولي احاجي نفسي
عموما...سقطت موج...وفرح منو بعد بالجدول
******
كرم...موضوع اسقاط ذرى ما نسيته...
بس حاليا انشغلت موسم زراعة...واني مو بس كاعي
لا كاع عمي جواد وعمي باسم
طول اليوم مشغول...وتعبان...
بس كل التعب بجفة...وتعب الليل من دنحشك بية ذرى بجفة...
اغفى بداية الليل...ومن تنام ماحس الا انحشكت بظهري...
تشعل اهل اهلي...وتبقى اعصابي متوترة للصبح
مرات اسحب نفسي واطلع بالحديقة والجو بارد...
اكول بلكت تبرد اعصابي..
ومرات ادخل اغسل...
بس لشوكت...بعد ماعندي طاقة تحمل...
بس كلامها جرحني ومس كرامتي...
واذا ارجع للواقع...عدهة حق شلون ابيتي ...
وبغرفتها...وما أمنت على نفسها...
يوم برجعتي شفت فرح يمنا...
كلت فرصة خلي اوصلها واروح لعلي عندي شغلة
وياه...
بس انتبهت على ذرى...ضاجت...معقولة تغار
من رحت لعلي بلغني على جية خطابة فرح الجمعة الجاية...
بس اني اعتذرت منه...لان اذا اشوف سامر اكتله
وخابرت حامد عزمتهم على الخميس
من رجعت ...صعدت لغرفتي بعد ما كعدت شوية وية ابوية وامي
فتحت الباب...واشوفها لافة نفسهة بمنشفة جبيرة
واكفة كدام الكنتور الظاهر سابحة وتريد اطلع ملابس
ظليت واكف جامد بمكاني ..
جرت دشداشة وسدت باب الكنتور والتفت وبيدها الدشداشة واليد الثانية على المنشفة تريد تفتحه
بس شافتني فزت..
_شبيج شفتي شبح
_شوكت اجيت ...شو ماحسيت بيك
كتلها بكلبي..يا يوم انتي حاسة بية
شفتها ظلت مجلبة بالمنشفة الي توصل لجوة ركبتها..
اول ماشافتني ارتبكت وبعدين رجعت لاتزانها...
وهذا مايعجبني بيها...
قوتها الخارجية..تحسس المقابل هية مسيطرة وما مهتمة...
بس اني هالمرة ماعندي سيطرة...
واريد اطلعها عن طورها...
تقدمت عليها...وهية بقت واكفة...ومالت براسها
وعيونها تسالني شبيك...
بس سيطرتها انكسرت..وراسا رجعت ليورة من نطخيت بيها...
_شبيك كرم
جريتها من زنودها بأثنين ايدي..
_بية انتي ...
وقبل ما تحجي اخذت شفايفه الي بطعم العسل اذوكها...
ابتعدت اجر نفسي...جانت متخردلة...عفت ايديها
وحاوطت خصرها بايد...وراسها باليد الثانية
وباوعت لوجها الي حمر....وشفايفها المتفرقات
وكأنها  تدعوني....
لبيت الدعوة وايدي بدت تستكشف طريقها...
خلت ايديها على صدري تحاول تدفعني...رغم عيونها الذبلانة...
بس باقي عدها نوع من السيطرة على مشاعرها
لزمت ايدها الي على صدري...
وايدي الثانية نمدت للمنشفة جريتها من عليها
هية شهكت بقوة...
واني فقدت اخر ذرة سيطرة عندي ..
بس بذيج اللحظة وسمعت صوت ايهاب يصيح علية من الدرج
_كرم...كرم
انسحبت هية راسا وابتعدت ودنكت على المنشفة الي وكعت بالكاع تشيلها
واني جنت احاول اسيطر على انفاسي المتسارعة
هسة وكتك ...خرب بحظي
_كرم...اكو حريق بواحد من الحقول...
هالكلمة صحتني طلعت على السريع
من وصلنا لكينا الفلح مجمتعين يطفون بالمي...
وناس بالتراب..
كوة يلا سيطرنا على الحريق...خفنا لا يمتد للحقول الثانية...
تشكرنا من الكل...رجعت اني وايهاب وابوية الي لحكنا بعدين...
