طبعا" انا لمن امنية طرحت علي السؤال ده .. ماكنت عايز اكذب عليها.. لاني ناوي امشي صح .. وحتى لو امنية غيرت رايها مني مامشكلة .. لاني زي البديت اقنع منها.. بالمواقف والمعطيات الحاصلة ..
لكن حاولت اعترف ليها بالحقيقة.. بطريقة ذكية شوية ..
قلت ليها طيب دقيقة يامنية .. القال ليها منو انا بتاجر بالقروش الحرام؟ .. انا صاح اشتريت بيت من زول.. وبعتو .. واشتريت بيت تاني .. اها لمن جات مواعيد الشيك.. الزول ابا يديني فرصة عشان ابيع بيتي واديهو قروشو.. ودخلني السجن.. وانا بقيت في السجن.. وماقادر ابيع البيت .. لغاية ما يوم وافق انو يطلعني عشان ابيع البيت.. واديتو قروشو .. وفضل معاي قريشات شغال بيهن .. يعني المسألة كلها ومافيها .. انو الراجل ما اداني فرصة.. وافتكرني ماعندي بيت بكذب عليهو..
وعلى كل حال انا الان.. رجعت ليهو قروشو على داير المليم .. الحرام وين في الموضوع يا امنية ..
قالت لي طيب .. انت صحي بتحب مودة وبتحبني في نفس اللحظة ؟؟.. انا طبعا" ضحكت من طريقة السؤال .. قلت ليها يا امنية.. مودة دي حبيبة صاحبي.. اسمو انور.. انا ممكن اديك تلفونو تسأليهو .. في زول بحب زولة صحبو؟
دي عشان انا بعاملها معامله خاصة .. وبحترمها شديد.. وبستأمنها على حاجاتي .. مفتكرة اني بحبها .. دي مغفلة ساي .. بعدين لاني انا كنت ممسكها ورق بيتي .. لو انا شغال بالحرام .. هي بتمسك لي ورق بيتي ليه ؟..
امنية قالت لي والله .ماعارفة ياعارف بقيت مافاهمة شي ..انت اخبارك شنو ؟ وغيرت الموضوع .. ومودة موضوعها نفس تسسسس .. عايزة تخلي امنية تكرهني وتاباني ..
انا صراحة بس ماعايز امنية تغير رايها فيني.. حتى لو ربنا ماجعل لي معاها قسمة.. انا نفسي تكون شخصيتي جواها طيبة ..
قلت ليها يا امنية انا عايز اوصيك وصية.. لو انتي بتعزيني اي مكالمة بيني وبينك.. مافي زول يعرف عنها حاجة.. لاناس بيتكم ولا ناس بيتنا ...قالت لي حتى عمتو ؟؟ قلت ليها حتى عمتو .. ههه هي قاصدة امي طبعا" ..
انا ماعايزها تحكي لامي .. الموضوع بتاع البيت والقروش.. والمواضيع دي لانو الناس كلها فاهمة انو قروشي دي حرام ..
المهم يازول ارجع ليك للحصل لي في مصر .. انا اليوم ده بالذات قلت ماشي ابتدي اشتري البضاعة الموصى ليها من السودان شلتها الدولارات معاي في جيبي .. وطلعت ..ماشي من عين شمس
لي نص البلد . يازول انا قاطع الشارع كدا.. اشوف ليك عربية جاية ماشة زي الصاروخ ..والله لمن جيت اقطع ماشفتها نهائي .. والعربية خبطتني .. وتاني انا ماحيت بي حاجة .. بس حسيت باني مافي .. الحصل علي شنو؟.. انا ماعرفتو .. نوم ...موت ...غيبوبة .. المهم بس اخر حاجة بتذكرها.. اني شميت ريحة الدم طالعة بي مناخيري .. والدنيا ضلمت .. وبس .. ....
يازول صحيت لقيت نفسي انا راقد في سرير.. في مستشفى
ورجلي مجبصة .. ويدي ملفوفة .. وحاسي بي نفسي ماطبيعي زي زمان .. ومعاي زي نفرين كدا انا مابعرفهم .. ومعاهم محمد عصام صاحبي القلت ليك من بري الدرايسة ده عرفتو .. قلت ليهو محمد انا وين؟؟ والحصل شنو؟؟ ..
