العسل المسموم ... طارق اللبيب

الأخـيرة

الحقيقة الانا ما خالطني فيها شك انو ابراصوم اللعين موجود في جسمو لكنو خانس.. بس عارف احتمال يكون متخوف من العلاج ومرعوب من المجهول .. والاحتمال الاكبر يكون الخوف ده نابع من ابراصوم مامن عارف .. وحنشوف ..
المهم يازول بكرة في الصباح اتصل علي عارف وقال لي انو في الشارع .. عايز يتاكد لو انا موجود.. قلت ليهو مرحب اتفضل انا راجيك ..
قبل مايصل عارف .. عندي بعض الاضاءات.. حول العلاج بالقران وطرد الجن من الاجسام .. الجن مخلوقات روحانية .. تسلك في ابدان المخلوقات العضوية .. وليس بالضرورة في جسم الانسان فقط ..
بل ممكن يلبس الجن في جسد كلب او قط او حمار او ثور .. وكثيرا شاهدنا حيوانات تصرع كمايصرع الانسان ..
وفي بعض الاثار عن الشيخ الدرديري .. قال بعض حيرانه .. انه كان له ثور للذبح .. فلما ارادو ان يذبحوه .. قال الثور .. انا احتمي بسيدي الشيخ الدرديري .. فقالو كرامة ..كرامة .. فلما بلغ الخبر الى الشيخ قال ليهم لايخدعنكم الشيطان .. انما هو ثور ممسوس ينطق الشيطان على لسانه .. فاذبحوه .. فذبحوه .. وغير ذلك كثير ..
اما ما يحدث للناس .. من صرع الجن وتلبسهم .. فهو مذكور في القران الكريم .. ففي سورة البقرة .. (الذين ياكلون الربا لايقومون الا كما يقوم الذي يتخبطه الشيطان من المس .. الى اخر الاية الكريمة..)
ودخول الجن في الانس معروف.. مثبت في كل الديانات السماوية .. وحتي في الهندوسية والبوذية والوثنية .. وفي كل الامم .. تتناقل الاخبار عن اعتداء الجن والاشباح على الناس والبيوت .. وغيرها ..ولم ينكر احد من هذه الامة دخول الجن في جسد الانسان الا المعتزلة ومنكري السنة .. واولئك الذين خرجوا من الدين والحدوا ..
ولكن مربط الفرس.. يأتي في كيفية العلاج .. فالعلاج الذي يقوم على الدجل والشعوذة .. محرم بل كفري .. مثل هذه الرموز والارقام الطلاسم التي يكتبونها على البخرات والمحايات والتمائم ..
ولكن العلاج الحقيقي والنافع هو العلاج بايات الله والرقية الشرعية باللغة العربية والادعية المفهومة .. التي ليس فيها طهطهة ولا كشكشة .. انتهي التوضيح ..
نرجع للقصة ..
مع بداية مواعيد العمل.. وصل الاخ عارف ..ومتوتر من هو برة.. زي الزول الداخل امتحان .. قلت ليهو يازول انت خايف؟ قال لي خايف.. وماخايف .. يعني عندي شعورين.. شعور طمأنينة بالقران وثقة في العلاج.. ومن ناحية تانية في خوف ماعارف مصدره ..
وجات اللحظة الحاسمة.. وابدأت الجلسة .. بقراءة ايات ابطال السحر .. بدأ جسد عارف يتحرك بحركة عجيبة وغريبة في الايدي .. ونفض غريب .. الله اكبر ..وده طبعا" ما من علامات تأثير السحر نفض الايدي .. نستمر في القراءة ..
جات ايات طمس العين .. حصلت حركة واهتزاز في كامل الجسم زي الزول الراكب ليهو عربية في دقداق .
برضو ده ماتأثير العين .. يعني السحر عندو تأثير معين لو حصل في الجلسة باكد وجوده .. والعين كذلك .. وكل تأثير مميز عن الاخر ..
جات ايات المس وتلبس الجن .. وتعال شوف الصراخ والالم ..
بدا يصرخ ويتلوى .. بطريقة مخيفة جدا .. وركزت علي الايات دي بالذات .. تركيز شديد .. ورفضت اتخاطب معاهو ابدا".. لان التخاطب مع الجن مضيعة للوقت .. فهو كذاب وافاك .. وربما يكون مضر .. مثلا" الجن يتهم مسلمين بفعل السحر وهم ابرياء .. زي مابحصل كتير مع جهلة المعالجين .. ينطق الجن باسماء ناس فعلوا السحر .. وربما يستغل الجن توتر في العلاقة بين المريض واخرين .. فيزرع الفتنة بين الناس . عشان كدا دايما بقول للمعالجين الحذر الحذر من تعمد استحضار الجن ..او سؤاله عن شي .. خاصة الغيبيات .. فان هذا قد يقودنا الى الكهانة .. والاستعانة بالجن .. وغيرها من الامور الممنوعة شرعا .. واحيانا يكون الكلام صادر من عقل المريض الباطن .. على كل .. مافي داعي لاخذ معلومات من الاستحضار ..
المهم وانا مستمر بتكرار .اية الكرسي وبداية الصافات .. وايات من سورة الجن والزخرف والاحقاف .. وايات زجر الشياطين .. عذبته عذاب شديد..
