(((((( ميرا )))))
#لولو_محمد
الحلقه الاولى
فى عيد ميلاد
اسيل ( ١٦ سنه ) بتحتفل مع صاحباتها و أهلها بعيد ميلادها و بيغنوا هابى بيرث داي تو يو و الكل سعيد و فرحان
نور ( والده اسيل ) / كل سنه و انتى طيبه يا قلبي و عقبال مليون سنه
اسيل / ربنا ما يحرمنى منكوا أبدا
نور / و لا منك يا قلبي خدى بقي صحباتك و روحوا هيصوا شويه لحد ما اقطع انا و بابا التورته و نجهز الاطباق نناديكوا مره واحده
اسيل / هندخل اوضتى نرقص تمام ؟
احمد ( والد اسيل ) / خدى راحتك يا قلبي دا عيد ميلادك يعني تعملى اللى انتى عوزاه
اسيل / ميرسي يا احلى اب فى الدنيا
اسيل تشاور لصاحبتها و يجروا على الاوضه كلهم
نور / استنى يا ميرا عوزاكى
ميرا تقف و تبص على أحمد نور تفتح درج و تدى لميرا فلوس
نور / الجمعيه يا ست الكل دورك تقبضي قولت ما دام انتى هنا اديهالك و سامحيني انى طول اليوم ملخومه ما فضيتش اديهالك
ميرا تاخد الفلوس تروح تحطها فى شنطتها
ميرا / شكرا ... تحبى حضرتك اساعدك فى حاجه
احمد / تسلمى يا ست البنات ادخلى انبسطى انتى مع صاحبتك و انا هقف اساعدها بنفسي
ميرا / تمام
ميرا تدخل تقف تتابعهم من ورا ستاره و احمد يساعد نور فى التقطيع و ترتيب الاطباق و اسيل من جوه تشغل اغانى و صوت تسقيف و ضحك عالى
احمد / اكتر حاجه عجبتنى فى حوار الجمعيه ده ان اسيل بدات تحوش
نور / تحوش !!! انت طيب اوى يا احمد دى بقت تسحب منى فوق مصروفها عشان تقدر تكفى مصاريفها بس على العموم انا اتفقت معاها مش هتورطنى تانى فى حوار الجمعيات ده انا مش فاهمه مين اللى شار عليها بالفكره دى بس
احمد / طبيعي تجرب و تستكشف و بعدين ما كانش المفروض اصلا تسمحى انها تاخد جنيه زياده
نور / ازاى بس يا احمد المصروف معمول ليه مش عشان تكفى مصاريف المرواح و المجى للدروس و لو هتاكل او تشرب حاجه فى النص
احمد / بالظبط يا قلبي و هى ربطت نفسها بجمعيه يبقي لازم تتحمل المسؤليه و تتصرف على الأساس ده تروح و تيجي مشي بقي تركب ميكروباصات بدل تكسيات تاخد أكلها و مايتها معاها من البيت تتصرف عشان تعرف ان القرش ما بيجيش بالساهل و كمان انها تكون قد كلمتها يا ما تقولهاش
نور / يا حبيبي هى لو ما ادلعتش على ابوها و فى خير ابوها هتدلع امتى و فين بس ما تاخدش كل حاجه جد كدا
احمد / انا عارف انك مسيطره و انك اكيد كلمتيها و فهمتيها انا بس ... بقول رأيى
نور / تمام يا حبيبى ما تقلقش خالص انا هرتب كل حاجه و هتكلم معاها تانى و هقولها رايك و انا متاكده انها هتاخده فى اعتبارها فى اى موقف تانى زى ده دا لو اتكررت اصلا
احمد / لا ما هو ده مش الحل
نور / و دا مش وقته
احمد / تمام ... هدخل المكتب اقعد شويه لحد ما يخلصوا ابقي ناديني
نور / المتوقع منك اول ما الكلام يبقي مش على هواك تجرى على المكتب و تقفل الباب
احمد / مش انتى اللى قولتى مش وقته
نور / كان ممكن تكمل مساعدتى فى صمت ما كنتش هضايق من حاجه زى دى
احمد / تمام معاكى حق انا اسف
اسيل تطلع من الاوضه تشوف ميرا واقفه
اسيل/ حضرتك واقفه هنا و سيباني لوحدى جوه
ميرا / لوحدك ايه دا الفصل كله معاكى جوه
اسيل / و انتى بقي فاكره ان فى حد فيهم ممكن يعوضنى عنك يا هبله انتى
ميرا / مامتك ادتنى الجمعيه ... و قدام باباكى
اسيل / قوليلى بقي هتعملى اللى فى دماغك برده
ميرا / صدقيني بقالى شهور بحوش كل قرش عشان اليوم ده
اسيل / ما قولتلك اكلمهولك
ميرا / اسيل لو سمحتى
اسيل / خلاص خلاص اهدى ما تقفليهاش كدا دا عيد ميلادى مش هيتكرر كل سنه يعني... لا ان شاء الله يتكرر كل سنه ... ايه اللى بقوله ده
الاتنين يضحكوا
اسيل / تعالى نشوف ماما لو محتاجه مساعده
ميرا / باباكى بيساعدها
اسيل / على الله ما يكونوش اتخانقوا
