((((((( ميرا ))))))
#لولو_محمد
الحلقه الاخيره
نور / هى الانسه اللى مشيت .. ميرا... كانت بتعمل ايه عند الدكتور جوه
الممرضه / بتكشف
نور / ميرا !!! من امتى ؟
الممرضه / دى تانى جلسه ليها مع الدكتور
نور / اه .. تمام ... عن اذنك
نور تروح تفتح الباب و تدخل على احمد
نور / انت ازاى تخبى عنى حاجه زى دى
احمد / نور اهدى احنا مش فى البيت فى ايه
نور تقفل الباب و تروح تقعد قدام احمد
نور / انا كنت حاسه انها مش طبيعيه بس ما كنتش فاهمه انت ازاى تسكت و تخبى
احمد / بتتكلمى عن مين؟!
نور / عن ميرا طبعا أمال مين
احمد / ايه اللى حصل يعني ... اوعى تكونى وجهتي ليها اى كلمه تجرحها
نور / انت هتجننى يا احمد انت خايف على مشاعرها و مش خايف على بنتك اللى لزقالها طول الوقت
احمد / و هى أثرت على بنتى فى ايه بس ... واحده و عندها مشكله و انا بساعدها فى حلها حصل ايه بقي
نور / مشكله ايه دى بقي ان شاء الله
احمد / ايه عوزانى افشي أسرار العملا بتوعى يعنى و لا ايه
نور / لا انا ما قولتش كدا
احمد / اى كان السبب اللى خلى ميرا تيجي هنا لازم تفهمى انه ما لوش اى علاقه بعلاقتها باسيل و لو كانت بتشكل خطر و لو واحد فى الميه على بنتى انا اول واحد كنت هبعدهم عن بعض فاهدى و ثقى فيا و اتمنى انك ما تقوليش لاسيل اى حاجه ان ميرا بتيجي هنا أو تجرحى البنت بالكلام هى ما جاتش هنا تتفسح جت عشان محتاجه مساعده و دا كان اكتر تصرف صح هى عملته و ما تقلقيش ما اعتقدش انها هتيجي تانى قريب فاهدى
نور / انا مش مشكلتى انها تيجي هنا أو لا انا مشكلتى انها بتيجي بيتي و بتقضي وقت طويل على بنتى
احمد / هى مش مريضه يا نور و مفيش اى خوف منها
نور تبص الناحيه التانيه
احمد / خير يا نور ...يا ترى ايه سبب الزياره السعيده دى
نور / قولتلك انى محتاجه فلوس عشان اشترى شويه طلبات للبيت
احمد / ما الفلوس معاكى فى البيت
نور / خلصت يا احمد ما انت عارف ان العيد ميلاد اتكلف
احمد / تمام ... مفيش مشكله اهدى ... ثوانى اجيب الفلوس اللى بره و خديها كلها بس ارجوكى المرادى امسكى ايدك شويه اديكي شايفه كل حاجه بقت غاليه ازاى
نور / الحمد لله انك عارف ... انجزنى بقي خليني امشي
احمد / تمام ... ثوانى
احمد يطلع بره و نور قاعده واضح انها مضايقه
..................
فى اوضه اسيل
اسيل قاعده بتذاكر نور تدخل
نور/ عامله ايه يا قلبي
اسيل / انا تمام الحمد لله و اهو دخلتى فجاه لقيتيني بذاكر اهو
نور / تمام يا قلبي ... مش ناقصك اى حاجه ؟
اسيل / عارفه لو مج نسكافيه من ايديكي الحلوه دى اكون ممنونه جدا
نور تضحك و تهز راسها
نور/ اخبار ميرا ايه صحيح
اسيل / تمام ... خير بتسالي ايه
نور / مفيش بطمن عليها بقالها فتره ما جاتش
اسيل / المذاكره و كدا حضرتك عارفه عنق الزجاجه و كدا ... بس ما يكونش عندك فكر ناخد الاجازه و هبيتها فى حضنى هناهوه كدا
نور / للدرجادى ؟!
اسيل / دى اعز واحده فى صحباتى و أقرب واحده ليا
نور/ طب هى بتحبك زى ما بتحبيها كدا
اسيل / جدا دا احنا فى كل حته بيقولوا عننا التوأم الملتصق و مش هتصدقي ان فى اكتر من حد افتكرنا اخوات و قالوا اننا فينا شبه من بعض ... تخيلى
نور / تمام
اسيل / ماما هو فى حاجه ؟
نور / ابدا بطمن عليكي بس
اسيل / ما تقلقيش انا زى الفل و ميرا مش بتعطلنى و لا اى حاجه بالعكس بتشجعنى على طول و عوزانى احسن حاجه فى الدنيا
نور / ربنا يهديها و يصلح ليها الحال
اسيل / امين ادعي لها اوى يا ماما ادعي لها و ادعيلي
نور / ليه خير ادعي لها اوى !! فى حاجه و لا ايه
اسيل / يعني حضرتك عارفه ظروفها و باباها و مامتها و هى ما لهاش غير جدتها تروح تزور امها تفضل تشتم فى ابوها تروح تزور ابوها يشتم فى امها لما قفلت منهم هم الاتنين و ما بقالهاش حد و جدتها ست كبيره و صحتها على قدها يعني
نور / ربنا يصلح ليها الحال و يهديها ... تمام ركزى فى مذاكرتك و انا ثوانى و هجيب لك النسكافيه
اسيل / ما اتحرمش منك يا جميل
نور تبتسم و تطلع بره و اسيل بتكمل مذاكره
....................
