في الحديقة
: يعني تقول حقيقة برائتي باقي ما طلعت بشكل كامل ؟
فيصل : يعني بشكل كامل لا ، يعني مضايقة البنات بنسبة أربعين بالميه بدوا الناس يصدقون انك فعلا بريء
نهيان : يعني إلى الان ما تخلصت من هالعبء؟
فيصل : نهيان ! اظن اهلك من بعد اخبار اليوم بيصدقونك وبيوقفون معك ، و الملازم نواف هذا لا تستخف فيه ، ما مر على توليه الملف إلا سنة وشف وش سوى ؟ على قولة سعود أظهرهم وراء بعض بالدور
نهيان بسخرية : ما وقفوا معي وقت اللازم وصدقوني ، بيوقفون معي ذالحين ؟
سكت فيصل ما قال شيئ لان الوحيد اللي يفهم شعوره وعاش نفس الشعور هو بعد ، وهو بعد أخذ نصيبه وتم خذلانه من اهله ، قاطعه صوت نهيان اللي نطق
نهيان : المهم ما علينا ! ذالحين من اللي قلت انه عاونك حتى أنه خاطر حتى يفضح زياد وخالد ؟
فيصل بابتسامة : سعود !
عقد نهيان حواجبه : سعود ؟
فيصل : سعود بن فارس آل فهد
نهيان : آل فهد !!
هز فيصل راسه بابتسامة
نهيان : هذولا اعرفهم !!
فيصل : زين اجل ما يحتاج اعرفك عليه
نهيان : لا يوم قلت اعرفهم سمعت عنهم من قبل وقبل شوي سمعت خبر عنهم ان مجموعه ارهابيه حاولت الهجوم على بيتهم ، صحيح ذا الكلام ؟
فيصل : مسالة الهجوم هو صار وكل الخبر سمعت بالرصاص ، لكن اللي هاجموهم ما عرفت سالفتهم وهل هي صدق مجموعة ارهابيه ولا وش السالفه
نهيان : وش قصدك ؟ حركات المافيا اللي في راسك ما تمشي في آلسعوديه قلل من مشاهد الافلام اللي اخذت عقلك
فيصل بضحك : لا يا ولد انت افهم علي ! واضح ان اللي ارسل الكلاب على بيت ابو فارس له سالفة طويله مع ابو فارس و اخو سعود عناد !
هز نهيان براسه وهو منصدم من الاحداث اللي جت وراء بعض قاطع تفكيره صوت فيصل اللي نطق
فيصل : شي اخير !
رفع نهيان لفيصل بفضول وانتباه ، وعقد حواجبه يوم شاف فيصل طلع جوال من التحديث القديم وشاشته مكسورة
نهيان: وش ذا ؟
فيصل : الجوال اللي تسبب في ظلمك !
بدا يسترجع نهيان ذاكرته وتذكر حادثه قبل ثلاث سنين واتحدت ملامحه يوم عرف وش يقصد فيصل ، فزت عيونه يوم فتح فيصل الجوال وفتح مقطع المضايقه اللي له تقريبا ثلاث سنوات، كان يشوف متسبب دمار ثقة اهله فيه ، ماقدر يتحمل يوم شاف يد خالد تلمس بنت بطريقة غير لائقة وقفل الجوال على طول، لاحظ فيصل غضب نهيان وهو يعتليه ، سكت ثواني ونطق بهدوء جاذب انتباه الثاني
فيصل : إلى ألآن ما لقوا له محامي يدافع عنه ! مروا ثلاث محاميين وكلهم رفضوه
رفع نهيان نظره صوب لفيصل
نهيان : طبيعي ! قضيته صعبه جدا و منافسة متعب ال سلطان
ابتسم فيصل بهدوء ورفع نظره لنهيان
فيصل : بس والله لو تشوف وش سوى سعود فيه ! قسم بالله شي يبرد الصدر !
نهيان : ايه هو وش سوا ؟ وشهي المخاطره اللي كنت تقصدها ؟
ابتسم فيصل وهو يتذكر انفعال سعود ومخاطرته
فيصل : مدري كيف طلع منها لكن ربي حماه ويسرها، قدم بلاغ كاذب !
ما فهم نهيان وش اللي يقصده فيصل وفتح قرورة الماء يشرب منها ونطق
نهيان بفضول : بلاغ كاذب ؟
نطق آخر كلامه وهو يحط راس القارورة في فمه وبدا بالشرب وعينه على فيصل اللي يبتسم
فيصل : تهريب مخدرات !
شرق نهيان من اللي سمعه وبدا يكح بصدمة ، فز فيصل وقرب منه يضرب على ظهره
فيصل : صحة !
ضرب فيصل ظهر نهيان حتى يتنفس
نهيان بصدمة : وش قلت ؟!!
فيصل بضحك : مريض صح ؟!
نهيان : وانت مشيت وراه ؟
فيصل : وهو عطاني فرصة أعارضه ؟
نهيان : يا مريض انت تعرف عقوبة البلاغ الكاذب ؟
فيصل : علمني متعب ، والله وطلع منها ولد فارس
نهيان : ياربي بموت ! وبكل دم بارد يضحك قدامي ! تدري انه ممكن تلحقون زياد وخالد الحين؟ ملاحظ ولا ؟
فيصل بضحك وبدم بارد : نشكر عناد لحق علينا في آخر لحظة
نهيان بانفعال : منهو ذا بعد ؟!!!
فز فيصل من نبرة نهيان وجلس يضحك بدم بارد ورواق
فيصل بضحك : رولكس يا نهيان رولكس ! الموضوع ما يستاهل والله !!
أنصدم نهيان من فيصل عكسه قبل سنتين يوم قابله في العزا. انفلتت منه ضحكة يم تذكر سالفة رولكس ، شاف فيصل ابتسامة نهيان واعتبرها الضوء الأخضر حتى يضحك براحته
نهيان : ما رح تنساها صح ؟
فيصل وهو ينفي بضحك : ودي أنساها لكن كل ما أتذكرها مت من الضحك وعلى ثقتك ذيك اللحظة !
نهيان بخجل : كله من تحت راس هتون ورهف
فيصل بضحك : يا حرام يالشايب ، زودنا على شيباته عشر شيبات ! وانت ختمتها بمثالية كالعادة
ضحك نهيان بإحراج وهو يحك اسفل راسه يوم يتذكر ذاك اليوم
ΔΙΑΒΑΖΕΙΣ
صواديف الاقدار
Τυχαίοشابان من عوالم مختلفة ، فيصل و سعود ، كلا منهما عاشا مر فقدان العزيز ، و كانت عائلتهما ضحيه لأمراض السرطان ، فقد فيصل اخته وتسبب ذلك في انغلاقه على العالم ، اما سعود فقد امه في طفولته واللتي ربته زوجة والده الاولى ، لكن ما عاشه لم يجعله انسان انطوائ...
