الرحمة 2 MERHAMET

PART 61

ترخات بشوية ميلة راسها كتشوف فيه : غاتعيط ليه هو خويا صغير قد هاكا

حيدات يديها من يديه كتشرح ليه قداش هو صغير زير على كتافها كيشوف فعينيها، حركليها راسو نطق بهدوء : ولكن خسك دوشي باش اجيبليك الماكلة ديالك

سميرة : نتا هو الطبيب ؟

شاف فيها شحال كانت كتسنا الاجابة ديالو : أنا طه، راجلك

ميلات راسها بشوية : طه ؟

زير عليها وهي تضربو بحركة لا ارادية بعدات : بعد نتا كذاب طه بعد مني خلاني، نتا ماشي طه

جبدها لعندو كيحاول يشدها وهي كضرب فيديه : بعد بعد كذاااااب عتقوووووونيييي عتقووووونيييييي الفرملية عتقيينييي كيكذب عليااا انقولها لطه يضربك انقولها لطه يضربك بعد مني بععععد

زير عليها من كتافها كيحاول يرصيها ولكن كان فيها واحد الجهد غريب لدرجة كتفلت من يديها وكدور راسها بجهد باغا تحرر، هضر بصوت عالي شوية : سميييرة هداااي

دخلات رحمة ماقداتش تصبر : طه خرج انا نبقا معاها انا ندوشليها

كتشوفو مركز عينيه حومر بالم عليها قربات كتفكليه يديه منها نطقات بحرقة : خرج أولدي

بعداتو من سدرو مخرجاه وهو كيشوف فيها كتجبد كاع فالشامبوانات كترميهوم وكضرب فراسها، دار عاطيهوم بالضهر خارج مخلي مو سادا موراه الباب غاتهضر معاه.

طلع يدو لعند عنقو من اللور، عروقو مطراسيين، عينيه حومر، روح مخنوقة، حيد الكاسكيط شعرو نزل فازك على جبهتو، اللحية ديالو كثيرة مخربقة، طلع راسو للفوق : يا الله رخف عليا الحمل

طلع يدو مسح على اللحية ديالو, الحـمل ثقـيل، قلبو محروق گلس فالصالون فاتح رجليه موكي عليهم يديه مشبكهوم ، كيحاول يحيد صورت لي داز من حياتو فصورتها، عينين سميرة خلاو روحو تربطها بصاحبو، كيفاش يقدر ينسا أنه تهان على قلبها فواحد الوقت

حط يديه تحت من كدم فمو عينيه كيشوفو فنقطة وحدة، ماقدرش اتقبل حالتها، غمض عينيه كيتفكر كلام الطبيب ديالها لي عرف من عندو حالتها كاملة، خاسو ينسا خاسو يتغاضا، خاسو يتحارب مع الداخل ديالو خاسو يحرق راسو باش يكون معاها محتاجاه، صراع بين عقلو وقلبو غايأدي بيه للجنون وقادر يدخل فيه بعينيه معمضين

ناض كيحس بالضغط فروح ديالو خرج هابط للزنقة مابقاش قادر يسمع صوتها كتغوت، فداك الشتا كمل كيتمشا كيحس بالقطرة كتنزل على لحمو وتولي سخونة، شنو هاد المعركة الجديدة لي دخل فيها ؟ الاسهم من كل جهة كتاجه ليه كدخل فالجسد ديالو بلا رحمة بلا شفقة.