ضل موضوع لقائي باحمد مأثر عليه وميفاركني مجان وكته أن اشوفه صح جنت محتاجه اشوفه لكن صحت جروح بكلبي تصورت نفسي نسيتها ...
كمت اتصلت بعادل وكتله ...
.. دزلي السايق او انت تعال اخذني اريد ارجع لبيتي ..
وكال .. العصر اني جايج ..
ماما اجتي عليه وكالتلي ..
ليش تريدين تروحين لبيتج
كتلها .. لا ماما لازم ارجع بيتي ومكاني وبصراحة جاي على بالي اكول لعادل اريد اشتغل ..
كالت .. ماما وين تشتغلين انتي تعبانه وصحتج مو مثل قبل ..
كتلها ماما .. اريد اغير من وضعي دومي وحدي كاعدة اني مهندسه وتعبت على روحي ..وجنت أتأمل من يجي ابني راح التهيي وياه تالي راح وانتي تعرفين اقل شي بعد ٣سنوات كدامي ياله اكدر اسوي طفل ....على الاقل اشتغل وانسى ..
كالت .. ماما وفاء لاتفكرين بحمل ارتاحي بعد .. اشو انتي بوادي ورجلج بوادي وصحتج بالدنيا اهم شي انتي وحيدتي و انكتب الج عمر جديد ..
كتلها .. ماما عادل هو صح ممقصر وياي بس طبعه بعيد يتصور أنه حياتي وياه بس المهم اكلت ونمت ومصرف عندي مايوم كعد وياي وحسسني بوجودة ولا عوضني بحنانه .. اني هسه فقدت ابني غير يقتربلي غير يكون يمي .. دومه بعيد وهالبرود مالته كتلني ..
كالت .. اقتربي انتي اله غيري من وضعج وياه ترى اكو رياجيل طبعهم سكوتين وبداخلهم شي حلو يجوز انتي متعرفين شلون تتعاملين وياه ..
كتلها .. راح احاول اغير من وضعي وياه لازم حياتنا تتغير ونعوض الي راح ..
اجاني عادل تقريبا الساعه سته العصر وباوعت عليه جان انيق طبعا اكيد مجان بالمستشفى وسألته ..
اليوم متأنق اكيد مجنت بالمستشفى ..
كال .. لا جنت معزوم على الغدة اني وكم طبيب ويانا وضلينا كاعدين نسولف واجيت عليج قبل لا اروح للبيت ..
اخذني ورحنا للبيت وبديت اخذ شريط منع الحمل بس محبيت اكوله ..
غير ملابسه وسبح وطلع من الحمام وجنت اباوع عليه وعلى ركبته اخاف اكو اثار بيه لان مجان خالي اكيد ورغم جان وضعه طبيعي بس مجنت مرتاحه ..
سويت جاي وكهوة .. وكعدنا وسألته ..
اي عادل احجيلي شسويت هالفترة وين جنت وين رحت ..
نظر الي نظرة غريبه .. وكال .. هاي شكو خيرج..
كتله .. غير اعرف اخبارك شدسوي هاي صار أكثر من ال٩ اشهر متفاركين غير اعرف شلونك .. مشتاق الي لو ممشتاق ..
كال .. لا طبعا مشتاق اني شعندي غيرج وفاء بس انتي تشكين هواي بيه ..
وضحكت من كلبي ..
كتله .. عادل اني لو اشك او اغار مثل النسوان مجان هذا حالي وياك جان حسبت الي وخفت عليه ..
المهم هذه الامور راحت بعد وان شاءالله نبدي من جديد ..
كال ... اكيد نبدي من جديد واني ماعندي غيرج ..
وكام اخذني للغرفه وأخذ حاجته ونام بصفي .. جنت احس بيه مرات يحبني ومرات احس لا مجرد زوجه يرتاح وياها وخلص ..
كعدت الصبح حسيته ديسبح وكمت سويت الريوك اله وحضرته ..
