قَيْدَ الذَّاكِرَهـ (مكتملة)

روابط لا تنفك !!

..
قال رسول الله صلى الله عليه وسلم: (إنَّ مِن أحبِّكم إليَّ وأقربِكُم منِّي مجلسًا يومَ القيامةِ أحاسنَكُم أخلاقًا)

{ دُمتن كالفراشات لا يكتمل جمال الورود سوى بهنّ🦋🤍 }
___________

" لاااااتيييييييين"
سمعت هي صوته الجهوري يخرج من الغرفة المجاورة لغرفتها فركضت الى دولابها لتختبأ به !!
_دخل الى غرفتها بعينيه البنية يبحث عنها فلم يجدها فوجَّه نظره الى الدولاب وابتسم ابتسامة ماكرة مرددا :
"هي راحت فين الحيوانة دي "
وتظاهر انه يخرج من الغرفة وسريعا اختبأ خلف الباب
تنفست هي الصعداء عندما شعرت بخروجه وخرجت بهدوء شديد من الدولاب كانها سرقت مفاتيح خزائن هارون وذهبت سريعا لتغلق الباب و
" أعععععععععع"
صرخت عندما رأته خلف الباب وحاولت الركض لكنه كان الاسرع لأذنها !!
" مين يا زفتة اللى خلى قميصى زي رغيف العيش المحروق كدا "
" الله وانا مالي يا لمبي بس "
ردد الأخر بغضب
" وانتي مالك ازاي يا حيوانة انا مش سايبلك القميص تكويه على ما اخد دش "
" تصدق صح .. اي دا هو انا مقولتلكش ؟ "
" قولتيلي اي تاني يا مصيبة "
"لا بجد مقولتلكش "
"يا بت انطقي بدل ما اخدك بوكس "
"لا يا اخويا وانا قد ايدك التقيلة دي هقولك هقولك "
"هااااا"
" يااا ادهاااام ادهااام ادهم الحقني عُدي عاوز يضربني "
وجرت منه سريعا
" اه يا بنت المجانين "
قالها بصدمة ثم جرى خلفها بغضب
" والله ما هسيبك يا لاتين دا رابع قميص تحرقيه الشهر دا "
" الله ؟ وانا اعملك اي يعني بطل المسلسل كان انضرب بالرصاص اقعد اعيط عليه ولا اكويلك القميص يعني ؟"

نظر لها بأعين متسعة لا يصدق ماذا تقول اخته الغبية
" بطل المسلسل ؟ دا انا هخليكي قصة مسلسل حزين بس اصبري"
هرولت لاتين وخلفها عدي الى غرفة ادهم اخيها الاكبر واختبأ خلفه وأخرجت لسانها ل عُدي

_"اي اللي حصل تاني "
نظر له عدي والشرر يتطاير من عينيه وصاح
_" خرجهالي يا أدهم لو سمحت ، الحيوانة دي حرقتلي قميصي الابيض الجديد "
نظر لها ادهم بنصف عين غاضبة فنظرت له ببراءة الاطفال التي لا يستطيع الغضب برجودها فأعاد النظر لاخيه متنهدا
_" خلاص يا عُدي الاجازة الجاية هجيبلك قميص جديد "
_ " أهو دا الكلااام " قالها عدي وهو سعيد ثم نظر اليها
_" وربنا لو ما كان اخوكي موجود كان زمانك موقودة دلوقتي "
_"نينينينيني"
خرج عدي ذاهبا الى عمله فنظرت لاتين الى ادهم وحاولت الخروج على اصابعها حتى لا يشعر بها
لكن هيهات
أمسها من رقبتها قبل ان تهرب !!
_" اه ..اااه يا ادهم افصل بين شغلك والبيت يا حبيبي .. بلاش تعاملني معاملة حرامي الغسيل اللي خد بدلة الشرطة بتاعتك كدا "
_ تعرفي لو مكنتش مسافر النهاردا مأمورية كنت هعلقك على الحبل بدل بدلة الشرطة كدا "
_" طيب طيب خلاص بقى يا باشا سماح المرة دي يا دووومي "
نظر لها شذرا فابتسمت ابتسامك بلهاء وكاد يصفعها على رقبتها الا انها هربت منه سريعا فابتسم ابتسامة حانية واكمل ارتداء البدلة ....

