أغلال المرجان (غَـربيب)

Part 39

أخـذ التسجيل منـي أيدة ترجف
ميثم: شفتي أنتِ شفتي متأكدة هو هذا؟!
غيـد: متأكــدة منـه ، تلاحگ روحـك.
ميثم: وشلون أعوفـج ها؟.

تنرفزت وأعصابـي تلفت منـه
غيـد: هـذا التسجيل أخذة وأشرد لأن راح يطيح حظك.
ميثم: كلها فتـرة مؤقتـة وراح أرجعلج.

كثر ما نرفزني ما عرفت شجاوبة.!!
عبالة غيـد راح دكها مناحة وراه ،
أخـذ التسجيل وطلع مـن البيت وانـي
دزيت مسـج لـ لـواء مثــل ما طلب وراها
كاتبلــــي
”انسـي كلشي صار وأرگـدي كافي لعب“.

مُرجان: وفعلاً كافــي ، مـن الأول حذرتج
بـس عنودية ما تبتي إلا مـن سويتي
اللــي براسـج اليابس ، بس خلص كلشي
راح ترجعــن ويا عمـو ظافـر باجـر.

شهكت ياقوت ولزمت أيدي بسرعة
ياقوت: عليـج الله تحجين صدك؟!
مُرجان: اي حضرن أغراضجن.
غيـد: گطيعة كلشي مناخــذ ويانة.

ما ناقشتهن ونهض أريـد أرجع لـ غرفتي،
وصاحت عليه ياقوت متوترة
ياقوت: شوفـي نسيت شغلة ما كلتها الـج.
مُرجان: وهـي؟!
ياقوت: بخصوص طلاقـي مرة ثانـية مـن بشار
نـوح وعدنــي يلاگـي ويخلي يطلكني مرة
ثانية بـس كان عنـدة شرط ، كال مـن
تخلص العدة ”4 أشهر و10 إيام“ بـ اليوم
الـ11 راح يجي يطلبني مـن عمو ظافر.

صفنت بوجها وهـي صارت تمتمت
وتبرر وتشرحلـي إذا انـي ما موافقـة ماراح
تقبــل هـي ، قاطعتها مصدومة
مُرجان: دقيقة هو كلج أنتظرج 4 أشهر و10 ايام؟!
ياقوت: اي والله.
مُرجان: يا ثــولة هذهِ عـدة الأرملة ، يعني
نـوح راح يقتل بشار لأن عدة المُطلقة 3 أشهر.

بحلقت عيونها وطفرت مـن مكانها
ياقوت: عزة بعين بشار ويصير قاتـل؟!
مُرجان: اي نعم ، بـ اليوم الـ11 يطلبج
وبـ اليوم الـ12 يدخل السجن وعيشي على الصور.
غيـد: خوب يذبحة ويدغمرة ولا مـن شاف ولا مـن درة.
مُرجان: حلتها سـبع البرمبة.

خزرتها وهـي أبتسمت ودارت وجها،
طلبت مـن ياقوت تتصل على نـوح ،
أتصلت خايفة منـي وانطتني التلفون
أقــل الثانية وجاوبها بـسرعة
نـوح: كنـاري.
مُرجان: وياك أخت كنـاري.

تحمحم بسرعة وأعتذر
نـوح: هـلا بـ حُرمة الغالـي ، آمـري.