Love Songs for No One

10 | teN

Nilapit ni Kaye ang magkahawak nilang kamay sa labi nito. "Matagal ka na palang willing? From the start pa lang?"

Tumawa si Rayne. "Napagkwentuhan lang namin 'yon kasi alam naming hindi magkakatotoo!" Binawi ni Rayne ang kamay ngunit hinabol ito ni Kaye, hinawakan muli. "Anong alam kong mangyayari 'to. . ."

"Ikaw, ah. Pinahirapan mo pa ako."

"Hindi kita pinahirapan, ah! Ang bilis-bilis na nga nito, nakaka-stress."

Kinulong ni Kaye ang hawak na kamay ni Rayne sa dalawang kamay. "Please, huwag naman magbago isip mo."

"Ay, wala na, nagbago na isip ko."

"Uy, saan? Hindi na pwede! Touch move na!"

"Wala na, nagbago na isip ko!" ani Rayne, tumigil sa paglalakad.

Kaye pouted. Kunot ang noo. Napangisi si Rayne.

"Ayoko na pala ng fries. Ice cream na lang pala." Tinuro ni Rayne ang Zero Degree. Hinatak niya si Kaye patungo sa kiosk.

"Hi Ma'am, Sir," bati sa kanila ng dalawang babae sa loob ng kiosk.

"Libre ko," ani Rayne.

Umangal si Kaye, syempre. Mas gusto nitong gumastos para kay Rayne – ngunit gusto ring gumastos ni Rayne para kay Kaye. Dapat fair. 

Para hindi na ipilit ni Kaye ang 1,000 peso-bill kay ate na magpe-prepare ng ice cream, yumuko ito kaunti, tinapat ang kaliwang pisngi kay Rayne. Tinuro nito ang pisngi nang nakangisi.

Hinalikan ni Rayne si Kaye sa dimples.

End of discussion.

Si Rayne na ang manlilibre, may kaunting kahihiyan dahil 'yong itsura ng dalawang ate sa Zero Degree, hindi malaman kung anong ire-react.

Ngumiti na lang siya, nanghingi ng paumanhin telepathically kung cringe man sila panoorin. 

Dahil walang alam si Kaye, si Rayne ang nag-order. Isang scoop ng Bubble Gum Blast para sa sarili at Eskimo Choco Decadence, ice cream cake para rito.

Tumayo sila sa gilid habang hinihintay ang order. Masayang-masaya si Rayne sa panonood ng pag-prepare ng isang ate ang ice cream nila nang bumitaw si Kaye sa kanya at umakbay. Ang akbay ay unti-unting gumalaw. . . hanggang sa naging yakap ito gamit ang isang kamay.

Siguro kung sa iba ito, kakawala si Rayne. Hindi talaga siya sanay nang sinisira ang personal space niya.

Pero kay Kaye? Hinayaan lang niya. Gustong-gusto pa nga ng katawan niyang mapalapit dito.

(Ang landi.)

Kumalas lang sa yakap nang marinig ang mahinang tikhim ng isa sa ate. Pagkakuha ng order at naupo sa nakalaang table para sa customers ng Zero Degree, pagkatapos ng akbay, balik holding hands ulit.

(Ang landi talaga.)

"Rayne. . ."

"Hm?"

"Pinag-brownies mo ako kanina, then ngayon, chocolate ice cream cake. . . Puro matatamis. Puro delikado sa lalamunan." Ngumuso si Kaye, mapaglaro ang mga mata. "Sinisira mo ata boses ko? Sabihin mo na lang sa akin kung ayaw mong umalis ako for recording bukas."

"Hala! Hindi ko sadya!" Tigil. "Hindi ko sadyang mapansin mo."

Tawanan.

(Ang landi nga kasi talaga.)