ကျုပ်က သီလလာယူကြတဲ့ဥပုဂ်သည်တွေကြားထဲမှာ ဆင်ပေါက်ကိုမျက်စိဝေ့ပြီးလိုက်ရှာကြည့်တော့ ဆင်ပေါက်ကိုမတွေ့သေးဘူးဗျ။ ကြည့်ရတာ ဆင်ပေါက်က ကျုပ်အမ စုစုစံဆီသွားနေတာပဲနေမှာ။ ကျုပ်လည်း ကျောင်းဆောင်ပေါ်ကနေ ချက်ချင်းပြန်ဆင်းတာပေါ့။
" ဟေ့ကောင် အဲ့တာက ဘယ်တုန်း...၊ ဘဘုန်း ကြွလာတော့မှာကွ "
" အမဆီသွားမလို့ပါ... အဘကလည်း "
" အပိုတွေပြောမနေနဲ့.. ဟေ့ကောင်၊ ငါ့သားငယ်ကို မတွေ့လို့ပြန်ဆင်းလာတာမလား.... "
" ဆင်ပေါက်ကို တွေ့ခဲ့တာလား "
အဘပြောတာလည်း မှန်နေတာမို့ ကျုပ်လည်းငြင်းမနေတော့ဘူးလေ။
" ဘာလဲ.. ငါ့သားထက်အရင် အခြားသူတွေက ရှင်မွှေးလေးကို ရေလောင်းမှာစိုးနေတာလား...၊ စိတ်ချပါ ငါ့သားရယ်...၊ မင်းရဲ့ဆင်ပေါက်ကို မင်းထက်အရင် ဒီရွာမှာဘယ်သူမှရေမလောင်းရဲပါဘူး... အမလေး ဖြစ်နေလိုက်တာ "
" ဟာဗျာ.. အမေကလည်း "
ကျုပ်အကြောင်းကို အမေရော၊ အဘရော၊ တစ်ရွာလုံးရော နှောကျေနေပြီလေ။ သင်္ကြန်အကျနေ့မှာ ကျုပ်က ဆင်ပေါက်ကို ပထမဆုံးရေလောင်းရမှကျေနပ်တာဗျ။ အကြိုနေ့မှာ ရွာက ကလေးပေါက်စနလေးတွေကလွဲပြီး ဘယ်သူမှရေမပတ်ကြသေးဘူးလေ။ ဒီနေ့ကျမှ လူကြီး၊ လူငယ်၊ ကလေးကအစ ခွေးအဆုံး တစ်ရွာလုံး ရေကစားကြတာဗျ။ ခုနကစကားလေးကို ပြန်ဆက်ပါအုံးမယ်။ ဟိုအရင်နှစ်တစ်နှစ်က ကျုပ်က ဆင်ပေါက်ကိုရေသွားလောင်းဖို့ သူ့အိမ်ကို အစောကြီးသွားတာဗျာ။ ဆင်ပေါက်က အရီးလေးနဲ့အတူတူ ဥပုဂ်သီလသွားယူတယ်တဲ့လေ။ ကျုပ်လည်း ဆင်ပေါက်ပြန်အလာကို သူ့အိမ်ကနေပဲစောင့်နေလိုက်တယ်။ ဒါပေမဲ့ အဲ့ကောင်ဆင်ပေါက်ပြန်လာတော့ တစ်ကိုယ်လုံးရေတွေရွဲစိုနေတာပဲ။ ကျုပ် တော်တော်ဒေါသထွက်သွားတာ။ အဲ့ကောင်ကို ရေလောင်းလိုက်တဲ့ကလေးတွေကအစ ကျွန်တော့်ထက်ကြီးတဲ့သူတွေအဆုံး ကျုပ်က တစ်အိမ်တက်တစ်အိမ်ဆင်း လိုက်ပြီးပြဿနာရှာတာလေ။ အမေနဲ့အရီးလေးက ကျုပ်ကိုနောက်နေ လိုက်ထိန်းတာ။ အဲ့တုန်းက ကျုပ် တော်တော်ဒေါသထွက်နေမှန်း မြင်ရုံနဲ့သိသာတယ်၊ ဘယ်သူမှ လိုက်ထိန်းတာမရဘူး။ ဆင်ပေါက်ကတော့ ကျုပ်ဒေါသထွက်နေတာမြင်ပြီး ဘာမှလည်းမပြောရဲ၊ ကျုပ်ကိုကြောက်ပြီး ငိုပဲငိုနေတော့တာ။ အဲ့ကောင်ငိုလေ ကျုပ်ဒေါသကပိုဆိုးလေပဲ။ နောက် ကျုပ်ကို ပြောမရထိန်းမရဖြစ်လို့ အဘကိုယ်တိုင်ကြိမ်နဲ့ဆော်မှ ကျုပ်လည်းငြိမ်သွားတာ။ ဆင်ပေါက်ကိုယ်တိုင်ကလည်း နောက်တစ်ခါဆို ကျုပ်အရင် ဘယ်သူမှသူ့ကိုရေမလောင်းခိုင်းတော့ပါဘူးလို့ ကတိပေးတယ်လေ။ အဲ့တော့မှ ကျုပ် စိတ်လျော့လိုက်တာ။ အဲ့အချိန်ကစပြီး သင်္ကြန်ရောက်တိုင်း ဆင်ပေါက်ကို ဒီရွာမှာ ကျုပ်ထက်အရင် ဘယ်သူကမှရေမလောင်းရဲကြတော့ဘူးလေ။
YOU ARE READING
စနေသားရဲ့ ဆင်ပေါက် / စေနသားရဲ့ ဆင္ေပါက္
Randomunicode ကျွန်တော့်ရဲ့ တမူမတူညီတဲ့စာရေးပုံနဲ့ မတူညီတဲ့ဇာတ်အိမ်လေးမို့ ဖတ်ကြည့်ပေးစေချင်တယ်ဗျ zawgyi ကြၽန္ေတာ့္ရဲ့ တမူမတူညီတဲ့စာေရးပံုနဲ႔ မတူညီတဲ့ဇာတ္အိမ္ေလးမို႔ ဖတ္ၾကည့္ေပးေစခ်င္တယ္ဗ်
Episode _ 6
Start from the beginning