ولكن لم يخرج وكان يصيح انه مجبور .. مأمور .. حتى تعب الاخ عارف .. وارهق جدا من الأستحضار .. ولكن بالطبع اشد التعب كان على الجني ..
لمن افاق عارف .. قال لي انا سامع كل الصراخ .. وحاسي بي كل الحركات .. بس كانت القوة اكبر من سيطرتي .. وجسمي بتحرك براهو .. قلت ليهو الليلة كفاية .. امشي اقرا اية الكرسي 100 صباح ومساء .. وتعال لي بعد بكرة ان شاء الله .. وماتفك حسبي الله ونعم الوكيل .. مابقدر يعمل ليك اي شي ..
المهم بدون تفصيل في حالة الرجل .. اخد تقريبا على ما اذكر .. اربعة جلسات .. وفي الجلسة الاخيرة .. عارف كان طيلة القراءة مغمض عينيهو عادي وطبيعي جدا جدا ومطمئن ..
بعد انتهت الجلسة قعد يتبسم .. تبسم المنتصر.. وانا اغروقت عيناي من الفرحة .. قال لي انا ماكنت عايز احكي ليك قبل الجلسة .. لكن انا امبارح بالليل .. شفت رؤيا سمحة شديد .. شفت شخصية تشبه الشخصية الكانت بتظهر لي الحيطة .. بس حجمو صغير شديد زي القزم .. ووشو ويديهو محروقات .. وشايل شنطة مشرطة .. وماشي زي اللاحق ليهو بص .. وبعدها قمت مرتاح وطبيعي .. والخوف والزهج والتردد كلو راح ....عرفت انو مشى .. بس قلت اتأكد بالقران في الجلسة .. الحمد لله رب العالمين ..
من اليوم داك عارف اتخذ طريقه الصحيح .. وبدل اصدقاءه .. ونا كنت من ضمن الاصدقاء الجدد .. واخباره اتواصلت معاي ..
فالحصل بعد داك والتردد عارف اشتغل مع ابوهو في المنطقة تقريبا شهر ونص والتردد لغاية ما الوالد اوراقو بتاعة السفر جهزت .. وسافر السعودية .. وخلا عارف في المنطقة لمن بقى مكنيكي .. شاطر ومسك محل ابوهو .. وبقى ماسك البيت .. اها الوالد لمن مشى السعودية حكى للخال .. التغييرات الحصل لي عارف والتردد وتحويله 180 درجة .. وامنية لمن كلموها انو عارف اتغير قالت ليهم عارف ده بالنسبة لي ماضي .. وتاني ماعندي ليهو حاجة .. وقالت الكلام ده لابوهو .. قالت ليهو قول لي ولدك .. شوف غيري .. شكلها دخلت في علاقة جديدة .. وشايفه ليها شوفة ..
في النهاية نقول القسمة .. لكن عارف اصلا الموضوع ده ما اثر فيهو .. لانومن زمان الاتصالات بقت متقطعة ومسيخة واخيرا انقطعت الاتصالات من جانب امنية .. المهم انو ما ابدى اي تفاعل يذكر بالموضوع .. وماتنسى انو التسليم لامر الله وقوة الايمان ليها دور برضو ..
بعد فترة من الزمن .. انا عرفت من عارف نفسو .. انو ارتبط بي واحدة اسمها شاهندا من بنات المغاربة .. وساكنة جبرة ..طالبة امتياز في مستشفى ابراهيم مالك .. امها من منطقة المسعودية .. قريب لي شركة جياد في جنوب الحرطوم .. يعني اداني عنها ترجمة كاملة وبسكر فيها جنس شكر .. البسمعو مايقول الزول داك .. الكان عاشق امنية هه .وشكله شاهندا دي نستو خالو ذاتو .. وقال حيتزوج قريب .. قلت ليهو اها امنية اخبارها شنو؟ بعد سمعت بي خبرك ده؟؟ ..
قال لي امنية يازول الجماعة جابو خبرها مقسطر .. مربطة مع واحد ود خالتنا .. اسمو غاندي ساكنين في جبل اولياء تتذكر .. خالتي الكنت ماشي ليها يوم مواعيدي الاولى مع عصمت؟ قلت ليهو ايوة اها .. لمن امك قالت ليك امش وانت ابيت ههه ..
قال بسسس ..
خالتي دي ولدها في السعودية .. وخلاص امنية من ود عمتها لي ود عمتها .. وانا اصلا هسي امنية تاني ماعندي ليها شي .. بت خالي وخلاص .. قلت ليهو والله ياعارف ان شاء الله احضر زواجك
لكن مواعيدك دي انا بكون في مكة .. وللاسف ماحضرت زواج عارف ..
المهم ياجماعة مرت الايام والسنين .. وخبر عارف انقطع مني .. اتصل علي قبل فترة قريبة .. من كندا .. قال انو اتزوج وانجب .. وامو وابوه واخواتو كلهم اقامو في السعودية .. وهو بي زوجته واوادو في كندا وزوجته دكتورة شاهندا ذاتها ..وهو شغال في شركة .. وعندو ولد وبت .. واستاذنت منه في نشر القصة دي.. واذن لي مشكورا ..فنشرتها لكم مع (بعض الحذف والاضافة)