فى الشارع قدام سنتر
اسيل / بعد الشر انتى ازاى تدعى بحاجه زى دى
ميرا / هو انا دعيت اموت انا بس دعيت ان تنسيقي يجيبني فى اى حته بعيد عن هنا
اسيل / عن هنا فين ؟! عنى !!!
ميرا / صدقيني يا اسيل انا مش مرتاحه خالص هنا و كل مكان بروحه و كل الناس اللى بتكلم معاها عاوزه ابعد و اهرب
اسيل / هو بابا ما جابش نتيجه و لا ايه؟!
ميرا تبص لاسيل
ميرا / على فكره انا ما روحتش تانى ... مامتك شافتنى و اتحرجت جدا ... يا عالم بتقول عنى ايه دلوقت
اسيل / ما قالت ليش يعني ... آآآآآآه عشان كدا بتسأل عنك كل شويه
ميرا / شوفتى الحمد لله ان ما حدش تانى شافني
اسيل / طب يا بنتى ما قولتلك اقعدى عندنا فى البيت و بدل العياده اوضه مكتبه موجوده
ميرا تهز راسها لا
اسيل / ميرا الهروب مش هو الحل
ميرا / و المواجهه كمان مش صح يا اسيل صدقيني حاولت بس ... انا مش عاوزه اخسرك انا بحبك و بحب اهلك اوى
اسيل / و هم كمان بيحبوكى على فكره انتى بس اللى
ميرا / انا لازم ابعد عن هنا لازم ابعد عشان اقدر اعيش و انسي و ابدء حياه جديده انا تعبانه
اسيل / يعني انتى هترتاحى بأنك تبعدى عنى
ميرا / ما احنا اكيد هيجي يوم و كل واحده تبعد عن التانيه
اسيل / اخص عليكي
ميرا / سنه الحياه يا بنتى انتى هتتجوزى و تتلخمى و انا اكيد يعني هيجي يوم و اتجوز و اتلخم برده و هنتقابل بقي كل فين و فين زى كل الناس
اسيل / لا احنا مش زيهم احنا حاجه تانيه ... بصي ايه رايك اللى تتخطب الاول تظبط التانيه مع اخو خطيبها او صاحبه الانتيم و بكدا نضمن اننا مهما حصل عمرنا ما هنفترق ايه رايك فى عبقريتى الفذه
ميرا / طب ما هو ممكن ما يكونلوش اخوات او ممكن يتخانق مع صاحبه او ممكن صحابه او اخواته يكونوا مرتبطين او متجوزين او ما يحصلش قبول هنعمل ايه يا جهبز
اسيل / و يمكن كل ده ما يحصلش و تظبط انتى هتقدرى البلا قبل وقوعه ليه بس
ميرا / طب ايه رايك فى حل مجنون يضمن اننا نبقي مع بعض على طول
اسيل / لا اى حاجه مجنونه انا دايسه قولى
ميرا / تجوزيني ابوكى
اسيل تضحك بشكل هستيري و ميرا متابعاها باهتمام
اسيل / دى حاجه ما اتمناهاش لالد اعدائى
ميرا / اخص عليكي هو باباكى وحش اوى كدا
اسيل / بابا مفيش منه يا بنتى بس ان درتك تبقي ماما نور دا تحدى كبير اوى ما حدش يقدر عليه ابداااا و بعدين انتى متخيله انك تبقي مرات ابونا دا امنا اللى ولدتنا مستحملانا بالعافيه هتستحملى انتى
ميرا / هستحمل ما لكيش دعوه كفايا نبقي سوا
اسيل / دا على اساس انك لما تبقي مرات ابويا هنفضل صحاب دا انتى طيبه اوى
ميرا / انتى مش المفروض تتعصبى من الكلام ده
اسيل / اتعصب ليه دا هزار هو جد ... انتى بجد بقيتي حاله مستعصيه ... عوزانى اتعصب على حاجه عمرها ما هتحصل ... شكرا انا مش نكديه للدرجادى
ميرا / طب لو حصلت ليه مش هنبقي صحاب وقتها
اسيل/ انتى بجد بتسالي... دا انتى غريبه جدا
ميرا / عاوزه اعرف لو باباكى سعيد و مش مقصر معاكوا فى حاجه فين المشكله
اسيل / المشكله انها فضيحه لينا كلنا ابونا راح اتجوز واحده قد عياله ... بلاش الناس طظ فيهم مامتى انا موقفها ايه انه بعد العمر دا كله و التضحيات دى كلها راح جاب لها عيله دره ... بلاش امى انتى نفسك تفتكرى انا ممكن اسامح ابويا انه ظلم صاحبه عمرى و دمر ليها حياتها
ميرا / هو الجواز ظلم
اسيل / لما ما يبقاش فى توافق بينكوا يبقي اكيد ظلم لما تتجوزى واحد ما يقدرش يشبع احتياجاتك و مع الوقت تتحولى من زوجه لممرضه و بعد الشر بعد الشر تترملى بدرى اكيد شر ... قال و على راى المثل ابن الشيبه يتيم
ميرا / ما انتى ممكن تتجوزى شاب صغير و يموت الأعمار بيد الله
اسيل / ملخص الموضوع ده البنت ما بتبصش لراجل قد ابوها الا عشان فلوسه سواء بقي هى طماعه او اهلها اجبروها غير كدا مستحيل تحصل
ميرا / و الحب
اسيل / حب ايه يا هبله اللى ممكن تحبيه لواحد قد ابوكى اصلا دى علاقه مش سويه من الناحيتين
ميرا / يمكن عشان ما حبتيش قبل كدا مش فاهمه
اسيل / و انتى اللى خبيره علاقات اوى
ميرا / لا بس فى حالات كتير جدا بتنجح
اسيل / البيوت ياما بيحصل فيها هو حد عارف ايه اللى جوا النفوس
ميرا / يعني نحكم على حاجه بالفشل لمجرد
اسيل / يخرب بيت زنك انتى المواضيع كلها خلصت ما فيش غير الهبل ده اللى نرغى فيه بقولك ايه شوفى موضوع تانى انا زهقت و خلقي ضاق و انتى معلقه مش عاوزه تفهمى او تفصلى انا ما ليش خلق اجادل و انتى عارفه لا بحب الجدال و لا اللى بيجادلوا خصوصا لى حاجه غلط... عاجبك كدا كنتى مستغربه انى ما اتعصبتش اديني اتعصبت مبسوطه دلوقت
ميرا تهز راسها لا
اسيل/ تمام غيرى السيره دى و تعالى اما نجيب حاجه ساقعه تبل ريقنا بعد الرغى دا كله
ميرا تهز راسها و تمشي مع اسيل و هى مضايقه
.................
