رواية بيت جدي اللي جمع كل المحبة والأماني والحنين

23

الجزء الثالث والعشرون 
<<<<

خلصت كل شي وراحت غرفتها لازم تبدل وتستقبلهم مجبوره مو بكيفها ولا لو عليها هم ميتين من زمان بالنسبه لها اللي حتى في عزا ابوها حضروا يوم واحد بس بحجه انهم ساكنين في ابها ومسافرين ولازم يرجعون
بدلت وحطت ميك اب خفيف وطلعت ماشافت احد جلست بالصاله تنتظر وغاده راحت تلبس عيالها كلها دقايق ودخلوا عماتها حرمتين جسمهم ممتلئ شوي سمر ولابسين ذهب مبالغ فيه ووراهم هادي يرحب فيهم
ابتسمت بدون نفس ووقفت تسلم نزلت غاده وسلمت هي الثانيه بدون نفس وقالت بكذب: وينكم تأخرتوا من زمان ننتظركم 
ثريا "العمه الكبيره " : تعرفين الزحمه هنا شلون وولدي سالم الله يحفظه مايحب يسرع 
غاده: اجل وين البنات ليش ماجبيتوهم معاكم يغيرون جو ويتسلون اصلا من زمان ماشفناهم حتى بعزاء عمي الله يرحمه ماجاو 
ثريا : بناتي طول وقتهم مع بنات خالهم يطلعون ويوسعون صدورهم ومايحبون المشاوير الطويله وبعدين ليش يجون خليهم يستانسون هناك احسن لهم 
سعاد "العمه الاصغر " الا وش مسويه ياريم بعد ماتطلقتي يقولون زوجك صار له فتره يحاول فيك ترجعين وانتي رافضه 
لوت ريم بوزها بممل "مسرع وصلتكم الاخبار " الحمد لله على كل حال انا راضيه باللي ربي كاتبه لي 
ثريا بهمس : شلون ترجع له وهو يحب وحده غيرها الله لايبلانا الا اذا ماعندها كرامه عاد هذا شي ثاني 
توسعت عيونها وناظرتهم بصدمه وقلب وجهها احمر قالت عمتها بسرعه : شفيك شفيك لاتنفجرين بعد هذي الحقيقه والكل يتكلم فيها وبعدين بصراحه وبدون زعل ياريم البنات يقولون بعد ان هاللي يحبها رجلك تجنن 
ارتجف صوتها وقالت بقهر: ياحبكم للقيل والقال بس جعل كل من يتكلم فيني تلف عليه الدنيا ويصير له اكثر من اللي صار لي الله يمهل ولا يهمل سبحانه 
شهقت ثريا : بسم الله على بناتي حسبي الله عليك تدعين على بناتي هم وش دخلهم هذا الكلام اللي الكل يقوله وهم سمعوه حالهم حال غيرهم وعلموني 
ريم : واذا سمعوه مو معناته ينشرونه ومايظل احد فَ الممكله مايعرفه الله يحب الستر والله يستر بعد وش الاشاعات اللي طلعت غير هالكلام 
قامت عنهم بسرعه لاتنفجر فيهم ناظروها بكره وهزت سعاد راسها : ماعرف اخوي يربيها والله ان ودي اسحبها معي لأبها واربيها عدل هناك بس مو فاضيه لها 
ابتسمت غاده بتوتر : حصل خير ماعليكم منها توها صغيره المهم تفضلوا على العشاء 
جهزت الشغاله العشاء وغاده قالت بكذب : يلا سموا حياكم هذا كله انا مسويته 
ثريا : ماشاء الله اخبرك يوم اخذك هادي ماتعرفين تسوين شي 
غاده : يووووووه خبرك قديم شدعوه خلاص صار عندي عيال وتعلمت كل شي وصرت فنانه حتى ذوقي وأحكمي 
كانت الشغاله شايله صينية العشاء بتوديها لريم نادتها ثريا : تعالي تعالي انتي ياللي ماادري وش اسمك
قربت الشغاله بخوف : وين موديه هالاكل كله 
الشغاله : ماما ريم 
ثريا : اللي يبي يأكل يقعد معنا ليش ماتاكل معانا شايفتنا قطاوه تقرف منا روحي ودي الاكل للمطبخ 
الشغاله : بس ماما حرام والله ريم تعبان روح مستشفى اليوم 
ثريا بتكشيره : حتى شغالتكم طويلة لسان قولي لها توديه لااذبحها الحين 
غاده : خلاص انقلعي وديه المطبخ ريم اذا تبي تجي تآكل هنا 
الشغاله تتحلطم : ماما ريم سوي كل هذا اكل بعدين مايآكل 
عقدوا ثريا وسعاد حواجبهم وهم يناظرون غاده اللي قالت بتوتر : بقره ذي ماتدري شالسالفه ريم من جات من المستشفى وهي بغرفتها ولا طلعت ابد
كملوا اكل وثريا وسعاد يناظرونها بشك وهي تدعي على الشغاله وتتوعد فيها 
اما ريم انسدحت وهي حابسه دموعها بالقوه عماتها اللي المفروض يكونون اقرب الناس لها هذا كلامهم شلون الغُرب اكيد طلعوا عليها كلام اكثر واكثر وبهروا السالفه 
مو كفايه اللي صار امس كانت قاعده فّ غرفتها وسمعت اخوها وزوجته يتناقشون وصراخهم عالي طلعت تشوف وش فيهم وياليها ماطلعت 
كان غاده تتشكى من ريم وانها مضيقه عليهم فَ البيت وانها تحتاج الملحق ومن هالكلام رجعت بسرعه لغرفتها قبل لاحد يشوفها ودمعتها على خدها 
تعوذت من ابليس وغمضت عيونها وكانت فعلا محتاجه للنوم لانها هلكانه من التعب