كلنا تراب وصخام الدخان مال الحريق
تلكتنا امي وذرى...بس اني جان مابية حيل احجي
صعدت لغرفتي ومنها للحمام
بس اذكرت ما دخلت منشفة...
صحت على ذرى جابتها لي...
من طلعت لكيتها نازلة...بدلت وتمددت بفراشي
بعدني ماغافي سمعت صوتهة يمي
_كرم اكعد اكل شوي
_ما اريد
جنت مخلي ايدي على عيوني
_مو صعدت الاكل لهنا ...لا تفشلني
رفعت ايدي وان مستغرب...معقولة...
ابتسمت بوجهي...يلا اكعد...شوية بينما اسويلك جاي
_لا تعاي ...اتعشي وياي..
نزلت الصينية بالكاع
_هواي خساير
_الحقل كامل انتهى
_زين فعل فاعل
_لا ما اعتقد...الكهرباء تعبانة يجوز تماس...وعلى كل باجر اجيب واحد.يكشف على الحقل
_الله كريم
******
سعاد...
صار تقريبا اسبوعين من ازوجت...
حامد حباب وطيب.....
بس امه...شو احسها بدت تتنحس عليه
خاصة من تشوف حامد شلون يدلل بية
بالبداية عافت الشغل كله علية...
كلت عادي متعودة ...بيت اهلي اكبر
واني جنت شايلته...
بعدين بدت تبسمر من تشوف حامد يتحارش بيه
وتضوج حيل...
اني غلست كلت مادام هو زين وياي
قبل كم يوم اهلي عزموني...سوت نفسها متخربطة
وهية الصبح جانت مابيها شي...
وخلت حامد طول الليل سهران وياها
وهالمرة ...ظل حامد يتوسل بيها حتة تجي ويانة
وهية تعزز ...
جنت ابدل...وحامد هم
حامد...اليوم..تعويض مو
سعاد...مال شنو
حامد ...مال البارحة...
ضحكت على حجايته...عرفته ديسد عن تصرف امه
رحنا للعزومة...وخطية كرم جايبلي مدالية ذهب ...كال هاي هدية عرسج...لبسنياها كدام اهلي وامه...
شفتها ضاجت ودارت وجهها
من خلصنا غدة رحت اغسل مواعين وية ذرى
ذرى...بشريني شلون وضعج
سعاد...والله حامد حباب...بس اني اشتاق لكم
ذرى...عادي بعدج بالبداية بعدين تتعودين
سعاد...اي ...وعمتي مادري شبيها...
عبالك مو مثل جنا مصوريهة
ذرى...حبيبتي الناس من تعاشريهم يلا تعرفيهم
لان بالخارج الكل لابس قناع...
وبالعشرة ينزع هالقناع...لو الوجه خير لو لا يطلع
سعاد...هية مامسويتلي شي...بس دائما تبسمر على حامد جان مايعوفها وحدها...واذا تخربطت يظل كاعد وياها...
وهسة هملها...وبعد مايدير بال عليها
ذرى التفت علية...
باعي سعاد...رجلج وحيد امه...ابوه مات وهو صغير...
يعني امه اكيد متعلقة بيه...وهسة بدة يوجه اهتمام لشخص غيرها...
عادي راح تصيرغيرة...انتي صيري سباعية
وكسبيها لج...ولا تبينين لرجلج انتي ضجتي اذا تاخر يمها...حتى ما يتشتت بينكم
هزيت براسي...
ذرى...سعاد خلي نودي الجاي...
واريد احجي وياج بموضوع...
سعاد...خوش
صعدنا بغرفتي بحجة سعاد تعدل نفسها...
سعاد...كولي ذرى
ذرى...اكولج مرت عمي قاسم شنو موضوعها
سعاد...مافهمت
ذرى...يعني ...شو احس نظراتها مو طبيعية لي
دائما احسها اضوج مني
سعاد...ها ...باعي هية اساسا ما جانت تريد تبقة بالعرب...
وجدي ما قبل عمي يروح لنص بغداد...
من جابت البنات ٣ الكبار...
تعرفين نسوان حمة وناس تغور ناس...