كال .. اليوم كاعدة من وكت
كتله .. يمكن لان نمنا من وكت البارحه ..
جان ياكل سريع وغير ملابسه بسرعه وطلع ..
وكتله .. عادل لاتتاخر
كال .. حسب شغلي ..
كتله .. حاول تجي اني اضوج وحدي ..
كال .. احاول ان شاءالله..
غيرت من الغرفه وترتيبها وحتى الستائر غيرتها جانت عمتي سناء جابتلي وحدة هي مخيطتها على ذوقها وطلعتها وخليتها بمكان القديمه ..صح جانت الغرفه تتنظف طول فترة غيابي بس مجانت على ايدي .. جنت احس اريد تغيير بكل الي حواليه اريد اعيش حياتي بعد كافي روتين ..
نزلت سلمت على خاله لان من اجيت البارحه جانت بغرفتها محبيت ازعجها وجان عمي مموجود .. وسمعت الباب انفتحت والا اخت عادل اجتي هي وابنها جان عدها ولد واحد .. بطبعها ماتجي قليل كلش ومن تجي تخلي ابنها يم خاله وتطلع .. وسلمت عليه وكالت ماما وين ..
كتلها بغرفتها ودخلت على امها ..
طول فترة مرضي وتعبي ماسالت عليه ابد ..بس من اتوفى ابني اجتي سلمت وطلعت بسرعه جان طبعها طبع ابوها وخليت وصعدت فوك لغرفتي .. سويت غدة وحضرت كلشي واتصلت بعادل ..
جاوبني .. ها محتاجه شي
كتله .. لا ممحتاجه اي شي اشو ماا جيت على الغدة .
كال .. اتغدي انتي خاف اتاخر عليج عندي شغل..
كتله .. مراح اتغدة انتظرك وسديت التلفون..
وضليت اتفرج تلفزيون لحد ماصارت الساعه ٥ العصر ونمت خلالها ساعه وكعدت وهو ماكو ..
بعدها اجا ..
كال .. شلونج ..
كتله .. عادل بعد تتغدى بيتك انت عندك بيت مو فندق تجي تنام بيه وبس ..
كال.. مكدرت اجي عندي شغل
كتله .. وشنو ذنبي
كال .. اتغدي انتي وحدج انتي من شوكت الا تتغدين او تتعشين وياي ..
كتله .. منا وجاي بعد تحسب حساب عندك زوجه تتغدى وتتعشى وياها ..
كال .. اسمعي وفاء ترى اني عايفج براحتج تحجين انتي صحتج تعبانه اني دكتور وتعرفين هاي حياه الدكتور .. واتعلمي اني حياتي كلها شغل ..
كتله .. انت متتغير واني داتعب روحي وياك ..
كمت اتغديت وخليت روحي بالاكل لان جنت جوعانه وتعبانه وتذكرت كلام امي من كالت اقتربي اله ..
غير ملابسه ونام بدون ميحجي ولا كلمه ..
وكعد بعد ساعه ونص جانت تقريبا الساعه ثمانيه بالليل وهم غير ملابسه واتعطر وطلع ..
طبعا ماسالته وين رايح او تجي على العشه ولا هو حجى كلمه وياي ..
وعرفت أنه اني جنت عاجبته لان مااسال وين رايح او وين جاي ..
وهم اجا بالليل الساعه وحدة وسويت نفسي نايمه وضل يصحي بيه واكيد هم على حاجته اخذها ورجع نام .. ورجعت حياتي وياه مثل قبل بس بالليل نلتقي على السرير وهذا هو ..
رحت لبيت اهلي .. كضيتها يمهم بين طلعات وسوك وزيارة لبيت عماتي .. وبيوم فكرت اروح الجامعه مالتي واسال اذا اكو فرصه عمل او لا ..