فى شقه ميرا
ميرا تدخل تلاقي جدتها ( ليلى ) قاعده بتتفرج على التليفزيون
ليلى / أيه ده جايه بدرى ليه خير حصل حاجه و لا ايه
ميرا تروح تقعد جنب ليلى
ميرا / مفيش تعبت شويه فكنسلت درس الكيميا و اتصلت بالاسيستانت و هحضر مجموعه بكره
ليلى / اجيب لك تاكلى
ميرا / هو انا ينفع اتكلم مع حضرتك
ليلى / اكيد يا قلبى اتكلمى
ميرا / هو احنا ينقع نبعد عن هنا نسافر اى بلد تانيه بعيد و ما نجيش هنا تانى
ليلى / ايه الكلام ده !! ليه ايه اللى جرا
ميرا / انا مش مبسوطه هنا و مش قادره اتعامل مع الناس ... تيته ازا روحت لدكتور نفساني
ليلى / دكتور نفساني!!! امتى و ليه و ازاى ما اعرفش حاجه عن الموضوع ده
ميرا / انا عاوزه اسافر
ليلى / يا قلبي و ماله نخلص امتحانات و نطلع اسكندريه اسبوع و لا اتنين
ميرا / على طول انا مش عاوزه اعيش هنا
ليلى/ هنسيب بيتنا و حياتنا و نروح فين بس يا قلبي
ميرا / اى حته بعيد انا مش عاوزه اعيش هنا
ليلى / هو فى حاجه حصلت حد ضايقك حد كلمك
ميرا/ انا مش عاوزه اعيش هنا
ليلى / ليه
ميرا / كدا من غير ليه
ليلى/ يعني نسيب بيتنا و أهلنا
ميرا / احنا كدا كدا ما لناش اهل انا ما ليش اهل ما ليش حد غيرك بنتك اللى بتيجي مره فى الاسبوع دا لو جت من كتر مشاغلها ما تستاهلش نربط حياتنا بيها
ليلى / انتى شوفتى ابوكى
ميرا / ابويا !! انهى اب ده انهى اب ... هو فين بيتصل بيسأل بيعبر يعرف عنى حاجه انهى اب ده
ليلى / طب بس اهدى و فهميني ايه اللى مضايقك اوى كدا
ميرا / كل حاجه مضيقانى كل حاجه كل حاجه انا مش عاوزه اعيش فى البلد دى عاوزه ابعد عن كل اللى هنا عاوزه ابدء بدايه جديده عاوزه انسي كل حاجه و كل الناس عاوزه ابدء من الصفر
ليلى/ طب ايه اللى حصل لكل ده طيب طمنيني عليكي
ميرا / انا كويسه ما تقلقيش بس تعبانه ... عاوزه امشي عاوزه ابعد مش هقدر استنى لما اخلص ثانوى مش هقدر استحمل يوم واحد هنا بعد كدا
ليلى / انا هتصل بامك تيجي تشوف لها حل معاكى
ميرا تبص لليلى و تدخل اوضتها و ترزع الباب ليلى تمسك التليفون و تتصل
..................
