وصارت حياتي عبارة عن جايه من مستشفى ورايحه للمستشفى .. ونقلوني الها بس امي كالت لبابا منوديها للمستشفى الي بيها عادل نوديها لغير مستشفى .. شكد ماامي جانت صعبه وياي بس من شافت الي صار بيه اتندمت على الي سوته بيه ومشافوني ارتحت وي عادل حتى صحتي اتدهورت وجنت يمهم مثل الملاك .. جنت مااحجي بس انفذ طلباتهم .. وعمري ماعارضتهم بشي او طلبت منهم شي فوق طاقتهم .. وردت منهم بس اتزوج الي احبه واعيش حياتي وياه بسلام بس ارجع واقنع نفسي واكول كل شي بالقسمه ..
رحت واني خايفه على ابني خاف يروح مني بعد كل هذا التعب .. دخلت للمستشفى واني ابجي من الالم وامي تهون عليه هسه تولدين وترتاحين دخلت لصاله الولادة وكالت الطبيبه احتمال ولادتها طبيعيه راح احاول وياها وفعلا خلال نص ساعه ولدت .. واجا احمد للدنيا بس جان تعبان كلش أخذوه مني ونقلوه للخدج جنت ادعي ربي ان يحفظه ..
واجا عادل واول مرة اشوف عيونه حمر من البجي ..
جنت انتظر طول الوكت يدخلون عليه وينطوني ابني بس اشوفه واحضنه لكن يكولولي ميصير يطلع من الحاضنه ..
وكمت من فراشي بعد ماكلت لعادل اريد اشوفه وديني للحاضنه لزمني من ايدي ودخلت عليه شفته ناعم كلش وميتحرك بجيت عليه شكد تعبنا اني وياه وتشاركنا المرض سوة ..باوعت على ايدة جانت صغيرة وأطرافه مثلي ويشبهني بكلشي ..
رجعت لغرفتي وماما متسكت من البجي عرفت بيها شي بس مسالتها جنت اخاف اسال خاف يطلع السبب ابني ميعيش .. ونمت تقريبا ساعتين وكعدت مالكيت احد يمي فزيت صحت ماما وينج .. وجان اندكت الباب ودخل علي اخويه عليه وحظني وكال حمدالله على السلامه حبيبتي المهم انتي صحتج شلونها
كتله .. اني زينه بس ابني مااعرف شلون صار
كال .. بالحاضنه هو معليج هما يعتنون بيه ..
كتله .. امشي اني وياك خلي نشوفه طبعا هو يشبهلك ويشبهني ..
كال .. حبيبتي ارتاحي هسه بعدين نروح نشوفه ..
اجتي امي كالت وفاء كتبولنا على خروجيه من المستشفى ياله نطلع ..
كتلها .. ماما وحمودي شلون اعوفه وحدة بالمستشفى ..
كالت .. مو حيبقى هواي بالخدج لان جبتيه بالسابع ..
كتلها .. لا ماما مااطلع الا اخذ ابني .. وكوليلي عادل وينه وين راح
باوعت امي على علي .. وعلي باوع عليها جان علي منطيني ظهرة وصرت كدامه كتله ليش منطيني ظهرك باوعت بعيونه جان صامد كوة كدامي وكالي وفاء .. خلي نروح للبيت ونتفاهم ..
كتله .. علي اشبي ابني.. وجان يكعد على الكرسي ويكوم يبجي ..
باوعت ماما هم تبجي ..
كتلهم .. لاتكولون راح ابني.. ابني ميروح اني قاومت علمودة وضحيت شلون يعوفني طلعت من الغرفه ورحت للحاظنه واجا ورايه علي ...
وكال .. وفاء اصحي بعد راح والله لو يبقى يتأذى وميعيش اول وتالي خليه يروح طير بالجنه خطيه مريض عندة فتحه بالقلب يتعب ويتعبج وياه .. ضليت ابجي واصرخ والناس كلها تباوع وتبجي عليه .. طلعنا من المستشفى بعد ماعرفت انه ماخذين الطفل وراحوا يدفنوه راح عادل وعمي وبابا وعلي .. رجعت للبيت اجوي عماتي وخالتي واجا عمي وزوجته اخذوا هم من خاطري وجانت رشا يمي معافتني طول فترة عزايه ..مجنت اعرف هيج الضنى غالي وقطعه مني راحت ماشفت عادل الا بالليل اجا سلم عليه وجان مو اقل مني منهار وصدك جان مكسور الخاطر .. وسألني اني رايح للبيت تحتاجين شي ..
كتله .. لا ..
كال .. ترى ذبحت اله عجل او وزعته للفقراء ..
كتله .. زين سويت
كال .. الله يعوضنا خير هاي قسمتنا والظاهر اني ماعندي حظ بالخلفه ..
عافني وراح .. حجايته قهرتني بس شبيدي اني هي قسمه والله كتبها عليه والحمدلله رضيت بقسمته ..
