لقيتك من بعد كل الخساير ربحي الأعظم عوض قلبي وبسماته وزهر عمري و نواويره

Part 39

طلعت شوق من القاعه و نزلت بالاصنصير و كان عوض جالس على جواله ينتظرها و بحكم ان صار الوقت متأخر و مافي ناس كثير سمع صوت خطوات و عرف انها هي رفع راسه عن جواله و هو مبتسم ناظرها مقبله له وقف : حي شوفتك
ابتسمت له : حي نباك ، خلصت
عوض : كيف المحاضره حقت المسابقه
شوق : حلوه سجلت كل شي بالنوت
حط يده داخل جيب اللابكوت و طلع المصاصه اللي كانت على شكل قلب و عطاها ضحكت : وش ذا
رفع اكتافه : مكافأه
فتحتها : ذي احلا مكافأه لانها منك
حطتها بفمها و نطق و هو مبتسم : بالعافيه عاد ذي مكافأه صغيره كبر الذره انتظري الاكبر
هزت راسها بالنفي و بفمها المصاصه : بالعكس كل شي منك حلو
ابتسم و همس : خلينا نروح البيت و اعطيك حقك
نزلت المصاصه من فمها و عضت شفتها من فهمت مقصده حط يده بجيب السكراب يدور مفتاحه عقد حواجبه مالقى شي و حطه بجيبه الثاني ولا لقى شي ناظرته : شفيك
عوض : مفتاح سيارتي معك
شوق عقدت حواجبها: لا ليش بيكون معي
التفتت يدور بالمكان اللي جلس فيه ولا لقى : متأكد كان معي معرف وين راح
شوق : ضيعته
حك جبهته : شكلي اجلسي على ما اتصل على عبدالرحمن يجي
جلست شوق بالكرسي و اتصل عوض على عبدالرحمن و وصله صوت عبدالرحمن: وينك انت الرجال بدوا يجون خلص تعال
عوض : بالجامعه وين بكون ضيعت مفتاح سيارتي تعال اخذني
عبدالرحمن اللي كان يشرف على حقين القهوه و يتأكد من التجهيزات : وش اللي اجيك تستهبل انت روح زين اتصل على سيف ولا اوبر مو فاضي لك
سكر عبدالرحمن و التفت لها : مو فاضي خالك حضرته
ضحكت بخفه و جلس جنبها : اطلب اوبر احسن لي
دخل على التطبيق و تنهد : مافي سياره قريبه
رفع لها الجوال تأففت : وش ذا اليوم
حط جواله على اذنه : بتصل على سلطان
ناظرته و نزل الجوال ما رد عليه سلطان رجعت راسها لورا و هي خايفه الوقت يضيع عليها ولا تجهز بعد مده ناظر عوض متعب اللي كان مقبل لهم وقف و سلم عليه عوض : اخبارك وش جايبك
متعب : الحمدلله جايبيني اساعدهم بالمسابقه
عوض ابتسم: الله يقويك
ناظر متعب شوق : فيكم شي
حك عوض راسه من ورا : اي ضيعت مفتاحي و بننتظر احد يجينا
طلع مفتاحه متعب : امشوا معي دربنا واحد
عوض : لا لا مانبي نتعبك
متعب : اي تعب ما من تعب عوض يلا امشوا
ناظرها عوض : يلا امشي
وقفت شوق و اخذت شنطتها و مشت جنبه و نطق متعب : صدق ماشاءالله طلعتي مرشحه بالمسابقه
ابتسمت شوق بخفه : اي
متعب : اذا احتجتي اي شي بلغيني
عوض : ماتقصر يا متعب
فتح متعب سيارته و ركبت ورا و ركب عوض قدام و حرك و نطق عوض : عطشان معك مويه
طلعت مويه من شنطتها و عطته : اي اخذ
اخذ عوض و بدا يشرب ابتسم متعب بخفه و رجع لها عوض المويه و نطق : صدق كم صارلك تدرس برا
متعب و هو يسوق : والله ما اذكر كم سنه بس بعد التخرج عشت هناك و توظفت
عوض : و كيف الحياه بأمريكا
متعب : غربه و عايش بعيد عن الديار اللي احبها و بعيد اهلك و ناسك و موحشه بس احبها الصراحه احب غربتي دياري ما عادت مثل الاول و فضلت الغربه عنها
عوض : اي دامك مرتاح الحمدلله بس وش اللي رجعك دامك تحب غربتك
تنهد متعب : اشتقت لدياري رغم انها ماعادت مثل الاول و ابوي الله يرحمه قبل لا يتوفى طلب مني اجي و مارفضت له طلب
عقدت حواجبها شوق مافهمت قصده بالديار بس حست انه يقصد عبير و في شي بينهم لازم تعرفه فتحت شنطتها و بدات تحط مكياجها و نطق عوض : ما عليك تتعود على الديار الجديد
تنهد متعب و كمل يسوق و كانت شوق فاتحه منظرتها الصغيره و تزيد مكياجها بعد مده وصلوا البيت و بدوا الرجال يملون الحوش و نطق عوض : الباب الخلفي لو ماعليك امر
متعب : اي نسيت
توجه متعب بسيارته للباب الثاني و التفت له عوض : ما تقصر والله اشوفك داخل
متعب : ما سويت الا الواجب
نزل عوض و نزلت معه ناظر متعب باب الحوش الخلفي و دخول عوض و شوق تنهد بضيق من تذكر الماضي كان يوقف عند الباب ذا و يسولف معها و يرسل لها وروده و رسايله بالكاسيت حرك سيارته و 
صعدوا شوق و عوض للشقه دخلت مسرعه من سمعت اصوات الاغاني : لا توترني كافي اني متأخره اخذ اغراضك و روح البس بالمكتب
طلع عوض اغراضه : طيب طيب
طلعت فستانها و حطته على السرير و طلع عوض من الغرفه ناظرت مكياجها بالمنظره : زين ضبط باقي الشعر
جلست على كرسي التسريحه و بدات تسوي شعرها ويفي خلصت و بدات تلبس فستانها و عقدها و حلقها و خواتمها و كعبها سمعت صوت طقه الباب و ابتسمت و هي تناظر شكلها بالمنظره : تعال عوض
دخل عليها بثوبه و شماغه الاحمر و حاط قلمه ولابس ساعته و متضبط ناظرها لابسه فستان لونه بيبي بنك طويل و عاري الاكتاف ابتسم و تقدم لها اخذ يدها و قبلها : كامله في زينك و اوصافك تبارك الرحمن يا بختي دامك نصيبي و حلالي و حبيبه قلبي
ابتسمت له ابتسامه عريضه برزت فيها غمازاتها ناظرها و نطق و هو يناظرها بهيام و ماسك يدها :
من يقول الزين ما يكمل حلاه
‏كل شي في حبيبي اكتمل