للوفاء عنوان

بارت 6

نزلت وهي عصبيه وكلها ثقه أنه احمد وضعه مو مثل ابن صديق بابا .. وقررت اكول لاحمد يجي يتقدملي و نواجه مصيرنا اني وياه ..
مر الاسبوع بسرعه وقبل يوم بلغت امي أنه جايين ناس عليه ولازم يقابلوهم طبعا بابا ابد مافتح وياي موضوع ولا حتى علي اخويه .. وصارت الامور طبيعيه واجا احمد وامه وابوه واخته او وحده من عماته او وياهم اكيد سارة .. وكانت الجلسه باردة وتم التعارف بين العائلتين ..
احمد جان واضح عليه الخوف والحيره وجانت عيونه ذبلانه و منايم ابد .. وتعرفون مثل كل البنات قدمت الهم واجب الضيافه وكعدت وياهم واول ماكعدت اجتي سارة عليه وهي تكول وفاء وفاء وكعدت بحظني بوستها وخليتها بحظني بدون مااباوع على امي لان ادري كل نظراتها عليه ..
ابو احمد كان كلامه عن اولادة وخاصه ابنه الي انقتل ظلم وعرفت منه أنه ابنه  هم جان متزوج وزوجته بعد ماانقتل راحت لأهلها وبقت فترة متواصله وياهم وبعدها انقطعت اخبارها وسمعوا من ناس انه هي تزوجت وشافت حياتها وخاصه هي صغيرة وحلوة .. اني طول تواجدهم اروح للمطبخ وارجع ماكعدت قليل جنت قلقه مااعرف خجلانه مجنت اكدر اكعد بمكان ثابت ... وبعدها طلعوا الناس وجانت الامور جدا طبيعيه وعرفت من علي أنه بابا كال الهم نرد الكم الخبر أن شاءالله والبي خير الله يقدمه ..
لاحظت على والدي هدوء غير طبيعي لكن امي معاجبها الوضع ابد وتريد تصرخ بس اكو من جابرها على السكوت  .. واكيد ماكو غير بابا .. علي جان وياي بكلشي وماوكف ضدي وجان مثال للاخ الحنون وحمودي بعدة صغير مجرد أنه يوزع ابتسامات عريضه .. بعدها صاح عليه بابا تعالي بابا .. انتي بنتي الوحيدة واني اريدلج الخير واحنا اهلج ادرى منج بمصلحتج لكن هذا الشاب الي اجا اليوم مايليق بينا ..

وفاااء ... بابا ليش اشبي وضعه المادي جيد وهو خريج ومن عائله طيبه ويريدني واريدة وهذا اهم شي ..
الاب .. اسمعي البنت الي اهلها تعبانين عليها ماتوكف كدام ابوها وتكول اريدة ويريدني .. 

وبعدها انفجرت الام .. شتكول الناس عليه ازوج بنتي الوحيدة لرجال مطلق وعندة بنيه وشنو سبب طلاكه غير اكو سبب وجيه حتى نبرر للعالم من نشمرج هالشمرة هاي .. اسمعي هذا الزواج مايتم لو شيصير  اني امج واني احدد الج مصيرج ماتزوجيه وخلص وهذا الموضوع بعد ماينفتح ..

علي ..ماما على كيفج ليش هالعصبيه وفاء من حقها تعيش حياتها هي مو صغيره واكيد تعرف مصلحتها ..

الام .. اسكت انت اني كلت كلمه وخلص هذا الزواج مايتم .. شفت حامد شفت بنته شلون كعدت بحضن بنتك عبالك امها .. امها عايفتها ويريد وفاء تربيله ..

صعدت لغرفتي ابجي وتعبت من البجي ولكيت احمد متصل بيه هواي .. جاوبته واني ابجي وكتله اهلي مموافقين كال ميخالف اجي مرة ومرتين والف مرة بس لاتبجين انتي الي واني الج محد يفرقنا .. وضليت احجي وياه ..وبعدها سالني اتعشيتي لو لا كتله لا كال لخاطري اتعشي كتله مااكدر وطلب مني اتعشى واذا ماقبلت هو هم مراح يتعشى .. نهيت المكالمه ونزلت على كيفي حتى امي ماتعرف اني اتعشيت لان هي اهم شي ناكل ونشرب مو مهم نعيش سعداء او احرار سعادتنا بالاكل .. سمعت صوت من فتت من يم غرفه ماما وبابا وبدون شعور خليت اذني يم الباب لان ماما كالت لبابا انت السبب ..هذا كله دلالك الها ..

بابا .. هذا يادلال البنيه من حقها تختار واني وكفت كدام سعادتها وكتلج اسكتي اني احجي وياها بطريقتي بس انتي متصبرين ..

الام ... حامد شتحجي وياها شتكوللها يعني قابل تحجيلها على عادل وان ابوه صاحب الشركه الي عيشتنا عليها  منين نعيش اذا هي مقبلت بعادل واذا انت بعت كل الاسهم وكعدتنا على الحديدة ..
الاب .. اي شاسوي اعوف اخويه يضيع ويدخل السجن ..
الام .. حامد ...سواء عادل خاطبها او مخاطبها اني ماازوج بنتي لواحد مطلق وعندة طفله لو شيصير .. اني راح انام تعبت منك ومن بنتك .. تصبح على خير ..

ضليت جامدة بمكاني . .. هذا سبب رفضهم لاحمد وزواجي من عادل يحل مشاكلهم الماديه هذا البيت مفتوح من خيرات عادل .. زين وهاي ياشركه ويا أسهم الي ابويه بايعها علمود عمي .. وتذكرت كلام احمد من سالني اول يوم بالمطعم عن أحوال اهلي واحنا عايشين على. راتب ابويه وهو أستاذ جامعي .. و عمي خلص حياته يرهن بيته  علمود  النسوان وتعال ياحامد سدد لو ينسجن اخوك وشتكول العالم اخو الدكتور حامد بالسجن.. لكن العالم مراح تعرف او تحس بتعاسه وفاء وزواجها الغصب من عادل ..