'All time to be you..'
ဖုန်းက တုန်ခါ၍မြည်နေသဖြင့် ကိကိ ဟိုစမ်းဒီစမ်းနှင့် လက်လှမ်းယူသည်။
'ဟဲလို...'
အိပ်ချင်မူးတူးနှင့် ယောင်ယမ်း၍ ဟဲလိုဟုပြောပြီးမှ Alarmမြည်နေမှန်းသိကာ alarmပိတ်လိုက်သည်။ မနက်(၆)နာရီခွဲထဖို့ ကိုယ့်ဘာသာ alarmပေးထားသည့်အဖြစ်ကိုမေ့ကာ ပြန်အိပ်ဖို့ဟန်ပြင်လိုက်ပေမဲ့ သူ့အိမ်ဆိုတာကိုသတိရမှ မျက်လုံးကျယ်သွား၏။ မျက်ခွံတွေကိုပွတ်သပ်၍ အိပ်ရာမှထလိုက်ပြီး ပြတင်းပေါက်တွေလိုက်ဖွင့်သည်။ ဆောင်းမနက်ခင်းမို့ ပြတင်းပြင်မှာ နှင်းကျနေဆဲဖြစ်ကာ ကဲကဲကတော့ စားပွဲအောက်က အခင်းလေးထဲမှာ ကွေးလို့ကောင်းတုန်း။
ခါတိုင်းရက်တွေမှာ ချမ်းလွန်း၍အိပ်ရာထဲကွေးနေတတ်သော်လည်း မနေ့ညကတည်းက အခုချိန်ထိ သိပ်မအေးဘဲ နွေးနေသည်ကိုသတိပြုမိ၏။ သူ့အိမ်မှာ အနွေးဓာတ်တွေများ လွှတ်ထားသလား။
ဒီအိမ်က အပြင်ပန်းမှာ သစ်လုံးတွေကာရံထားပြီး အတွင်းမှာတော့ decorationအကုန် အဆန်းတကြယ်ပြင်ဆင်ထားကာ luxuryဆန်လွန်းသည်။ ကိုယ့်အိမ်ထက်တောင် ပိုခမ်းနားနေသဖြင့် မနာလိုစိတ်အသေးစားလေး ဝင်မိသေး၏။
သူမအခန်းက အတော်ကျယ်ဝန်းကာ နံရံတွေက သခွားရောင်နှင့်ခရမ်းရောင်အဖျော့ ရောနှောထားသည့် သက်တံရောင်ပြေးပုံစံမို့ decorationက အတော်လှသည်။ ခန်းဆီးတွေကအစ မွေ့ရာ၊ ခေါင်းအုံးအဆုံး ထိုအရောင်တွေဖြစ်ကာ မျက်နှာကြက်မီးပန်းဆိုင်းကြီးနှင့် ဆက်တီတွေကတော့ ကျွန်းညိုရောင်ဖြစ်သည်။ ဒီအခန်းကို သူမအတွက် သီးသန့်ပြင်ပေးထားသည့်သူ့စိတ်ကူးကိုလည်း သဘောကျလို့မဆုံး။ သူမနေဖို့အတွက်များ တကူးတကကြိုတင်ပြင်ဆင်ခဲ့သလားဟုပင် လိုရာဆွဲတွေးမိသေးသည်။ သူ့အိမ်ကို စရောက်သည့်ပထမဆုံးနေ့ဟာ သာယာလှပလိုက်ပါဘိ။
မျက်နှာသစ်၊ သွားတိုက်၊ ခြေလက်ဆေး၍ ခေါင်းကိုသေချာဖြီးသင်ပြီးနောက် အခန်းထဲမှထွက်ခဲ့သည်။ ဒီအချိန်ဆို သူမနိုးသေးဘူးထင်သည်။ သူ့အိမ်ဘုရားကျောင်းဆောင်ခန်းမှာ အရင်သန့်ရှင်းရေးလုပ်ပေးဦးမည်ဟု တွေး၍ ဘုရားကျောင်းဆောင်ခန်းထဲဝင်လာတော့ သူက အရင်ကြိုရောက်နေကာ ရှောစောင်ကြီးကိုလွှမ်းခြုံ၍ တရားထိုင်နေ၏။
YOU ARE READING
The Legend Of The Phoenix:Born To Love You
Romanceဖီးနစ်ငှက်တစ်ကောင်ရဲ့ ရင်ကွဲမတတ်အော်ဟစ်သံဟာ လောင်ကျွမ်းအံ့ဆဲဆဲ အတောင်ပံတွေနဲ့အတူ ပျောက်ကွယ်ပျက်စီးသွားတော့မယ့်အချိန်မှာ ငါဟာ မင်းနဲ့နောက်တစ်ကြိမ်ဆုံတွေ့ဖို့ ရူးသွပ်မိခဲ့တယ်။ မင်းပြောခဲ့တဲ့ စကားတစ်ခွန်းကြောင့် ငါ့ရဲ့ လစ်ဟာပျက်ကွက်မှုတွေကြောင့် ...