جنت اباوع على عادل شلون يداريني وكام يرجع من وكت ويهتم وميخليني اتحرك ..
و اتمنيت احس نفسي مثل باقي البنات من أحبل اروح لاهلي وامي تعتني بيه وتشتريلي ملابس لابني بس مجان بيدي اسامحهم ومازرتهم ابد من تزوجت لحد هذي اللحظه وحتى من عزموني بعد العرس مارحت واعتذرت بس حمودي جان يمرلي بين فترة وفترة هو وعلاوي ... وبابا يخابرني مرة بالشهر واجاوبه مرات بمزاجي ومرات مااجاوب خاصه من احس بملل وحسرة .. وشكد حاولت ارجع وي امي مثل قبل بس من اتذكر كلامها وياي اموت الف مرة وجانت من تتصل اجاملها بالكلام ... ومن اتذكر احمد وشلون بجى اخر يوم شفته بيه من جنت بيتهم .. ازيد على اهلي لان مااتغير شي بحياتهم بالعكس خسروني وخسروا علي وتركهم والله وفقه من عافهم .. علي شكد صاحب قلب ابيض بس من يتخذ قرار ميتراجع عنه هذي الصفه الوحيدة الي اخذها من امي الي يريدوه يسووه وفعلا ترك نور وانسحب من حياتها ومن كتله بعد اني تزوجت ميحتاج أن تتركها جان ردة .. كمت من اشوفها لنور احس هي سبب زواجج وهي جانت عاجبتني بالشكل وردت فعلا اتزوجها بس بعدها اكتشفت هاي البنيه مو مثل طبعي وصدكيني وفاء مو انتي السبب البنيه طلعت من عيني واني نفسي مااعرف ليش ..
اتاكدت أنه علي اتغير وصار قاسي وحاد بكلامه مااخفي عليكم امي حاولت هواي وي علي أن يرجع للبيت بس مجابت وياه اي نتيجه .. او والدي هم حاول وياي أن أرجع مثل قبل لكن اني هم ماكدرت ارجع مثل قبل اكو غصه بكلبي محد يحس بيها بس الي يعيشها.. وبيوم من الايام واني كاعدة وحدي فكرت اتصل بانوار اخت احمد حبيت اسمع اخبار احمد وتمنيته شاف حياته واتزوج صح جنت اغار من افكر بيه متزوج ومستقر بس جانت سعادته تهمني اكثر من اي شي .. اتصلت بيها وردت عليه ومن عرفتني فرحت بيه وعاتبتني لان انقطعت كل هاي الفترة خاصه واني غيرت رقم تلفوني .و كتلها اعذريني اني عايشه حياتي وي عادل بالقدرة وتركت حتى اهلي وعرفت منها أنه احمد بعدة ممزوج ولا يفكر بزواج وان طليقته سحر قبل شهر جايه تريد تشوف سارة وطردها احمد ومنعها من الزيارة بعد لان ماصدكنا بدت تنسى وزوجها الظاهر متزوج عليها وتاركها باعت احمد وبتها وهسه زوجها باعها ..
طلبت من انوار أنه مااكول لاحمد اني اتصلت ابد وتالمت من عرفته لحد الان يفكر بيه وماناسيني وعاش فترة صعبه بدوني وسارة تسأله عني ويكوللها مسافرة من تجي اوديج الها .. نهيت المكالمه وهاجت عليه كل المواجع وبجيت بحركه وقهر .. وفجاه سمعت صوت مسج اجاني فتحت تلفوني مالكيت اي مسج استغربت اني متأكدة اكو صوت تلفون بالغرفه كمت دورت لكيت اكو تلفون بالصاله فتحته لكيته تلفون عادل ناسيه وطالع وطبعا هو عندة ٣ اجهزة من ضمنهم الفاتورة ..فتحت الجهاز ودخلت على الرسائل لكيت كم مسج .. منها يخص الشغل ومنها غراميات وتفاهات من بعض الممرضات الي وياه .. وكان واحد من المسجات من وحدة كاتبه اله حبيبي جيب عشه وياك ترى ماسويت شي ..
وجانت وحدة من الرسائل تفاجات بيها وحيرتني مبروك عليك وعليها الحمل مو كتلي اني ميصير عندي بس هذا الحمل منين ..
اشتعلت نار بيه واني اقرا الرسائل التعبانه .. وكلت هالمرة مراح اسكت وجنت متأكدة أنه المسج الاخير من هاي الي شفتها وياه بالمستشفى ..وبدت عندي اوجاع قويه بطني مااعرف شلون اوصفها .. كلت خلي انزل جوة اشوف خاله واسالها عن سبب هالالام يمكن لان اني حامل .. ورجعت التلفون بمكانه .. صحت عليها وردت عليه . ها خاله شبيج ..
