وفاء ..
امي اتاخرت اريد اروح للكليه وين الريوك جوعانه ...
الام .. تعاي اتريكي كلشي حاضر بس الجاي هسه اجيبه
شربت الجاي واكلت شي بسيط وطلعت اركض وصوت امي ورايه هو هذا اكلج عود اكلي بالكليه وديري بالج ماما على روحج ..
والام بداخلها ..ربي داحفظها ويسر امرها
جانت امي دعواتها الي مستمرة احس من اسمعها أنه اني امشي بدعواتها الحلوة ..صار ماما باي ..
طلعت امشي ومثل كل يوم ابو الخط لسه ماجاي بس اني احب امشي شويه بين مايجي هم اشتم هوة نقي وهم اباوع على طلاب المدارس الصغار الي جانوا يملون شارعنا وجانت المدرسه الابتدائيه قريبه على بيتنا واباوع على البنات وشرايط شعرهم الحلوة والكصايب المرتبه الي يلفون شعرهم بيها جانت الكليه قريبه على بيتي بينها وبين البيت .. ربع ساعه بس ماما جانت تخاف عليه كلش ومتقبل الا بالخط اروح لذلك الحك على طلاب المدارس بطريقي ..
وما حسيت الا لطخه قويه من طالبه صغيره وهي رافعه جنطتها او وكعت بالكاع واني هم ردت اوكع بس سيطرت على روحي والا جان وكعت فوكاها حبيبتي
.. حبيبتي خما تاذيتي
ردت عليه وهي تعاتبني واني انظف بهدومها والزعل بعيونها لا ماتاذيت انتي معلمه ..
كتلها لا اني طالبه بس بالكليه
شنو اسمج .. كالت سارة
كتلها .. سسراوي خما تاذيتي كالت لا بس تاخرت وكامت تبجي ..
وكفت سيارة يمنا رفعت راسي تصورت ابو الخط اجا دااحجي عليه لان صدك اني هم تاخرت ونزل منها شاب كل نظراته متوجهه على سارة وكال الها ليش تبجين كالتله وكعت اني وكاللها ليش طلعتي مو كتلج اوصلج ... وجان بطارف عيونه يباوع عليه وكالي هلو ست اني اسف مسلمت انخبصت بسارة ..
ضليت اباوع عليه مااعرف شااحجي يمكن نظراته وكفت عقلي وشدت لساني ومكدرت احجيله اني مو المعلمه لا اني الي وكعت الطفله ... فجاءة وكفت سيارة الخط والسايق وهو يعلي بصوته ست وفاء تعاي اصعدي .. عفت الصغيرة والي جان وياها ورحت صعدت السيارة وبنات الخط كلهم يباوعون عليه لان ماسلمت وكالولي شبيج شو متسلمين ..
وكاللعادة عيون خالد بين الطلاب تباوع عليه ولا يفيد وياه الرزايل والصد .. مرات انقهر عليه مرات اكول الرجل لازم يفكر بكرامته ..
طول الطريق اباوع من الشباك واتذكر شكل هالولد الي شفته وي هالبنيه الصبح الي مااعرف هو منو وشنو وياترى هاي بنته او بنت اخوه أو أخته الصغيرة .. عيونه العسليه ونضراته الثاقبه وشعره الكستناءي مافاركوا بالي ..
لج وفاء شبيج اليوم .. صوت زينب يم اذني يرن ..
صح هي صديقتي المقربه وتحبني كلش بس اذا تريد تعرف شبيه معناها راسي راح ينسطر اليوم ..
كلشي مابيه بس منايمه زين
.. ياله خلي ننزل وصلنا واتاخرنا بالمحاضرة بسبب تاخير هالسايق هذا ..
زينب .. يمعوده كل يوم نتأخر تعلمنا
رحنا بوجهنا محاضرتين اخذنا وهاي جانت اخر سنه النا والحمدلله اني من االطلاب الاواءل ..
الاستاذ .. ياله طلاب التقيكم بالمحاضرة الاخرى ..
مااحس الا صوت ورايه وفاء شلونج وبدون ماالتفت صاحب الصوت معروف ومعلوم مثل كل يوم كتله اهلا ... باوعت على زينب ياله خلي نروح نشرب شي دافي احس راسي حينفجر ..
زينب واحنا نمشي بالممر وهي تحجي بصوت عالي ادري على الاقل باوعي عليه يعني هم خطيه خالد خوش ولد ..
جاوبتها واني ادري جوابي ميعني الها شي لزينب لان كل يوم نحجي بالموضوع وهي تسال نفس السؤال ..
زينب انتي تعرفين رايي بيه أحسه مو رجل متكامل افتهميني ولو كل يوم اكول ومتفهميي ..
زينب .. اني افهمج بس احنا نكول اخذ اليحبك ولا تاخذ التحبه .
فجأة صفنت بحجايتها وتذكرت الشاب الي وي الصغيرة سارة وكلبي كام يدك وسكتت ماعرفت شجاوب يمكن اني تفكيري بيه جان اكثر من اللازم ويمكن هي ساعات من عرفته والتقيت بيه ..وكتلني الفضول هاي الطفله شتكون اله معقوله بنته ..
زينب .. وهي تسالني لج وفاء شتاكلين شتشربين وين رحتي لا انتي اليوم مو طبيعيه ابد ..
وفاء .. لا زينب ماريد اكل اريد نسكافيه راحت زينب تجيبلي النساكفيه ورفعت راسي وشفت خالد حياكلني بعيونه من بين كل الطلاب ..شربت النسكافيه ورحت المحاضرة الثانيه وتفكيري مشغول بلي صار وياي الصبح .. ورجعت للبيت ساكته طول الطريق بعد مااقنعت زينب الي داامر بيه هو صداع بسبب سهري بالليله الي فاتت .. من فتت بشارعنا باوعت على المدرسه ومكان الي التقيت بي بالطفله والشاب وسالت نفسي باجر هم راح اشوفه ..
