لملمت نفسي وي كتب سارة الي وكعت من جنطتها وبعد ماحسيت نفسي اني تبعثرت وي كتبها وجنت مخدوعه راجعت ذاكرتي وعيوني على سارة وهي تمشي مثل الملاك وي صديقاتها وشعرها الطويل الملفوف بالشريط والنسخة الثانيه من ابوها كل هذا ماانتبهت عليه بس جان همي احمد وشيريد اني انفذ والمقابل طلع متزوج وعندة بنيه بعمر الورد .. اني وين جنت من هذا كله .. سمعت صوته وهو يكولي وفاء شبيج مو دااحجي وياج وبدون شعور او تردد صفعته على وجهه وعلامات الغضب بانت عليه وكأنه بركان وانفجرت بوجهه ضل يباوع عليه و سالني ليش وفاء ... كتله اني الي اكولك ليش تضم عليه زواجك وفوكاها عندك بنيه خدعتني طول هاي الفترة وتكولي سارة بت اخويه الشهيد ..
اني رايحه ومن هاي اللحظه بعد مااريد اشوف وجهك كدامي والي بينا انتهى.. مو وفاء الي تاخذرجال من زوجته وبنته..
مشيت وحدي بالشارع وحسيت اني وحدي بالدنيا بعد ماجنت اتوقع ان الدنيا ضحكتلي بحب صادق تذكرت حظنه وبوساته ماكدرت لحظه انساها كل هذا كذب زين شلون يريد يتقدملي كان يخدعني طول هالفترة
..ولكيت نفسي باب الكليه .. كلبي يكولي التفتي شوفيه يمكن اجا وراح يبرر موقفه .. وعقلي يكولي امشي لاتلتفين وراج صفحه واطويها ... بس هذي ياصفحه واكدر اطويها ..احمد كل شي جان بحياتي شلون انساه يعني هذا هو بعد ماانتظرة الصبح بعد مااتريك وياه مثل كل يوم بعد مااحجي وياه بعد مايلزم ايدي .. شلون ياربي ساعدني ...
احمد ...
ضل واكف بمكانه يباوع على حلمه الوحيد الي انتهى بلحظه بدون مايدافع او يبرر او حتى يوضح موقفه .. لكن شيوضح وشنو الي يقنعها بعد وفاء راحت ورادت بعد متشوفني ..
لازم اخطي خطوة ابين الها حبي وحقيقه موقفي اتجاهها لازم تعرف كلشي عني واكيد من تعرف راح تعذرني وتعرف أنه اني من ضميت عليها حتى لا اصدمها مو حتى اكذب عليها ..
وفاء .. حاولت اركز بدروسي وامتحاناتي النهائية حتبدي بعد ايام والي صار مو وكته ولا اله اي وكت بحياتي لان صدمه هزتني وقتلت اشياء حلوة بداخلي ..
زينب .. شبيج وفاء بقى بالي يمج ..
لا زينب .. مابيه بس اكتبي المحاضرة يمج لان راح استأذن واطلع ويمكن باجر مااجي .. باي
طلعت من الكليه بلا مااباوع على مكانه جاي لو لا مااريد اضعف لازم أقاوم واخلي قبل كلشي سارة بين عيوني شنو ذنبها وابعدها عن امها و ابوها .. جنت اتصور بعد مامرت ايام على فراكنا أنه اني قويه وراح اكدر انسى او أقاوم ذكرياتي وياه لكن يوم بعد يوم اضعف وذبل عودي بدت امي تنتبه عليه وحتى بابا كام يركز عليه ومن يشوفني اطب واطلع للكليه بس ساكته وبيوم كاعدة وحدي وصعد الي بابا بالغرفه ...
منو .. اني بابا ..
اتفضل بابا ..
بابا وفاء .. شلونج ليش مو على بعضج اكو شي مضايقج ..
لا بابا ..انت تعرف بدت امتحاناتي واريد مثل كل سنه اطلع من الاوائل وابيض وجهك ..
يعني ماكو شي اقلق منه باباتي ..
لا بابا ..اطمئن اني عال العال ..
وهو ديطلع من الغرفه كال بابا ترى دكتور عادل جاي عن قريب ..
عرفت منه هذا خطيبي الجديد .. كتله بابا الله كريم كلشي بوكته اكمل امتحاناتي ونتناقش بالموضوع ..
نزل بابا من غرفتي .. وبقيت بدوامتي بين خطوبتي او علاقتي بشخص حبيته من كل كلبي ..
