أبتسم لي

18

ابو ايمن:- تفضلي خيتي امري
اني:-ما يأمر عليك ظالم بس اريدك اسوي الي حساب فيس تعرف؟
ابو ايمن :ضحك وكال اي اكيد .. انطيته موبايلي ..
وابو داود وجهه ما يتفسر . ابصراحه اتعمدت اجي كدامه واطلب ماعرف ليش عرفته راح يضوج وحبيت اضوجه .
صدك كمل الحساب ابسرعه اني اتقربت من ابو ايمن اريد بس يعلمني لانه شي جديد عليه طبعا ابد مجنت قاصده شي ومو كولش قريبه عليه يعني بس مسافه حتى اشوف شاشه الموبايل هو كاعد واني واكفه .
الراوية:---- ابو ايمن كلش انحرج وخاصه الشيخ سالم كاعد وقرب مها عليه مايعرف ليش ربكه ابن عرب ما متعود هيج وخاصه مها اله جاذبية خاصه من اسلوب كلامه  المختلف عن نسائهم ..
ابو داود:- ام فرح صبينا جاي ثاني بلا زحمه اني:- تامر ورحت اصبله .اهنا ابو ادواد راح اتكلم مع مرته ..
ام وجيهه اجت لمها
ام وجيهه: - خية اعرف مالج قصد ترة احنه اهنا فلاليح عرب مايجوز عدنا المرة تحجي وية الزلم .. ابو داود حيل ضاج من حجيتي ويه ابو ايمن ترة
اني:- عاداتكم راح تموتني هاج انت ودي الجاي .
...............
ثاني يوم عطله عندي ..
ابو دادو راح يشوف مصالحه واني كعدت بالصاله
ام وجيهه :- يلا اني رايحه فدوة ام فرح اطبخي بمكاني
اني:- اي ام وجيهه بس بلا عرضه وين رايحه
ام وجيهه :- رايحه عد أهلي والله
اني:-هاا سلمينا عليهم ولو مااعرفهم
ام وجيهه :- يوصل .. وراحت لوحده من غير بناته ..
قبل ما يجي سالم هي رجعت ...
ورة الغده صبوا الجاي
وجيه:-خاله مها حبابه خابري صديقتي ع الفايبر
طبعا مها ماعده موبايل وحتى امهاته ماعدهن ..
وجيه:- اريد أساله على الامتحان
اني:- اي جيبي الرقم راحت جابت الرقم بورقه وضلت ساعه تحجي وياهه .. واحنه كاعدين و نسوان سالم كاعدات يم رجلهن وبس يسولفن وياه بمواضيع واضح جدا هو ما يحبه واني هم مواضيعهن بايخه  ويلحن اهوايه وهو باله مو يمهن المفروض يلاحظن هذا الشي بس هنه مستمرات .....
وجيه :- هاج خاله الموبايل
اني:- اها شو تأخرتي
وجيه :- والله اكو مسائل ما فاهمته وهي فهمته الي
اني :- هي وين بيته
وجيه:- قريب علينا
اني:- اي لعد ليش مارحتي ويه امج الصبح من راحت لأهله جان رحتي وبطريقه توديج واجيبج
اهنا وجيه عضت شفته بمعنى ااااش مااعرف ليش؟
سالم:- وجدان اليوم رحتي لأهلج؟؟؟
ام وجيه طلع اسمه وجدان ما جنت اعرف بس استغربت شنو ما ماخذه اذن من زوجه ؟؟.
ام وجيه وجه صار ينطي الوان ماتعرف شنو تكول
سالم:- يعني رايحه ؟
وجيه:- والله اخر مرة
اهنا كام من مكان ولزم ام وجيهه من زنده وضغط عليه بيده الخشنه وصاح بصوته المرعب
سالم:-- اني مو حذررررررررررررتجججججج
اهنا اني من يمي فزيت ارجف وبناته كامن يبجن وام داود تحاول تهدي رجله بس هو دفعه وضل يظغط على ايد ام وجيهه
وام وجيه ضلت تبجي وتتوسل اني اتوقعت راح يضربه من شكله المتهجم بس هو اكتفى بدفعه على الارض وكال:- لمي جرودج وروحي يمهم خل يفيدوج كاله بأستهزاء طبعااا وطلع
اني اهنا صدك كرهت سالم كللللش يعني شنو ليش هيج سوة بمجرد ماعرف بيه حتى لو رايحه بدون علمة المفروض يحاسبه بهدوء بينه وبينه مو كدامنا وكدام بناته خطيه يهينه صدك حسيته يعاملهن مثل البهايم لا يسوي الهن حساب ولا قدر واصلا هو ما حاسبه لان طالعه من دون اذنه حاسبه لان من الاصل مايريده تروح .... شنو من استعباد مستعبد بيه نسوانه هذا المستبد .. 
اني تقربت من وجيهه الي كاعده تبجي وبناته حواليه يحظنن بيه
اني:- ان وجيهه والله ماعرف لو ادري ولا حاجيه اني شعرفني وليش هو هيج الله يساعدج . هسه شنو راح اسوين
ام وجيهه:- كامت وراحت لغرفته واني احساسي بالذنب موتني ..
كعدت بصف ام داود الي كاعده وصافنه
اني:- ليش هيج يتعامل وياكم وانتن ليش ساكتات
ام داود : شنو بيدنا
اني:- والله مقصدي ترة ماعرف بيه طالعه من غير اذنه
ام داود :-- لا يداده انت مالج دخل . لا تهمين اشويه ويرضى وهي تروح تحب ع ايده ويسامحه وكامت ام داود
وعافتني مصعوقه عاااا يعني فوك ما اهنانه كدامنه هي تعتذر وتبوس ايده .صدك ضجت لو منه والله اروح لهلي واخذ موقف
رحت اله
اني :-ام وجيه بعدج تبجين ؟
ام وجيه:- والله امي مريضه ورحت اشوفه
اني:-الله يلعن الظالم الي يحرم بت من امه انت ليش ساكته؟
هي:- لا لا ادعين عليه
اني:-شنوو راح اتخبلوني انتم . انتي ليش ما ترحين لهلج مو طردج
اني:-لا هذا بيتي عدنا عيب المرة تعوف بيته الا تكون مسويه عمله جبيرة .
اني:-شنو هاي انتم .. بعدين ماله حق يمنعج عن امج تره
هي:- هو يخليه تجي اتشوفني بس اني اروح ممنوع
اني:- ليش شنو
هي:- سكتت دنكت ما حجت شي ... اني ضجت منه اضوج من وحده هيج لهلدرجه وعرفت السبب مو بس بسالم .....