His Indecent Proposal: Lander Montenegro

Chapter 8

"HALA!" Di ko napigilang mapabulalas.

Nakatanaw ako ngayon sa isang malawak na karagatan kung saan ako dinala ni Just Lander. Nasa isang isla raw kami, isang pribadong isla na pag-aari ni Just Lander, kulay puti ang lupa rito na ang tawag ay buhangin.

Bumalik ang tingin ko sa bughaw na karagatan na kasing kulay ng mga mata ni Just Lander at kakulay din ng kalangitan. Napakalawak niyon at hindi ko matantya kung mababaw lang ba o malalim. Hindi ko tuloy maimahe kung ilang basong tubig ito.

Basta ang dami-daming tubig, hindi ko kayang ubusin kahit inumin ko buong buhay ko.

Nilingon ko si Lola Peach. "Lola, pwede na ba akong pumunta ron?"

"Nakow! Eh, hintayin mo na natin si Ser para ba sabay-sabay na tayong mag-swimming." Sabay hawak nya sa strap ng aking bra. Inayos nya iyon dahil pilipit.

Nakasuot lang kasi ako ng bra at panty. Ang sabi ni lola ay two-piece daw ito. Ganito raw talaga ang isinusuot kapag nasa tabi ng karagatan.

Napansin kong maluwang ang bra ni lola kaya binuhol ko iyon sa likuran. Naka-swimsuit din kasi sya. "Lola, may tanong po ako?"

"Sige, hija, tira."

"Bakit po idinampi ni Just Lander iyong mga labi nya sa mga labi ko?"

"Ang tawag dun ay halik."

"Halik?"

Humarap sa akin si lola matapos kong higpitan ang kanyang bra sa likuran. "May iba't ibang halik, hija."

"Iba't ibang halik?"

"Merong smack kes, french kes at torrid kes."

"Ano po iyong smack kiss?"

"Mabilis iyon na halik."

"Eh, yun pong french kiss?"

"Sipsip."

"Iyon pong torrid kiss?"

"Laplap."

"Ano naman po iyong tawag doon sa halik na ginawa sa akin ni Just Lander?"

"Putragis."

Kumiling ang aking ulo. "Putragis?"

Iniangat ni lola ang suot nyang salamin sa mata na shades daw ang tawag. Mas malaki pa iyon sa kanyang mukha. "Si Ser ba talaga yung nakikita ko, hija?" Nakatingin sya sa nasa likuran ko.

Nilingon ko iyon.

Si Just Lander nga!