العسل المسموم ... طارق اللبيب

16

ونحن ماشين على البيت .. وانا متضايق .. سألت انور قلت ليهو ناس بيتنا كيف؟ .. قال لي كويسين والله .. لكن سمعت انو ابوك بعمل في اجراءات مسافر السعودية .. زي الكأنو التهامي رسل ليهو ..
قلت ليهو ان شاء الله ربنا يوفقو والله .. طبعا" انا مع اني زعلان منه .. ومقهور.. لكن اي خير ليهو خير لي امي واخواتي ..
لمن وصلت البيت.. كانت الساعة 1 ظهرا .. ونزلنا من التاكسي .. وانور حاسب بتاع التاكسي ووقف معاي جمب اباب يدخل .. ودقيت الباب .. فتحت لي الباب امي.. لمن شافتني قربت تقع في الارض .. قالت لي ده شنو يا عارف؟ .. الناس بجو من برة نضاف ومنورين.. انت تجيني بالحالة دي .. عليك الله هسي ناس الطيارة قبلوك كيف؟ ..
قلت ليها يا امي انا تعبان .. خليني اخش واساليني جوة ..
ابراصوم قال لي شكلها بتريدك ريدة شديدة .. قلبي مكسور عليها .. عاين ليها عاين ليها مسكينة .. هسي ح تدخل المطبخ وتقعد تبكي عليك.. وعلى حالتك .. لو عارفاك انت كنت في مصر بتسوي في شنو.. كانت ضبحتك بالسكين يامعفن .. شوف المراة العبيطة دي بلاي .. علامة الصلاة فوق وشها كمان .. هو بتكلم معاي وامي لسع واقفة لتعاين لي ..
انا قلت ليهو اسمع .. لو سمحت دي امي .. انور اتلفت علي.. قال لي قلت شنو؟ .. قلت ليهو لالا بتكلم براي يانور انت ماداخل؟.. قال لي لالا انا عندي مواعيد مع ناس جايني افي البيت .. قلت ليهو اها اخبار مودة شنو؟ قال لي مرة تانية بحكي ليك خش خش انت تعبان ..
وهو في اضاني يضحك .. قال لي قلنا ليك كم مرة ماترد بي صوت رد في سرك انا بسمعك .. داير الناس يقولو مجنون ؟ هسي انور ده يقول عليك شنو؟
عندك كم يوم كدا في الدنيا دي عديهن وانت نصيح ..
المهم دخلت جوة.. امي جابت لي هدوم وصابونة حمام .. وقالت لي ادخل جوة استحمى وصلي الظهر بترتاح شوية .. قام ابراصوم قال لي اوووعك والصلاة.. خلاص طير استحمى من عفنك ده.. لكن صلاة مافينا .. لو صليت بجلط دمك واكسر ضهرك فاهم .. ؟؟
قلت ليهو امشي مني.. تعال لي يوم الاربعاء .. خليني ارتاح شوية عشان انفذ ليك القلت عليهو وتمشي مني ..
قال لي مامشكلة ياعارف.. انا بمشي .. بس يوم الاربعاء لو رفضت تنفذ المأمورية.. ماتلومني في تصرفاتي .. قلت ليهو انت ماممكن توريني المطلوب مني شنو؟.. قال لي بس انت اصبر الاربعاء مابعيدة ..
انا دخلت استحميت وغيرت وسرحت شعري .. وقلت لامي اديني المصلايه ..
ودخلت الغرفة فرشتها.. وماصليت فيها.. لاني متأكد لوكبرت اصلي .. بجيني راجع ينتقم مني .. قعدت في السرير في الاوضة .. والمصلاية مفرشة قدامي .. لغاية ما اتاكدت انو امي افتكرت اني صليت جيت طالع ..
قلت ليها اعملي لي شاي .. عملت لي الشاي.. وجات تتونس معاي ..قالت لي .. انت وكت مشيت مصر.. ليه ماشاورتني من البداية .. يعني انا ما اعرف انك مشيت مصر الا لمن تكون بي هناك؟.. وبعدين وينها البضاعة القلت موصنك ليها ماشي تجيبها .. قلت ليها بتصل بي وراي مشحونة ..
