رواية بيت جدي اللي جمع كل المحبة والأماني والحنين

19

الجزء التاسع عشر
>>>>

دخلت لبيت اخوها وعيونها منتفخه من البكي 
قربت مرت اخوها وسلمت بدون نفس: حياك ريم 
ريم بصوت مبحوح: الله يحييك 
هادي باحراج : ريم اعذريني تدرين ان مافي الا ثلاث غرف غرفتي وغرفة العيال وغرفة الشغاله يـــ
ريم تقاطعه: ولا يهمك ياخوي عادي انام بأي مكان 
غاده زوجة هادي: مافيه الا الملحق
هزت راسها: طيب ممكن تدلوني وينه
هادي شال شنطها : تعالي 
لحقته لين وصلوا لعند باب فتحه كانت غرفه صغيره مفروشه وفيها نافذه وخاليه من الاثاث تماما وفيه كم مفرش مرتبين في زاوية الغرفه وفيه حمام صغير-اكرمكم الله - 
دخل الشنط وقال : العيال عندهم تلفزيون صغير بجيبه احطه هنا عشان ماتطفشين 
ريم: لا مايحتاج خله لهم
هادي: لا مايحتاجونه فيه تلفزيون فَ الصاله اذا يبون يتفرجون
طلع هادي وهي وقفت تتأمل الغرفه دقايق الا رجع وهو شايل التلفزيون حطه على الارض وانحنى يشبك الاسلاك 
خلص وجاب طاوله صغيره وحط التلفزيون فوقها مد الريموت لريم : خذي واذا احتجتي اي شي قولي لي والشغاله بعد شوي بتجيب لك العشاء 
طلع وهي فتحت شنطه وطلعت لها لبس ودخلت تاخذ شور سريع بعد دقايق طلعت واخذت استشوارها من الشنطه وجففت شعرها ورفعته 
اخذت المفارش وفرشت لها على الارض وانسدحت حست بخوف لانها مو متعوده على المكان 
غمضت وعيونها تحرقها وتغالب دموعها مسكت جوالها وحاولت تلهي نفسها فيه شوي واندق الباب توقعت الشغاله جايبه العشاء 
فتحت وشافت عيال اخوها محمد واحمد واقفين ابتسمت لهم : هلا حبايبي 
محمد شايل البلايستيشن قال بحماس : عمه ريم تلعبين معنا 
ريم : لا يَ قلبي روحوا ناموا بكره نلعب 
احمد بهمس : العبي معنا تكفين لاتخافين امي وابوي ناموا 
ابتسمت بدون نفس وقالت : تعالوا 
دخلوا بحماس وشبكوا البلايستيشن على التلفزيون وشغلوا شريط مصارعه بعد دقايق دخلت الشغاله وشايله صينية العشاء قعدت ريم تاكل بدون نفس وتناظر عيال اخوها اللي يلعبون بحماس 
محمد واللي عمره 10 يفتح علبة البيبسي : عمه لاتقولين لابوي اني شربت بيبسي والله بيضربني 
ريم : لاتشرب حبيبي مو زين لك 
محمد برجاء : بس هالمره والله بشرب نص علبه بس تكفين لاتعلمين 
احمد واللي عمره 8 بملل : بس يبينا نشرب حليب ولبن كل شي ممنوع 
ريم : عيب هو ابوكم ويعرف مصلحتكم لازم تسمعون كلامه 
احمد: عمه انتي بتسكنين عندنا كم يوم
محمد بعصبيه : عيب ياحيوان مايقولون كذا 
احمد بطفوله : لا انا ابيها تقعد عندنا كثيييير لانه طفش وماعندنا شي نسويه 
محمد: اسكت بس -رفع يد البلايستيشن - تعالي العبي 
ريم : مااحب المصارعه 
محمد بسرعه : طيب وشو تبين فيه كوره وفيه حرامي سيارات - قال بهمس - ابوي مايدري عن حرامي السيارات ولا كان كسره 
ابتسمت غصب عنها وتمنت ترجع طفله مثلهم وكل همها تشرب بيبسي وتلعب حرامي سيارات 