فى اوضه ميرا
ميرا قاعده و جنبها مامتها ( اميره )
اميره / طب ما لو مش ناويه تتكلمى جبتيني ليه
ميرا / انا لا جبتك و لا كلمتك حتى لو عاوزه تمشي اتفضلى انا متاكده ان وراكى مليون حاجه اهم منى
اميره / ما ورايش اهم منك ... بس انتى مش عاوزه تتكلمى و تقولى مالك هعرف منين انا هشم على ضهر ايدي
ميرا / ما فيش
اميره / ما هو انا مش هقدر اساعدك و انا مش عارفه انتى فيكي ايه
ميرا / انا ما فييش حاجه كل اللى طلبته انى ابعد عن هنا
اميره / ليه
ميرا / كدا زهقانه عاوزه اطفش اخلص امتحانات و اهج من البلد باللى فيها
اميره / انتى اتخانقتى مع صاحبتك ... اسيل باين
ميرا / لا
اميره/ امال عاوزه تبعدى عنها ليه
ميرا/ مش عاوزه
اميره/ امال ... فهميني عشان اقدر اخد قرار
ميرا / انا مش عاوزه حاجه خلاص شكرا
اميره / هو ايه اللى خلاص شكرا ما انا لازم افهم
ميرا / ليه ... ايه اللى لزمه مهتمه اوى يعني تعرفى ... اشمعن دى اللى مهتمه تعرفيها تعرفى عنى ايه اصلا عشان تعرفى دى
اميره / اتكلمى مع مامتك عدل
ميرا / مامتى ايوه صح
اميره / انتى قابلتى ابوكى
ميرا / ابويا مين انا ما ليش اب... انتى بتسمى الراجل اللى بروح اقابله ساعه بيقضيها كلها شتيمه فيكي اب
اميره / ميرا انتى ايه اللى جرالك
ميرا / ما ليش زى ما انا ما فيش حاجه اتغيرت انتوا اللى علاطول مش موجودين عشان تعرفوا او تشوفوا او حتى تحسوا انتوا اللى كل واحد فيكوا عايش حياته و كانى مش موجوده
اميره / انا عمرى ما اتاخرت عنك
ميرا / انتى عمرك ما كنتى موجوده انتى اخترتى تتجوزى ودا حقك و هو رفض يصرف عليا
اميره / ابوكى اللى رفض تعيشي معاه
ميرا / انا مش صغيره انا عارفه كل حاجه و فاهمه كل حاجه انتوا ما حدش فيكوا عاوزنى
اميره / انتى ايه اللى جرالك
ميرا / انا من حقى حد يطبطب عليا من حقى حد يسألني مالك و يهتم يسمع حد يبقي عارف انا ايه اللى بحبه و لونى المفضل تعرفى يا ماما لونى المفضل او اكتر اكله بحبها
اميره / ايه التفاهه دى هى دى الامومه بالنسبالك يعنى
ميرا / طب ايه هى الامومه بالنسبالك طيب
اميره / قوليلى دى هرمونات يمكن اقدر افهم جنانك ده
ميرا / انا اسفه ... انا بجد اسفه انا ... انا ... انا اسفه
ميرا تقعد فى جنب و تعيط اميره تستغرب و تروح تاخدها فى حضنها
ميرا / عاوزه ابعد عن هنا عاوزه اسافر بعيد عاوزه ابدء حياه جديده عاوزه انسي كل حاجه و كل الناس عاوزه افوق لنفسي عاوزه اركز و اعيش انا مش هقدر اعيش هنا انا بموت هنا
اميره / ليه بتموتى هنا ليه فى ايه هنا تاعبك
ميرا / انتوا
اميره / احنا !!
ميرا تعيط
اميره / ماما بتقول انك روحتى لدكتور نفسي
ميرا تبص الناحيه التانيه
اميره / صدقيني انا عاوزه اساعدك
ميرا / لو عاوزه تساعديني ابعديني عن هنا
اميره / ميرا انتى فى حد فى حياتك
ميرا تبص لمامتها
اميره / زميل مثلا او
ميرا / انا عمرى ما هعمل حاجه غلط او حرام تمام ما تقلقيش من النحيادى
اميره / انا واثقه فيكي و فى أخلاقك و ربايتك ... بس
ميرا/ انا مفيش اى حد فى حياتى
اميره / امال عاوزه تبعدى عن هنا ليه و ما تقوليش احنا احنا كدا كدا بعيد اهو و ما نعرفش عنك حاجه و دا كلامك انتى اللى لسه قيلاه دلوقت عاوزه تبعدى عن مين بقي
ميرا تسكت
اميره/ معادك امتى تانى مع الدكتور عاوزه اجى معاكى اتكلم معاه
ميرا / مش هروح تانى
أميره/ ليه بقي
ميرا/ كدا
اميره / انتى بتعاندى مين انا بحاول اساعدك
ميرا/ الحاجه الوحيده اللى تقدرى تساعديني بيها هى انك تبعديني عن هنا
اميره / مش هيحصل و طول ما انا مش فاهمه المشكله مش هسمحلك تهربى منها صارحيني انا امك
ميرا تبص الناحيه التانيه
اميره / انا ماشيه لما تبقي تحبى تتكلمى فى اى وقت انتى عارفه رقمى ... سلام
اميره تمشي و اميره متبعاها بغضب
...................
فى عياده احمد
اميره قاعده مع احمد
اميره / انا حاولت اتكلم معاها كتير و ما رضيتش تقولى اى حاجه و بالعافيه ماما قدرت تعرف منها ان حضرتك الدكتور اللى هى بتجيله انا بجد قلقانه عليها اوى و مش عارفه اتعامل معاها
احمد / طب هى لسه مصره على موضوع السفر ده
اميره / جدا و عرضت عليها تيجي تقعد معايا رفضت
احمد / طب حضرتك حاولتى تتواصلي مع باباها
اميره / لا طبعا و مش هقدر اعمل كدا دا هيسيب كل حاجه و يمسك فيا انا و انى متجوزه و هملاها زى كل الحوارات اللى فاتت هى مش هتفرق معاه هو كل اللى هيفرق معاه انه يطلعني وحشه و مقصره و خلاص لكن لا هى فارقه معاه و لا عمره عبرها اساسا
احمد / طب ممكن تديني انا رقمه احاول انا اتواصل معاه
اميره / يعنى اللى هو هيعمله مش هقدر انا اعمله يعني
احمد/ لا تقدرى بس مش هتعملى و اعتقد ان هو كمان هيرفض يحاول برده بس هعمل اللى عليا و أحاول
اميره / حضرتك تقصد ايه
احمد / ميرا محتاجه عيله محتاجه اب و ام و اهل حواليها محتاجه حد يحتويها و يحسسها بالأمان
اميره / طب هو مفيش اى علاج يخلينا نعدى المرحله دى لحد الاجازه حتى و بعدين انا هسفرها تغير جو و كدا بعيدا عن والدها
احمد / فكره انى اكتب ليها علاج مش حاجه سهله و له مضاعفات قويه و هى اصلا صغيره جدا على حاجه زى دى هى محتاجه بس شويه اهتمام و معامله خاصه انما علاج و دوا صدقيني الموضوع مش محتاج نهائى دلوقت
اميره / تمام اللى حضرتك تشوفه و انا هدى لحضرتك رقم باباها بس صدقنى حضرتك بتضيع وقتك معاه لو كان فيه الخير ما كانش دا بقى حالنا كلنا
احمد يبتسم و اميره بتدور فى النمر
................