نزلت من سيارة الخط ودخلت للبيت وحسيت اكو خطار بالبيت .. لاكتني امي وفاء اليوم شكد خابرتج اني وعلي ليش متردين ..
اسفه ماما والله صداع عندي ومحاضرات هواي حتى مطلعنا من المحاظرة الا ربع ساعه شربت بيها شي دافي ورجعت .. كوليلي منو يمنا
كالت .. صديق ابوج علمود شغله تخص ابنهم بالكليه
كتلها وعلي وينه .. كالت جان دينتظرج يتغدة وياج تالي تغدة ونام تعرفيه يحب تتغدين وياه ..
علي اخويه الاصغر ..هم طالب كليه مرحله اولى .. ومحمد اصغر منه طالب متوسطه كلش شاطر واني البنت الوحيدة واكبرهم ..
والدي رجل هاديء واستاذ جامعي بنفس الكليه مال علي .. امي معلمه جانت من صرنا ٣ والدي طلب منها تترك التعليم وتلتفت النا وهي جانت احرص ام بحيث هي ممقتنعه أنه تترك وظيفتها بس حرصها علينا وخوفها تركت كلشي علمودنا .. صعدت لغرفتي وغيرت ملابسي وذبيت روحي بفراشي بدون مااحس على روحي الا وندكت الباب ..
وفاء .. كومي والله جعت ..صوت علي يتوسل حتى ناكل سوة لان ميكدر ياكل الا وياي ..
اي علاوي كمت ا اغسل وجهي وانزل وراك ..
انتظرج لاتتاخرين ..
صار لو بس اعرف شوكت تشبع لا وفوكاها وزنك مايعبر الستين ..
نزل علي وكمت اني غسلت وجهي ونزلت ولكيت ماما تحجي وتكوله لابويه هيأتها نزلت اليوم لا اكل ولا شرب وشوف الوجه اصفر ..
مساء الخير ..
الاب .. هلو باباتي شلونج اليوم ..
وفاء .. زينه اني البارحه نومتي قلقه ومكدرت اليوم ارتاح بسببها ..
بابا اوديج للطبيب ..
وفاء .. لا بابا لاتقلق من نمت ارتحت الحمدلله ..كعدنا اكلنا وجانت امي تباوع عليه..
جنت احس اكو تشابه بين امي وزينب حبهم الزايد جان يوترني اكثر من افرح بيه وخنكتني الضحكه من امي تباوع عليه لزمت روحي لان بس اضحك راح ادخل بعالم التساؤلات الي ماتخلص ..
علي جان ياكل على السريع علمود يروح يلتقي وي اصدقاءة ومحمد ياكل حتى يروح يكمل دراسته .. واني اكل حتى امي تقتنع مابيهه شي كملت الاكل وكلمن راح على الي يهمه واني بقيت أعزل المطبخ وواغسل المواعين .. وفجاه رن تلفوني بمسج ..
من زينب ... وفاء باجر ماكو خط ..
كلت وي نفسي بلكت اشوفه باجر الصبح ..وحرصت أنه مااكول كدام امي ماعندي خط لان معناها بابا يوصلني او علي ...
ومثل كل يوم نزلت اتريكت وسالت على علاوي نايم لان محاضراته تبدي ب١١ طلعت امشي بشارعنا واني اباوع على الطالبات الصغار ولكيت سارة بينهم وشكلها جان عبالك مريضه وهي شافتني وابتسمت رحت عليها تفاجات أنه هي بيها شبه هواي هي والشاب الي جان وياها وكلت بيني وبين نفسي هاي بنته .. كتلها سارة شلونج خما زعلانه لان وكعتج البارحه كالت لا مزعلانه بس حمودي سألني عليج وكتله ه هاي مو معلمتي هاي مثلي طالبه .. اني ضحكت على كلمه طالبه وكتلها حمودي منو جان اسمع صوت يكولي صباح الخير رفعت راسي ولكيته هو كدامي كتله صباح النور وحاولت اسوي نفسي طبيعيه وكأنه شي عادي بس اني مسمعت صوت سيارته يعني جاي مشي .. كالي سارة تكول انتي طالبه بس معرفت اكو طالبات بهالعمر بالابتداءيه وهو مبتسم حجاها ... كتله لا اني اكيد مو بالابتداءيه اني طالبه كليه كال اكيد كليتج هاي القريبه كتله اي ..
بعدين انتبهت على روحي الشارع بدا يفرغ من الطلاب وكفتي وياه بالشارع صعبه وليش دااجاوب على أسئلته وليش اصلا داانتظرة .. بعدين كتله من رخصتك تاخرت ..كال الخط مااجا ليش مااوصلج كتله لا شكرا اني اروح ... عفته ومشيت واني امشي واكول لروحي ليش هيج سويت ليش انتظرته وليش ردت اشوفه معقوله اني وفاء اسوي هيج ...زين هو اسمه حمودي .. يعني لو محمد لو احمد ... وهي اكيد مو بنته لان كالت حمودي مكالت بابا ... صعدت سيارة ورحت للكليه ومن وصلت باب الكليه تفاجات بشي مجان بالي ابد وهو أنه جان هو واكف باب الكليه يعني جان متابعتي طبيت للكليه واني اسال نفسي .. ليش ديتابعني معقوله هو اصلا من وكفت وي سارة جان دينتظرني يعني مو صدفه ...
وفجاه .. صباح الخير وفاء صوت زينب من الصبح وهي تسال شلون اجيتي وخالد واكف وراها ديتابع اخباري ..