,,,,

رفع راسها : اهدي اهدي حبيبتي وكلميني 
لكنها كانت ضامه وجهها بين يدينها وتبكي 
قرب المويه منها : سمي بالله واشربي 
شربت شوي وركان قال : علميني وش صار وش فيك 
شهقت وهي تحط يدها على فمها : ريم تقول انا السبب 
مافهم شي ومسح دموعها بيده : امول بابا اهدي وتكلمي عشان افهم 
رجعت دموعها تنزل : سعود طلق ريم 
راكان باستغراب: طلقها طيب وانتــ
قاطعته وهي ترجع شعرها الطويل لورى : وريم تقول اني انا السبب في طلاقها 
انشد فَ رقبته عرق معقوله سعود طلق زوجته عشان امل عد للعشره عشان يهدأ وقال : وليش يطلقها عشانك 
امل لاحظت تغير وجه راكان ورفعت كتوفها : مدري
امل كانت مجبوره تقول له لانه لو ماعرف منها بيعرف من غيرها
وده ينفجر بس مسك نفسه قدام امل اندق الباب وكان فيصل : تفضل
دخل فيصل وقال بخوف : شخبارك الحين 
امل تمسح دموعها : الحمد لله بخير 
قرب فيصل وقال : قومي اوديك المستشفى 
امل تهز راسها : لا مايحتاج والله مافيني شي 
فيصل ناظر وجه راكان : شفيك راكان شفها بخير الحمد لله مافيها شي 
راكان بهدوء : مافيني شي 
وقف وطلع من الغرفه بسرعه
امل مسكت يد فيصل : الحقه بسرعه بيروح لسعود لاتصير بينهم مشكله 
فيصل مافهم شي لكنه ركض ولحق راكان وهو يناديه 
راكان وصل للحديقه : فيصل واللي يرحم والديك اتركني بس بتفاهم معاه
فيصل يوقف بوجهه : لا راكان انت معصب الحين ومو حاس بعمرك اهدأ بعدين تفاهموا 
راكان يتنهد : فيصل ابعد واللي يسلمك انا هادي
فيصل بحده: قلت لك لا اذا تركتك بتتضاربون طيب علمني وش صاير 
راكان من بين اسنانه : تدري ان هالحقير مطلق زوجته عشان امل 
وصلهم صوت من وراهم يقول: مالحقير الا انت والحشيمه حق فيصل مو لك 
فيصل : صحيح الكلام اللي سمعته ياسعود
سعود يبي يقهر راكان هز راسه ببرود : ايه صحيح وانتوا كلكم تدرون بهالشي قبل لاتتزوج هذا 
راكان والشر يتطاير من عيونه : سمعت فيصل وبكل وقاحه يقولها 
فيصل يمسك كتوف راكان : راكان اهدأ انا بتفاهم معه تكفى مابي ابوي يحس بشي بعدين فكر في امل حرام اللي فيها مكفيها صل على النبي 
راكان يمسح وجهه : اللهم صل وسلم عليه - ناظر سعود بحده وحقد - انا بمشي قبل لاارتكب فيه جريمه 
سعود باستهزاء : لا خوفتني تصدق
سحب فيصل راكان لداخل : تعال ادخل انا بنادي امل 
قعد راكان فَ الصاله وبمجرد ماشاف فيصل طلع الدرج ركض لبرا لان النار اللي فَ قلبه للحين ماطفت 
وصل لعند سعود وبدون مقدمات وجه له لكمه قويه تلمس سعود انفه وفمه وشاف الدم اللي طلع رص على اسنانه وشد قبضة يده عشان يرد له اللكمه 
لكن ياسر وصل في الوقت المناسب ومسك سعود وهو يقول : شصاير شفيكم !!
سعود صرخ : ياسر ابعد
ياسر ماسكه : ماراح اتركك وانت كذا قل لي وش صاير 