ميرا/ ما تقلقيش باباكى بيعرف يحتويها و يلم اى موضوع ... و الله يا بنتى لو كل الابهات زى باباكى ... كان زمانهم لغوا محكمه الاسره دى خالص
اسيل / و انتى الصادقه لو كل الأمهات زى مامتى كانوا قدروا يتاقلموا مع كل الابهات اللى زى بابايا
ميرا / بتتكلمى كان باباكى شخص وحش و مامتك هى اللى بتحتويه مش العكس
اسيل / ما قولتش كدا بس بابا برده ليه عالمه الخاص انتى عارفه زى ما بيقول بيفضل طول اليوم يسمع مشاكل الناس فبيروح يقفل على نفسه الباب لحد ما يصفى نفسه خالص و يطلع لينا بقي
ميرا/ و انتوا مش مقدرين طبعا هو بيتعب قد ايه عشانكوا و انه
اسيل / يا ميرا انتى مش فاهمه ممكن على ما يقرر يطلع من الاوضه اكون انا نمت أو مشيت أو حوارى ماما قدرت تحله خلاص
ميرا / بس هو عمره ما قصر معاكى ايوه مامتك دورها مهم بس باباكى كمان دوره اهم بكتير هو كل اللى انتى عايشه فيه ده مش بسبب تعب باباكى و شغله
اسيل / احنا بنتكلم فى نقطتين مختلفين تعالى نطلع بره بدل ما احنا بنتوشوش زى الحراميه كدا تعالى
ميرا و اسيل يطلعوا بره
نور / مش ممكن للدرجادى جعانين مش قادرين تستنوا اما اناديكوا ... خدوا بقي وزعوا على صحباتكوا دول لحد ما اكمل الباقي
اسيل / تسلم ايدك يا ست الكل بجد شغل فاخر من الاخر
احمد/ عد الجمايل يا سيدي
اسيل / قلبي اللى مدلعنااااااى
الكل يضحك ميرا تاخد الاطباق و تدخل توزعها و اسيل تعمل زيها و تحصلها
...................
فى عربيه احمد
احمد راكبه جنبه ميرا محرجه
ميرا / انا اسفه اوى نزلت حضرتك بعد يوم متعب زى ده كنت اخدت اى تاكس او حاجه
احمد / ما تقوليش الكلام ده ازعل منك و بعدين الوقت اتأخر انك تركبى لوحدك
ميرا / ميرسي ... هو حضرتك هتروح العياده بكره
احمد / باذن الله خير ؟! فى حاجه و لا ايه ؟!
ميرا/ لا بسأل بس عادى
احمد / ايوه بإذن الله
ميرا / ربنا يعينك و يقويك انا عارفه انى رغايه و اكيد حضرتك مصدع من الأغانى و الدوشه دا غير شغلك طول النهار و لسه هتعيد كل ده بكره تانى... بجد ربنا يكون فى عونك بتتعب اوى
احمد / مفيش حد ما بيتعبش ... انتى نفسك اكيد تعبانه بين الدروس و المذاكره طول اليوم
ميرا /حضرتك تعرف انى تقريبا حضرت أعياد ميلاد نص بنات الجروب ... عدد الابهات اللى بيحضروا العيد ميلاد من اوله لاخره و يتعبوا نفسهم فى كل التفاصيل زى حضرتك كدا تقريبا مفيش يعني لو العيد ميلاد مثلا فيه تجمع عائلى الرجاله بياخدوا جنب و لو زى ده كدا الصحاب بس الاب ممكن ما يحضرش اصلا
احمد / فى ناس بتشوف ان كدا احسن
ميرا / احسن انك ما تكونش جنب بنتك و تفرحها
احمد / ممكن يكون بيفرحها بينه و بينها و بيسيبها تاخد راحتها وسط صاحباتها يعنى اديكي شوفتى نص البنات محجبات ما شاء الله اكيد كانوا هياخدوا راحتهم اكتر لو انا مش موجود .. صدقيني انا شخصيا اتفاجئت و كنت محرج جدا و فكرت كتير امشي باى حجه و بقيت بهرب كتير على الاوضه ادارى لحد ما حد يناديني على قد ما اقدر عشان اديكوا مساحه تنبسطوا
ميرا / ما تحاولش تقلل من نفسك فى ابهات لو سألتهم مش هيعرفوا تاريخ ميلاد عيالهم امتى اصلا
احمد / ربنا يعين كل واحد على حاله بس صدقيني يا ميرا مفيش حد ممكن يحب البنت قد ابوها بس فى ناس ما بتعرفش تعبر
ميرا / ما دى المشكله
احمد / هى ايه ؟
ميرا / ان الواحد ما يكونش قادر يعبر عن مشاعره و حبه للى قدامه
احمد / للاسف البيئه اللى اتربى فيها ناس كتير مننا ما بتعترفش بالحاجات دى فالانسان بيكبر زى ما اتربى البنت محتاجه ايه اكل و شرب و لبس و انا اتعب عشان اوفرهم فدا بالنسباله الحب و التضحيه هى مش قادره تشوف جزمته اللى هتتقطع و مش قادر يشترى لنفسه واحده جديده عشان كل قرش بيكسبه بيصرفه عليها و هى شيفاه اولدفاشون و مبهدل و ممكن يكسفها قدام صاحباتها مثلا يعني