طلعت الصبح ورحت للكليه وقدمت اوراقي وبابا جان استاذ جامعي ويعرف أساتذة هواي ورحت على كم واحد بيهم او واعدوني أنه يساعدني وكالولي اسبوع وراجعي ومر الاسبوع عليه شهر هلكد ماجنت اريد اغير شي وانسى .. ورجعت الهم والحمدلله حصلت موافقه بس تحت التجربه والي ساعدني معدلي جان عالي وجنت من العشرة الأوائل كل سنه .. الا سنه التخرج لان جانت سنه تعب بالنسبه الي ..
وكل الي سويته ماكلت لعادل عليه لان جنت أحسه ممهتم وطول الفترة الي جنت بيها يم اهلي اتصل بيه بس مرتين ونفس سؤاله محتاجه شي ..
وبعد ماحصلت الموافقه ..اتصلت بيه
وكتله .. تكدر تجي اليوم
كال .. لا مااكدر ادز لج احد
كتله .. اريد احجي وياك بموضوع
كال .. خير ياموضوع
كتله .. ترى اني زوجتك مو مال تلفون حاول تجي
كال .. دكولي بالتلفون صدكي عندي شغل ولجان تفتيش اليوم بالمستشفى ...
كتله .. اني قدمت اوراقي بالجامعه صار فترة واليوم اتصلوا بيه حصلت موافقه يعني احاضر يمهم بالاسبوع ٣ ايام ..
كال .. براحتج بس شكد ينطوج راتب اكثر من الي اني انطيه الج يعني
كتله .. هي مو شغله راتب
كال .. بس شنو لاتكوليلي اريد احس بوجودي وكياني
كتله .. اني تعبت عادل انت بعيد مو قريب وكل وقتك لشغلك ..
كال .. غيري وضعج انتي سويلج طفل التهي بيه
كتله .. مااكدر هسه اقل شي بعد ٣ سنوات
كال .. واني ابقى بلا طفل شنو ذنبي ..
كتله .. هذا مو موضوعنا اني دااحجي على دوام الكليه
كال .. انتي مكمله كلشي عليمن مخابرتني بعد ..
داومي وسوي الي تريدين وسدي فراغج القاتل .
وسد التلفون بوجهي ..
طبعا جان أسلوبه غريب ولهجه اللامبالاة عندة صارت واضحه بدون ميخفيها ..
وفعلا بديت اداوم واخذ محاضرات وجانت محاضراتي تحت التجربه ..
رجعت لبيتي وعشت وياه كزوجه عاديه واتعلمت اكل واشرب وانام وحدي .. وهو يجي بالليل لو العصر مرات حتى يسبح وينام شويه ويطلع ..
وفد يوم اجا من وكت وجان ضايج مااعرف شنو الي بيه . كتله ...احضرلك العشه
كال.. اي
وسويتله العشه .. واتعشى ..
كال .. شنو اخبار دوامج
كتله .. زين مرتاحه
كال .. شوكت تتركيه
كتله .. ليش اتركه اني مرتاحه
كال .. اني خليتج براحتج تداومين وماجبرتج على شي ... بس انتي ساكته وحتى هملتيني ولا كانه عندج زوج وبيت ومسؤوليه ..
كتله .. انت الي متريد يكون عندك زوجه وبيت مو اني ..
كال.. انتي لو اعوفج سنه متهتمين
كتله .. عادل انت متقبل احاسبك او اسالك وين رايح او وين جاي اني طبعي ما الح ولا احب المشاكل وانت تريدني اكون هالشكل واني دااشوفك مرتاح وماهمك شي ليش اعكر عليك وعلى نفسي ..
كال .. اسمعي وفاء اني كبرت واصدقائي الي وياي كلهم عندهم اطفال وزوجات اريد احس نفسي مثلهم .
كتله .. عادل ..اني هم اريد طفل والتهي بيه وصدكني اني جنت اريد طفل بس حياتي وياك للاسوء انت مامستقر وياي شلون اسوي طفل واعرض حياتي للخطر ويجوز مااعيش هذا الطفل منو اله انت بيه مامهتم تهتم بابنك لو اجا ..