فى شقه أسيل
اسيل تخبط على باب مكتب احمد
احمد / ادخل
اسيل تدخل
احمد / تعالى يا ياسو خير فى حاجه و لا ايه
اسيل / هو حضرتك ما تعرفش حاجه عن ميرا
احمد / هى ما بتجيش الدروس و لا ايه
اسيل / و لا بترد على الموبايل و كلمتها على الأرضي جدتها ردت و قالت نايمه و لما تصحى هتكلمنى و ما كلمتنيش و اتصلت تانى و بفكر اروح لها بس ماما مش راضيه
احمد / اعتقد انك اتصلتى اكتر من مره و لو كانت عاوزه تكلمك دلوقت كانت كلمتك اديها مساحتها
اسيل / بس هى ما لهاش غيرى يا بابا يعني فى حالتها دى ابعد ازاى بس
احمد / دى رغبتها يا اسيل
اسيل / طب هى حكتلك اللى مضايقها صح
احمد / و انا المفروض اقولك ؟!
اسيل / طب انا ما فيش حاجه اقدر اعملها عشانها خالص
احمد / ممكن تبعتى لها رساله تقوليلها انك بتحاولى تكلميها و مش عاوزه تطفلى بس وقت ما هتكون جاهزه تتكلم هتكونى موجوده
اسيل / بمزاجها يعني ؟!
احمد / لا مش بمزاجها ... بقدرتها
اسيل / هو الموضوع كبير و لا ايه
احمد / كان ممكن يكون اسوء بس ميرا بنت كويسه و فطرتها سليمه و انا واثق انها هتعدى من المرحله دى
اسيل/ تمام
اسيل تطلع بره
احمد / اخبار المذاكره ايه يا اسيل
اسيل تبص لأحمد بحزن
اسيل / مش قادره اركز فى اى حاجه
احمد / و دا صح ؟!
اسيل / بحاول و الله
احمد / تمام
اسيل تمشي و احمد يكمل قراءه
................
اول يوم امتحانات
ميرا رايحه المدرسه تقابل اسيل واقفه على الباب الاتنين يقفوا يبصوا لبعض اسيل تروح تحضن ميرا
اسيل / زعلانه منك اوى بس بحبك وحشتيني
ميرا / انا كمان بحبك سامحيني
اسيل/ عامله ايه جاهزه ؟ انتى ما حضرتيش ولا حصه من المراجعه
ميرا / كنت بذاكر من الورق اللى بتبعتيه
اسيل / تمام اعملى اللى ربنا يقدرك عليه و خلينا نروح سوا بعد الامتحان فى كلام كتير اوى عاوزه اتكلم معاكى فيه
ميرا / اسيل انا
اسيل / عشان خاطرى يا ميرا انا عمرى ما عملت لك اى حاجه وحشه لو سمحتى
ميرا / حاضر
ميرا و اسيل يدخلوا الامتحان
.....................
فى شقه ليلى
اميره / و انا هتحايل عليه انا جبت لك مفتاح شقه محمود ابن عم اسماعيل جوزى فى اسكندريه و اتفقت معاه هاجرها اول شهر فى الاجازه روحوا غيروا جو و اتفسحوا و انبسطوا و لما الدروس تبدا ابقوا ارجعوا
ليلى / و ايه اللى ممكن يتغير فى الشهر ده
اميره / و ايه فى ايدي اكتر من كدا اعمله يا ماما حضرتك اكتر واحده عارفه انا وفرت ازاى فلوس الشهر ده انا ما فيش حد بيساعدنى و البيت عندى والع و اخواتها لما عرفوا ماسكين اشمعن و مش اشمعن و اسماعيل مش بيساعدنى خالص
ليلى / طب ما تيجي انتى و باقي العيال بالمره
اميره / و شغلى هعمل فيه ايه و حضرتك مش هتقدرى عليهم لوحدك و مش هقدر اروح و اجى عليكوا خميس و جمعه و لا حتى اسماعيل هيوافق اصلا اعمل ايه بس
ليلى / و لا حاجه يا بنتى ربنا يعينك
اميره / حاولتى تتكلمى معاها طيب
ليلى / فى ايه ... دا حتى اسيل صاحبتها ما بتكلمهاش و البت يا كبدى هتتجنن عليها
اميره / و الدكتور الزفت ده برده مش راضي يحكي لى في ايه و لا البنت قالت له ايه كل اللى بيقوله قربوا منها اهتموا بيها هى محتاجاكوا و الله البت دى كانت زى الفل لحد ما العبط ده دخل دماغها
ليلى / و اخرتها
اميره / ما انا على يدك اهو قصرت يعني
ليلى تتنهد و تهز راسها
.......................
فى الطريق قدام المدرسه
اسيل / انتى شايفه ان ده الحل يعني
ميرا / لو عليا ما رجعش تانى ابدا بس ما حدش مساعدنى
اسيل / ليه كل ده
ميرا تبص لاسيل و تسكت
اسيل/ طب ما فكرتيش فى الكورسات اللى بعتها لك
ميرا تهز راسها لا
اسيل / تمام ... اهم حاجه انك تكونى مبسوطه ... ياريت لما ترجعى تكلميني دا لو لسه عاوزه نفضل صحاب
ميرا / عاوزه
اسيل / مش حاسه بس تمام اهم حاجه راحتك
ميرا / صدقيني انا ما عنديش اغلى منك
اسيل / و انا كمان ... هسيبك بقي عشان .. اروح
ميرا تهز راسها و كل واحده تمشي فى اتجاه
.......................