ميرا / دى تبقي بنت مش متربيه و ما عندهاش اصل ... بس حضرتك مش كدا خالص حضرتك من اشيك الناس اللى قابلتها فى حياتى و اللى يشوفك يقول فى العشرينات مش تلاتينات و لا اربعينات حتى
احمد/ هنا بقي يجي دور الزوجه الصالحه ... اكل صحى بيت هادى و نضيف لبس مرتب و مكوى
ميرا / و الله فى ستات بتعمل اكتر من كدا بكتير و ما بتتقدرش برده
احمد / البيوت ياما بيحصل فيها
ميرا / البيوت ياما بيحصل فيها بس لما بيكون للبيت راجل حكيم و عاقل كل حاجه بتعدى و تهون الراجل هو عمود البيت هو اللى بيشتغل و يتعب و يصرف و يروح يدادى و يسمع و يحتوى و يطبطب الراجل هو أساس نجاح اى علاقه و مش سهل ابدا تكون راجل بجد
احمد / معاكى حق
ميرا / المشكله بقي لما الراجل ده ما بيقابلش التقدير اللى يستحقه او يحس انه عمل زى ما عملش الراجل لازم يتقدر عشان يقدر يكمل
احمد / و الله التقدير ده مهم جدا لاى حد حتى لو عيال صغيره مش الراجل بس
ميرا / الشارع الجاى
احمد / ايوه واخد بالى ما تقلقيش انا حفظت العنوان كويس
احمد يركن
ميرا / تعبت حضرتك اوى انا بجد اسفه
احمد/ اطلعى و شاوريلى من فوق انك وصلتي
ميرا تبتسم و تنزل تطلع تجرى تدخل الشقه و تفتح البلكونه و تبص له و تشاور يمشي و هى متبعاه لحد ما يختفي
...................
فى اوضه اسيل
نور / بس احنا اتكلمنا كتير اوى فى الموضوع ده
اسيل / يا ماما ميرا صاحبتى و عارفه علاقتى ببابا كويس و بالعكس بتحبها
نور / بس هى ما عندهاش زيها فمهما بينت ممكن تكون من جواها محتاجه لده و نفسها فيه و مش لقياه
اسيل / يعني اعمل ايه يا ماما ما اتعاملش مع بابا قدامها يعني و بعدين انا مش عارفه انا غلطت فى ايه بالظبط
نور / ما غلطتيش هو فى احساس غريب جوايا كدا انا مش فهماه
اسيل / احساس ايه ده ؟!
نور / مش عارفه صدقيني مش قادره افسره بقولك ايه انسي انسي و اتفضلى نامى عشان ورانا بكره تنضيف الليله دى كلها
اسيل / ماما !!!
نور / بكره مش عيد ميلادك يعني هتساعديني
اسيل / و الله و رخصت يا تفاح
نور / يلا يا بت على السرير كلتى دماغى طول اليوم
اسيل / ما هو من طعامته يا حلو انت يا رايق
نور / الصبر من عندك يا رب
اسيل تضحك و تروح اوضتها
.....................
فى عياده امراض نفسيه
ميرا قاعده بره و فى حاله تطلع الممرضه تشاور لميرا تقوم تدخل
احمد / ايه ده ميرا !! ايه المفاجاه دى
ميرا / انا بصراحه اترددت كتير قبل ما اجى بس ... انا ... انا مش جايه لحضرتك كعموا احمد انا جايه لحضرتك كدكتور احمد
احمد / دى مفاجاه تانيه ... عشان كدا كنتى عامله الجمعيه ... انتى قاطعه كشف بره ؟!
ميرا / ما هو ده حقك
احمد/ خلينا ما نضيعش وقتك و وقت الناس ... اتفضلي اقعدى
ميرا / فين هنا و لا هناك و لا فين
احمد / مكان ما تحبى ... المكان اللى ترتاحى فيه
ميرا / شكرا
ميرا تقعد على الكرسي قدام احمد
احمد / هو انا مش المفروض اعمل كدا بس ميرا انتى جايه عشان المشاكل اللى بين باباكى و مامتك؟
ميرا / لا ابدا ... بصراحه جايه فى موضوع... اصعب بكتير
احمد / احكى انا سامعك
ميرا / انا مش عارفه ان كان مجيتى هنا اصلا صح و لا غلط بس صدقنى اقسم بالله حاولت كتير انا بقالى كتير اوى و الموضوع بيكبر معايا و مش قادره اتكلم مع حد و لا احكى و لا لاقياله حل
احمد / انك تطلبى المساعده مش حاجه غلط و لا وحشه ابدا بالعكس دا الصح ... و بغض النظر عن انى عارفك معرفه شخصيه... فانا فى بيني و بين ربنا قسم يعني اى حاجه هتحكيها عمرها ما هتطلع بره الباب ده
ميرا بتفرك فى ايديها و احمد متابعها بهدوء
احمد/ اجيب لك حاجه تشربيها؟
ميرا تهز راسها لا
احمد / تمام وقت ما تحبي تتكلمى ما تضغطيش على نفسك
ميرا / هو الحب حرام ؟
احمد / الحب !! .. لا مش حرام ... بس فى انواع كتير من المشاعر بتتفهم غلط انها حب ... خصوصا على واحده فى سنك