وسألتها من ابوي واخواتي .. قالت لي اخواتك كويسات.. وابوك اليومين ديل مرسلين ليهو اقامة من السعودية.. وكل يوم بمشي يشوفها وصلت ولالا.. بلقاها ماجات .. وجدد جوازو.. وحاجاتو كلها جاهزة .. ومنتظر بس تصل الفيزا.. قلت ليها انا ح انتظرو في البيت هنا.. لمن يجي من الشغل .. قالت لي والله كويس .. هو كان زعلان منك شديد.. لكن لمن عرف انك انت سافرت مصر.. واشتغلت في التجارة.. زي ما انا حكيت ليهو .. غايتو هدن شوية .. قلت ليها عارفة يا امي.. لو ابوي زعلان ولا مازعلان انا لازم انتظره واسلم عليهو .. واطلب منو العفو والسماح .. الظروف مامعروفه .. احتمال انا اموت في اي لحظة .. قالت لي لالا انت ماطبيعي كلو كلو .. انت ولدي وانا بعرفك.. ده ماكلامك ودي ماطبايعك .. انت الحاصل عليك شنو ياعارف؟؟ .. قلت ليها ولا اي شي انا عايز انوم .. ولمن ابوي يجي صحيني اعافيهو كان يسامحني . ..
بس امي طلعت وقفلت باب الاوضة.. عشان انوم.. اسمع ليك ابراصوم قالي اسمع يا سجم انت .. والله تطلب منو العفو.. او تتكلم معاهو كويس انا انتقم من امك دي .. قلت ليهو هوووي كل حاجة ولا امي.. خلاص مابتكلم معاهو.. ولا بطلب منه العفو امشي قلت ليك .. قال لي ماماشي .. انت بتتلاءم كمان؟؟؟ ..
فجأة كدا احس ليك (طبز) في عيني .. حسيت بي انو في عود دخل لي في عيني .. والله لمن كوركت.. وامي جات جارية .. قالت لي عارف سجمي مالك؟ .. قلت ليها في حاجة وقعت لي في عيني دي.. ماعارفها شنو .. ولعي النور ده .. ولعتو عاينت في عيني كدي.. قالت لي سجمي الضربك شنو في عينك ؟؟. بقت حمراء زي الدم .. قلت ليها ماعارف والله .. قام هو قال لي ماتحكي ليها مالك ناكر ؟؟ قلت ليها خلاص يا امي .. وهي ماسكة راسي و تعاين في العين وتنفخ فيها .. ولفت طرف توبها كدا.. ولكدمتو خلتو زي كورة الشراب الصغيرة .. وبقت تنفخ فيهو .. وتختو لي فوق عيني .. يعني نظام مكمدات بي بخار وكدا .. مرتين تلاتة .. حسيت بالالم خف .. قلت ليها خلاص كدا الالم خف والله يامي .. امي مشت وانا حاولت انوم بالتعب والارهاق .. نمت نومة اخير عدمها .. كلها كوابيس ومصارعة
وعوالم من الشياطين وثعابين وعقارب وتماسيح ..
شوية كدا ولاغرقت في النوم سمح.. جاتني امي.. قالت لي قوم ابوك جا.. وتعال سلم عليهو .. وعلى اخواتك ديل .. وكت قمت .. امي قالت لي سجمي عينك بقت عادية.. بسم الله الرحمن الرحيم.. انت مانمت اكتر من نص ساعة.. والعين رجعت طبيعية زي اختها .. والله ياعارف .. انا قلت عينك دي نوديك بيها للدكتور .. وامي بقت مندهشو ومستغربة .. وحسيت بي رعب فوق وشها .. وانا طبعا عارف الحاصل .. مثلت ليها اني مندهش زيها ..
المهم قمت مشيت .. سلمت على اخواتي الصغار .. ومشيت لقيت ابوي قاعد .. سلمت عليهو سلام عادي.. ولا اعتذرت ليهو ولاحاجة .. وهو شكلو امي كلمتو.. قالت ليهو عارف عايز يعتذر ليك .. شايفو بعاين لي كدا.. منتظرني اعتذر ليهو .. واطلب منه العفو .. انا فعلا نفسي اعمل كدا .. لكن مغلوب على امري ..
قعدت معاهو شوية كدا .. هو ساكت وانا ساكت .. داير اقوم اطلع .. قال لي عارف اقعد .. اقعد عايز اتكلم معاك .. قلت ليهو جدا يا ابوي ..
قال لي ياعارف.. انا مابنكر اننا اهملناك اكتر من اللازم .. واديناك حريتك اكتر من الاولاد التانين .. باعتبار انك انت ولدي الكبير.. انا ماكنت عايز اعاملك بالمعاملة القاسية .. لكن شكلها الحرية الزايدة خربت سلوكياتك ..واستغليت محبتنا ليك استعلال سئ..
انت ياعارف ما قادر تتصور.. قدر شنو نحن سمعتنا بقت في الحضيض بي سبب فعايلك .. وقدر شنو انا خجلان من الناس بي سبب دخولك المتكرر للسجن ..
