أغلال المرجان (غَـربيب)

Part 11 || 11:11

غفـار: انا رايد أسمع رأي البنية هسه.

أنتفض جدي ويعتبر كل كلمة من غفـار تحدي اله
الرماح: ما الك يمي مرة غفـار؛ لو ناسي وضعك شنو؟!

ضحك غفـار بصوت عالي وتنهد
غفـار: ليتك عيرتني بما هو عـار.

لـواء: أعتبرة فصل او خطوة صلح جدي لو اله نكول...

قاطعة بسرعة ينتر بي واللـي فهمتة مايريد
اي حديث ينفتح كدام أبو فيصـل
الرماح: إذا على رأيي مُرجان راح تسمعونة هسه.

رجعت بخطوات سريعة وكفت يم باب غرفتي
من سمعت جدي طلب من طرفة تصيحني حتى
يسمع قراري كدامهم، بلعت ريگي متوترة كيف ممكن
يخليني بهيج موقف؟! وفوكاها كدام ناس غربة هم.!!
أجت طرفة عليه وتأشرلي اروح للصالة
طرفة: الله أعلم شجان بيناتكم قبل.!! لا تشوفينه
وأنتِ متحامية بي وهسه أجه يتقدملج.

مُرجان: اكدر ارد رد مضاعف على كلامج بس
أكو فوارق عقلية بين عقلي وعقلج.

طرفة: ماكو دخان بدون نار.

مُرجان: امممم يعني مشاكلج ويا لـؤي هم وراها نار مو؟!

فتحت عيونها بصدمة وبقت تبلع بريگها وتمتمت
متعرف شتحجي، أبتسمت بخباثة وأبتعدت عنها رايحة
للصالة، غيمت ملامحي ودخلت سلمت عليهم
أم فيصـل: هـلا يمة هـلا بالغالية.

صفنت بوجها هاي نفسها المرة اللي جانت تسألني
على اسمي وعمـري قبل كم يوم، ابتسمتلها مجاملة
وراحت عيوني على غفـار صافن عليه مبتسم،
أختفت أبتسامتي من التوتر والموقف المُحرج
أنداريت على جدي كان ينظرلي بنظرات تحذيرية
الرماح: أظن سمعتي طلب أبن عمج، شرايج أنتِ؟!

قبضت أيدي بقوة ونطقت قراري بدون ما أكون
متأكدة منه اذا هو لمصلحتي أو لا
مُرجان: أنتَ بمثابة ابوية القرار الأول والأخير الك جدو.

أبتسم جـدي منتصر وبقت نظراتي متشتتة
ما أريـد أباوع لـ غفـار ولا أريـد أشوف تعابير وجهه،
دنگت راسـي وردت أرجع واستوقفني كلامه
غفـار: اي دام القرار الك يَـا جـدي أخـذ راحتك
بالتفكير وننتظر خبـر منك بالأيام الجاية.

وهذا كان رأي أبـو فيصـل هم وما اعطو مجال لجدي
حتى يحجي ويسمعهم رفضة،
نهض أبـو فيصـل من مكانة هو وزوجتة يردون يطلعون
أم فيصـل: ننتظر منك أخبار حلوة أبـو سلطان.

هز راسة ما عاجبة الوضوع وهمه طلعو،
لـواء دفع غفـار لغرفتة واني تسحبت من يمهم
ورحت وراهم، من شافنـي لـواء راد يطلع من الغرفة
لـواء: راح أعوفن الباب مفتوح تحسباً للأفعال الشيطانية.