عيشة سعيدة

2

#عيشة_سعيدة2
Shahd Alsalman

كعدت من النوم احس بتعب وجسمي متكسر
بس هذا مو بيتنا ولا هاي غرفتي
اسمع صوت جهاز يسوي طوط طوط طوط وشي بيدي ينغزني والغرفة اللي اني بيها بيضة فتحت عيني اكثر اريد اميز اني وين واحس راسي ثكيل سمعت وحدة تكلي حمدلله على السلامة جان شكلها ممرضة او طبيبة  هيج مبينة من هدومها
كتلها وين اني كالت بالمستشفى وهسة الدكتور يجي
فات الدكتور وبفتحة الباب شفت عمتي وخالتي بس مدا اعرف ليش اني هنا

- حمدلله على السلامة
- ليش هنا اني شنو صار
- متتذكرين شي
- لا
بس غمضت شوية وتذكرت اخر احداث صارت ..

صارت ساعة 8 ونص بالليل وماكو احد ومبقى شي لحضر التجول وين راحو يا ربي
اندكت الباب واني متعودة ما افتح الباب من اكون وحدي اهلي علموني هالشي بحكم الوضع الامني
واذا يكونون هم ع الباب فعدهم مفتاح
سمعت صوت خالتي سارة وزوجها فتحت الباب كتلها هلو خالة بس اول مرة اشوفها هيج عصبية ومتوترة تخيلت ممكن تكون متعاركة ويا زوجها لان هو هم نفس الحالة واساسا هو شوية منطوي مو كلش مختلطين بي حتة خالتي حسب كلام اهلي انه بعدما اتزوجت قلت جياتها والتهت ببيتها وبحكم زوجها شوي عصبي ومتزمت فما عندي ذيج الميانة وياها
كعدو وسالتهم شتشربون مقبلو وكالو تعالي اكعدي بس الغريب ما سالو عن اهلي ولا حجو شي
فكتلهم انه اهلي طلعو وعلى جية بس تاخرو وبصراحة بالي يمهم خالتي هزت راسها كأنو تعرف ورجل خالتي طلع جكارة وبدة يدخن بشراهة
ساكتين كلنا وما تقبل خالتي اكوم من مكاني
بعد ساعة اندكت الباب كتلهم يمكن اجوي بطريقي للباب تذكرت عدهم مفتاح رجعت لخالتي كتلها مو هم وما افتح الباب تعاي وياية
رجل خالتي كام وكال هسة اشوف منو
فاتت عمتي منال وزوجها ركضت عليها بوستها كلش احبها وخاصة زوجها معتبرني بنتة وهم عدهم ولد اكبر مني و مشايفتة عايش
بالبصرة ويا بيت جده لان عمتي وزوجها عدهم دراسة بذيج الفترة وشغل همين ببغداد
استغربت من جيتهم بذاك الوقت وهمين مسالو عن اهلي وكعدو كلهم ساكتين
بعد ربع ساعة كلبي عصرني حيل وكفت وكتلهم انتو ليش جاين وليش ساكتين وليش وجوهكم هيج
ما اعرف احساس او تصرفاتهم او اني اساسا خايفة جنت سالتهم اهلي صايرلهم شي
محد جاوب بس عمتي متحملت وبجت لان من اجتي جان واضح عليها البجي من صوتها وعيونها
عطت بيهم احجو شبيهم احس كل شي بية وكف حتة النفس ما اكدر اجرة
رجل عمتي لزمني تعاي كعدي ماكو شي شوية بالمستشفى وتعبانين صارلهم حادث صغير وباجر نروحلهم كمت ابجي واصيح واريد يودوني بس هم انتظرو انه يصير حظر تجول حتى ما يخلوني اروح
بقيت الليل كلة ابجي صليت قريت قران بس نار بكلبي واحس صار شي اكثر من الكالو وما بيدي لا اروح ولا اهدى
طلع الصبح بطلعان الروح كومتهم بسرعة وهم منايمين همين وكضوها وياية كل الليل
رحنا للمستشفى وسالو على الغرفة من سالو كالو البقية بحياتكم اني سامعة هاي الجملة واعرف هاي تنكال لمن يتوفى احد بس جذبت اذني وكلت هاي مو لعمو مديحجي وياه بقيت صافنة واحس كلبي دكاتة مسموعة وجسمي يرجف واباوع لعمتي وخالتي يصيحن ويبجن وحتى رجل خالتي اللي اشوفة رجال نحس وقوي بجة ورجل عمتي
الا اني مدا اسوي اي شي وساكتة تقربتلهم واحس خطواتي ثكيلة بس ردت احد يكلي ماكو شي وهذا حلم مو الا حلم ارضى حتى لو كابوس
كتلها عمة ومجاوبت بس تبجي باوعت واحس بدوخة رحت لخالتي
خالة شنو صار بس مدا اسمع صوتي
حسيت عمو حضني ويبجي واني فاتحة عيني بس شفت كل شي حواليا اسود و ما اتذكر شصار ..