ميرا / بس انا مش صغيره البنات فى سنى كانوا بيبقوا متجوزين و مخلفين عادى
احمد / دا كان زمان يا ميرا ... دلوقت الوضع اختلف خالص ... و بغض النظر عن الموضوع ده انتى لسه قدامك على الاقل سنتين على السن القانوني للزواج و انا هنا ما جبتش سيره الجامعه و سنين الدراسه عشان يبقي معاكى شهاده
ميرا / ما هو فى ناس كتير جدا بيتخطبوا السنتين دول و بيكملوا دراستهم بعد الجواز عادى
احمد / بس دى مجازفه كبيره اوى انتى بتتكلمى و انتى ما تعرفيش اى حاجه عن الجواز و مسؤلياته و لا حتى احتماليه الحمل و تعب الحمل و الولاده و السهر بالبيبى كل الحاجات دى هتاثر على مستقبلك دلوقت مش وقتها خالص ... انتى كلمتى حد من أهلك فى الموضوع ده
ميرا / ما حدش يعرف حاجه
احمد/ بس دا غلط جدا ايه يضمن لك اصلا انه جد ناحيتك
ميرا/ هو ما يعرفش اى حاجه عن مشاعرى دى و ما ينفعش يعرف و لا ينفع اى حد يعرف
احمد / ليه
ميرا / عشان انا مش انانيه و لا وحشه... انا مشاعرى دى غلط و ما ينفعش ... بس مش قادره اتحكم فيها
احمد / يعني إعجاب من طرف واحد
ميرا / انا بفكر فيه على طول و بحلم بيه و بتخيله معايا طول الوقت و مش قادره اعيش من غيره بحب اتكلم عنه او اسمع سيرته ساعات كتير اوى بتلكك و اعمل حاجات غريبه و عبيطه عشان اشوفه او اتكلم معاه حتى لو ثوانى
احمد / اتعرفتى عليه فين و امتى
ميرا / من فتره طويله فى الاول كان عادى ... شخصيه محترمه ... بس مع الوقت ... بقيت مش قادره امنع نفسي انى اتابعه ... فى كل حاجه ... بس دا غلط
احمد / بتقولى مش انانيه ... دا معناه ايه ؟؟ مرتبط ؟!
ميرا / متجوز و مخلف و سعيد فى حياته
احمد / ما يمكن ده اللى انتى حباه مش هو ... العيشه اللى نفسك تعيشيها
صمت و تبادل نظرات
احمد / بصي هو اعترافك ان الموضوع ده غلط دا فى حد ذاته بوينت مهمه جدا وفرت عليكي وقت طويل و مجهود الباقي بعد كدا مش محتاج غير شويه مجهود
ميرا / ازاى
احمد/ تشغلى وقتك و تحاول تركزى على مستقبلك اكتر... حاولى تدى تفسير تانى للامور
ميرا / اوهم نفسي يعني
احمد / نهائى هو اللى انتى فيه ده هو الوهم مش اللى هتعمليه انتى بتقولى انه متجوز و مخلف و سعيد يعني ما بيحبكيش
ميرا / بس انا بحبه
احمد / الحب مش مجرد كلمه بنقولها و خلاص
ميرا/ تضحيتى بنفسي عشان هو يكون سعيد دا فى حد ذاته حب
احمد / مظبوط ... بس تعالى نتخيل لو ما عملتيش التضحيه دى ايه الاحتمالات اللى ممكن نحطها على الترابيزه الأولى انه يحرجك و يجرحك التانيه و الأسوء انه يطلع واطى و يستغلك
ميرا / هو ما يعملش كدا ابدا
احمد / ما هو لو انسان كويس اوى كدا مش هيخون مراته مع طفله ... واحد متجوز و مخلف هيكون عنده قد ايه اقل حاجه مثلا تلاتين ؟! خمسه و تلاتين ؟!
ميرا / اتنين و خمسين
احمد يتعدل فى كرسيه و يتنهد
احمد / انتى اخر مره اتكلمتى مع باباكى امتى يا ميرا
ميرا / الموضوع مش كدا
احمد / ما هو ايه اللى ممكن واحد فى السن ده يقدمهولك اصلا غير كدا .. فلوس ... مش انتى اللى تبصي للحاجات دى
ميرا / الحب
احمد / نزوه مش اكتر
ميرا / ليه ؟! انا مستعده اديله كل حاجه حرفيا ليه ما يحبنيش ناقصني ايه
احمد/ مش ناقصك اى حاجه دا انتى اللى كتير جدا عليه ميرا انا عاوزك تفهمى ان واحد فى السن ده مش هيقدر يعوضك عن الاحتياجات اللى واحده فى سنك محتاجاها هو عاش كل حاجه و فهم الدنيا و لفها و طاقته خلصت محتاج بقي يرتاح و يقضي باقي أيامه فى هدوء
ميرا / ما انا كمان انسانه هاديه و بحب الهدوء و العقل ما دى اكتر حاجه على فكره شدتني ليه ... انه عاقل و هادى و راسي مش زى العيال الاراجوزات اللى فى كل مكان حوليا هو حاجه تانيه هو برستيج و هيبه و شخصيه و كل حاجه حلوه ممكن اى واحده عاقله تحلم بيها
احمد / و المواصفات دى كلها ما تلاقيهاش فى شاب عشريني وسيم و ذو خلق برده؟!
