His Indecent Proposal: Lander Montenegro

Chapter 12

"Just Lander..."

"Lord L."

Sabay-sabay kaming napatingin sa malaking pinto ng mansion. Ang nagsalita ay isang malaking lalaki na nakakulay itim. May mga kasama itong malalaki ring lalaki na parehas ang kulay sa suot nito.

"Where is she?" Nakasimangot na sabi ni Just Lander sa mga lalaki.

Hindi na niya nahintay na sumagot ang mga ito. Bumaba na siya ng hagdan at saka sumama sa mga lalaki. Pero bago sila umalis ay tumingin pa ulit sa akin si Just Lander. Hindi ko alam pero nakaramdam ako ng takot sa klase ng pagtingin niya sa akin.

May pumaradang sasakyan sa labas ng mansiyon. Mula roon ay bumaba ang isang babae, tingin ko ay kasing-tanda ni Lola Peach. Pero mas makinis at marami itong kumikinang na nakasabit sa katawan. Ang buhok nito ay nakataas at ang suot ay napakasikip na damit na kulay dugo, kakulay ng damit ang makinang ring bibig.

"Where is Rechelle?!" sigaw ng babae sa mga guwardiya.

"Nasaan daw si Rechelle," bulong ni Lola sa tabi ko.

'Rechelle'? Iyon ang tunay na pangalan ni Apple! Namutla ako. Hinahanap ng babaeng bagong dating si Apple! Baka malaman niya ang ginawa ko!

"Jack, okay ka lang?" Kalabit sa akin ni Lola Peach. "Namumutla ka!"

"Lola..." Nangilid ang mga luha ko.

Nanlaki ang mga mata ni lola Peach, parang may bigla siyang naisip. "Diyos ko! Anong nagawa mong linsyak na bata ka?!"

"Lola..." humikbi ako.

Kumalampag ang malaking gate ng mansion. Mula ron ay pumasok ang malalaking lalaking nakakulay itim. Kasunod nila si Just Lander na may buhat-buhat na isang babaeng walang malay. Napalunok ako kasabay ng panginginig ng buong katawan ko.

Sa mga braso ni Just Lander ay naroon si Apple! Ang duguang katawan ni Apple!

Nakabalik na siya! At natagpuan niya si Apple!

"Oh my goodness!" Tili ng babaeng makinang. "What the hell happened to her?!"

Hinila na ako ni Lola Peach papasok sa loob ng mansion. Halos kaladkarin niya ako patungo sa kuwarto ko.

"Lola..." takot na takot ako. Malamang magagalit sa akin si Just Lander kapag nalaman niya ang totoo.

"Wag ka ng magsalita. Alam ko na." Seryoso ang mukha ni lola at hindi siya ngumingiti.

"Lola..."

"Ito na lang ang sagutin mo. Bakit mo ginawa iyon?!"

Humikbi ako. "G-gusto ko kasing mawala siya. Para ako na ulit ang papansinin ni Just Lander. Para ako na lang ang kakausapin niya. Para ako na ulit ang papakasalan ni Just Lander."