فى اوضه احمد
نور تفتح الباب و ندخل
نور / هو حضرتك هتفضل قافل على نفسك و تتجاهل ان فى اى حاجه بتحصل فى البيت خصوصا ان دى فتره امتحانات و مش وقته خالص الهبل دا كله
احمد / فى ايه يا نور بس
نور / ما دى المشكله افتح باب الاوضه دى و اطلع اقعد معانا ما هياش اوضه كشف اللى عاوزك يدخل بالدور عشر دقايق و يطلع
احمد / دا انا !!!
نور / لو سمحت يا احمد روح اتكلم مع اسيل شويه
احمد / سبيها يا نور لو سمحتى
نور / اسيبها ايه هو احنا على مزاج نفسيه ست ميرا ... حبيبي احنا فى اسبوع امتحانات و مفيش وقت
احمد / ايوه بس برده اسيل مش صغيره و بتعرف توفق أمورها كويس ما تقلقيش عليها و كمان لازم تتعلم ان السعاده و الدنيا كلها ما بتقفش على حد اديها مساحتها تكتشف العالم
نور / العالم !!
احمد / هى فى سن بتكتسب فيه خبرات و مهارات من التجارب و الدروبس اللى بتقع فيها لو الدنيا ذبادى خلاط ما حدش هيتعلم حاجه يا قلبي
نور / مش وقته يا احمد تعدى الأسبوعين دول على خير و بعدين
احمد / اهدى انتى خالص و كل حاجه هتبقي زى الفل
نور / ربع برودك يا رب ربعه بس مش عوزاه كله
احمد يبتسم نور تقفل الباب وراها و تمشي احمد يتنهد و يكمل قراءه
..........................
فى اسكندريه
ميرا تفتح باب الشقه و تدخل
ليلى / كنتى فين؟
ميرا / بتمشي يا تيته فى حاجه و لا ايه
ليلى / طبعا فى .. يا حبيبتي دى مش بلدنا و لا نعرف شوارعها و لا حد يعرفنا فيها ممكن تتوهى و لا يجرالك حاجه
ميرا / معايا جى بى اس على الموبايل و حفظت اللوكيشن عليه و فى ابليكايشن كريم لو تهت اقدر اطلبه يروحنى ما تقلقيش
ليلى / و انا لو ما قلقتش عليكي هقلق على مين يعني ... يا بنتى انا مش باقيلى فى الدنيا غيرك كل واحد اتلخم فى حياته و بيته و بيجولى زيارات انتى الوحيده اللى جنبى و مهونه عليا الدنيا
ميرا / ربنا يبارك ليا فيكي و ما يورنيش فيكي حاجه وحشه
ليلى / طب طمنيني عليكي احسن دلوقت نفسيتك اتحسنت لما جينا هنا
ميرا / لا ... كان نفسي بس ... مفيش حاجه اتغيرت خالص يا تيته و بفكر نروح و خلاص
ليلى / لا حول و لا قوه الا بالله ... طب ما تحكيلي يا ضنايا قوليلى ايه اللى تعبك اوى كدا ... يعني هو الدكتور ابو صاحبتك ده احسن منى ... أقرب ليكي منى ... يعرفك قدى
ميرا تبص لجدتها بحزن
ليلى / طب انا زعلتك فى حاجه
ميرا / ابدا يا تيته حضرتك عملتى عشانى اللى امى نفسها ما عملتوش ... بس اوعد حضرتك انها مرحله و هتعدى استحمليني شويه بس
ليلى / طب على الاقل افهم
ميرا / مفيش حاجه يا تيته تلاقيها بس هبه هرمونات ما انتى عرفانى
ليلى / و عشان عرفاكى بقولك ان دى مش حاجه عاديه و لا بسيطه انتى متغيره و مش مظبوطه و انا كل يوم بقيت بقلق عليكي اكتر ... يا بنتى احكيلى و اى كان اللى هتحكيه انا هفهمه و مش هيطلع بره و هساعدك
ميرا / يا تيته ما فيش و الله حوار و خلص بس انا مضايقه شويه
ليلى / الحوار ده يخص ولد ؟!
ميرا / اكيد لا يعني يا تيته هو انا بتاعه الحاجات دى برده
ليلي / امال ايه ... يا بنتى ما تتعبيش قلبي اكتر ما هو تعبان احكى ... حوار ايه اللى يعمل فيكي كل ده
ميرا/ الكلمه لما بتطلع ما بترجعش
ليلى / احكى و اوعدك مش هتندمى انك حكيتي... اتكلمى و خرجى اللى جواكى و انا هنصحك و هساعدك ... فضفضى
ميرا تبص لجدتها و تعيط و تترمى فى حضنها و ليلى بتطبطب و ساكته و مخضوضه
ميرا / انا تعبانه اوى يا تيته تعبانه اوى
ليلى / حقك عليا يا بنتى حقك عليا اى كان اللى تاعبك اوى كدا حقك عليا انا
ميرا / انا وحشه اوى يا تيته وحشه اوى انا اللى وحشه انا عمرى ما كنت اتخيل انى اكون انسانه سوده و وحشه اوى كدا
ليلى / ليه بتقولى كدا يا قلبي بس دا انتى مفيش منك اتنين و الكل بيحبك ليه بتقولى على نفسك كدا
ميرا / عشان انا كدا يا تيته انتى ما تعرفيش انا عملت ايه و لا كنت عاوزه اعمل ايه انا انا كان ممكن ادمر كل اللى حوليا انا كنت هاذى اقرب الناس ليا يا تيته انا ... انا وحشه و انانيه و منافقه انا وحشه اوى
ليلى / طب بس اهدى و احكيلى عملتى ايه و ليه بتقولى الكلام ده
ميرا / انا حبيت حد وقبل ما الشيطان يلعب فى دماغك هو ما يعرفش و مفيش بينا اى حاجه
ليلى / مش قولتلك ولد
ميرا / لا مش ولد
ليلى / امال ايه بنت !!!