ميرا / ما اعرفش انا ما جريتش ورا الموضوع و لا راضيه عنه اصلا انا ما اخترتش الشخص ده بالتحديد و قولت هو ده اللى هحبه اهتمامى بيه و مشاعرى ناحيته هى اللى مش لقيالها اى تفسير غير انها اكيد حب ... انا بنت عندى أبين و عندى اعمام و خيلان و رجاله كتير اوى فى عيلتنا و شوفت كميه علاقات بالهبل و كل واحد منهم بيعامل مراته ازاى ... هو ما لوش زى
احمد/ انتى دخلتى البيوت دى كلها بس ما دخلتيش بيته
ميرا / لا دخلت
صمت
ميرا / هو مش زيهم
احمد/ وجودك ضيفه فى بيت حد حاجه و انك تعيشي فى البيت ده و تشوفيه على طبيعته حاجه تانيه ... صدقيني هتتصدمى
ميرا / بالعكس انا شوفته فى مواقف كتير جدا هو نفسه ممكن ما يكونش اخد باله انى متبعاه و مركزه قد ايه فى ردود أفعاله انا بحس بيه و بفهم هو يقصد ايه او حتى عاوز ايه من غير ما يتكلم انا هعوضه عن كل حاجه محتاجها و هو هيعوضنى
احمد / مش يمكن انتى بتحبى شخص خيالى فى دماغك انتى بس يا ميرا
ميرا / لا حقيقي هو موجود انا اعرفه
احمد / فاهم فاهم ... انا اقصد انك رسمتى ليه صوره فى خيالك و صدقتيها و بدأتى تتعاملي مع الصوره دى على انها حقيقه
ميرا/ لا بقول لحضرتك انا اعرفه كويس
احمد / مش يمكن انتى عارفه جانب الشخصيه اللى هو سمحلك تشوفيها منه او اللى اتحكاك عنه ... مش شرط يكون هو ده فعلا ممكن لما تقربى منه اكتر تكتشفي حقيقه تانيه خالص بس فى الحاله دى هتجازفى انه يحبك و ساعتها حياته هتدمر
ميرا/ لا انا مش عاوزه كدا خالص ... انا عاوزه انساه عاوزه ما احبوش عاوزه دوا يساعدني
احمد / ياريت الدنيا كانت بالبساطه دى
ميرا / يعني ايه
احمد / يعني انتى محتاجه تقعدى مع نفسك الاول و تساليها ... انا عندى كام سنه ؟ قدامى كام سنه دراسه على الاقل لحد ما اكون فى سن مناسب للجواز ؟ انا طموحى ايه و نفسي ابقي ايه ؟ هل انا كمان عشرين سنه متخيله نفسي ممرضه لراجل سبعيني مسن و لا
ميرا / انا مستعده ...
احمد / انتى هيبقي عندك وقتها سته و تلاتين سنه فى عز شبابك ... دا فى بنات بيتجوزوا فى السن ده دا اصلا لو الراجل ده عاش العشرين سنه دول لحد ما يكمل السبعين اساسا و لا الحاجه و سبعين دول و شوفي قبلهم يعني والدك مثلا مريض ضغط و سكر
ميرا / بس هو ...
احمد / حتى لو رياضي و بيهتم بنفسه ... ميرا انا مش بكلمك كطبيب نفسي ... انا بكلمك كاب ... انتى بالنسبالى زيك زى اسيل بالظبط و عشان كدا بحاول اختصر عليكي كلام كان ممكن يتقال فى جلستين تلاته و يمكن اكتر
ميرا عنيها تدمع و تحاول تدارى وشها و تقوم تقف
ميرا/ انا لازم امشي
احمد / حاولى تتكلمى مع والدك يا ميرا
ميرا تبص لأحمد
ميرا / ما اقدرش اتكلم معاه فى حاجه زى دى ... هقوله ايه ؟!
احمد / لا انا قصدى تتكلمى معاه عموما تحاولى تقربى منه
ميرا تبتسم بسخريه
ميرا / عشر سنين ما حاولش يقرب هو منى مره و فى كل مره نتقابل ما بيعملش حاجه غير انه يشتم فى ماما و انها ازاى ست أنانيه و مهمله اتجوزت و رمتني لأمها تربيني و كأنه مش متجوز و مخلف غيرى اصلا
احمد / انتى فاضيه تانى امتى
ميرا / اشمعن
احمد / اعتقد ان ده الموضوع اللى محتاجين نتكلم فيه الجلسه الجايه
ميرا / مش هيبقي في جلسه جايه ... انا كنت عاوزه اعرف حاجه و عرفتها
احمد / كل الناس عندها موقف او ذكرى حياتها وقفت عنده العمر بيجرى و بنبان من بره عادى بس فى الحقيقه احنا وقفنا هناك ... مشاعرك ناحيه الراجل العجوز دى هى فى الحقيقه انعكاس للموقف اللى انتى لسه واقفه عنده ... احتياجك للاسره و الاب ... بس ... بما انى اكبر منك و دا مجال تخصصي عاوز اقولك انك للاسف يا ميرا عشان تكونى ام سويه ناجحه و النقطه دى ما تأثرش على اختيارك لزوجك و مستقبلك و مستقبل عيالك كله لازم تحليها
ميرا / حقيقي مش عارفه اقول لحضرتك ايه انا اسفه جدا انى ضيعت وقتك عن اذنك
احمد / ميرا لو سمحتى استنى احنا لسه ما خلصناش كلام
ميرا / بالعكس حضرتك قولت كل حاجه و وفرت عليا حاجات كتير اوى
احمد / تمام ... لو حبيتي تتكلمى تانى فى اى وقت مش محتاجه تحجزى كشف اعتقد ان رقمى معاكى كلميني و انا هقابلك و نتكلم فى اى وقت و يا ريت و انتى خارجه تاخدى فلوس الكشف معاكى
ميرا تبص له بحزن و تمشي
...........................