رجعت للواقع ورجعت لصوت الطبيب اللي ديصيح اسمي واني صافنة ومدا اكدر اصدك
- هذا حلم مو اني هنا بحلم مو ؟؟؟
- اهدي واسمعيني
- لا ما اسمعك كعدني خلصني من هالكابوس
كمت اصيح بابا ماما تعالي ماما وبعلو صوتي حاولو يلزموني ويهدوني شفت بايده ابرة بقيت اصيح وخايفة وابجي بعدها محسيت بشي بس احس رخى جسمي واصيح بس ما يطلع صوتي ...

طلع الدكتور وكال لعمتي صدمتها مو سهلة ويمكن نضطر انه نخليها تاخذ جرعات مهدىء زايدة والمشكلة عمرها صغير و ممكن مستقبلا يأثر عليها ويسببلها هبوط او شي مزمن بس ان شاء الله بمساعدتكم تكدر تتخطى هالازمة ؛  تكوم بالسلامة

بعد شهرين ..

بقت خالتي تتناوب ويا عمتي على الجية ويباتون يمي رفضت انه اطلع من بيت اهلي ولزمتني حالة كأبة حادة ما اقبل اشوف احد ولا احجي مجرد كاعدة بغرفتي يا انام يا ابقى كاعدة وصافنة
قررو عمتي وزوجها انه يكضون فترة الدراسة يمي وبعدها ياخذوني وياهم للبصرة اني جنت بعالم ثاني
احس خسرت كلشي بلمح البصر محتاجة الهم بعدني مشبعت منهم ولا شافوني متخرجة ولا عروس مثل مجان بابا يحلم وماما مشافتني واني جبيرة شلون هيج صار وكل يوم الوم نفسي ليش كتلهم ع الدوة اني ما احب اطلب منهم حتة لا اتعبهم ليش كتلتهم بيدي كل يوم اتمنى الموت لان اني ذبحتهم
جنت اخاف اسال عن سبب وفاتهم واصلا ما اكول الله يرحمهم صعبة بلساني وكلبي ميتحمل اكولها

اجتي المدارس وما جنت اريد اداوم مالي واهس شي لحد ما زوج عمتي حجة وياية وكالي
اذا تحبيهم كملي وواجهي كل شي وارضي بالقدر واحمدي الله على كل حال ارفعي راسهم لا تحرميهم من نجاحج كملي وين ما وكفتي حتى ميتاذون اذا جنتي تحبيهم
باس راسي وتركني وطلع من الغرفة وبقيت لوجه الصبح ابجي سمعت صوت الاذان مسحت دموعي وبست صورتهم ورحت توضيت وصليت ودعيتلهم وتقبلت هالمصيبة لان اريدهم مرتاحين مثل ما ريحوني واريد محد يحجي عنهم ويكول من ماتو بنتهم تركت كل شي وما رفعت راسهم
بهاي الفترة اكلي قليل ضعفت كلش والدوخة متفاركني وكم مرة يصير عندي اغماء بسبب سوء تغذية وحالة نفسية و من وقتها صار عندي هبوط ضغط نفسي كل ما اتوتر يصير عندي دوخة لحد ما اوصل مرحلة الهبوط والاغماء
نزلت الصبح الهم لكيتهم كاعدين ديتريكون مصدكو طلعت من الغرفة وكايمة الصبح ودا احجي وياهم كتلهم صباح الخير
صباح النور هلا بشوشة
وكامت عمتي بوستني وكعدتني وسالتني شاكل
كتلها اني جيت اكللكم انه اريد اكمل دراسة وابلش اداوم من الاسبوع الجاي عمتي كيفت وشجعتني وعمي لزم ايدي وباسها كالي سبعة ورافعة راس اهلج
من جاب سيرتهم بجيت حيل حضنوني وبعد شوي سكتت وكمت عنهم رجعت لغرفتي رتبتها هوسة وصارلي هواية تاركة كل شي
طلعو للدوام هم كمت نظفت ولميت البيت ورتبت الغرف بس مكدرت افوت لغرفة اهلي
بعدين متحملت اشتاقيت لريحتهم وفراشهم فتت نمت على فراشهم واتذكر شلون جنت اجي بالليل انام يمهم و اعوف فراشي والا اغفى بفراشهم وشقانة اني وبابا من نتصارع ويظل يدغدغ بية ويضحكني وماما من تطلع هدوم شتوية او صيفية وتخليني اساعدها وتكعد تحجيلي قصة كل بلوز او تيشرت او شي يذكرها بكليتها او بيت اهلها جانت حياتي حلوة ليش هيج راحو وخلوني وحدي اني مشتاقة الهم مشتاقة حتى اشوفهم نايمين يا ريت لو مشلولين واداريهم والله بس اعرف نفسهم بالدنيا ووياية ليش انحرمت منهم بجيت وبقيت احجي وياهم شون كدرو يعوفوني ويروحون وليش هيج اذوني بروحتهم وما فكرو بيا بقيت ابجي بحركة واني اباوع لصورتهم وحاضنتها لحد ما غفيت .