Three Strings Attached

Part 2 (Final)

"ကျွော်ယိချန်... ငါ့ကိုရောမကြည့်တော့ဘူးလား?"

လီလွင်သည် ကျွော်ယိချန်အားတောင်းဆိုနေဟန်တူသည်။ နှုတ်ခမ်းများကိုအတတ်နိုင်ဆုံးခနဲ့တဲ့တဲ့အပြုံးများဖြင့်ဆင်ယင်ထားသော်လည်း မျက်လုံးထဲကတစ်ထောင့်တစ်နေရာတွင် တစ်ခုခုကိုပျောက်ဆုံးသွားသည့်ကလေးလေးတစ်ယောက်၏မျှော်လင့်ချက်မျိူးတွေပါ၀င်နေသယောင်။ ကြည့်နေရင်းမှ လီလွင့်ဆီမှ ရွှေရောင်အစက်အပျောက်အလင်းတန်းလေးများထွက်လာသည်။ ထိုအလင်းတန်းကလေးများမှ တဖြည်းဖြည်းအငွေ့အသွင်ပြောင်းလဲကာ ကျောက်ယွမ်ကျိူးဆီမှသည် လီလွင်ထံသို့၊ လီလွင်ဆီမှသည် ကျောက်ယွမ်ကျိူးထံသို့ကူးပြောင်းသွားသည်။

ကျွော်ယိချန်ရှေ့မှ ကျောက်ယွမ်ကျိူးသည် မျက်လုံးများမှိတ်ကျသွားရာမှ တစ်ဖန်ပြန်လည်ပွင့်လာချိန်တွင် သူ့အားအနူးအညံ့ဆုံးပြုံးပြလေသည်။

"ရှောင်ကျွော်..."

မျက်စိရှေ့မှကျောက်ယွမ်ကျိူးဆီကခေါ်လိုက်သံကြောင့် ဒီလူဟာကျောက်ယွမ်ကျိူးအစစ်ဖြစ်သည်ဆို‌တာ သေချာသွားသည်။

"အချိန်ပြည့်သွားပြီပဲ နှမြောစရာပဲ... နောက်ထပ်နည်းနည်းလောက်ထပ်ပျော်ချင်သေးတာကို"

ကျွော်ယိချန်နောက်ဘက်မှထွက်ပေါ်လာသော လီလွင်၏အသံ။ နှစ်ယောက်စလုံးကခန္ဓာကိုယ်အမှန်တွေဆီပြန်ရောက်သွားကြပြီဆိုသည့်သဘော။

"ကျောက်ယွမ်ကျိူး..."

ဒီတစ်ခါတော့ ကျွော်ယိချန်ကပဲအရင်ဦးစွာ ကျောက်ယွမ်ကျိူး၏မျက်နှာကိုလက်နှစ်ဖက်ဖြင့်ဆွဲယူကာ မကျွမ်းကျင်သောအနမ်းတစ်ခုကို‌ခြွေလိုက်သည်။ ဒီလိုမကျွမ်းမကျင်နှင့်ကြိုးစားနေသည်မှာ အရမ်းချစ်စရာကောင်းသည်။

"ရှောင်ကျွော်က တော်လိုက်တာ အများကြီးနမ်းတတ်နေတာပဲ"

"ပါးစပ်ပိတ်ထား..."

ကျွော်ယိချန်၏အမှတ်အသားဖြစ်သောမျက်မှောင်ကြုံ့ကြုံ့လေးနှင့်နှုတ်ခမ်းစူစူကလေး‌တွေက ကျောက်ယွမ်ကျိူးကိုအတောက်ပဆုံးပြုံးသွားစေသည်။ ကျွော်ယိချန်သည် ကျောက်ယွမ်ကျိူးကိုရန်ထောင်နေရင်းမှ တစ်ခုခုကိုသတိရသွားဟန်နှင့် အနောက်သို့လှည့်ကာ လီလွင်ကိုခုန်အုပ်လိုက်သည်။ ထို့နောက်အသိပေးခြင်းမရှိဘဲ လီလွင့်၏လည်ပင်းကိုကုန်းကာ အကောင်ပေါက်လေးတစ်ကောင်လို ကိုက်ခဲလိုက်သည်။