قدام سنتر دروس
اسيل و ميرا بيتمشوا
اسيل / يعني مش هتقوليلى فى ايه ... هتخبى على ايسو حبيبتك
ميرا / مفيش حاجه يا بنتى اعملك ايه عشان تصدقيني
اسيل / بقولك ايه انا عرفاكى و حفظاكى و انتى مش مظبوطه خالص .. قوليلى بقي عملتى ايه بالجمعيه اللى كنتى هتموتى عليها دى و محسسانى انها هتغير حياتك
ميرا / هو انا ممكن اسالك فى حاجه خاصه
اسيل/ لا مش مرتبطه انا
ميرا / انا بتكلم جد بطلى هزار شويه
اسيل / ما ايه هى الحاجه الخاصه اللى ممكن تسأليني فيها يعني
ميرا / هو انتى باباكى و مامتك عمرهم ما اتخانقوا ؟!
اسيل / هو احنا عندنا قاعده صارمه اسمها اللى بيحصل فى البيت ما بيطلعش بره باب البيت فانا مش هقدر اقولك اى تفاصيل بس اكيد مفيش اى اتنين فى الدنيا ما بيتخانقوش يا ميرا دا انا و ماما او انا و اخواتى او انا و بابا حتى ساعات كتير بنتخانق
ميرا / يعني عمرك ما فكرتى يمكن لو انفصلوا او ما كانوش اتجوزوا مش يمكن حياتك كانت هتبقي احسن
اسيل / أعوذ بالله بعد الشر طبعا اكيد لا ايه الاسئله العجيبه دى
ميرا / مش قصدى انا بس
اسيل / صدقيني يا ميرا البيوت ياما بيحصل فيها بس اخر اليوم بيتراضوا و عادى يعنى هم كبار و بيعرفوا يتعاملوا مع المشاكل دى
ميرا / دا عشان باباكى بيحبكوا بس
اسيل / طب ما ماما اكيد بتحبنا هى كمان ايه يعني بتحاولى تقولى ايه
ميرا / مفيش زهقانه شويه بقول اى كلام
اسيل / لا دا انتى شكلك زهقانه خالص على الكلام العجيب ده بس على العموم نخلص بس امتحانات و اوعدك مش هتقولى و لا يوم من أيام الدراسه
ميرا / اشمعن
اسيل / بابا لقى سنتر بيدى دورات برمجه و كومبيوتر و تنميه بشريه و لغات و حاجات تانيه كتير اوى و عندهم برامج صيفيه انما ايه حكايه
ميرا / و بكام بقي كل ده
اسيل/ ما تستهبليش انتى لحقتى تخلصي الجمعيه
ميرا/ ما صرفتش منها جنيه
اسيل / ايه ده ما روحتيش المشوار المصيرى الخطير اللى كنتى موقفه عليه حياتك ايه ما لقيتيش مواعيد و لا ايه قوليلى لو كدا استخدم سلطاتى و اتصالاتى و اظبط لك معاد
ميرا / روحت
اسيل / و ... يا بنتى ما تنطقى ايه اللى حصل
ميرا / ما حصلش حاجه زى ما روحت زى ما جيت
اسيل / هو ده بقي اللى مضايقك اوى كدا
ميرا / و الله يا اسيل انا الحوار مضايقني من أوله و مش عارفه اخرتها ايه
اسيل / ايوه هو ايه بقي الحوار اصلا
ميرا / ما تاخديش فى بالك
اسيل / لا و الله ما هعديهالك بقي ... فى ايه يا ميرا انتى بقالك فتره طويله مش مظبوطه و من سئ لاسوء و علاطول ما فيش ما فيش ايه يا بنتى هو انتى عندك حد اقرب منى تحكيله و تثقى فيه
ميرا / انا ما عنديش بعد تيته غيرك اصلا
اسيل / امال فى ايه ... مشاكل فى البيت ؟
ميرا / مفيش حاجه و الله ... مرهقه شويه
اسيل / لا فى ... مالك بجد ما تقلقنيش عليكي
ميرا / فى ايه يا اسيل هو انتى هتزعليني بالعافيه انا تمام ما فيش حاجه اهدى بقي و عدى اليوم
اسيل / عديته براحتك اصلا
اسيل تبص لميرا و الاتنين مضايقين
............................