كال .. هاي كلها حجج انتي متكدرين تسوين طفل خايفه على حياتج وتذبيها بيه أنه اني ماعندي مسؤوليه ومااتحمل ..
كتله .. شتريد تحسبها احسبها انت اني مااكدر اسوي طفل وانت هذا وضعك واني صحتي على كدي ..
كال .. زين مو مشكله اكو طرق ثانيه اسوي بيها طفل ..
كان كلامه عليه مثل السهم وجعني بيه ..
وكتله ... شنو يعني طريقه ثانيه
كال ... اتزوووووج
بديت احس بكلبي يرجف وحيلي راح والدنيا صارت كلها فوك راااسي ..
كتله .. تزوج ليش اشبيه شنو الي ناقصني تطلع من الصبح لليل ياله اشوفك وتجي تدور عليه بس بالفراش تتمتع وتنام ..ملابسك نظيفه و بمكانها .. او وياك اني مثل ماتريد
تالي تكولي اتزوج ...
كال .. اسمعي مااريد مشاكل عندج خيارين لو تكعدين بالبيت وتبدين تراجعين طبيبه وحتى لو تريدين سفر هم اسفرج .. وتسويلي طفل ..
لو تبقين على هذا وضعج ومااجبىرج على شي... واتزوج اني وحياتي وياج كما هي ويمكن تتغير للاحسن ...
كتله ... هاي انت اليوم جاي من وكت بمكان ماتكولي تعاي نطلع نغير جو او تكولي اجيت مشتاقلج ... تكولي اتزوج ...
كتله اسمع ... كلشي اتحمل منك حتى خيانتك تقبلتها واني اعرف كلش زين انت عندك سوالف موزينه واعرفك تنام وي غيري ومتونس وي اكثر من وحدة كلها عبرتها الا مساله الزواج مااسمحلك تحجي بيها ...
كال ... انتي بيج شي يعني على الحرام راضيه وعلى الحلال مترضين ...
كتله اني مراضيه بالحرام بس اكول عسى ولعل أنه تصحى على نفسك وتترك هذي نزوات ... بس نسأله زواج وتساويني وي مرة لا مستحيل اعيش وياك لحظه وحدة ...
عفته ورحت نمت بالصاله وكضيتها بجي وجان هو ديتفرج على التلفزيون... ونمت وكعدت لكيته ديشيلني من القنفه وخلاني بفراشه واكيد جنت مااكدر اتقبله ودفعته كتله تعبانه مااكدر اتقبلك كمت اكرهك واتقزز منك بس على راحتك تجي تدورني ... بعدين انتبهت أنه ريحته جانت قويه جان شارب شي وهو بطبعه ميشرب الا قليل كلش وعرفت أنه هو جان طالع وشارب وجاي لان خاله بس تعرف جايب كحول للبيت تطردة وتهينه ... وكتله وفوكاها شارب ابتعد عني كرهت كلشي بيك ضل يلح وياي واني ادفع بيه وكمت من يمه ... واجا ورايه ولزمني وكام يضرب بيه ضرب مو طبيعي وكام يجر بشعري ويضربني بالكاع وكمت اصرخ وشالني وشمرني على السرير وبالغصب اخذ حاجته وتركني ... واني فقدت من هلكد ماضربني على راسي ... صح ماجان بوعيه لكن مااعذرة اني جنت اتحمل واسكت واكول يتغير وجاني بتغييره زواج وضرب واهانه .. والصبح صحاني من النوم وفاء كومي ... انتي بيج شي وكعد يبوس بايدي ويعتذر ويكولي سامحيني جنت مو بوعيي وانتي استفزيتيني ... كتله عوفني الله يخليك وروح لشغلك بالليل نتفاهم .. سبح وغير ملابسه ومن طلع بوسني وكرر اعتذارة ...
اتصلت بالجامعه اعتذرت كتلهم مااكدر اجي اليوم ... ولميت كل ملابسي واغراضي ورجعت لاهلي وقررت أنه اتركه وكلشي لازم ينتهي بياناتنا ....
للحكايه بقيه...