قال لي ياخي انت الليلة ليك 8 يوم في المستشفى .. انت ضربتك عربية .. وصاحب العربية هرب .. واسعفوك ناس الشرطة .. ولقو اغراضك وجوازك مجدعة جمبك .. وبي ورقة معاك عرفو عنوان الشقة الانتا ساكن فيها .. المهم انا لمن مشيت ليك في الشقة.. ناس العمارة كلموني.. انو حصل ليك حادث وانت في المستشفى.. وصفوها لي وجيتك ..
قلت ليهو ان شاء الله قروشي موجودة .. قال لي انت اخد راحتك كل شي حيكون بخير ..دقيقة اسال ليك مكتب الاستعلامات .. مشى كلم العسكري المناوب في المستشفى .. قال ليهو المصاب فلان افاق .. وجاء العسكري .. شايل الفايل بتاعي واغراضي في كيس .. وقال لي دي كل اغراضك .. شايل الجواز وبعض الاوراق فيها عناوين وارقام وكدا .. والتذاكر .. وتلفوني مشقوق .. ومافي ولاقرش .. قلت ليهو وين فلوسي ..؟؟ قال لي نحن مالاقينا فلوس ولاحاجة ده كل اللقيناهو .. وانت حتى كنت شبه ميت ياعم..
لاحول ولاقوة الا بالله .. والله اناقربت تجيني غيبوبة تاني وكت عرفت انو قروشي ضاعت ..الحمد لله على كل حال .. والله ابرة ماشتريتها من البضاعة الجاييها .. كل القروش راحت وانا اتضررت ضرر غريب .. رجلي مكسورة .. ويدي ممزقة
وفي ضربة في راسي فيها 7 غرز ..
وحالتي مبشتنة بشتنة عدوك .. وفوق ده فقدت كل راس مالي.. الجاي بيهو من الخرطوم .. المهم يازول انا عرفت انو محمد عصام واصحابو قامو بالواجب .. وزيادة و دفعوا تكاليف المستشفى الانا ماعارفها كمها .. وانا ماعندي غير قريشات بسيطة في جيب الشنطة في الشقة وماعارفها اساسا كم ..
بس في حاجة غريبة حاصلة لي .. شايف صور في الحيطة بتتحرك..
زي كلاب وحمير ورسومات.. وصور شبه حقيقية.. وبتتحرك في الحيطة قدامي .. قلت لي محمد عصام ده شنو الفي الحيطة ده .. انا قبل كدا شفت البروجكتر بس مازي ده . دي شنو يامحمد؟؟ ..قال لي شنو ياعارف ؟؟ انا ماشايف حاجة انا ياعارف.. انت شكلك بتتخيل .. قلت ليهو ياخي عاين ليها..
ونادي الجماعة ديل .. خليهم يشوفو معاي ده شنو؟
وكت قالو لي مافي حاجة .. خلاص انا الجن ركب راسي.. وعرفت انو انا مخي بدا يتلحس .. والحادث اثر على راسي .. بس بقيت ساكت.. تاني مابقول لي زول انا شايف كدا ولاكدا .. والصور قدامي شغال وحمير وغنم وكلاب وناس وعربات .. وجوطة في راسي مايعلم بيها الا الله ..
بعد كم يوم ناس محمد عصام دفعو الفواتير المتبقية للمستشفى .والله موقف ما انساهو ليهو كلو كلو .. طلعنا مشينا على الشقة حقتي .. قلت ليهم انا قروشي مابتكفي لي حق الايجار.. احجزو لي انا ماشي السودان.. اصلا تذكرتي ذهاب واياب .. قالو لي لازم تصبر لغاية ماتملك الصحة .. ويفكو ليك الجبص.. وتمشي على رجليك زي الناس ..
مشو معاي بي تكسي جبت عفشي.. ودفعنا باقي الايجار.. وجيت نزلت معاهم في شقتهم .. هم اربعة شباب .. اتنين بقرو في الجامعة واتنين شغالين .. وماشاء الله اولاد طيبين وصلاتهم في مواعيدها وماعندهم اي صعلقة وقلة ادب ..
اها لمن شحنت التلفون .. وفتحتو لقيت كمية مكالمات ليها ايام .. امي .. وامنية.. وانور .. وارقام غريبة ..
قلت اتصرف باي طريقة .. اتصلت على انور .. وقلت ليهو عايز احكي ليك حاجة .. بس توعدني ماتجيب سيرة لي بشر .. انا طبعا لمن سافرت القاهرة سحبت جزء من القروش المهم هسي في حسابي عندي تقريبا زي العشرين مليون في البنك في السودان .. وطبعا زي ما انت عارف مستحيل تحصل حوالات بنكية من السودان للخارج في الوكت الحالي .. فانا عايزك تتدين ليك زي عشرة مليون .. من اي زول.. وتحولا لي بواسطة صرافة ثقة ومعرفة كدا .. وانا اول ما اجي بسلمك ليها .. قال لي والله ماعندي اي زول بديني قروش قدر دي.. لكن بسأل ليك والله ..