ميرا ما تقدرش و تضحك و تمسح دموعها
ليلى / الله طب ما تفهميني
ميرا / عمو احمد بابا اسيل صاحبتى
صمت و صدمه
ميرا/ شوفتى انا وحشه ازاى كنت عاوزه اخرب اكتر بيت اتفتح لى كنت بشوف نفسي مكان طنط نور و هى مش مهم كنت بتمنى تموت او تطلق مش مهم المهم اخد انا مكانها و لانى طيبه اوى ما كانش عندى مانع انها تفضل على زمته عادى بس تربى عيالها انما انا ... أنا اللى استاهله ... شوفتى وقاحه اكتر من كدا
ليلى/ و عملتى ايه؟!
ميرا تبص لليلى و تسكت و تتنهد
ليلى / احكيلى يا بنتى عملتى ايه
ميرا / ما عملتش ... لا عملت و دا اللى تاعبني عملت حاجات كتير بس ... الحمد لله فوقت قبل ما اكمل و اعمل حاجات اكتر ... ما عدتش عارفه اللى تاعبني هو حبى ليه و لا ندمى على اللى عملته ... الدنيا ملخبطه اوى جوايا
ليلى / تمام ... تمام نهدى كدا و نجيب الكلام من أوله و تحكيلى عملتى ايه بالتفصيل و الموضوع وصل لحد فين و اى كان اللى حصل هيتحل باذن الله ... و الحمد لله انها جت على قد كدا ... الحمد لله طبعا الف مليون حمد و شكر ليك يا رب ... نهدى خالص نهدى كدا و احكيلى يلا احكى انا سمعاكى احكى عملتى ايه تاعبك اوى كدا
ميرا / كنت بقوم اسيل على مامتها و بحاول أقرب من باباها كنت على طول فى بيتهم عشان اعرف أخبارهم كانوا بيعاملونى كويس و انا عايشه وسطهم عشان ادمرهم كانت بتضايفني فى بيتها و تهتم بيا و انا بحاول اخرب بيتها و اسرق جوزها انا ازاى وحشه اوى كدا انا
ليلى / عملتى ايه يا ميرا
ميرا/ ما عملتش ... ما لحقتش اعمل ... بعدت ... اول ما قالى انى زى بنته فهمت
ليلى/ انتى
ميرا/ لا انا ما قولتلوش انا فهمت من وسط الكلام لما اتحججت انى محتاجه دكتور نفسي و حكيت ليه مشاعرى على انها لراجل تانى نصحنى و قالى انتى بالنسبالى زى بنتى اسيل فهمت و روحت تانى عشان أكد الكلام و برده رده كان واحد و هو صح كنت ماشيه فى طريق ما لوش غير نهايه واحده من اتنين يا ابقي نزوه و اخرب بيته و بيت صاحبتى يا يجرحني و برده كنت هخسر صاحبتى
ليلى / عشان كدا قطعتى مع اسيل
ميرا تهز راسها
ميرا/ نطيت من المركب قبل ما تعرف حقيقتي و تفضحنى و تكرهني
ليلى / عملتى الصح
ميرا/ بس مش قادره انسي يا تيته مش قادره
ليلى / بصي يا ضنايا اولا كدا انتى مش وحشه ابدا بالعكس انتى انسانه طيبه و معدنك طيب
ميرا / بقولك كنت بوقعهم فى بعض و بفرح لما بشوفهم شادين سوا او احس ان فى حوار فى بيت صحبتى هى ما كانتش بتحكى بس كان بيبان عليها ... انا كنت بفرح لما بلاقي صاحبتى الانتيم مضايقه لانى بفهم ان فى مشاكل فى بيتها انا حقيره جدا ازاى بتقولى طيبه و معدنى حلو ازاى
ليلى / لأنك وقفتى اللى بتعمليه و بتلومى نفسك ... واحده غيرك كانت كملت دورت على اللى ناقصها و يولع الباقيين مش مهم
ميرا / اللى ناقصني!!