لم تلبث خمس ثواني الا واشرأبت برأسها من الباب ونظرت له

_"خيييييير"
قالها وهو ينظر لها بتعجب

فابتسمت ابتسامة واسعة وقالت :
_" عاوزاك ف مهمة خاصة يا كبيير "
_" لااتين .. مفيش خروج النهاردا "
_" يا ادهم بكرا هنبدأ الجامعة ومرمطة الجامعة وقرف الجامعة ودش الجامعة واصحاب الجامعة و...."
_" باااس.. روحي البسي روووحي"
_"يا حبيبي يا ادهم كنت عارفة انك عمرك ما هتردني خايبة روح يا ابني الهي يـ..."

_"فاضلك ٣ دقايق يا لاتين وهلغي الفكرة"
فاكملت جملتها سريعا
" ربنا يوقف الوقت"
وجرت مهرولة لغرفتها لترتدي ملابسها !!

كانت لاتين ترتاح في الملابس الفضفاضة فارتدت چيب وعليه تي شيرت بدون اكمام وفوقه بليزر چينز وفوقهم حجاب بلون الجيب وال تي شيرت ممزوجين معا وجلست على الهاتف تنتظر اخيها !

خرج من غرفته مرتديا بدلته الزيتية والتي تناسبه تماما
فنظرت له اخته وما لبثت ان اصدرت صفيرا لمغازلته
_" بطلي شغل العيال الصايعين دا بقى "
_" تحت أمرك يا فندم "
"يالا يا عندية هانم"

ركبا معا سيارة ادهم متجهين الى المكان المفضل لها ( ملاعب المدينة)
ولم تتوقف لاتين عن الثرثرة طوال الطريق حتى تمتم ادهم وهو يغلق عيناه بندم
"انا اللي جيبته لنفسي "
فنظرت له لاتين متسائلة :
"بتقول حاجة يا دومي "
"بفكر ف طريقة اقفش بيها حرامي الغسيل "
نظرت له لاتين باستغراب وصمت ثم انفجرت في ضحك وهي تقول بين ضحكاتها الشديدة
" ابقى ...ش..يل الغسييييل "

نظر لها هو ايضا ثم ضحك معها
بعد فترة قصيرة وصلوا ف نزلت لاتين سريعا وتركت باب السيارة مفتوحا كعادتها فنظر اليها بغضب مصطنع مرددا :
"اقفلي باب العربية مرة واحدة ف حياتك "
"وانت وظيفتك اي يا دوووومة" ثم ضحكت وهرولت للداخل وتبعها ادهم

لم يتواني في اسعاد اخته فحبه لها كان كفيلا بجعل الابتسامة ترتسم على كل من يراهم

انتهيا من اللعب وخرجا من المكان ليلا ولكن قبل خروجهما تماما امسكته من ذراعه واشارت بيدها الاخرى لمكان وهي تنظر له ببراءة

وضع يده على وجهه في ضجر وذهب الى المكان الذي اشارت اليه بدون حتى ان ينظر اليه لانه يعرف وجهته تماما بينما ضحكت هي

اشترى لها الايس كريم بطعم الموز الذي تحبه وركبا السيارة وذهبا للمنزل ومازالت تثرثر معه كالعادة

وبينما كانت يصعدان العمارة صعد خلفهما عدي بدون ان يلاحظا وفجأة

"بووووووووووم"
صدع صوت بوق عالى في المكان فصرخت لاتين فورا وقفزت باتجاه ادهم وهي تنظر للاسفل
فوجدت عدي يكاد ينام ارضاً من الضحك
فجرت خلفه وهي غاضبة بشدة
"منك لله خليت قلبي زي طائر العنقاء "
"احسن عشان تبقى تحرقيلي قميصي تاني"
"وربنا ما هسيبك يا عدي هعملك رغيف محروق زي قميصك اصبر عليا "

"لما تخلصوا شغل توم وجيري دا اطلعوا " قالها ادهم وهو متجه للاعلى وهو يائس من أخوته الأغبياء

** في مكان اخر ...........!
"هو دا ؟"
"هو "
"سيبه عليا .. هتسمع خبره قريبا يا باشا "
ثم اخد صورة الشخص الملقاة امامه وقام بحرقها ووضع المسدس على المنضدة امامه وضحك بشر !!!!!!!!

يُتبع ...
#قَيْد_الذَّاكِرَهـ
____
رأيكوا في الشخصيات ؟
لاتين ؟
أدهم ؟
عدي ؟
*دمتم_سالمين 🌸🤍
ان شاء الله هنزل الرواية يوم ويوم ولو لقيت تفاعل هنزلها كل يوم وفي رواية تانية قيد الكتابة عرفوني لو حابين انزلها او استني اخلص قيد الذاكرة الاول 🍂
بقلم_غادة محمد