PORT THE EXPLORER!

PORTuges 5

"Port! Nandito mga kaibigan mo!" Pagkarinig na pagkarinig ko kay Mama at sa tawanan nila Rhino at Jhax sa may sala ay agad kong inempake ang aking bag. Naging palagay na rin ang loob ni Mama kina Rhino at Jhax dahil napansin niya rin na mabuting mga bata sila.

Pagkababa ko kung nasaan sila ay nadatnan ko si Rhino na umiinom ng gatas.

"Pinainom sa akin ni Tita Perla yung gatas mo dahil baka matae ka na naman daw." sabay ngumisi si Rhino.

Malungkot na napatingin ako kay Mama at nginitian niya lang ako.

"Para sa iyo rin yan Port, tawag diyan eh Lactose intolerant. Your body reacts differently to dairy products." singit ni Jhax na may hawak ding baso ng gatas.

"So saan naman ang lakad niyong tatlo ngayon?" tanong ni Mama.

"Adventure po Tita Perla!" excited na sagot ni Rhino. Nakalimutan ko palang nabanggit na natanggal na ang benda sa ulo ni Rhino.

"Wow! Saan naman ang adventure niyo?" nagtatakang tanong ni Mama.

"Hindi ko po alam kay Rhino, Tita." singit ni Jhax. Lumingon kaming lahat kay Rhino na bakas sa taas ng labi ang foam galing sa gatas.

"Secret po." sabay ngisi ni Rhino.

"Basta mag-ingat kayo." patango-tango si Mama. 

Tumayo si Rhino at linapitan ako sabay akbay sakin. "Tita, meron kami ni Port. Laging handa to." sabay palo saking dibdib. "Di ba tol?"

Tumango-tango na lang ako.

"Oh siya, alis na kayo at sana maging masaya yang adventure niyo."

Sunod nun ay isa-isa kaming nagpaalam kay Mama at naglakad na patungo sa sa terminal ng jeep. Gaya ng dati, ako lang ang nagdala ng bag.

"Manong, ito po ba yung sakay papuntang beach? Yung malapit lang? Kung saan naliligo yung karamihan?" tanong ni Rhino sa driver. Noong una ay hinanap pa nung driver kung sino nagsalita at nang napatingin siya sa gilid niya sa bandang ibaba ay nakita niya kaming tatlo na nakatingala sa kanya.

"Oi! Mga bata, bakit naman pupunta kayo sa beach na kayo-kayo lang?" kuryosong tanong nung driver. "Maraming nalulunod ngayon sa dagat. Marunong ba kayong lumangoy?"

"Di po naman kami maliligo." mabilis na sagot ni Rhino.

"Di tayo maliligo sa beach?" dismayadong tanong ni Jhax.

"Marunong ka bang lumangoy?" tanong ni Rhino.

"Oo!" pagmamayabang ni Jhax.

"Eh ikaw Port, marunong ka?" tanong ni Rhino sa akin at tumango ako.

"Nakalimutan ko, trinain ka na pala ni Tita ng survival skills." malungkot na komento ni Rhino.

"Paano yan boy, ikaw lang pala hindi makakaligo." pang-aasar nung driver.

"Tara! Hindi na tayo pupunta sa beach." pagmamaktol ni Rhino.

"May dala akong inflatable na life vest." singit ko at napanganga ulit sina Jhax at Rhino.

"My boy! That's my boy! Pati life vest naisip mong idala?" pagmamangha ni Rhino.

"Saludo na ako sa iyo Port." singit ni Jhax.

"Inisip ko kasi kung saan tayo pwedeng pumunta kaya hinulaan ko lang na baka gusto niyong magpunta sa dagat." sagot ko.

"Oh, paano ba yan Kuya, tara sa beach!" pang-aasar ni Rhino sa driver.

"Sige sakay na kayo sa loob at ibababa ko kayo pag malapit na tayo sa beach. Pero maglalakad pa kayo bago niyo makita beach dahil hindi naman tumatawid ang jeepney sa dagat."