اما زهوري كعدت بالكاع ورتبت كعدة ولدها الاربعة وهمه لابسين هدوم العيد الجديدة والاحذية الجلد اللي تلمع ...داير مداير امهم وبقى رجلها واكف بصفهم حتى تكفي الصورة ههههه
هذه الصور لساها موجودة بالالبوم ....واني اشوفها واوصفها الكم ...
كلها بيوتنا العراقية بيها من هذه الصور ...صور العيد لو السفرات ...
من جهة لخ ...اول مرة امل تلتقي بنرجس ...هداءت الامور بيناتهم وعلاء صلح كلشي بان امل قدمت هواية تنازالات وراحت هي باست راس نرجس...
البنية مجانت تريد اكثر من رضا علاء عليها خصوصا بعد وفاة والدها ولانه هي الوحيدة هنا ورثت اموال ابوها واهل امها كلها...
وبالصدفة التقوا فخرية واخوها بسلمان باك ...جان اكثر الناس اللي عدها سيارات تروح تعيد هناك ...
ينصبون مراجيح وديلاب الهوى ...
وهوسة الجهال والعوايل اللي فارشة وناشرة غداها ...
من فخرية شافت علاء دموعها كامت تكت ...ماتحملت نفسها ...من شافها ...ابتسم الها...ركضت عليه شمته من ركبته وباسته وظلت تشهك على بجيته انه صارله سنة مشايفته ...
واول مرة تشوف امل جانت بنية طويلة وبيضة وشعرها اسود بس ماتجي ولاشي لجمال نرجس ...جنها ممثلة فرنسية طالعة ههههه ...حلوة نرجس علاء دير بالك عليها ...بوستهم وسلمت على سهيلة وحطت عيدية بيد سمير وركضت رجعت يم رجلها ومن سالها وين جنتي ...اتحججت تاخذ سعودي يقضي حاجته ...
بس البنات شافنها وماحجن ...
@@@@
ورة العيد باسبوعين بدت المدارس وجانت فخرية توها خلصانة من ايام الشدة اللي بقت بيها اداري رجلها...جان يحب يدلل عليها وهي ماتقصر هم متعلمة على هذا الشي بس الحمل صاير اضعاف عليها...
جانت يومية الصبح تطلع بالعشرة كون ترجع بالوحدة قبل كاطع تروح للسوك تشتري صدريات للبنات وجنط واقلام ودفاتر وكله من احسن وارقى نوعية...
كاطع اتغير شوية وصار احسن من قبل وفتح ايده اكثر من اجاه الولد ...
رحاب جانت قنوعة بكلشي ترضى وكلشي تشوفه حلو...
وقبل عطلة نهاية السنة مال الامتحانات ...
وكعت نورية بالفراش ...
وكامت يومية فخرية من الغبشة تاخذ سعودي وتعوف ميلاد على عمتها تنظفلها البيت وتطبخلها وترجع ...الى ان صارت العطلة كامت ادز رحاب وعهود بين يوم ويوم ياخذهن ويرجعهن سامي ومرات جانت امهن هم تجي وياهن ...البنات من يجن الولد يساعدوهن بالشغل واحد يغسل الكراج والطرمة واللاخ ينظف الحديقة لو يتعلق ينظف البنكات ...
ورحاب لازم تمسحلها البيت من فوك ليجوة ...
الجو جان صيف وحار وريحة الكاشي توه مغسول وممسوح ...يخلصون شغل وينتظرون كلهم يفرشون بالكاع ويكعدون يتغدون ...
ومن يكعدون رحاب كل شوية تنبه عهود كعدي عدل عيب لاتفتحين رجلج ...عهود جان عمرها بذيج السنة اللي ثمانية وسبعين عشر سنين ...بس مبينة اصغر جانت ناعمة ..وظلت تكزل من وكعتها من فوك السطح من جانت صغيرة ...
عمتهم نورية جانت تعاني وتشكتي من ظهرها وتصدف ايام توكع بالفراش موخوش وكعة ...بذيج الظهرية ورة ماخلصو غدا وغسلن المواعين ...
صاحت عهود وكصت شعرها طاسة جان طويل ومعكد ...وكلهم كاموا يضحكون عليها عمتها كالتلها ناقصج بلبلول وتصير ولد على هالشكولات ههههه
رجعت عهود بيومها تبجي للبيت وحلفت بعد ماتروح لبيت عمتها ...
بينما كانت رحاب اميرة الجماعة كلشي تريد يركضون يسوولها الولد ...
بيتهم جانت بيه مكتبة صغيرة ابوهم زهير جان يحب يقرا فرحاب تكيف كلما تروح تاخذ قصة لو ثنين تقراهم وشوية شوية كامت توصي سامي يجيبلها كتب من المتنبي والاخير جان عنده عيد وعرفات من رحاب تريد منه شغلة ...بس البنية خطية مجانت تفكر بشي ...
ونورية انتبهت ابنها يرغب لرحاب بس محجت لانه تعرف اخوها كاطع منطي حجاية لبيت ابو غازي
انه رحاب لابنه الجبير...
وشافت سامي بعده صغير وعيب يفكر بهالسوالف ...
وبنص شهر السابع بدرية خابرت اختها تبشرها بحملها بعد اربع سنين زواج ...وهي بشهرها الثاني الخبر نزل مثل قالب ثلج على گلب فخرية بذاك اليوم ....
وعلى شهر شهر الثالث من سنة تسعة وسبعين ولدت بدرية طفلها الاول كريم ...
وجانت فرحة جبيرة الهم ....
ويمكن هذه اخر فرحة بهذه السنة ....
بنفس الفترة جوي بيت ابو غازي يخطبون رحاب...
اول ماسمعت فخرية اتخربطت ووكعت بالحمام ....
بارت 13نهايه لفصل الاول
Start from the beginning