فى شقه أسيل
احمد قاعد فى المكتب قافل على نفسه و بيقرأ فى كتاب الباب يخبط
احمد/ اتفضل
اسيل تدخل راسها
اسيل/ فاضي
احمد يقفل الكتاب و يشاور لها تدخل
اسيل / كنت محتاجه اتكلم مع حضرتك
احمد / فى اى وقت يا باشا اتفضل
اسيل / انا مش عارفه المشكله فيا و لا فى ميرا بس فى حاجه مش مظبوطه و الموضوع مضايقنى
احمد / حاجه ايه اللى مش مظبوطه
اسيل / بقالها فتره طويله بتسرح و ساكته و مش ميرا اللى اعرفها و بعدين مش بتتكلم الاول لما كان بيبقي فى حاجه مضيقاها كانت بتحكيلي... هى ما لهاش غيرى اصلا بس الفتره دى و لا حتى انا ... خايفه اكون بخسرها ... ميرا هى اكتر واحده بحبها فى صحباتى
احمد / بس مش شرط أن عشان انتوا صحاب تحكيلك كل حاجه
اسيل / امال تحكى لمين
احمد / مش لازم الواحد يحكى اصلا عادى حاجه مضيقاه و هتعدى لوحدها ... عاوز اقولك ان احيانا كتير الكلام عن موضوع او مشكله بيكبرها
اسيل / يعني اسكت
احمد / انتى الوحيده اللى تقدرى تقررى امتى تحكى و امتى تسكتى و تحكى لمين و مين لا و كل واحد غير التانى
اسيل / انا كلمتها عن الكورسات و ما حسيتش انها اتحمست خالص و انا لو روحت لوحدى هزهق
احمد / ما احنا برده ما ينفعش نربط حياتنا بمزاج الناس انتى اتحمستى لما شوفتى الموقع ايه اللى هبطك
اسيل تبص لأحمد و تعوج بقها
احمد / انا كنت فاكر ان عندك حماس و طاقه تشحن الكوكب مش ميرا اللى تهبطك بالسرعه دى ... دا واضح ان بنتى هى اللى فيها المشكله بقي مش ميرا ... ايه الحجاره خلصت و محتاجه تتعضعض و لا ايه
اسيل/ اوعدني انك عمرك ما هتالش و لا تقول النكته دى تانى لحد ... دا لمصلحتك صدقنى
احمد يضحك
اسيل / يعني اكلمها تانى ؟
احمد / لا ... هى لما هتبقي جاهزه تتكلم هتيجي من نفسها ما تضغطيش عليها ... بس خليكي جنبها و اكدى عليها انها لو احتاجتك فى اى وقت هتلاقيكي دا دورك مش اكتر من كدا
اسيل تتنهد و تهز راسها
احمد / طمنيني انتى بقي عليكي ايه الدنيا
اسيل/ انا تمام الحمد لله
احمد / جاهزه يعني للامتحانات
اسيل / كلو تمام بإذن الله
احمد يبتسم و يهز راسه اسيل تقوم تبوس راسه يطبطب على كتفها و تطلع بره
.....................
فى عياده احمد
الباب يتفتح و ميرا تدخل
احمد / مش انا قولت ما تقطعيش كشف تانى ... و لما تحتاجي تكلميني كلميني
ميرا تروح تقعد فى صمت
ميرا / خفت نتقابل بره حد يشوفنا يفهمنا غلط
احمد / و مين قالك اننا كنا هنتقابل بره
ميرا / امال كنا هنقعد نتكلم فين
احمد / ما علينا ... خلينا فى موضوعنا ... جاهزه النهرده نتكلم عن اهلك شويه
ميرا / هو حضرتك ما عندكش اى فضول تعرف مين الشخص ده
احمد / الحقيقه لا و ما كنتش متخيل انك هتيجي تتكلمى فى نفس الموضوع تانى
ميرا / الموضوع مش سهل زى ما حضرتك فاكر
احمد / عارف بس فكره انى اهرب من مشكلتى الحقيقيه بانى ارمى نفسى فى مشكله تانيه اكبر منها دا فى مش حل دا انتحار
ميرا تفتح الشنطه و تطلع ورق كتير و تحطه قدام احمد على المكتب احمد يقلب فيه
ميرا / حاولت كتير جدا حاولت اكتب عن احلامى و مستقبلى كل حاجه بتلف تلف و ترجع ليه هو تانى ... عاوزه اكبر ابقي زيه و معاه و احلامى كلها انه يبقي جنبى و ازاى هطور من نفسي بأنه يكون معايا و حوليا هو هيحل كل مشاكلى و يعوضنى عن كل الناس و كل حاجه ... كان الدنيا وقفت عنده
احمد / و دا صح ؟
ميرا / اكيد لا ... و عشان كدا جيت ... الموضوع بدا يخرج من ايدى .. نفسي اواجهه و اعترف له بكل حاجه ... نفسي اقوله بحبك ... بس خايفه
احمد / لو راجل محترم زى ما بتقولى اكيد هيصدك و يختار بيته و أولاده و يجرحك
ميرا / طب لو حضرتك مكانه هترفضنى برده
احمد / ميرا انتى بنت جميله جدا و كلك مميزات بس حقيقي مش عارفه قيمه نفسك
ميرا/ ليه حضرتك بتقول كدا
احمد/ لان ان واحده زيك تقرر تربط حياتها بنص راجل و عجوز كمان دا فى حد ذاته انها
ميرا / بتحبه
احمد/ انتى تستاهلى اللى يجرى وراكى و يحبك و يتمنى ودك مش واحد متجوز و له حياته و انتى هتكونى بالنسباله مجرد نزوه بيجدد بيها شبابه يومين ... صدقيني نفس اللى عنده و اكتر هتلاقيه فى حد من سنك او اكبر حاجه بسيطه و من غير ما تضطرى تقدمى اى تنازلات
ميرا / بس اللى عندى مش هيلاقيه في غيرى و لا حتى مراته انا عرفاه اكتر من نفسه بيحب ايه ما بيحبش ايه ايه اللى بيليق عليه و ايه لا انا حافظه تفاصيله
احمد / و انتى متخيله انك عرفاه اكتر من واحده عايشه معاه على الاقل عشرين سنه و يمكن اكتر
ميرا/ البيت و الولاد لاخمينها عنه مش مدياله حقه
احمد / اه ... فانتى بقي هتعوضي النقص ده
ميرا / انا هسعده
احمد/ بس عمرك ما هتكونى ام
ميرا/ ليه !!!
