قلب الصخر

الجزء الاول

انه فاطمة ... عمري ٢٦ سنة متزوجة و ريتني ما تزوجت ... انه هسة قايديني للموت ... بايد جلاد ما يرحم
... جبروته و ظلامه محاوطني من سنين  ... ابو رجلي هو الجلاد ...
خانگني بسوط قوته .. ظالم و ظلمني حيييل ... حكم علي بالاعدام واني مظلومة مالي اي ذنب بالتهم الي وجهها الي ... تهموني بالزنه و الخيانه ... وانه الله يشهد نظيفة و طاهرة ... و الي بطني من ابنهم ...
عمري ما باوعت ولو بنظرة لرجال غير رجلي ...عمري ما طلعت من بيته بغير ما يدري... كاعدة و حاملة العذاب حتى لهلي ميخليني اروحن ...هو ما يمشي برايه هذا كله شور ابوه الشيخ ... شيخ الظلم ... الوحش مثل ما يسمو الفقرة الي هنا مستعبدهم ...
جرني من ذراعي و لواها و جان يكلي ها فطيم ... ها يا عاهرة ... بعتي نفسج لغالب العربنچي ... ولج ما عاش و ما صار الي يدنس شرفي و اسمي بنجاسته ...
وانه اتباچة و اتلوة بين ايده كتله عمي والله و القرآن و روح المحمد انه ما مسوية شي ... صدگني ...
جر شعري حيييل و جان يكولي سمعي يا بت نجم ... هذا القسم و الحلف ما يوصل لذاك الباب ... الي حچالي متاكد انت بعتي شرفج لذاك العربنجي ... و ما طول انه حي الي بطنچ ميعيش  و متضحكين علينه بهالقسم يا فطيم ... و بعد متصيرين مرة لجاسم ...
انه اتهسرت ولا حسيت بالالم الي بايدي و رجلي عمي ضخم و ايده چنهة كرك شالها و جان يسطرني راشدي على وجهي ... خلة اذني تنسد و ما حسيت بالالم ... الالم واحد ... كبريائي بس الي ديوجعني ... و دا اموت بين ايده وهو ديحاسبني على فعلة ما مسويتها ...
هذا الحجي جاسم ديتفرج ... و راضي على ابوه كتله عمي هذا جاسم و اساله هم فد يوم طلعت وهو مو راضي ؟؟ والله ما عاصيته ..
كلي انچبي يا سافلة ... تشهدين رجلج على صخام  وجهج  ... قبّح الله وجهج يا بت نجم ... انه طبعاً ارجف و ما اعرف شأكولن ... سحلني للسيارة و ودوني لبيت صبرية الجدة مال المنطقة ( القابلة المأذونة) وكفنا بالباب و جان تطلع هي كالت منو شيخ سلمان ،؟؟  كلها اريدج بكلمة راس ...
كالت انت تؤمر ... باوعتني جان دكول شبيها مرت جاسم ان شاءالله بخير ... انه موش  كتلكم ان شاءالله جاسم هالسنة لو الاخرى يصير عنده ظنه و دا اكولك شيخ اريد الحلاوة عود مو تنسى ... ههه... جان يكلها صبرية عوفيج من خفة الدم هسة ... موضوعي چبير ...
انه واكفة لا حول ولا قوة زلمتي بالسيارة كاعد و انه بباب الاعدام واكفه ... جاية برجلي اوگع ظناي .. ظناي الي بعد ما متت ياله حملت ...و مية نذر نذرت ...
ميخاف الله سلمان الوحش ... حسبي الله بيك ...
بس لا ابددد ما راح اخلي الوحش ياخذ ظناي مني ... ظليت ادعي و افكر و انه لازمة روحي گوة اريدن ابچي بواچي الدنيا كلها ... وين اولي يا ربي ساعدني ...
وجان تجي صبرية و عمي لان جانوا واكفين غاد يتهم بيه كدامها الميخاف الله ...
باوعتلي صبرية بطرف عينها و كاشة نفسها مني ... اني تاكدت انه ترهم عليه ... كالت تهييي بهيييي چا شنو بعد ماكو مخافة الله ...؟ والله يا ربي ... تعاي فطيم ... تعاي طبي جوة...
اني كمت ارجف كتلها ما اطب .. كالت تعاي مو احجي وياج چا ليش راسج يابس ... وجان تجرني من ردني و دخلتني ... كلتلي بصوت ناصي و بعد ما سدت الباب ... فطيم انه ما صدكت الوحش ... و لو كايلي الشمس طلعت من الغرب اصدكه بس مال يكولن هذا الحجي عليج لا بالله ما اصدك ..
شوفي انه وياج نتفق انه الراده صار ... هي تحجي وانه دمووع تزخ ... كتلها انت الله جابج بدربي ... الله ينطيج خلصيني ... ما اريدن اذبه الظناي ....كالتلي يالثولة انه كلت نذبه ... ؟ انت طرشة چا شدا احچي انه ... هندي ..؟
كتلها لا مو منساع شمّرتي علي حچي جرحني و ملت صدكتي ... گالت انت مفزوعه متشوفين مدتربطين ... امشينه نكعد نتفق ...
