رحمة

بارت 1

#رحمة
#طيبة الربيعي
||البارت الأول||

بسم الله الرحمن الرحيم
{فَأَمَّا الْيَتِيمَ فَلَا تَقْهَرْ} (9) الضحى
صدق الله العلي العظيم

استشهد اخوية الوحيد وتركنا نصارع الحياة وحدنة اني وماما...بابا متوفي واني بعمر صغير قبل ما يقارب العشر سنوات... وهسه عمري 19 وكلشي مشفت من حياتي غير الفقر والقهر والتعب...

رغم كل هذا احمد ربي عندي سقف يحميني وبيت يأويني وام استمد حناني وطاقتي منهة... عايشين علة مكينة الخياطة ماما اجيبلي زبائن من معارفهة واني اخيط...'طيبة_الربيعي'

و في بعض الاحيان يجون نسوان يدكون بابنة لان صرت خياطة معروفة بالمنطقة...صرت اخيط عبي رياجيل همينة لكن ميجيبن رزق بكد الدشاديش والفساتين...

من عمري 14 سنة تعلمت الخياطة وقبل سنة يلة ضبطتهة...اخوية حبيبي الله يرحمة ويخمد روحة الجنة جان يشتغل حمال وهو الي اشترالي المكينة والتفاصيل المهمة...

منكسر ظهري بوفاة بابا بكد ما انكسر بأستشهاد اخوية...راح ضحية بيد الكفار الي ميتسمون "داعش" مع جماعة سبايكر الله يرحمهم...

اذكر شلون جان يجي من الشغل تعبان ومتكسر... مرات من يكون تعبان فد نوب يطلب مني افركلة بس اغلب الاحيان ميتعبني جان يراعي مشاعري اكثر مني...

مات بسبب الحكومة الفاشلة الي مو كادرة توفر الامان لهل شعب المسكين الي عايش علة الخبزة والبصل... مداعية علة احد بحياتي غير الحكومة كون الله يعثرهم ويشتت شملهم ويعيشهم بذلة واهانة مثل ما دمرو حياتنة...'طيبة_الربيعي'

اول شي سويتة من كعدت قريت دعاء الصباح وسويت ريوك لماما وشربتهة دواهة الي مبقة عليه كم يوم ويخلص وحايرة شلون اروح اجيبة...

لازم تكسي وفلوس ضبة وماعدنة غير الخمسين الف... الله يفرجهة الله كريم...

اسمي رحمة بس ملاكيتهة... الله رحمن رحيم لهذا السبب اني احمد الله واكول هذا اختبار الحياة لا اعتراض على حكمه سبحانه...

تريكنة بيضتين وجاي ووراهة فتحت الشباك وساعدت ماما تكعد عالكرسي كبالة...متعودة يومية الصبح تكابل السمة وتدعي وتذكر الله...واني يمهة اخيط...

بيتنة عبارة عن هول ومطبخ وحمام، وترك صغير جداً بي القنينة وبعض الشغلات البسيطة...الحمدلله رغم بساطتة مرتب ماخلي هوسة ابد...بالهول زولية بالشتة وبالصيف حصيرة...'طيبة_الربيعي'

وتلفزيون قديم صغير وستلايت قديم بس مكفينة الحمدلله...وبي الكنتور مال ملابس والفراشات... بالشتة نثلج وبالصيف نموت من الحر ماكو حل وسط...

مرات احس بالموت اكول هاي هية اني مراح اكدر ادبر الغدة الباجر بس الله يفرجهة ماعرف شلون...