ابوي بتكلم معاي كدا.. انا حسيت بي غضب جواي.. لدرجة اني حسيت بي نااااااااار ولعت في قلبي عليهو .. والله بقيت اعضعض في اصابعي .. بس قومت علي حيلي .. وانفجرت فيهو .. قلت ليهو انا ذاتو غلطان البجي اسلم عليك .. عايز تعمل لي فيها محاضرات وسلوكيات وهبالة ؟
انت هسي وقفت معاي في مصايبي ؟ جيت سألتني قلت لي مسجون في شنو؟ وعملت شنو؟ جيت حاولت تساعدني؟ .. للاسف الشديد اي انا ولدك صح .. لكن مابتشرف انك ابوي ابدا .. وعشان ماتكتر معاي النقة والكلام الفاضي.. انا طالع وتاني ماجاي ..
ابوي طبعا اندهش من اسلوبي.. وقعد يعاين لي وساكت.. وبس مجحم فيني .. مطير عيونو كدا.. يعاين لي انا هايج .. وهو مخلوع .. بس احس لي بي امي جات بي وراي.. هبشتني من كتفي.. اتلفت عليها .. ولصقت لي كف .. لمن شفت لي ستارة حمرا قدام عيوني .. وقالت يا غبي يا حمار .. ده اسلوب تتكلم بيهو مع ابوك؟؟؟ ..
والله كف امي داك.. التقول صحاني من سكرة .. قلت ليها انا اسف يا امي .. والله ماعارف الحصل علي شنو .. اتلفت على ابوي لقيتو يبكي ويقش في دموعو ..
والله قلبي حاسي بيهو بتقطع من الندم .. اول مرة في حياتي اشوف دموع ابوي ..
وقام داير يخش غرفتو.. انا عايز الحقو كدا .. اسمع ليك ابراصوم قال لي اوووعك .. اوووعك تحصلو.. خليهو يطرشق.. يستاهل .. ماتشتغل بيهو .. يلا اتخارج من هنا لو سمحت ..
قلت ليهو انت الجابك شنو تاني؟؟ موش قلنا يوم الاربعا.. واتفقنا على كدا .. ؟؟
قال لي اول انت قايل انت بمشي وين؟؟ لو مشيت استراليا بجيك في لمحة بصر .. اطلع اطلع من البيت ده .. انا ماشي ..
طبعا انا خليت ابوي زعلان يبكي.. وطلعت .. لكن والله ماعارف الحصل علي ده شنو؟.. والله بقيت اتكلم مع ابوي بدون وعي .. انا فعلا في الوكت داك حسيت اني انا ماكويس نهائي ..
المهم قلت لي امي لو سمحتي يا امي.. اديني قروش انا طالع ..
قالت لي طير القروش المطبقة .. شيل العاوزو وتاني ما اشوفك في البيت ده ..
مشيت فتحت مطبقتها.. وشلت كل القروش الفيها وطلعت .. وندمان ندم .. سافي التراب .. على قلة الادب والاسلوب الوضيع الاتكلمت بيهو مع ابوي ..
ركبت مشيت القوز .. الكلام ده العصر ..داير الاقي عصمت ليه ماعارف .. الغريبة انو ابراصوم مامشي معاي .. ولا كان عارفني ماشي وين .. اول من وصلت شارع ناس عصمت في القوز .. في الشارع لاقاني ود خالتو انا ببعرفو ..
قلت ليهو وين عصمت؟؟ يا كباشي.. قال انت اصلك كنت وين؟ .. انت ماعارف الحصل؟
قلت ليهو الحصل شنو ماعارف والله .. قال لي عصمت راقد في المستشفى ليهو شهر .. قلت ليهو مالو؟؟ قال لي واله عملو حادث هو واصحابو كانو ماشين الحصاحيصا .. لزواج صديق.. صديق ده من شلة الاجنحة .. القرايين ..
قلت ليهو المعاهو منوعصمت ؟ قال لي معاهو ..عمر يوسف ..وبابكر التوم .. وعثمان بله كان بتعرفو .. قلت ليهو كلهم بعرفهم .. قال لي وعصمت سايق العربية ..
و عمر وبابكر ديل اتوفو وكتي .. وعثمان بلة ماحصل ليهو اي حاجة .. خرشة ماجاتو .. وعصمت حصل عليو كسر في الحوض .. وتهشم في فقرات الضهر .. واحتمال تاني مايقدر يمشي على كرعيهو .. وبتجيهو غيبوبة وتشنجات .. في اليوم اكتر من اربعة مرات .. شفت ياعارف؟؟ مال الحرام؟؟ وحق الناس بعمل شنو؟؟
الزمن كلو نوصي فيهو.. وهو ماداير يفهم .. يشيل طاقية ده ويختها في راس ده.. ويمرق من السجن بالتحايل على القانون .. لكن بقدر يتحايل على ربنا .. انا موش قلت ليكم قبل كدا.. |(حق الناس كناس) ؟
الى اللقاء ..