الرحمة 2 MERHAMET

PART 06

ساعة دالمكانة عاد رجع لعندهوم طلع فالطموبيل وقلعو بدات أمال كتسولو عليها وعلى احوالها وهو كيجاوبها، غيثة غاساكتة وكتشوف فالشرجم، شدو الطريق للحسيمث باش من تما يقطعو لطنجة دارت امال موسيقى اما غيثة رجعات راسها متكية وداتها عينيها .

* ايتوزين الدريوش - الناظور

وصل المغرب حل عينيه على الاذان، هز تيليفون كيلقا شي ابيلات من عند الرجال لي خدامين معاه، عيط تم نيت على واحد قريب ليه وجاوبو تم تم ممنوع يتعطل عليه ولا يجي يقلبهم كاملين .

طه : اش كاين ؟

الخدام : حصلنا بلال فالحدود ديال طاليان مع قنطار من الشيت ( نوع دالحشيش ) مهربو لعند القطاعة ( سمية طالقينها على الماكرو مافيا دروافا لي كاينة فطاليان )

طه : شكون بيعو ؟

الخدام : شافوه المهوگلين دالحدود

طه : ضبرليا على لي زعمو وجيبوه لسبانيا غانهبط عندو غدا

الخدام : واخا الرايس .

قطع عليه ومسد عنقو من اللور كيسمع الهضرة باقي الدنيا عامرة، توكض وخرج مشا توضا عاد رجع لبس عليه وخرج لبرا تلاقا مع عمو مصطفى تسالمو .

مصطفى : منين جيتي ماشفناك

طه : غير شي مسائل العميم وصافي ( دوز السوارت ديال الطموبيل من يد ليد وشاف فساعة ) لحق وقت الصلا على وضو ؟
مصطفى : اييه

طه : يالاه

تحركو هو وياه للجامع القريب ليهوم، ودخل طه برجليه لمنية حيد السباط على تقاشر فالبيض كيشعلو وصل دار التحية وناض الامام كيقيم فالصلا تستفو وبداو كيصليو، كيتمعن مزيان فالسجود والركوع، كل حرف كنطقو بشوبة بين شفايفو، وكيسلم بشوية عليه تاسالا وبدا كيسبح غير من خلال الصبعين ديالو كيحسب فكل واحد الثلاثة على حساب التقسيم الخلقي لي داير ربي فاليد دالانسان .

كيف سالا وناض جاو شي رجال رغم كبار تقربو كيسلمو عليه وفرحانين، معروف بين كاع ناس ايتوزين، وشكون لي يغفل عليه النسر ولد النسر، راجل حقاني تربا من صغر بين حجر الرايس الكبير بلحاج، ومن نهار شهد ضد باه كولشي ولا كيترعد ويقفقف منو واخا كان فعمرو 15 داك الساعة ولكن عرفوه بلي كابر مامعاهش اللعب ويعرفك كتبوهل عليه اجمعك ويطويك يا تقاد معاه يا يصفيهاليك، وحتا لي كيخدمو معاه مايمكنش شي نهار افكر يخونوه والا العاقبة معروفة ..