قلب الصخر

الجزء السابع عشر

البارت السابع عشر
قلب الصخر

ريم...
فتحت عيوني و حسيت بالم بمعصمي و اشو هاي الدنية ظلمة هاي شنو ايدي شاديها ... و عيني هم ... صرت اعيط و اريد افتح ايدي و جان ينجر شعري و واحد گلي اشششششش بلا عياط اسكتي  ... ترة هذا المسدس افرغه براسج ..افتهمتي ...  اني كمت ارجف كتله زين اخوية وووين عفية الله يخليك لا تكتلوا ... انتو تريدون فلوس... ؟ خابروا ابوية ينطيكم والله بس لا تكتلوا .... جان يكول اذا تريدين اخوج يعيش و منكتله اسكتي و لا حرف تنطقين و لا تصرخين افتهمتي  ... و عافني و طلع ...
و ظليت ابجي ... اني لساني ممصدكة انه سامر مو اخوية ... و ابوه مو ابوية ... زاد البجي و ما اعرف على شنو ابجي ... ابجي ع الكذبة الي عشتها  ١٨ سنة ... او على حقيقتي اني بنت زنى ... او مصيري ما اعرف شنو بايد هذولة .. ما ادري ... زين صخر ... صخر ... كافي اعيش اوهام ... اني مثل ما كالت ام صخر ما اناسب ابنها ... و اصلاً ما استحق اعيش... بس لييش سوت هيج امي ..؟ ليش اهلها ما خلوهاتسقط حملها ... لو يكتلوها  حتى يغسلون  عارها و جان ما اجيت اني ... ليش ...
ظليت ابجي و ابجي وما حسيت بروحي و نمت ....

سامر ...
اني ما ادري وين اني ... شادين عيني و ايدي لافيها من ورة بس اسمع صوت رياجيل بعييد ..لازم اخلص روحي و افكر شلون اطلع  من هنا حتى اشوف ريم وين ...
سمعت الباب انفتح ... و تقرب جسد عليه ... جرني من شعري .. گلي نهايتك على ايدي ... كتله انتو منو ..؟ و شتريدون مني ... وين اختي ...؟ والله لو صار بيها شي ... والله ازوعكم الحليب الي رضعتوا ... جان يضربني راشدي قوي .. كلي اسكت لك ... حيوان ...
و جان يعوفني و يطلع ...
و اني ظليت احاول افتح الي بايدي ماكو ... مكدرت ...

رقية ....
اجة دوري و لو متاخر بس لازم تتعرفون علي ... انه رقية .. عمري ١٩ سنة ... مو طويلة و مو قصيرة ... سمرا و عيوني وساع سوود ... اعيش بالعمارة ... انه القدر لعب بية لعب ... ما نصفني فد يوم ... جنت اعيش وي امي و ابوي و عندي خوان ٢ حالي حال اي بنت اهلها يحبوها و مدلليها ... خواني اكبر مني بچثير ... احنه ناس بسطاء ابوي خلفة و خواني عمال وياه يطلعون الصبح و يرجعون باليل ... قبل خمس سنوات امي وابوي راحوا زيارة لكربلا و انكلبت بيهم السيارة و ماتوا همه و  الركاب الوياهم ...
و من هالنقطة بدت حياتي تتغير ... خواني الشيطان لعب بعقلهم و عافوا شغل الحلال و بدوا يشتغلون بالحرام ... لو يبيعون مخدرات لو بيتنه يجيبون ناس تريد تفعل الموزين و المنكرات و ياخذون فلوس منهم ... جنت زغيرة و ما افهم ... يكولولي ذوله صدكانه و جايينه خطار يباتون و يرحون ثاني يوم ...بالبداية صدكتهم ... و جنت اكييف اسويلهم عشا و ا اودي الهم ... بس من كبرت و صار عمري ١٥ بديت افتهم هذوله ناس ميعرفونه و لا نعرفهم ... و شفت كم مرة من يطلعون ينطون لاخوية فلوس ... سالت اخوي كتله هذوله ليش ينطوك فلوس ... و ليش صدكانك يومية يجون ... و هذول هواي صدكان عندك ... گلي هذا الموضوع ما تدخلين بي افتهمتي ...
عرفت انه الموضوع الي براسي صح خواني يشتغلون بالحرام و فاتحين بيتنه هيج و هاي الفلوس الي اني اكول الحمدلله الله رزقهم بعد وفاة ابوي و امي .. هاي فلوس حرام ... دارت الايام و انه اشوف اخواني زادت حالتهم كاموا يشتغلون بالخطف و يجيبون بالبيت الناس الي خاطفيهم و ياخذون عليهم فلوس ..
مكدرت اعترض و احجي لان مرة حجيت وية اخوي الزغير و جان يلزمني يدگني كتل و ما خلة بيه مكان صاحي ... فكرت انهزم و اعوفلهم البيت ... بس وين اولي ما عندي غيرهم بحياتي ... لا خالة و لا عمة و لا كرابه ... لذلك كعدت و سكتت ... انه اعترف بروحي جبانه و انه جبت التعاسة لنفسي ... بس شنو الي بايدي ... ما عندي غير اختيار لازم  اظل و اكون طامسة بالحرام وياهم ... قدري هيج شسوي ...
قبل ثلاث شهور جانوا جامعين اصدقائهم و مسوين گعدة يشربون السم و جايبين بنات مو زينات و حتى مخدرات جايبين ... انه حبست روحي بالغرفة و خفت اطلع ... بيني و بين جهنم بس باب ... صرت الوب بالغرفة بس اريدهم يطلعون ... اسمع ضحكهم و لغوتهم .. و الطرب ... كلت لازم اكولهم باجر بعد ميجيبون شغلهم للبيت ... طبهم مرض اذا راحوا لاي مكان و شربوا لو تعاطوا مخدرات بس مو هنا ... ردت اروح للحمام .. ومكدرت ابقة لازم اروح .. طلعت على كيفي و مثل البايكة بوكة حتى لا احد يحس بية و يلمحني ... فتحت باب الحمام وجان اشوف واحد هناك ... ضخم وعينه حمر و مبين سكران و غادي بخته .... گلي وينج تعاي ... انه ردت انهزم مكدرت و جان يسد حلكي و ...... ذبح طُهري و عذريتي ... و قتل الانوثة البية ...
و هاي انه محد من اخوتي درى بالي صار لان تايهة و ميصدكوني لو كتلهم رح يجذبوني و المن اتهم اكولهم صديقكم الي جان ميندل دربه و شوكت احجي وياهم لا ليللهم ليل و لا نهارهم نهار ... ٢٤ ساعه صاروا مو بوعيهم ... ومستمرين بافعالهم النجسة ....
وانه اعرفهم لو كتلهم رح يذبحوني لان همه براسي شرفاء و ناس عدها ناموس ... بس من يم نفسهم لا همه ديرفهون عن انفسهم و هذا شي عادي ... سكتت و ما كلت لاحد و لا راويتهم نفسي خلال هالايام ... لان حالتي استجد بيها شي .. دورتي الشهرية انقطعت و يمكن انه حملت من هذاك الحيوان ... وانه هسة لازم اشوفلي حل  .. لان بطني دتكبر ... و وضيعتي صارت كولش مبينة ... حاولت اذبه منزل ... كمزت و اشيل ثكيل و ما فاد هسة صار اكبر و حايرة بي فكرت اروح جدة و احجيلها و بلكت تذبه بس خفت دكول لاخوتي لان ولدها اصدقاء اخوتي و بنفس الشغل ... و ما عندي لا جيران و لا احد ...احجيله ... وحاولت اموت نفسي و خفت ... كرهت نفسي ... شأسوي ما ادري ...
البارحة شفت اخوتي باليل جروا واحد معصب و شادين   ايده بس مبين من هندامه هو موش منا ...
ويصيح وين اختي و وين اختي ... يا ربي هذوله اخوتي بس لا كتلوا اخته ... ؟ طببوا بالغرفة الي دائماً يدخلون الناس المسلبيهم بيها .. و قفلوها و طلعوا ...
فد يوم الله رح يكلب هالبيت على روسنا و نستاهل والله بلكي الله ياخذني اني هم و يمحي سوئتي ....