هية ضاجت وظلت ادك على عمي يطلعها...
وسوت هواي مشاكل...
لحد ماجدي قرر كل واحد يطلع وحده
بس صارت منافسة بينهن ...
وصراحة هية جانت تريد كرم ياخذ ضحى بنتها الجبيرة
ذرى...ضحى كلية علوم مو
سعاد...اي
ذرى ...زين مو ايهاب على اساس لضحى
سعاد...لا ....تريد ايهاب ياخذ هبة الاصغر منها ..وياه بالتربية بس صف اول
سعاد...بس ذرى دير بالج ...مالج علاقة بيها...حتة بناتها نفس طبعها
ذرى...لا شعلية بيها
من رجعت بقيت افكر ذرى لوين تريد توصل
وصلنا لبيتنا...وهستونا طبينا
ام حامد...شدعوة على اخوج ...جايبلج هدية بس لج
ليش حامد مو صاحبه...خوب يجيب شي للبيت
حامد..يمة شنو هالحجي
ام حامد...ها يمة صاير حجي ثكيل عليك
اني بقيت صافنة شجاوبها
صعدت لغرفتي...وعفته يتفاهم وية امه...
بقة نص ساعة وصعد...
حامد...ها اليوم طردة لاهلي
ضحكت...ليش طردة غير تعويض لو غيرت رأيك
حامد....بوياي ...نهجم بيتي ...ياغيرت رأي
بكلبي كلت...مثل ما كالت ذرى مانطيها مجال تخرب علية
******
كرم...رحت اريد اشوف سعاد شمحتاجة على صفحة...
مو كدام عيالها...وسمعت حجي ذرى لها من توصيها على عمتها
بداخلي افتخرت بهالمرة...
رغم راسها اليابس...بس عقلها جبير
هسة هية فاهمة الكل...ليش تجي يمي وتبنجر
*****
احمد.....
اول مرة رحنا لبيت عمي جواد...كان اني وعلي اخوية وعمي قاسم وعمي باسم..طبعا ويانة كرم
شباك صالتهم جان على الباب الخارجي
والبردة مرفوعة ونازل بس التول....
يعني الي يدخل من الباب الخارجي ينشاف بس مو كلش
بيومها شفت بنية  دخلت جذبت نظري
يجوز من باب الفضول ...
لان بنات عمنا ومانعرفهن
بعدين كم مرة رحنا تعرفنا على ريم وسما
بس البنية الي شفتها...ماكو
لحد يوم كاعد علي وكرم...حجوا على وحدة دخلت عليهم
كرم جان يحجي باعجاب بدون ما يحس على نفسه
طبعا كرم واخوية علي حيل متشابهين من ناحية الشخصية والاسلوب...
وهمة المفضلين عد جدي ...وجان حيل يميزهم
من سمعته يحجي عن البنية...كلت اكيد بيها شي مميز هالعجبت كرم...
طبعا جان حجيه وية علي بدون ما يسمعنا...
بس اني جنت قريب منهم...
من تخربط عمي ورحناله...
ردت بس اشوفها
وهم شوفتي صارت من بعيد
لان ابد ماجانت تدخل تسلم...
جدي من فرض نزوج منهن...
جان ابالي اني اخذ وحدة ...
رغم بنت عمي سعاد محجوزة لي...
بس مادام جدي قرر...تنكسر كل الاتفاقيات
جنة كلنا متاكدين ريم خارج الحسبة
لان مخطوبة...وعمي كال هالشي
اذا السرة لذرى...
بس جانت المفاجاة كرم هو الي اختارها
وجدي قبل وابوي هم...
اني اعترضت ليش مو اني...
ابوية انطاني امل...وكال اني احجي وية جدك
بس من راح حجة وياه...
جدي كدر يقنعه...
بوقتها كلش انتحست...ليش كرم كلشي يريده
ينوله....
ليش كل مايقرر الكل لازم تستجيب...
حتة علي اخوية نفس الشي...
ودائما يوكف وية كرم...
بيوم السبعة...شفتها على الدرج...وجانت بعينها نظرة وحدة تايهة...
تقربت عليها وحاجيتها...