ليلى / احمد بالنسبالك كان الاب اللى حلمتى بيه انتى كنتى عاوزه مكان اسيل مش مامتها ... كنت بتقولى لنفسك الكلام اللى يريحك و منطقى بالنسبه لعقلك ... انتى عمرك ما هتكونى اسيل و لا ينفع تاخدى مكانها بس ممكن تاخدى مكان امها
ميرا/ و بالمره افضل صاحبه اسيل برده اخد كل حاجه و ما اخسرش اى حاجه
ليلى / بس ما حدش بياخد كل حاجه و انتى عملتى الصح لما بعدتى ... هتتعبى شويه دلوقت بس صدقيني انا فخوره بيكي جدا
ميرا/ انتى بتقولى كدا و خلاص
ليلى / ابدا ... اقسم بالله انا عمرى ما اتأكدت ان تعبى فى تربيتك ما راحش هدر قد دلوقت
مبرا / ازاى بعد اللى قولته تقولى كدا دا انا
ليلى/ يا بنتى اماطه الاذى عن الطريق صدقه حتى لو انتى اللى رميتي الاذى ده انك ترجعى نفسك معناها ان ضميرك حى و فطرتك لسه سليمه ... يا بنتى انتى فيكي حاجه ما عادتش موجوده فى ناس كتير اوى ... اه غلطتى و اه عملتى حاجه وحشه بس لحقتى نفسك و ندمانه عليها
ميرا/ عمرها ما هتسامحنى لو عرفت
ليلى / مش هتعرف حاجه و الموضوع هينتهى هنا و لو مش عاوزه تكملى مع اسيل يكون افضل ابعدى و ابدئي من جديد انتى كدا كدا لسه صغيره و الحياه قدامك و ياما هتغلطى و تتعلمى المهم انك تفضلى على فطرتك انك تقاومى نفسك و ما تستمريش فى الغلط
ميرا/ بس انا بحبه
ليلى / لا يا بنتى ما بتحبيهوش ... دا كله وهم ... دا احتياج... انا قدرت اعوضك عن امك بس ما قدرتش اعوضك عن ابوكى ... انا كنت عارفه ان ده هيحصل... بيقولوا الام هى عمود البيت و الاسره بس دا مش حقيقي الاب هو الأساس... الست اه هى اللى فى وش المدفع و قدام الاولاد هى اللى بتعمل ليهم كل حاجه و قدام الناس هى اللى شايله المسؤليه بس فى الحقيقه هو فى ضهرها بيحميها و يوفر ليها كل اللى هى بتحتاجه و يدعمها و يخفف عنها بيطبطب و يداوى و يشقي و يتعب عشان ما يبقاش ناقصهم حاجه فهى بتشتغل و هى مرتاحه و مطمنه فالبيت بيكون هادى و سعيد ... لو هو بقي مش قايم بدوره كويس تلاقيها خربت و كل حاجه ناقصه و بايظه ... اه فى ستات بتقدر تيجي على نفسها و تحاول تعوض النقص ده بس ... بيجي عليها وقت و تقع ... و انا ست كبيره و صحتى على قدى و ما قدرتش اعوضك كفايه وقعت بدرى اوى
ميرا / بعد الشر عنك يا تيته انتى عملتى عشانى
ليلى/ كل اللى اقدر عليه بس مش كل اللى انتى محتاجاه ... انتى مش وحشه يا ميرا انتى اللى ضحيه ... ضحيه امك و ابوكى و انا ... انى فرحت و ما صدقت ... ما سالتش كويس و لا صليت استخاره و لا صبرت ... فرحت لفرحتها و ما حسبتهاش ... غمضت عيني عن كل العلامات و الإشارات و كان كل همى ان المركب تمشي ... و فعلا فضلنا نزق فيها نزق فيها لحد ما غرقت بينا كلنا
ميرا تطبطب على ايد ليلى
ليلى / بس انتى فوقتى قبل فوات الأوان و لحقتى نفسك و انا متاكده انك اتعلمتى حاجه من التجربه دى متاكده انك هتخرى منها احسن و أقوى و امك فهمتي غلطك ... مشاعرك اللى جواكى اللى ما قدرتش تفهميها و تفسريها صح مع الوقت هتكبرى و هتفهمى ... هتصبرى و تستنى و تحسبيها بالعقل هتفكرى قبل ما تاخدى اى قرار او تصرف هتطلعى من التجربه دى كسبانه يا ميرا
ميرا / بس انا تعبانه اوى
ليلى / عشان الحكايه لسه طازه بس انتى قدها و هتعديها و انا جنبك ... و خلينا نتفق من دلوقت اننا نحاول نقرب من بعض اكتر و تتكلمى معايا فى كل حاجه و انا جنبك و هسمعك و هعمل كل اللى اقدر عليه و اكتر كمان
ميرا تحضن ليلى
ليلى / انا هقوم اللبس و ننزل نشوف لينا حته على البحر نقعد ناكل فيها لقمه حلوه و نفكر هنعمل ايه لما نروح ما احنا اكيد مش هنقعد هنا العمر كله
ميرا تهز راسها ليلى تطبطب عليها و تقوم تمشي ميرا تناديها
ميرا/ انا بحبك اوى يا تيته
ليلى / و انا بحبك اكتر يا قلب تيته ... ثوانى و رجعالك
ليلى تدخل و ميرا تبص فى موبايلها و تقلب فى النمر لحد ما تلاقى رقم اسيل تكتب رساله
( صباح الخير يا اسيل انا اسفه جدا على كل التصرفات اللى حصلت منى الفتره اللى فاتت انتى كنتى اجدع صاحبه ليا و احسن واحده عرفتها فى حياتى و اتمنالك كل الخير فى حياتك عشان انتى ما تستهليش غير كل خير و باذن الله الدنيا تجمعنا فى ظروف احسن ) ميرا تبعت الرساله ليلى تطلع لابسه العبايه و بتلف فى الطرحه
ليلى / شوفتى السرعه ... يلا بينا
ميرا / يلا
ليلى و ميرا ينزلوا و يقفلوا الباب وراهم
....................
VOCÊ ESTÁ LENDO
ميرا بقلم /لولو_محمد ( كامله )
Contoقد يدفعنا الحرمان للسعى وراء الحصول على ما هو ليس لنا فهل ستنساق ميرا وراء العاطفه و تدمر كل شئ ام ستستطيع ان تقاوم و تنقذ ما تبقي لها