مرت الايام بسرعه وقربت نهايه امتحاناتي واني غيرت وقتي كله بالطلعه الصبح حتى لا التقي باحمد واضعف وخليت سارة بين عيوني وحتى طلعتي من الكليه كمت اطلع وي الخط الي من داخل الكليه حتى لايشوفني من اطلع وجنت هواي اشوفه باب الكليه وارجع للبيت اكضيها بجي وحسرة على حب ضاع بدايه الطريق وغيرت رقم تلفوني .. وبيوم اني داامشي بعد ما عرفت أنه الخط حيتاخر بالكليه لان اكو طلاب بالخط امتحانهم عملي معناها ابقى انتظر اكثر من ساعتين طلعت باوعت مالكيته بابا الكليه واتمشيت بسرعه من السايد الثاني .. وحسيت اكو سيارة وكفت بجانبي بين فرحه ولهفه شوفته وبين خوفي لا اضعف كدامه جرني من ايدي وفتح باب السيارة وصعدني بيها بدون ماانطق اي كلمه .. شفته بعد فراك شهر ماعرفته جسمه هزيل ولحيته عاليه وعيونه من الضعف والسهر الهالات السودة محاوطتها .. وحرك السيارة وهو يمشي بسرعه مانطق ولا كلمه واني بدون شعور ابجي وهاي الدموع الي مااعرف منين اجتني .. وخلال دقايق وكف سيارته يم باب بيت ونزلني بالقوة بدون مايحجي وحتى اني ماسالته لان جنت خايفه من عصبيته .. دك جرس الباب .. وكتله اني ماادخل بيت غريب وي غريب اريد ارجع كال البيت مو فارغ والا مادكيت الجرس وبهاللحظه فتحت الباب مرة ختيارة والتقت بيه بابتسامه عريضه وكالت اكيد انتي وفاء اتفضلي بنتي ...
لزمتني من ايدي وباستني من خدي جانت بيها ملامح من احمد هواي نفس عيونه وضحكته وحتى طريقه كلامه .. بس هي قصيره واحمد صاحب طول واكتاف.. دخلت انبهرت بجمال البيت والزرع بيه من كل مكان وكأنه لوحه فنان تذكرت كلامه احنا عائله تحب الرسم دخلت من باب المطبخ لان امه كالت نشرب جاي سوة وندردش وانتي مو غريبه انتي بتنا .. كعدت بالمطبخ واني مااعرف ليش جابني لبيتهم وليش يريد يعرفني على اهله وزوجته وين .. كعد هو كدامي وعيونه بعيوني واني مقاومه مااريد اضعف اريد اصر على موقفي أنه كلمن يعيش حياته ..
وفجاه . . كال ماما ... احجيلها لوفاء على سحر .. وبدون مااسال سحر منو جانت واضحه هي زوجته .. وبعدها كال سحر طليقتي .. انصعقت بهالكلمه طليقته .. زين ليش طليقته يكون اني السبب ..
اسمعي بنتي .. احنا عدنا بنات ونخاف على بنات العالم ومنظلم احد ..احمد ابني تزوج بنيه جميله بشكل والكل جان من يشوفها يتعجب على جمالها وحسنها ..بس جانت البنيه مو مثل طبعنا ولا مثل بناتنا وكلنا نغيرها والمرة بينا تتبع رجلها جانت هالوحدة لامها امها من جابتها وجانت صغيرة ابوها استشهد بحرب ايران وربت وي امها وامها تزوجت وبيت جدها اخذوها ونسوان عمها متحملوها ورجعت لامها وامها التهت بزواجها وجهالها واول ماشبت عرفها احمد وخطبناها اله وتزوجوا وجتي سارة فرحه العمر بس من جتي سارة .. سحر تغيرت بين يوم وليله اريد اروح لامي وتروح لامها واحنا نشتاق لسارة حفيدتنا الوحيدة واحمد ماحرمها لمرته من شي ولا منعها بس كامت تبقى اسابيع واني وحدي بالبيت وجانت بنتي الصغيرة على باب زواج واني تعبانه ورة ماانقتل ابني الجبير اني وعمج كبرنا من وكت وفوكاها طلعوا غلطانين باسمه وهاي جانت طعنه ثانيه النا مات ابني مظلوم مرتين ..
كام احمد يضوج من طلعات مرته وكثرت حججها بدون سبب وصارت بينهم مشاكل تالي طلبت منه لو يكعدها بيت يم اهلها لو يطلكها جانت سارة صغيرة واني مااريد ابني يطلك وهاي بنته شنو ذنبها وهي من طلبت منه هالشي تدري باحمد ميعوفني اني وابوه وهذا البيت دتشوفيه واسع ماشاءالله وتعيش بيه اربع عوائل .. اني وابوه طلبنا منه أنه ينفذلها طلبها بس هو مارضى كال امي المرة تتبع زوجها اني مااتبعها .. وسحب البنيه منها وتركها يم اهلها وجانت الصدمه ماكو اي شي منها كعدت يم اهلها ولا كانه عدها بنيه ولا تسال عليها عافتها وعمرها ٥سنوات والبنيه واعيه تريد امها وهي ماجتي بيوم تسال عليها .. وبيوم كاعدين واجا الشرطي دك الباب .. وجان وياه دعوى طلاك ولكيناها متنازله عن الاول والتالي حتى بتها مقابل الطلاك .. وصار الطلاك وصدمه احمد ابني مو بالطلاك ... لا صدمته بزواج سحر بعد مااخلصت العدة مال طلاك بخمسه ايام .. وذاك يوم وهذا يوم لا شفناها ولا سمعنا عنها ولا سالت على بنتها ... وسمعنا من ناس انه هي تزوجت ضابط ومتزوج ومطلك مرته قبل زواجه منها..
هاي القصه بنتي واني ماضميت عليج شي ابد ولا احمد ضم عليج شي ومن تركها احمد لمرته تركها لان هي باعته احمد ضل متمسك بيها بس تعرفين النسوان بعد... واني فرحانه بيج لان احمد من عرفج رجع احمد الي مثل قبل يضحك ويحجي والفرحه بعيونه ...