كعدنه نحجي انه وياها و بسنطه ... و بعدين كالت كومي هذا كركم خبطي ويه شوية ماي و حطي بوجهج حتى يصوفر ... وتعاي صرخي  فد صرخة صرختين ...كتلها صار   ... كمت واني احمدالله بكلبي و انذر بس اطلع منا اخلي امي تذبحلي ذبيحة لوجه الله تعالى ... رحت الها كتلها هااا شوفي وجهي خلصت...
كالت اي صرخي ... اني هم صرخت و طلعت قهر كلبي حتى البواچي الي چنت حابستهن طلعتهن .. كالت اي زين... كالت شوفي يا فطيم انت لازم تروحين لهلج ابغداد حتى تبتعدين عن الوحش شما بمجالج ابتعدي ولا دكولين صبرية ساعدتني . ابد اني سقطج .. عرفتي؟كتلها اي اي والله هذا فضلج ما انساه و نزعت بتوتي اثنين و نطيتهيا ... كالت لا فطيم انت بنتي ... كتلها و لان اني بنتج اخذيها و بردي كلبي  ... اخذتهن وحطتها بعبها وجان دكول امشينه نطلعله بس هاااا سوي نفسج سقطتي هستوج و مابيج تحجين ولا تمشين اتعثري و امشي بطيء ... كتلها اي فدوة صبرية انه خايفة ... خاف ميصدك ... كالت لا ابد قابل رح يخمج ... امشينه ...
وطلعنا و شافني جان  يكلها هااا صبرية خلص كملتي ... كالت اي يا شيخ سدك امين فضت و راحت ...
كال  بنبرة حقيرة ياله ... تعاي ...
اني هم مثلت اني اتوجع و اتالم و لازمة ظهري و اون و بهدا صعدت السيارة ... حرك السيارة و مشينه ... كلي هذا مصير الي يحط راسه براس سلمان ... شفتي يالنذله ... وهسة رح اترحم عليج و انزلج بالكراج و تركبين و تروحين لهلج و ما اشوفج تعتبين هالمحافظة كلها و الا وقسماً اجي لعندكم و افضح هلج و عمامج بديرتكم افتهمتي يالنجسة ... انه ساكته و ما نطقت بحرف واحد
و جاسم خانس ... وينك يا جويسم  كلت بكلبي ... مو و الله بعت هلي و عشيرتي كلها و صرتلك خدامة ... عفت ناسي و ديرتي وحتى لهجتي غيرتها حتى هلك يرضون شكد عايروني اني الحضرية و اني بت بغداد ...
ااخ يا زمن لو ترجع جان انه مو انه و جان ما وكعت بهالمأزق ....
نزلني بالكراج و ركبت سيارة ع السريع و جابتني لهلي ... طبيت الهم مفزوعه و مالي حيييل و حالتي تصعب ع الكافر ...
خذوني و غسلولي و حچيت الهم كل الي صار ... بس ما بايدهم حيلة غير السكوت ... شيخ سلمان مداين ابوي مبالغ هواااي و سادله ديون ويه المقاولين صحبانه و كاسر عينه بهاي ... فسد الموضوع و كال بنتي اني رح ابيع البيت و نبتعد عن المنطقة بين متولدين ... و بعدين من تولدين الجاهل نسمي بأسم اخوج و هي تضيع
انه ظليت ابچي و ادهك و ادك و الطم ع الوضعية الي انه بيها ليييش يا ربي ... رزقتني شي و رح تاخذ مني شي ... رزقتني الامومه و رح تحرمني من الطفل ...
و ظليت ايام و شهور معتكفة ... ما اريد اشوف احد و لا اسمع احد ... بس وحدي و ابني ببطني احجي وياه و اغنيله ( ماما زمنها جية جية بعد شويه ..) شكلت بيه حالة نفسية و اهملت نفسي  الى ان وصلت للشهر السابع ...
جان الجو بارد وانه فوك بغرفتي ... بالبيت الجديد الي اشتراه ابوي بعد ما باع القديم و كعدنا بمنطقة بعيدة حتى ميعرف بينه احد ... عطشت مي و دا انزل للمطبخ ... بس هاي شنو الظلام ... نزلت اول ٣ درجات و جان رجلي تلوي و جان اوكع مدعبلة على الدرج و عطت بلا شعور و بعدين ما حسيت بروحي ... الا واني بالمستشفى يركضون بيه بالسدية ... و جواية فد شي حار ... الوب براسي و الم من ظهري لبطني موتتني كتلهم عفية ابني نقذوا ابني ... لان عرفت انه رح اوكع الجاهل ... دخلوني لصالة العمليات ...
و بعد ما حسيت بشي .......