مشتاق:جدي والله آني ما قصدت بس ...
قاطعه الجد: شنو عبالك آني نايم ورجلي بالشمس لو ما اعرف شيصير ميصير ابيتي؟؟
مشتاق بأسف:جدي حقك علية والله..بس اسمعني الله يخليك ولا تتعصب.
الجد: ما اتعصب شنو؟ليش الموضوع هيّن؟؟على تالي الزمن مشتاق انت العاقل تتعارك وتضرب ابن عمتك لااا وتطرده من بيتي لخاطر مرتك.
مشتاق بإستغراب:منو؟ليث؟
الجد: اي ليث ومنو غيره يعني؟بالله ما استحيتو على نفسكم وانتو تتعاركون لخاطر عرضكم اثنينكم.
مشتاق فتح عينيه:جدي إنتَ خابرتني علمود الشغلة اللي صارت بيني وبين ليث؟يعني مو على غير شي؟
الجد:اي ليش صاير شي ثاني وآني ما اعرفه؟
مشتاق بإرتباك:آآآ..لالا..ماكو شي.
الجد جلس في مكانه: اسمعني مشتاق..مو آني اللي بنيتة بسنين تجي انتَ وابن عمتك تخربوه لخاطر شي تافه..وتبدون تقطعون صلة الرحم وواحد يطرد الثاني من بيته وتتعاركون وتتضاربون وتفتحون دفاتر قديمة,,وبعدين بيتي جان مفتوح للكل..وكلكم تربيتو بيه مثل الأخوة.وبالذات إنت وليث .
مشتاق عض على شفتيه وهو يستمع لكلام جده:بس جدي ليث هو الغلطان انتَ ما سمعته وهو...
الجد:لا ما سمعته بس بت عمك موقفته عد حده وهو ندمان بس مقهور منك.وبعدين شنو انتَ ما عندك ثقة بمرتك؟
مشتاق فتح عينيه
الجد:شبيك؟جدك وآني بعيد عنها واثق منها..اعرفها متربية زين وقوية ومتنطي مجال لأحد يضحك عليها..بس....
رفع مشتاق رأسه ليسمع تكملة الجملة.
الجد اكمل: بس عنادية ومتعبتك.
مشتاق زفر بموافقة.
الجد بتساؤل:
ولهالسبب.انتَ لازم تتزوج وبأسرع وقت آني وراية مشاغل ومصالح مو فاضي افك عركاتكم لخاطر النسوان..لا وتريد تعوفها ابيتي وإنت تسافر...يعني كَلّي اشون..أمنع ولد عماتك يجون لبيتي والله شنو حتى لا تغار؟
ما الذي يقوله الجد؟ وعن أي غيرة يتحدث؟طبعا هو لا يغار لكنها ملكه ولن يسمح لأحد بالاقتراب مما يملكه.
الجد استمر بكلامه:خلاص لازم تتزوج حتى تكَطعون كل المواضيع القديمة .
مشتاق: جدي صدكَني آني ما عندي شي بس هو ليث لازم ينسى.
الجد: وانت هم لازم تنسى لأن تعرف بت عمك هي اللي رفضته لأبن عفاف تدري ليش؟؟لأن هي عاقلة وتعرف عمتها ما راح تتقبلها وتعرف راح تصير مشاكل بين عفاف وابنها بسببها,,,
ولأن آني ردتها ما تبعد عن بيت بركات ما جان كَدامي بس إنتَ واعرف ضغطت عليك واعرف حطيتكم كَدام الامر الواقع..بس يا مشتاق انتَ متعرف شكَد هالبنية كاسرة بخاطري..
مشتاق انتبه لنبرة الحزن في كلام جده عن دجلة.
الجد استمر بكلامه:آني احس بنفسي ظلمتها هواية..وشكَد حاولت اعوضها وياما تمنيتها تتربى ابيتي وجوة عيني ..بس هي تعلقت بأمها ورجل امها وكلت ما اكسر قلبها وانوب تكرهني بالزايد..ولو تعرفون انه آني حطيتلها مصروف يزود عنكم كلكم حتى بلكي تفرح بس هالبنية شايلة كل الأنَفة مالة بيت بركات جانت ما ترضى تاخذ مني ولا فلس وكبرت ونفسها عزيزة حتى عيديات وهدايا متقبل تاخذ من احد.وعرفتها عنادية ويرادلها رجّال قوي يتحملها ويتحمل عنادها.
وبينما الجد يتكلم كان مشتاق يهز رأسه لأنه قد عانى ما عانى منها.
YOU ARE READING
انا وابن عمي
Short Storyماذا يحدث لكن منهما مشتاق شاباً ذكياً مدللاً لديه اعتداد بنفسه حد الغرور لكنه لم يستغل هذا الدلال من اجل ملذاته او طيش الشباب بالعكس كان انسانا محترما ومحل ثقة ويفكر بعقله قبل عواطفه وكانت تهمّه المظاهر ويحلم بزوجة مستقبل من عائلة راقية ,يتباهى ب...