احمد/ لانه مش عاوز واحده تتلخم فى العيال و البيت هو عاوز واحده تعوض بس الجزء اللى سقط من مراته يشبع النقص اللى عنده و يرجع لها و يركنك انتى و بمجرد ما يجوع تانى هيجيلك يشبع و يطير و لو حصل و ما شبعش انتى اللى هتطيرى
ميرا/ مش هيعمل كدا
احمد / دا لو اصلا عاش انه يكمل معاكى انتى بتتكلمى عن واحد بيلعب فى الوقت الضايع يا ميرا
ميرا / طب ما عندكش فضول برده تعرف هو مين
احمد/ لما جيتي المره اللى فاتت احترمت فيكي انك مش عاوزه تبوظى حياته و احترمت فيكي برده انك عارفه حدودك و انك معترفه ان اللى بتعمليه غلط ارجوكى ما تخليش شيطانك يسحبك فى سكه كل احتمالات نتائجها بالنسبالك كارثيه
ميرا تتنهد و تبص فى الارض
احمد/ الفتره الجايه امتحانات اليوم اللى بيروح مش هيرجع تانى ... ما تضيعيش مستقبلك و تعبك الفتره اللى فاتت كله ... حرام عليكي نفسك
ميرا / تفتكر لو كنت اكبر شويه فرصتى كانت هتبقي احسن
احمد / اكيد كانت هتبقي احسن جدا ... بس مش مع الراجل العجوز ده ... مع حد تانى احسن و انسب
ميرا / بس انا مش عاوزه التانى
احمد / لما النصيب يجمعكوا هتغيرى رايك
ميرا تتنهد
ميرا / بس انا عاوزه حضرتك تعرف هو مين صدقني هيفرق معايا اوى
احمد / بلاش يا ميرا ... الكلمه لما بتطلع ما بترجعش ما تقوليش كلام ممكن تندمى عليه
ميرا تبص لأحمد و تبص فى الارض و تتنهد و تمشي
احمد / المرادى مش هخليها ترجع لك الفلوس عشان واضح انها لو رجعت هتيجي تدفعيهم تانى كمان يومين ... زى ما قولت دى فتره امتحانات و لازم تركزى فى اللى جاى
ميرا تبص لأحمد و تفتح الباب و تمشي تقابل نور
نور / ميرا !!!
ميرا ترتبك
نور / بتعملى ايه هنا ؟!
ميرا / مفيش عن اذن حضرتك
ميرا تسيب نور و تجرى نور تستغرب و تبص للممرضه
الممرضه / اهلا و سهلا يا مدام نور نورتى العياده ... دكتور احمد ما عندوش حد تحبى أبلغه ان حضرتك جيتي ؟؟
نور / هى الانسه اللى مشيت .. ميرا... كانت بتعمل ايه عند الدكتور جوه
الممرضه / بتكشف
نور / ميرا !!! من امتى ؟
الممرضه / دى تانى جلسه ليها مع الدكتور
نور / اه .. تمام ... عن اذنك
نور تروح تفتح الباب و تدخل على احمد
نور / انت ازاى تخبى عنى حاجه زى دى
احمد / نور اهدى احنا مش فى البيت فى ايه
نور تقفل الباب و تروح تقعد قدام احمد
نور / انا كنت حاسه انها مش طبيعيه بس ما كنتش فاهمه انت ازاى تسكت و تخبى
احمد / بتتكلمى عن مين؟!
نور / عن ميرا طبعا أمال مين
احمد / ايه اللى حصل يعني ... اوعى تكونى وجهتي ليها اى كلمه تجرحها
نور / انت هتجننى يا احمد انت خايف على مشاعرها و مش خايف على بنتك اللى لزقالها طول الوقت
احمد / و هى أثرت على بنتى فى ايه بس ... واحده و عندها مشكله و انا بساعدها فى حلها حصل ايه بقي
نور / مشكله ايه دى بقي ان شاء الله
...................
YOU ARE READING
ميرا بقلم /لولو_محمد ( كامله )
Short Storyقد يدفعنا الحرمان للسعى وراء الحصول على ما هو ليس لنا فهل ستنساق ميرا وراء العاطفه و تدمر كل شئ ام ستستطيع ان تقاوم و تنقذ ما تبقي لها