كتلها خاله اشوف عندي الالام قويه بطني تروح وتجي ..
وكالت .. ليش ماما سويتي شي جريتي شي ...
كتلها لا والله خاله .
كالت تعاي اكعدي ارتاحي اسويلج شي دافي ترتاحين خاف برد صار عندج ..
جانت بالبيت اكو مرة تجي تنظف وتطبخ وتروح وجانت خاله معتمدة عليها كلش .. وقبل لا اني احبل جنت اني اطبخ الي ولعادل لان الطابق الثاني كامل غرفه نوم وصاله وحمام ومطبخ .. بس من حبلت خاله ام عادل مجانت ترضى اسوي شي وجانت تحب تكعد وحدها بغرفتها وتكعد تقرا قران لو تصلي لو تتفرج قنوات دينيه وجانت قليله الكلام وتمر ايام متحجي حتى سلامها بالاشارة ..
اني من شفتها بالبدايه ماحبيتها وجنت خايفه منها بعدها اكتشفتها مرة ماالها شغله باحد وكل شي متحجي .. وجان عمي مثل عادل يجي بالليل بين العزائم والأصدقاء وحتى يروح يتفرج على الريسزات سباق الخيول وغيرها يعني مونس نفسه وعايفها بالبيت .. وبين ماحضرتلي الحليب الدافي غفيت على القنفه بدون ماادري بروحي وصحيت على صوت عادل وهو جاي الظهر واكيد جاي على تلفونه ومن شافني نايمه بالبيت جوة كلش قلق ...
وكال .. هاي ليش نايمه هنا شتحسين .. كمت من القنفه وحسيت اكو مثل النغزة الحادة بصفحتي واتذكرت وجع الكليه الي لزمني فترة وسافرت لاربيل بسببها ..
وشكيت الالم من الكليه مو شي يخص الطفل ..
وسألته بصوت عالي ..
كتله شو رجعت ..
كال .. ضل بالي اتصل متجاوبين ..
كتله .. ليش مااتصلت بخاله ..
كال .. مااجا على بالي .
كتله .. مثل مااجا على بالك وتركت تلفونك بالغرفه ..
كال .. شنو هالكلام واذا نسيت تلفوني شنو الي صار .
كتله .. فتحت التلفون وقريت مسجاتك ..
كال .. بس ميصير تفتشين ورايه اني دكتور عندي مواعيد والتزامات ..
كتله .. مواعيدك والتزاماتك تفرض عليك أنه تستقبل مسجات تباركلك على الحمل وتكولك انت مايصير عندك اشو صار ..
كال .. شي طبيعي تسال هالسؤال هذي زميلتي دكتورة وحبت تبارك ليش تفكيرج يروح لبعيد ..
كتله .. يابعيد الي تحجيه هي شمعرفها انت يصير او ميصير عندك انت متزوجني الي قابل الها ..
كال ... وفاء انتي حامل ماريد احجيلج اي شي ارتاحي ومن تهدأين احجيلج ..
كتله .. اني ماارتاح الا اعرف سبب هالكلام ..
كال .. السبب تلكيه عد اهلج مو يمي ..
وبقيت صافنه .. اهلي شنو علاقتهم بالموضوع اني وياك اهلي شعليهم ..
كال .. وبصوت عالي .. لان اني جنت متزوج قبل وطلكت زوجتي لان ماصار عدنا اطفال وطلبت منها اتزوج ثانيه ماقبلت تكون الي زوجه غيرها وأصرت على الطلاك .. مع العلم هي مابيها شي واني هم مابيه شي وبقيت وياها ٥سنوات تقريبا حتى أنابيب هم سوينا بس الله ماراد ..
افترت الدنيا بيه وحسيت بنفسي شكد غشيمه يعني اهلي مو بس جبروني عليه لا ضحكوا عليه وماحجولي موضوع انفصاله ... ومن احمد اجا خطبني ماما كالت ماكو بتاريخ العائله وحدة تزوجت واحد مطلك .. هاي قواعد العائله مشت بس عليه وعلى احمد ..
وكتله .. ليش ماكتلي بموضوع انفصالك ..
كال .. والدج او والدتج طلبوا مني ثم اني كلت الموضوع مياثر اني مابيه مشكله وتحاليلي سليمه ..
كتله .. وهذا هو المشكله بالتحاليل لو المشكله انت خدعت انسانه وضحكت عليها وبديت أفقد اعصابي وحسيت الدنيا افترت بيه وشالني وصعدني فوك بالغرفه وهو يتوسل أنه اسامحه وكتله اتركني اريد انام واطلع من الغرفه .. وطلع وعافني وضليت ابجي لحد ما تعبت ورجع عليه الالم وبدا يزيد وبديت استفرغ لحد مااغمى عليه وماكعدت الا بالمستشفى ..
....... للحكايه بقيه ....
