Unicode
မောင့်ရဲ့ကား လေးခြံထဲကထွက်သွားတာ သေချာတာနဲ့အိမ်ပေါ်ပြန်တက်လာခဲ့သည်။ ဒီအိမ်ကြီးထဲကို မောင့်ရဲ့အလုပ်သမားအဖြစ် စတင်ရောက်ရှိခဲ့သည်။ ပြီးတော့ မောင့်ရဲ့အတွင်းရေးမှူးအဖြစ်။ ထို့နောက်မှာတော့ မောင့်ရဲ့သက်ဆိုင်သူအဖြစ်။ ခုတော့သားရဲ့အမေအဖြစ်။ ဒီနှစ်တွေမှာ မောင့်ဘေးနားကျင်လည်ခဲ့သည်။ မောင့်ကိုပဲ ယုံချင်ပြီး ငသူ့မျက်လုံးတွေကိုမယုံချင်တော့တဲ့ သူ့ရဲ့စိတ်ကိုတော့ ဒီတစ်ခါအပြစ်တင်ချင်သည်။ တခြားမိန်းမတစ်ယောက်အတွက်နဲ့ မဒီတို့ဝေးရမှာတန်ရဲ့လားမောင်ရယ်။ ထိုနေ့ကအကြောင်း မေမေကြီးကိုပြောပြခဲ့ပါသေးသည်။ ထိုနေ့က-
“မေမေကြီး မဒီစကားခဏပြောလို့ရမလားဟင်”
ရတနာပစ္စည်းတွေနဲ့အမြဲရှုပ်နေတတ်သည့်မေမေကြီးဟာ ခေါင်းညိတ်ရုံသာညိတ်ပြသည်။
“ရှိုင်းအကြောင်းပါ”
“ပြောစရာရှိတာပြောပါဟယ် တကယ်ပဲအလုပ်ရှုပ်နေပါတယ်ဆိုမှ”
မေမေကြီးရဲ့တုံ့ပြန်မှုကြောင့် အံ့ဩခဲ့ရသည်။
“ဟုတ်~~ ရှိုင်းမနေ့က~~နွေး..နွေးနဲ့ နမ်းနေတာတွေ့ခဲ့တယ်~~”
မရှက်မကြောက်အားကိုးရမလားစိတ်ကလေးနဲ့မျက်နှာလက်နဲ့အုပ်ကာငိုကြွေးမိသည်။ သို့သော်ငြား ပြန်ကြားရတဲ့စကားကြောင့် လက်မှိုင်ချသွားရသည်။
“ညည်းအမြင်မှားတာလည်းဖြစ်မှာပေါ့ တကယ်လို့ရှိုင်းအဲ့လိုလုပ်နေရင်တောင် ဖြစ်သင့်တာပဲလေ ညည်းကအဲ့သွေးမတော်သားမစပ်ကလေးအနားပဲကပ်နေတာကိုဖြစ်ပြီပေါ့”
“မေမေကြီး!”
“ဘာလဲ အဲ့လေသံနဲ့လာမပြောနဲ့နော် အဲ့ဒါမို့ပြောတာ ဗီဇကပြင်မရဘူးဆိုတာလေ ရှိုင်းလေးကလည်းလေ ဘယ်လိုဟာကိုအိမ်ပေါ်ခေါ်တင်လာလဲမသိဘူး”
“မဒီ့ကိုကြိုက်တာပြော ဒါ..ဒါပေမယ့် သားကိုထိဖို့မလိုဘူး သားကိုအဲ့လိုချိုးနှိမ်ဖို့မလိုဘူး ဒါသတိပေးတာ”
ပြောပြီးလှည့်ထွက်လာခဲ့သည်။ မေမေကြီးဟာ မောင့်အရှေ့မှာပဲ သားအပေါ်ရော သူ့အပေါ်ပါသိပ်ကောင်းပြပါလားဆိုတာသဘောပေါက်ခဲ့ရပြန်သည်။ အခန်းထဲရောက်တော့ အပြစ်ကင်းတဲ့သားမျက်နှာကြောင့် ပိုအားနာမိသည်။
YOU ARE READING
မဆုံသောမျဉ်းပြိုင်
Fantasyတစ်ခါတစ်လေ ကံကြမ္မာက အလှည့်အပြောင်းထက်ကျီစားလွန်းတယ်။ ဒီအလှည့်အပြောင်းမှာ ငါတို့အားလုံးနစ်နာခဲ့ရတယ်။
