أغلال المرجان (غَـربيب)

Part 5 || نَـــدم

دفعتها عنـي بقوة حاقدة عليها بسبب تصرفاتها
وكلامها ويا عمي ظافر وياريت على شخص يسوه
مُرجان: راح اوكف وياج بعرسج بس حتى أنفذ وصية أمج.

تركتها ودخلت للمكتب ومحد قبل يحجي وياها،
بس أديب اسمعة بقى يمها يواسيها
أديب: لا تبجين ياقوت اني ابقى يمج ما أعوفج.

نزلت راسي وصرت أضرب بي على المكتب،
الوجع هدني وأخذ ثلثين حيلي،
عمو ظافر شايفها بسيارة بشار وما أعرف
أذا بوضع طبيعي لو يفشل لا هي قبلت تحجي ولا هو،
طلع من يمنة ومتلكي ابو بشار ولأن يعرف عمي ظافر
ماراح يسكت حاول يحل الموضوع ويزوجهم،
ولو ياقوت ما طلع منها ذاك الكلام بحق عمي ظافر مستحيل
يزوجها بشار ، ومن بعد هذا القرار راح تندم ندم عمرها.

عصرت راسـي بين كفوف أدية وبجيت بوهَن،
صرت أحس الدموع التنزل على خدي نار مو دموع،
حرگت روحـي وتركت ندبتها بكلبي،
اللي زاد قهري موقف ياقوت ما رفضت الزواج
وجملة منها زادت حقدي وأستحقاري أتجاهه
ياقوت: اللي يحب لازم يحارب.

غيـد: تحاربين أهلج؟!
ياقوت: الدنيا كلها مو بس أهله.

كلنا قاطعناها وثاني يوم أجو أهل بشار تقدمولها رسمياً
لزمتها غيـد تبجي وتتوسل بيها
غيـد: لا توافقين ياقوت انسي خلي يولي
راح نسافر احنه وابدي حياة جديدة لا تضيعين
نفسج وتضيعينة وياك.

ياقوت: ما أكدر غيـد، سافرو واخلصو مني ومن مشاكلي.

شمرت كلشي ورة ظهرها وتم "عقد قرانهم" بنفس اليـوم، فرحتها جانت طافية ورغم تحققت أمنيتها بس ما لمحت ابتسامة على وجها حتى لو بالغلط،
بس هـذا كان قرارها وفضلت بشار على عائلتها ،
غيـد تباوعلها والدموع تهل بعيونها
غيـد: ليش هيج سوت بروحها؟! ليش نكرتنة بهذهِ السهولة؟!
معقولة الحب هيج يسوي بالشخص؟!

مُرجان: هذا غباء مو حُـب، وتتوقع هسه بشار يحبها فعلاً لأن عقدو ما تدري بس حتى يسكتون عمي ظافر.

غيـد: راح تضيع والله راح تضيع.!!!

الحسبات هدت حيلنا وموقف ياقوت دمرنا،
هواية غلطت بس ولا مرة تعلمت من غلطها
قبـل أكثر من سنة دخلت علاقة ويا ولد من المنطقة
هم كان شخص سـيء وحتى أكثر من بشار،
صارت مدمنة عليه كل كلامها بي،
كل أحلامها تنجمع وياه،
اسمه ما يوكع من لسانها "نوفل"
ياقوت: سبحان اللي خلقة مُرجان نوفل واحد ما منه اثنين.

غيـد: بالصفات السيئة أكيد.

ياقوت: بي كل الصفات الحلوة واللي يتمناها كلبي.