وردة الشيخ محمد
بعد عني وهو يدحك بعيوني ويتلمس خدودي وينظرلي نظرات اكلت كلبي اكل رفعت رجلي وسحبتو من ياختو وحجيت بهديد :- يول متستحي
- لا
دنك باسني بخدي :- بويه هسه ارتاحيت ,
- وديناج على ملح رجعتي مطكعه متوازيه لو فلفتي خاله هههه
اندارت خالتي دحكت بيه وابتسمت ..دنكت استحيت :- يستاهل وليدي يطكعها عبنها حليوه وتستاهل
ردتها :- شيستاهل كريمه احنه بيا حال متشوف الوضع مخبوص وشغل وعالم وهي صاعده ونازله وفاله الحجاب حتى الاكل ميصير تلزمه يمكن نكسه والله ياربي لا حيا ولا مستحى متكول بنات ممتزوجات هنا
- مفهمت شدتقصدين ؟؟؟ اني داالف حجابي وهين محد اكو ممتزوجه ..التفتت وفعلا محد اكو كلهم كبار بالعمر
خالتي اشرتلي بمعنى اسكتي , وهي رتها وتخزر بيها كدامنه :- احترمي شويه كريمه عيب عليج داخلين ببيتج
خالتي :- هسه شحجينه لا اله الا الله
عفتهم وطلعت يستفزون الواحد , لو حجينا يطلعونه منستحي وومربايين كل واحده شكبرها وعقلها عقل جاهل , امشي وادردم صاحتني خالتي :- ريااام تعاي يمه
رجعت :- صبي المرك خلي نكف العالم
رحت يمها اخذت الطوس ودحكتني خزرتني :- ضمي ركبتج وايدج ولاتلبسين هالذهب بعد عين ماصلت ع النبي
- خاله بس .
نزلت الردن ورجعت اشرتلي روحي صبي , وكفت صبيت واريد انزل الطاسه بالصينية جان ادفعت دفعه من ايدي وبدال مااخلي ايدي بالكاع خليتها بطاسة المرك وهي حارة نار .. انسلخت ..فرفحت كمت اكمز ميته من الوجع نار نار شاغت روحي ..
خالتي سحبتني وخلت ايدي جوالمي وتصيح :- جيبو ثلج ... واني ابجي ولازمة ايدي وادحك بيها صار حمرة ونار تلسع بيه
- خاله راااح اموت
ركضت مرة حماية ام ضرغام , واخذت ايدي وتخلي عليها ثلج ,
- يايمه غير تنتبهين
- خاله والله اندفعت والله العظيم , احجي وابجي
حجت وحده :- لعد شكد فكر هالعزيمة
خالتي :- انلصمي يمه مالنا خلكج ..
- شدعواج خالة ..
خلت ايدي بالبرميل الي مخلين بي ثلج وكاسات المي .. واني الوب ..حجت مرة حمايه :- عيب زهره اسكتي
زهرة :- مدااحجي وياج خاله لتتدخلين
مرت حمايه فكت عينها خزرتها :- طايحة الحظ متستحين والله اكول الامج تربيج شنو هالاخلاق والصلافه
