القوارير

القوارير ٢

#القوارير ٢
زينب الموسوي
بعد اسبوع اخذ احمد اجازه السوق واشترى سياره بسيطه وبدا هشام يدرب حسين على السياقه وكلشي نريده هشام يكون اله دور بيه حتى ظلينا نخجل من افضاله علينا
مر على دخولنا امريكا شهر صاحتني امي العصر كان سبت ماعندي مدرسه دخلت غرفتها لكيت الكل موجود
شكو اليوم اجتماع عائلي
ابوي. گعدي بويه اسيل تدرين اخواتج من تزوجن جان عمرهن كل وحده ١٧سنه وذني نسوان اخوتچ اخذناهن جهال وانتي تشوفين عيشه امريكا اخاف عليج من الفتنه هنا والبلد كله فساد والزواج ستر للبنيه
بويه كلشي مافتهمت منو يتزوج
احمد خويه اجيبها الچ من الاخير هشام خطبچ منا وانتي شفتيه الولد. صار شهر واكف ويانا مثل الاخو والولد وحداني شاغول يفتهم مخلص دراسه بالعراق ويريد يعادل شهادته ويشتري بيت واحنا وافقنا حرام علينا نشوف هاي اخلاقه ودينه وعدنا بنيه بعمر الزواج ونرفضه
خوي احمد اني زغيره وبعدني بالمدرسه ماافكر بالزواج احجي يمه ليش ساكته شلون توافقون واني مااريد اتزوج
امي يمه اسيل اخواتج بعمرج وتزوجن والولد ماتلگين مثله ليش ترفضينه
يمه اني شفت بعمري حتى اتزوج صار شهر من عفت الصحراء تريدون تزوجوني وتبطلوني من المدرسه
حسين اذا على المدرسه تداومين هو الولد يريد تدرسين
اي مو هو بكيفه اداوم لو ابطل
احمد. اكلج ترى انطيناج مجال هواي تادبي وسكتي هشام يسوا راسج وموبكيفچ ترفضيه انطيناه كلمه زلم مو عبالچ بامريكا نترك طبعنا احنا ناس فلح البنيه من يندگ بابه ننطيها
كمت من الغرفه واني ابچي وجتي سعاد يمي
سعاد صدك ماتفتهمين اكو وحده يگولولها زواج وبيت لوحدج ورجال لاام ولااب تكول لا
سعاد هذا الحجي بالعراق مو هنا اني صار شهر وعرفت الدراسه احلى شي بالدنيا يازواج بهذا العمر
سعاد شوفي احنا بنات عشاير امهاتنا من عمر ١٢ تبدي تحضرنا للزواج لان نتزوج من وكت وانتي لان مخيم امج معالمتج على الزواج صح احنا هسه بامريكا بس نبقى على نفس التفكير وعدنا البنيه تاليتها زواج
الله يخليج سعاد فهميهم اني عمري حتى مو ١٦ والله مااريد اتزوج ولا اعرف شنو زواج الله يخليج فهمي احمد وخلي يرفضوه
ولچ شيرفضوه ابوج وافق وباليل يجي علينا ويحجون بالتفاصيل ولج هدوم جديده وحمره وكحله والولد من بغداد هسه يخليج تنزعين هاي الخيمه اللابستها وتلبسين مثل البنات بعمرج شو بله راويني حواجبج تدرين اذا اسويهن الچ تطلعين غير شكل وعندي حمره خلي اجرب اخليلچ
اخاف عيب من ابوي واخواني
عيب شنو بعد انتي انخطبتي شوفي اذا طلعتي تشترين حلقه اخذي وحده ثگيله وعريضه حتى البنات تشوفها بايدج يجوز اني اروح وياج واختارلج
بس اني مااريد اتزوج بعدني زغيره
ولج كلنا بالبدايه ماردنا الزواج بس بعدين كيفنا اسكتي وتزوجي وتدللي على هشام راح يطلعج ويعلمج سياقه هاشكلتي اسوي حواجبج
اوكي سويهن
گمتي تحجين بالاوكي من هسه
هذي كانت موافقتي على الخطوبه هسه اكيد تريدون تعرفون منو هشام
شاب عراقي عمره ٣٣سنه يعني ضعف عمري من بغداد متخرج من القانون بالعراق وعنده اخوان واخوات بالعراق كان بسوريا واصل قبل سنه لامريكا متدين ملتزم
باليل لمن اجى على اهلي اتفقوا الزواج بعد عشرين يوم لان عطله جايه وحتى يجهز شقته بس هشام اصر يسمع موافقتي على الزواج مع ان ابوي واخواني بلغوا اني موافقه
وكنت خلف الباب اسمع
هشام ميخالف حجي اسمع موافقتها هذا زواج والبنيه زغيره يمكن تكول اليوم موافقه وباجر تغير رائيها
جتي امي اخذتني للصاله تصدكون لحد الان اني مامقتنعه بس شي مخليني ساكته يمكن النصيب سالني ابوي
بويه اسيل هشام اتقدملج واحنا وافقنا ونريد نقرا الفاتحه نقراها لو لا
بكيفك بويه (كنت مدنكه ) بس اريد ابقى بالمدرسه
هشام تبقين بالمدرسه وهاي گدام اهلج اگولها واي شي تريديه كوليه واي سوال عندج اسالي
ماحجيت وياه ولا حتى شفت وجهه والله العظيم لحد ذاك اليوم مكنت مركزه بوجهه وملامحه وادري هو مكان يريدني على شكلي بقدر مكان يريد الاستقرار واعرف هو خوش رجال لكن الزواج مجرد التفكير بيه يخليني اخاف واتردد وحاولت ثاني يوم الصبح افهمهم مااريد اتزوج محد سمعني
والشي الي خلاني اسكت هو هشام كان يعاملني بدلال وبدل مااحس اني خطيبته حسيت اني بنته خطوبتي مالتقيت بيه او گعدنا سوا وحتى لو التقينا مااعرف شراح اگول لاشايفه افلام او مسلسلات ولا سامعه قصص حب عمري ١٣كنت بالريف وتارك الدراسه بالخامس ابتداني طلعت للصحراء سنتين شجره مشايفه وصلت لامريكا خضار وانفاق وشوارع وجسور ردت اعيش حياة مختلفه لكن اهلي اصروا اعيش حياة بنت الريف حتى واني بامريكا
الي شفته بهشام كان يختلف عنه بطباعه من احد يحچي وياه ينتبه عليه ويحسسه الي يگوله مهم وميعتبر الخطيبه او الزوجه شي مخجل لازم ميگول اسمها او يدلعه گدام اهلها واخوانها
واني نشات بيت مكنت طفله مدللة كنت الاخيره صح بس امي عدها سبع بنات غيري وخمس ولد متلحك تهتم وتدلل غير شغل البيت والزرع
الزواج بهذا العمر صعب انتم شنو رائيكم