وصل فيصل يركض ومسك راكان : انا مو قايل لك لاتطلع شفيكم انتوا انهبلتوا 
ياسر : فيصل شصاير
فيصل : مو صاير شي اخذ اخوك قبل لاحد يشوفه - سحب راكان - وانت امش 
مشى راكان وركب سيارته ويحس انه يغلي من القهر ثواني وركبت امل حرك السياره بدون لايتكلم وكان يسرع سرعة جنونيه 
امل بخوف : راكان شفيك خفف
ماسمع لها وكمل طريقه وامل قلبها بيوقف من الخوف ترجته : واللي يرحم والديك راكان خفف 
خفف وهو يهز رجله بتوتر : الخسيس الواطي ويقولها بوجهي بعد 
امل تمسك يده : حبيبي اهدأ الله يخليك مايصير تسوق وانت كذا 
ذكر الله وحاول يهدي من نفسه بس كل مايتذكر كلام سعود وانه للحين يفكر في امل يحس انه بيموت من القهر
وصلوا البيت ونزلوا استقبلتهم ليان وسلمت عليهم ناظرت عيون امل المنتفخه من البكي وقالت بحده : راكان مضايقك بشي 
طلع لجناحهم ماله خلق شي وعلى طول دخل ياخذ شور 
ليان سحبت امل : تعالي قولي لي شفيك 
طلعوا لغرفة ليان وشالت امل النقاب والعبايه وتنهدت بضيق وهي تقعد على السرير 
ليان باستفسار : انتي متهاوشه مع راكان 
امل تهز راسها : لا 
ليان : اجل علميني شفيك 
امل مسكت راسها لانه مصدع : تخيلي سعود طلق ريم عشاني 
ليان باستغراب: عشانك !!! شلون يعني عشانك 
امل بصوت مبحوح : مادري وش صار كنا قاعدين فَ الحديقه وجات تصارخ وتقول ان سعود طلقها عشاني وبعدها انا طحت وماحسيت بشي 
ليان بزعل : سلامتك ياقلبي 
امل : الله يسلمك المهم ان راكان تضارب مع سعود ولولا الله ثم فيصل كان شبو في بعض 
ليان : لاحول ولا قوة الا بالله 
امل : ليان انا حاسة بالذنب 
ليان : انتي مالك ذنب حبيبتي يمكن ريم من القهر قالت هالكلام 
امل تهز راسها : لا سعود قال هالكلام في وجه راكان 
ليان بصدمه : قال يحبك 
امل : الظاهر كذا لان راكان شاب نار ومولع انتي ماشفتيه شلون يسوق 
ليان : الله يعين المهم انتي لاتحطين في بالك انك انتي السبب ترا مالك دخل حتى لو كان للحين يحبك انتي مالك ذنب - مسحت على كتفها - قومي ارتاحي حبيبتي 
امل توقف : اوك تصبحين على خير 
ليان : وانتي من اهله 
دخلت امل لقت راكان توه طالع من الشور ويجفف شعره بالفوطه اخذت لها بجامه مريحه لبستها وانسدحت بتنام ماتبي تكلمه وهو معصب 
حست بَ راكان ينسدح جنبها وهي معطيته ظهرها ضمها وهو يهمس : آسف بس ماأتحمل اشوف احد يفكر فيك لو مجرد تفكير فما بالك يجي ويقول يحبك 
لفت عليه وقالت بعتب : طيب بس انت تدري اني مستحيل افكر بأحد غيرك 
باس راسها : والله ادري ياحبيبتي بس لاتلوميني 
مسك يدها وباسها : آسف حبيبتي - مسح على شعرها - شخبارك الحين 
امل : الحمد لله بس راسي مصدع شوي 
راكان : تبين بندول 
امل : لا الحين انام واصير احسن ان شاء الله 
باس خدها : يلا نامي ماراح انام لين تنامين