صخر ...
دك تليفوني هواية ... كلت خلي افتحن خاف مريتي محتاجة شي ... فتحته و شفت مكالمات منها هواي ... ادك عليها ماكو ... متشيله ... كلت خاف بيدها شغلة و متكدر ... دكيت ورة دقايق ... و ماكو ... بديت احسب غير حساب ... كلت خلي ادك على حسين ... شاله حسين و صوته معجبني ...
صخر ... ها حسين شلونكم هلي شلونهم ...
حسين ...: شيخ اريدن اكولك شغلة ..
صخر و ببال مشغول ...: كول شكو حسين ...
حسين ..: حرمتك يا شيخ انهزمت وي ابن خالها ...
صخر( و براكين الغضب فاضت بعينه )  ..: شنووووووو ؟ احچي عدل يا الاغم ... وين ريم ..؟
حسين ...: شيخي انه شفته اجه ابن خالها و خذاها بسيارته ... و انهزمت وياه حتى اخذتلهم صورة بالموبايل
صخر ... ردت افترس الحوالية افتراس ... و اكل اوادم ...هذا يحجي عدل لو يضحك علي ... انه صخر ابن جبار ريم تضحك علي ... لا متسويها ريم باعت اهلها و ناسها ... علمودي ... و اختارتني الي و ضحت بعالمها الي جانت عايشته .. زين چا وينها هسة ...
طبكت التليفون من حسين و دكيت على خال ريم ...

صخر ..: الو
خال ريم ..: نعم تفضل
صخر ..: انه ما راح افتعل طلايب و اهدد .. بس رح اكولن شغلة وحدة ... لا تلعب وي صخر انت موش بكده
خال ريم ..: شنو مناسبة هالكلام هذا شتريد ...
صخر ..: لا تغشم نفسك يالخال ... ريم وييين اخذتوها ...
خال ريم و مفزوع ..: شنووووو ريم وين مو عندك ... بنتي وين ..؟
صخر ..: وهو يضحك باستهزاء ... لا تمثل ما يلوكلك احجي ريم وين (بصراخ)
خال ريم ..: اني ما اعرف من يوم الرجعت من العمارة الي ادري بي بنت بامانتك ... امنتها يمك و كتلك دير بالك عليها اني اسألك وين بنتي ... اذا صار بيها شي ... ما تلوم الا نفسك ...
صخر ..:  ابنك  الشفية شافوا جاي و ماخذها ... طلعوا حرمتي و لا تدنة مني ترة انه من تطخ بعقلي اكلبها حرب والله و راويني شلون رح تكثل و تعاند ...
خال ريم ..؛ انت شنو تهددني فوكاها هم اخذت بنتي و حرمتني منها و هم تاليتها تختفي و تذبها براسنا ..
وتهددنا احنه خاطفيها ... صخر اريد بنتي و انت المسؤل اذا صار بيها اي شي ...
صخر ..: ابنك وين ... ؟ انطيني سامر احجي وياه ...
خال ريم .. سامر بيت جده ببغداد ...
صخر ..: اتصل بي و شوفه وين ... و اذا ما لكيته ... هذا تفسيره واحد .. ابنك هو الي اخذ ريم و غافلك و غافلني ... بس ساعتها رح يكون ردي مو كلام ... ردي دم