Dormisteryo

3

Nagising ako nang may pakiramdam na paninibago. Yung pakiramdam na nagising ka sa isang kuwarto na hindi mo pagmamay-ari at mapapatanong ka na lang sarili mo kung bakit ka nasa kuwartong hindi mo naman pagmamay-ari.

Kakaiba pa ang naririnig kong mga tunog sa paligid. Imbes kasi na mga huni ng ibon at mga tunog ng kapitbahay naming maagang nagwawalis sa kanilang bakuran ang aking nakasanayang naririnig, tunog naman ng electric fan at mga boses ng mga nagk-kuwentuhang mga kalalakihan sa labas ang maririnig dito.

Napabuntong-hininga ako. Tumagilid ako ng paghiga at nakita ko ang kabuuan nitong kuwarto.

Hanggang ngayon, napapaisip pa rin ako kung ano bang dahilan ng taong 'yon. Of all the things that he could steal, why briefs? May fetish ba siya sa mga underwear? Ano kayang kasarian niya? Kung lalaki siya, he might be some sort of maniac? Kung babae naman—kaso ang problema e walang babae rito bukod sa mga receptionist... wait!

Biglang may ideya na pumasok sa isipan ko. Siguro tama ang iniisip ko, it is logical for my theory to happen. But the question is, why would that person steal briefs? There's only one way to find out.

Bumangon na ako para masabi ang mga naisip ko tungkol sa katauhan ng brief thief. Para kasi akong nakahanap ng isang piraso ng puzzle na makakatulong sa pagbuo ng malaking litrato. Ang kailangan ko lang siguraduhin ay tama ang lahat ng mga facts na nakalap ko.

Bumangon at dumiretso na ako sa labas ng kuwarto at naabutan kong nanonood ng balita sina Kurt at Clyde. Prente silang nakaupo sa mga couch na tila relax na relax sila sa mga oras na 'to.

'Breaking Entertainment News! Nakuha ng sikat na aktor na si Spencer Chaves ang jackpot sa noontime show na–' biglang pinatay ni Kurt ang TV sa pamamagitan ng remote control na hawak niya sa kaliwang kamay.

Tinignan siya ni Clyde nang masama. "'Yan na naman siya, pinatay na naman niya yung TV na parang siya lang ang nanonood." Sarkastikong pananalita ni Clyde, itinaas niya pa ang pareho niyang mga paa sa couch na inuupuan niya.

Inihagis ni Kurt ang remote sa ilalim ng center table, pumatong iyon sa mga magazine na nakaayos sa ilalim nito. Humikab si Kurt at inunat niya ang mga braso niya.

"Nakakayamot kapag gano'n mapapanuod mo. Ang yayaman na nga ng mga artista na 'yon tapos sila pa rin contenders sa mga game show ng istasyon nila? Easy money sa kanila mga ganitong kalokohan, pera pera lang." Sumimangot si Kurt.

"Inggit ka lang, kasi sila yumayaman nang gano'n gano'n lang." pasaring ni Clyde kay Kurt na may mapang-asar na ngiti sa kaniyang labi.

"Ba't naman ako maiinggit? Kapag naka-gradweyt na ako, sasali ako sa National basketball team. Makikita mo. Doon hindi easy money, talagang palakasan ang labanan. Palibhasa nasilaw ka ng showbiz," sabi ni Kurt.

"Wushu, nagsalita ang hindi mahilig manood ng mga foreign TV series. Halos pilitin mo na nga mga ka-teammate mo para lang mag-download sa torrent websites e," natawa si Clyde, maging sina Reinald at Martin na may kaniya-kaniyang ginagawa ay hindi rin naiwasang hindi matawa.

Napansin kong nakita ni Kurt ang mga itsura nila nang pagtawanan nila siya. Mabuti na lang hindi at hindi niya ako nakikita, nakikinig lang kasi ako sa usapan nila, naghahanap ng tamang tiyempo para sa theory na gusto kong sabihin sa kanila.

"Iba ang foreign shows sa mga shows natin dito. Doon sa kanila, hindi nakakasawa ang mga palabas. Hindi tulad sa bansa natin, masyado nang formulaic." Napagkrus ni Kurt ang mga braso niya sabay de-kuwatro naman ng kaniyang mga binti. "Mga nagkahiwalay na magkapatid, nag-aagawan sa iisang lalaki hanggang sa ending, ano bang bago sa mga telenovela ngayon?"