ومن دخلت تسلم على عمامي وجدي ...
جان اكو بمشيتها شموخ وكبرياء ...
مو خوف ورهبة ...
ماعرف شنو الي خلاني اشجعها حتة تكمل
يمكن جنت اريد اخلق مشاكل وية كرم...
يوم الي تخربطت بعزومتنا جنت هسة طالع من الصالة وصارت مقابيلي
ماعرف بلحظتها فعلا دخلت كلبي
بس تعوذت من الشيطان...مزوجة وبنت عمي
وعرضي
مع ذلك رحت سالت واستفسرت عن الكلية والدوام
ومن اجو بالعزومة ..
انطيتها رقمي حتة افهمها...
بس ما خابرت...زاد هالشي من اعجابي بيها
وكدرت احصل تلفونها عن طريق سامر
وطبعا سامر جابه عن طريق موج..
*****
ذرى...
ظليت افكر ليش سعاد حذرتني من مرت عمي باسم
بس فكري غير اتجاهه...
من سالني كرم بعد ما وصل فرح...شفتي احمد
ليش من دون ولد عمي ياكد على احمد...
اكو بينهم منافسة....لو اكو شي ما اعرفه
زين ليش دائما افكر ممكن مرة مسويتها
مايجوز رجل عنده شي وية كرم وحب يحرك كلبه
احمد....بوقتها لح على مسالة الكلية....
من يا باب افسرها...خاصة هو جديد متعرفة
عليه..يعني اكيد من خوف على مستقبلي
زين رقمي مين جابه...شو هاي فاتتني اساله بوقتها
زين شلون راح اكدر اعرف واني ماكدر احجي وياه...
********
كرم....
اكو سفرة مستعجلة للهند احنة مجموعة مزارعين مدة اسبوعين...
هم فرصة ابتعد شوي افكر بوضعنا...
رجعت من وكت شفت ذرى شايلة زولية المطبخ
وتمسح....
ظليت اتفرج عليها...
من كل عقلي حلالي ومانع نفسي...
هسة لو احجيها لاي عاقل يصدك..
بس اني انطيتها وعد...
خلص من ارجع من الهند لازم نفض الشغلة
خامة نبقى هيج
وصلت يمي ونطخت بية...
راسا بلحظة اندارت متفاجاة...بس وية لفتها ازحلكت رجلها ورادت توكع...
لوما اني اجرها....نصدمت بصدري بقوة...
موقف صار بثواني واقل
_اخ
_اذيتك
اذيتي كلبي...حجيتها وية نفسي
_ادري راس لو بلوكة
_اريد افهم انتة شنو ...فجاة تظهر...ما طلع صوت من تجي...
جنت بعدني لازمها من ايدها وقريبة كلش مني
كلبي مألف بدكاته...
_وانتي ليش هيج مدنكة...نفترض اجة ايهاب
نسحبت من ايدي
_مو وكت رجعتكم هسة
_بعد لا دنكين هيج...
عفتهة ورحت لابوية...
وخلال يومين كملت اموري...الفيزة من زمان محضريها...
بس جان وقت السفر ما محدد...وهسة تحدد
جانت تحضر جنطي...
_شكد راح تبقى
_اسبوعين....تحتاجين شي
_لا ...سلامتك
_هاي الفلوس خليها جوة ايدج خاف تحتاجين شي
_شدعوة هواي واني وين رايحة
_ميخالف...راح ابات يم اهلج...حتة من الفجر نطلع طيارتنا من وكت...ما اريد اطلع ايهاب الفجر
_اجي وياك
_اول وتالي راح ترحين بعرس اختج وتباتين
بس ما اوصيج ..
ماريد لبس مفضوح بالحنة...
واني وصيت ايهاب...يجي ياخذكم بالزفة
هزت راسها ب...اي
تقربت منها...ورفعت وجهها لي...
_دير بالج على اهلي وموج...
دنكت بست كصتها...
واخذت جنطي ونزلت...
شكد جان بنفسي اكثر من بوسة بالكصة...
بس بالفترة الاخيرة بديت ما اضمن نفسي
بس لو ادري الي جان ينتظرني من ارجع ..
وللحكاية تكملة