: في شركة الصياد ،،، -يارا: اللي سمعته ، مش دي الحقيقة ، كل واحد فيكو بيدور ع مصلحته وبيعملها ، وانا أخر حد بتفكروا فيه -أدهم: ده مش حقيقي -يارا: كفاية كدب بقى ، من يوم ما دخلت بيتكم وانا بتعرض لاهانة يا قلة قيمة رغم اني ماحاولتش أجي جمب حد فيكو ، حاولت أكون في حالي ، أتعامل معاكو بكل بساطة، لكن المقابل منكو هو برضوه الاهانة ، بس مش هسمح بده يحصل تاني ! -ادهم: انتي فاهمة غلط على فكرة -يارا: لأ أنا فهمت صح خلاص ، كل مصيبة بتحصلي بيكون وراها حد منكو انو الاتنين -خالد: يارا -أدهم: ايه ؟ -يارا: وطبعاً معروف مين اللي بيدعمكم ، بس خلاص كل ده انتهى ، انا من النهاردة زيي زيكم -خالد: تقصدي ايه ؟ -يارا: أنا ليا لي ميراث ونصيب ، أنا هشتغل فيه ، ومش هشتغل عند حد فيكو ، ولو عاوزة أفهم شيء هفهمه من عمي ، ع الأقل هو خايف عليا ، غلط أه زمان ، بس بيحاول يصلح غلطه وندمان ع اللي عمله ، لكن ولاده الصراحة لأ ... طالعين لفريدة هانم ، بيطبقوا أوامرها بالنص ، وفعلاً نجحتوا في ده ، أذتوني نفسياً وبدنياً وخليتوني تريقة للكل .. شكراً ع اللي عملتوه معايا -خالد: يارا بلاش تقولي كده -يارا: لأ ، هاقول واكتر من كده كمان ، لأنها الحقيقة -أدهم: يــ.. يارا حاولت يارا النهوض والتغلب على آلم كتفها ، ورفضت أي مساعدة من خالد أو ادهم و.. -يارا: اوعوا محدش فيكو يلمسني ، كفاية أوي لحد كده -خالد: يارا استني -ادهم: يارا -يارا: أنا رايحة لعمي ، وليا لي كلام معاه ............. توجهت يارا إلى مكتب عمها رأفت لتبلغه بنيتها تولي أمور ميراثها بعيداً عن خالد وأدهم و... -رأفت: يارا ،ايه اللي حصلك يا بنتي -يارا: حاجة بسيطة ، كنت محبوسة بس في الأسانسير -رأفت بفزع: يا ساتر يا رب -يارا: ماتقلقش يا عمي أنا كويسة الحمدلله -رأفت: ده انتي شكلك مبهدل ع الاخر وضع رأفت يده على كتف يارا ليجعلها تجلس ، ولكنها تآلمت و.. -رأفت: طب تعالي أقعدي -يارا متآلمة: آآآآه -رأفت: مالك ؟؟ في ايه ؟؟؟ -يارا: كتفي بس بيوجعني -رأفت: طيب استني اجيبلك الدكتورة -يارا: الأول بس عاوزاك تسمعني -رأفت: مش قبل ما اطمن عليكي حضرت الطبيبة وضمدت جراح كتف يارا ونصحتها بعدم القيام بأي مجهود خلال الأيام القادمة و... -الطبيبة: حاولي متعمليش مجهود اليومين الجايين -يارا: ربنا يسهل -الطبيبة: ان شاء الله الكدمات تروح ، بس ادهني من المرهم ده ، والكريم ده -يارا: اوك وبعد أن انصرفت الطبيبة ، تحدث رأفت مع يارا و... -رأفت: خير يا بنتي -يارا: أنا مش عاوزة أشتغل مع خالد -رأفت: ايه -يارا :ولا مع ادهم كمان -رأفت: طب ليه؟؟؟ -يارا: انا عاوزة أبقى مديرة زي زيهم ، هما مش احسن مني في حاجة ، أنا من حقي يبقالي مكتب وموظفين وناس تبعي أشتغل معاهم مش اشتغل عندهم واتبهدل كل شوية منهم -رأفت: ممم... -يارا: أنا برضوه بفهم مش غبية ولا جاية من ورا الجاموسة عشان اتعامل المعاملة دي سواء من ادهم ولا خالد ولا حتى خالتي فريدة -رأفت: طيب هنتكلم في ده بعدين -يارا: انت وعدتني يوم ما جبتني هنا ان لو معجبنيش النظام أمشي ، وأنا مش عاوزة أعمل ده -رأفت: خلاص يا يارا ، قولتلك هنتكلم في ده بعدين ، يالا بينا الوقتي ع الفيلا -يارا: طيب ..................... في مكتب خالد ،،،، كان خالد يعاتب أدهم على ما حدث ، ولكنه كالعادة أنهى الحوار و... -خالد: انت مبسوط باللي عملته -ادهم: انا معملتش حاجة -خالد: ايوه ايوه ، اهرب زي عوايدك -أدهم: بقولك ايه ، ريح دماغك مني ، وخلينا نروح الفيلا -خالد: دايما لما تتزنق تدور ع أي حجة وتخلع -أدهم: انا تعبان ومش قادر اتكلم ، بعدين بقى ابقى عاتبني براحتك .. سلام ................... في فيلا رأفت الصياد ،،،، عادت يارا بصحبة عمها ، وطلبت من صباح أن تحضر لها الطعام في غرفتها و... -يارا: صباح بعد اذنك هاتيلي اكلي في الأوضة -صباح: حاضر يا ست يارا -يارا: شكراً -فريدة بصوت عالي : صبااااااااااااااح -صباح: ايوه يا هانم -فريدة: الزفتة دي بتقولك ايه ؟؟ -صباح: آآآ.. عاوزة الأكل في أوضتها -فريدة: أفندم ؟؟؟ اياكي تعملي كده -صباح: بس آآآ -فريدة: الأكل في السفرة مش في أوض النوم ، لو مش عاجبها تتفضل تاكل في المطبخ ، وده اللي عندي ، فااااهمة -صباح: حاضر يا هانم وصل عمر إلى الفيلا وهو يحمل هدية مغلفة في يده واستمع إلى ما قالته والدته لصباح ثم... -عمر من بعيد: ايه ده ؟ هي لسه ماما بتمارس مع يارا دور مرات الأب ده ، أنا طالعها ، يااا رب تعجبها الهدية .................. في غرفة يارا ،،، طرق عمر الباب ، فسمحت يارا له بالدخول و.. -عمر (طق...طق ...طق ) : ممكن أدخل ؟؟ -يارا: أه طبعا .. اتفضل -عمر: ازيك يا يارا ، ايييه ده ، مالك تاني ؟؟؟ -يارا: كتفي بس اتخبط في الأسانسير -عمر: يا ساتر يا رب وده من ايه ؟؟ -يارا: من أخوك -عمر: خالد !! -يارا: لأ التاني .. -عمر: أدهم !!!!! -يارا: أيوه ، أصل اخواتك مش هيرتاحوا إلا لما اتلف كلي بالشاش زي الموميا -عمر ضاحكاً: ههههههههههه ، معلش يا ستي هما أصلا باردين -يارا: اه والله -عمر وهو يعطيها الهدية : اتفضلي -يارا بدهشة: ايه ده ؟؟؟ -عمر: حاجة بسيطة -يارا: عشان ايه ؟؟ -عمر: من غير حاجة -يارا وهي تفتح الهدية : ده ... ده موبايل -عمر: اه ، ايه رأيك ؟؟ -يارا: بس ليه ؟؟ -عمر: بدل اللي اتكسر منك -يارا: بس انا مش محتاجة واحد -عمر: عشان خاطري مترفضيش الهدية ، ده انا تعبت عشان اجيبهالك -يارا: شكراً يا عمر ، بس مكنش في داعي ليها -عمر: لأ ازاي ، متقوليش كده ، بس مقولتليش ايه رأيك فيه ؟؟؟ -يارا وهي تفحصه: ماشاء الله حلو -عمر: ده تاتش على فكرة -يارا: يا سلام -عمر: اه وفيه واي فاي كمان -يارا: مممم... -عمر: عشان نتواصل بقى ونقضيها واتس آب .. فيس ، فايبر ، وكده -يارا: أهــا ... شكراً يا عمر ع الهدية ، وان شاء الله أردهالك -عمر: انا مش عاوز أي حاجة غير إني أشوفك مبسوطة وبتضحكي -يارا: ربنا يخليك ليا يا عمر ، والله انت اللي في البيت ده -عمر: عان تعرفي بس .. ............................ في غرفة المعيشة ،،، قرر أدهم أن يتجاهل يارا تماماً وألا يعيرها الانتباه ، بل ربما يتعمد اهانتها والتقليل من شأنها أمام الأخرين ... -أدهم في نفسه : عاوزة تعملي واحدة مهمة عليا يا يارا !! مش أنا اللي تكون في واحدة بتترسم عليا ، أنا هعرفك أنا مين ، وهوريكي مقامك كويس .. -أدهم: فيروووو -فريدة بتجاهل: هه -ادهم: ايه يا فيروو ، مالك زعلانة بس ليه ؟؟؟ -فريدة: يعني مش عارف -ادهم: لاص بقى يا فيرووو، مايبقاش قلبك أسود -فريدة: أووووف -أدهم: على فكرة أنا كنت بعمل كده بس عشان أعرف أظبط خطة انتقم بيها من البت دي -فريدة: ها ونجحت ؟؟؟ -أدهم: احم... آآآآ... -فريدة: أه طبعاً .. هتنجح ازاي وانت أصلاً كل همك تلاحقها -أدهم: يا ماما انتي فاهمة غلط -فريدة: لأ فاهمة صح ، ده أنت ادهم ، وانا عارفاك كويس ، اضحك على أي حد إلا أنا -أدهم: طب بقولك ايه عاوزين نظبط حفلة شاهي -فريدة: ناهد هتعملها البارتي خلاص في النادي -ادهم: نادي ايه بس يا فيرووو، عيد ميلاد شاهي السنادي هنا في الفيلا -فريدة باستغراب: نعم ؟؟ -ادهم: طبعااااا .. دي شاهي برينسس العيلة ، يعني لازم نظبطها ونخلي كل واحد هنا في الفيلا يعرف قيمته -فريدة وقد بدأت تفكر في اقتراح أدهم: هه -ادهم: أنا هعمل الحفلة وهتتفاجئي باللي هعمله ، وهتعرفي إني لسه ادهم حبيب قلبك -فريدة: أما أشوف ................ في فيلا ناهد الرفاعي ،،، -ناهد هاتفياً: بس يا فريدة جاسر خلاص ظبط الحجز في النادي وآآآ -فريدة مقاطعة: لأ يا ناهووود ، البارتي هتتعمل عندنا -ناهد: مافيش داعي يا فريدة -فريدة: ناهد ، شاهي دي أكتر من بنتي ، وأدهم مصمم على ده -ناهد: ادهم -فريدة: أيووه ، وانتي عارفاني بضعف قدام ابني حبيبي -ناهد : ممم... -فريدة: هاتلي بقى شاهي اما أفرحها بالخبر ده -ناهد: أوك ... شاهي يا شاااااااهي تعالي كلمي أنطك فريدة -فريدة: الوو .. أيوه يا شاهي -شاهي هاتفياً: انطي فيرووو ، ازيك ؟ -فريدة: تمام يا شوشو ، عندي بقى ليكي مفاجأة حلوة -شاهي: ها يا أنطي ؟ -فريدة: عيد ميلادك هيتعمل عندنا في الفيلا -شاهي : بجد ؟؟ -فريدة: طبعاااا ، وعارفة مين صاحب الفكرة -شاهي : مين -فريدة: ادهم -شاهي بفرحة : بجد يا أنطي ؟؟؟ بجد -فريدة : ايوووه طبعاااا .. يالا بقى جاهزي نفسك يا برينسس ، عاوزينك تكيدي الأعادي -شاهي : شور يا أنطي . ........... في غرفة المكتب بالفيلا ،،، كان رأفت يتحدث مع خالد ابنه حول قرار يارا و.. -رأفت: البنت جاتلي منهارة من اللي بتعمله انت واخوك فيها -خالد: يا بابا معملناش والله حاجة ، كل الحكاية إن أدهم آآآ... -رأفت مقاطعاً: أنا مش عاوز أعرف حاجة ، أنا كل اللي طلبته منك انت وهو انكم تتعاونوا معاها عشان تتعلم ، مش عشان تبهدلوها ، دي مش موظفة عندكم ، دي بنت عمكم وليها في الشركة زيكم -خالد بضيق : والله يا بابا أنا كنت بحاول أخليها آآآ... -رأفت : مافيش داعي لأساليبك معاها ، هي خلاص هتدرب معايا أنا ، وهيبقالها مكتب وطقم سكرتارية زيك وزي أخوك -خالد: اللي تشوفه يا بابا -رأفت: أنا عارف ان نيتك خير ، وانك عاوز مصلحتها بس برضوه انت اتعاملت بأفورة معاها ، واخوك حب يعمل مدير عليها ، وانتو الاتنين نسيتوا انها بنت عمكم قبل أي شيء -خالد: اها -رأفت: هي أمانة عندنا لحد ما يجي ابن الحلال اللي أسلمهاله بايدي وأجوزهاله وانا مطمن -خالد بخضة : هه .. تجوزها -رأفت: طبعااااا ، اومال يعني هسيبها كده -خالد: طيب ، ربنا يسهل ، عن اذنك بقى يا بابا -رأفت: وقول لأخوك يكبر كده ويعقل وبلاش حركات النادي دي مع بنت عمه -خالد: ان شاء الله ظل عقل خالد مشغول بما قاله والده عن تزويج يارا ... -خالد: يجوزها ، طب ليه ؟؟ ولمين ؟؟ ازاي يارا تكون لحد تاني ، ازاي ؟؟؟؟ ................ رن جرس الباب بالفيلا ، فذهبت صباح لترى من الطارق و... -صباح : ايوه يا فندم -الكابتن سليم: مساء الخير -صباح: مساء النور -الكابتن سليم: حضرتك الآنسة يارا موجودة ؟ -صباح: آآآ.. ايوه يا فندم -الكابتن سليم : طيب ممكن تديها خبر إني عاوز أقابلها -صباح: طب مين حضرتك -الكابتن سليم: أنا الكابتن سليم ، مديرها في النادي -صباح: اهلا وسهلاً بحضرتك .. اتفضل في الصالون ............. توجهت صباح إلى الطابق العلوي لتبلغ يارا بوجود الكابتن سليم بالأسفل ورغبته في مقابلتها و... -صباح : يا ست يارا -يارا: ايوه يا صباح -صباح: في واحد منتظرك تحت في الصالون -يارا : واحد ؟؟؟ مين ده ؟؟؟ -صباح: بيقول ان اسمه الكابتن سليم ومديرك في النادي -يارا بدهشة: الكابتن سليم ، طب أنا نزلاله حالاً .. صباح ممكن بس تقدميلي حاجة لحد ما أغير هدومي وانزل -صباح: اوك .............. ارتدت يارا ملابسها ونزلت لتقابل سليم في غرفة الصالون بالفيلا و.. -يارا: كابتن سليم ازيك -الكابتن سليم وهو ينظر لاصابتها : آنسة يارا ، ايه مالك ؟؟ ايه اللي حصلك -يارا: حاجة بسيطة ، متقلقش -الكابتن سليم: أنا قلقت عليكي .. آآآ.. قصدي الأطفال قلقوا عليكي لما اتأخرتي عليهم ومجيتيش في ميعادك التدريب -يارا: معلش يا كابتن ، زي ما حضرتك شايف كتفي بس تعبان شوية ، وأنا للأسف مكنش معايا موبايل عشان أبلغ حضرتك اني مش جاية -الكابتن سليم: ولا يهمك .. الف سلامة عليكي ، المهم انك بخير ، وأنا مبسوط اني اطمنت عليكي -يارا: شكراً يا كابتن ع زيارتك -صباح وهي تحمل صينية المشروبات : اتفضلوا -يارا: اتفضل يا كابتن -الكابتن سليم: شكرا يا آنسة يارا خرجت صباح من غرفة الصالون فنادى عليها أدهم و.. -أدهم: صباااااااااااااح .. صبااااااااااح -صباح: أيوه يا أدهم بيه -ادهم : هو في ضيوف عندنا النهاردة -صباح: ده الكابتن سليم جاي يزور الست يارا -ادهم: نعم ؟؟؟ سليم !!!!! -فريدة: في ايه يا أدهم ؟؟ انتي شايلة الصينية دي ليه يا صباح ؟؟؟ -صباح: كنت بقدم يا هانم حاجة ساقعة للضيف اللي جوا -فريدة: ضيف مين -صباح: الكابتن سليم جاي يزور الآنسة يارا -فريدة: نعم ؟؟؟ في بيتي وبدون اذني ولا حتى علمي -صباح: آآآآ... -فريدة مكملة : وازاي تستقبليه بدون ما تبلغيني ، حسابك معايا بعدين يا صباح انجري ع المطبخ -صباح: حـ...حاضر يا هانم -ادهم بضيق : أنا داخل أشوف الزفت ده بيعمل ايه هنا -فريدة: مش لوحدك ، لازم البت دي تعرف ان البيت ده له أصحاب مش سايب .................................................. !!!!!!!
أنت تقرأ
الفريسة والصياد
Romance.فريسة... . غَلَبَت الصَيَّاد ) أرغمتها الظروف أن تكون هي فريسته .. ولكن بشخصيتها المتمردة تفوقت عليه وغلبته .. فصارت أكثر من مجرد حبيبته ،،، .. بلى .. لقد سطرت بيدها أول سطور قصة حب كانت هي فيها فقط عشيقته ...... ! بقلمي / منال سالم