يازول غايتو الحمد لله .. ناس محمد عصام مقعدني معاهم .. وباكل وبشرب .. وساكن والقروش العندي كلها ماتامة ليها سبعمية جنية..
بس مافي صرف .. وهم رافضين يستلمو مني قرش .. من اول يوم حاولت اساهم .. حلفو وقالو لي عيب ..
وطيلة القترة دي .. انا الخيالات ملازماني.. وبقيت اخاف .. والليل كلو مابنوم . ووضعي ماطبيعي نهائي .. لغاية يوم الفكيت الجبص وقلت ليهم ماشي السودان .. بس لمن اتذكرت الطائرة.. جاتني خوفة ماطبيعية .. لمن قعدت ارجف وعرقت .. قلت ليهم انا مابقدر اسافر بالطائرة .. الا امشي بالواطة بي طريق حلفا .. بالبواخر ..
قالو لي يازول الحكاية دي طويلة ومملة..
وانت اساسا عندك تذكرة رجوع .. وانا ماقادر اقول ليهم انا خايف من الطيارة .. لاني متكتم على كل الحاسي بيهو ..
والشي المتأكد منو انو الحادث عمل لي ارتجاج في المخ.. ومخي بقى يجيب كلام فاضي ..افلام وثايقية وتصاوير عجيبة وغريبة ..
وفي فترة بقيت اشوف ليك العربية الضربتني جاية دايرة تضربني تاني.. لمن انط من مكاني ..
المهم محمد عصام الوحيد الحسة بي .. وسالني.. قال لي انت ياعارف مالك؟ انت ماطبيعي ..
قلت ليهو تتذكر انا في الستشفى قلت ليك بشوف خيالات ؟.. قال لي نعم متذكر .. قلت ليهو المسألة اتطورت يامحمد ..
وانا بقيت بخاف شديد وبالليل مابنوم .. وماعارف الحكاية دي شنو.. شكلها شيطان دخل راسي.. في وقت الحادث او يكون حصل لي ارتاج في المخ ..قال لي طيب نمشي نعمل صورة للراس ..
قلت ليهو بس انا عندي شرط .. تخليني ادفع قروش الصورة .. بعد محاججة وافق .. ومشيت لي دكتور .. وحكينا ليهو.. وعمل صورة فعلا.. وقال مافيش اي مشكلة في الراس.. تكون دي خيالات نفسية بس.. من اثر الصدمة وكدا .. وحبة بندول ما اداني ليها ..
بس قال لي ياصحبي يابن النيل متخفش .. والله محمد الله يقدرني على جزاهو ..
المهم هسي يعني حكاية الارتجاج دي مافي.. طيب البحصل لي ده شنو؟.. والله بقى لي وهم بس ..وشبه اتفقنا انا ومحمد انو دي حكاية شيطانية ..
محمد صديقي العزيز .. قال لي اسمع يا عارف.. في واحد من الشيوخ الروحانيين .. زول عندو خدام من الجن المسلمين .. وزول معروف في المنطقة كلها .. وبطلع العمل والشيطان.. والحاجات دي .. انت تمشي ليهو .. والله يعالجك في يومين .. اصلا الزول ده ساكن في الجنوب .. لكن بجي يوم الاحد .. من كل اسبوع في منطقة اسمها (المعادي) .. يوم الاحد انا وانت نمشي ليهو .. وعلى مسؤوليتي ,,
انا طبعا" مضطر امشي ليهو .. لانو الخوفة الفي قلبي دي بقت ماطبيعية .. وتعال شوف العجايب والغرائب الانا اصلا جيتك عشان احكيها ليك ..
YOU ARE READING
العسل المسموم ... طارق اللبيب
Poetryارجو ان قد تنال رضاءكم .. انما ننشد الفائدة ممانكتب .. ولانعشق ضياع .. الوقت بين الحروف .. والمحبة العندي ليكم .. مابتقل في يوم وتمسخ.. كل يوم رافع مقامكم .. واحترامكم عندي يرسخ.. ياحلاة زول مني يقرا .. ويطرا ناس تانين وينسخ..
