Dreamlovers: Duncan And Melina (PREVIEW ONLY)

Chapter Three

HINDI napigil ni Melina ang pag-ikot ng mga mata nang matunghayan ang tanawin sa harapan ng kabilang porch ng duplex. Sa lounge chair doon ay prenteng nakaupo si Duncan, may binabasang broadsheet at naka-boardshorts lang ito ng kulay berde, wala itong pang-itaas.

Ibinaba nito ang diyaryo pagkatuntong niya sa ibaba ng porch at bumati sa kanya. "Good morning, lovely!" malapad ang ngiting sabi nito at inilapag pa ang diyaryo sa tabi nito na para bang gusto nitong ipakita ang katawan sa kanya.

Kailangan niya namang aminin na impressive ang dating ng katawan ni Duncan. Wala itong bakas ng taba at pantay ang kayumangging kulay. He's got a washboard abs and chiseled chest. Nakamit siguro nito ang magandang built dahil sa kaka-ehersisyo sa umaga. Kung minsan ay nakikita niya itong nasa porch at nagpu-push-up o sit-ups, mayroon din itong maliit na barbel doon. Minsan na rin niya itong nakitang galing sa pagtakbo sa gilid ng dagat. At kadalasan ay hubad-baro ito at ngingiti-ngiti sa kanya kapag nakikita niya. Malandi talaga! Si Dixon nga ay hindi pa niya nakikitang topless kahit nag-e-exercise din ito.

Hindi niya na lang ito pinansin at tuloy-tuloy ang kanyang paglakad palabas ng bakuran. At kahit nakalayo na siya mula sa duplex ay parang nararamdaman niya pa ring ihinahatid siya ng tingin ni Duncan. She knew she looked s3xy in her short and high-waisted pale orange skirt and sleeveless light gray top. Normal lang sa mga lalaki na tapunan siya ng tingin kung naka-postura siya at hindi naman siya naaalibadbaran sa ganoon. But Duncan's gaze was lingering. Ni si Dixon ay hanggang sulyap lang sa magagandang parte ng kanyang katawan na nai-enhance ng mga s3xy outfits, hindi ito tumitingin nang matagal.

Napasimangot si Melina. Kung may pagnanasa man sa kanya si Dixon ay tila kontroladong-kontrolado nito iyon. Hanggang holding-hands at akbay lang ito kung magkasama sila, dalawang beses lang siyang hinalikan sa mga labi, mababaw pa at mabilis. Parang wala siyang maramdamang intensity sa mga ginagawa nito sa kanya. Parang... parang ginagawa lang nito ang mga iyon dahil kailangan, dahil mabait ito sa kanya.

Napabuntong-hininga siya. Oo nga't nagdi-date na sila ni Dixon ngunit sa totoo lang ay parang wala siyang nararamdamang development ng samahan nilang dalawa. She couldn't even feel any thrill or excitement. It was almost bland.

𝐻𝑒'𝑠 𝑗𝑢𝑠𝑡 𝑡𝑜𝑜 𝑛𝑖𝑐𝑒 𝑡𝑜 𝑟𝑒𝑗𝑒𝑐𝑡 𝑚𝑒, maktol niya sa isip. Kung minsan ay naiisip niya ang posibilidad na iyon at gusto niyang maawa sa sarili. Ngunit hindi siya dapat madismaya. Kakaumpisa pa lang naman ng relasyon nila ni Dixon, nag-a-adjust pa lamang sila sa isa't-isa. Ngunit bilang babae siguro ay naiinip na rin siya, lalo pa't si Dixon nga ang mapapangasawa niya balang-araw. Sana lang ay hindi matagalan ang adjustment period nila dahil handang-handa na siyang lumagay sa tahimik. Ayaw niyang lampas sa edad na trenta pa siya mag-aasawa! As a matter of fact, she had decided long ago that she would settle down before hitting twenty-eight. At heto, nalalapit na siya sa dulo ng kanyang self-imposed timeline.

Kinatanghalian nang araw na iyon ay nagpunta si Duncan sa Stardust. May binili ito roong tatlong polo at isang pantalon. Sina Lacey at Henri ang umaasikaso sa binata at patingin-tingin lamang si Melina sa mga ito.

"Pasado alas-dose na, kumain na ba kayo?" narinig niyang tanong ni Duncan sa dalawang babae nang makapagbayad ito sa counter. "Kung hindi pa, tara na'ng kumain. My treat."

"Ay! Tapos na kaming kumain ni Henri, kanina pang eleven," nanghihinayang na sagot dito ni Lacey. "Si Melie ay hindi pa."

Sabay-sabay pang tumingin ang tatlo sa kanya.

"Si Ate na lang ang yayain mo," sabi ni Henri kay Duncan. "I'm sure gutom na 'yan."

Bago pa siya nakaiwas ay mabilis na lumapit sa kanya si Duncan. "Hey... can I treat you to lunch? Bayad-atraso sa nabasag kong baso," nakangiting alok nito sa kanya.